Gwybodaeth am Geredigion
Mae Ceredigion yn un o’r siroedd mwyaf yng Nghymru. Mae ganddi ddiwylliant Cymreig cryf sy’n ehangu, gyda dros 60% o’r boblogaeth yn siarad Cymraeg. Mae ganddi boblogaeth o 71,000, ond cynyddir y ffigwr hwn bob haf gan tua 850,000 o ymwelwyr. Yn ychwanegol at hyn, mae’r sir yn gartref i ddwy brifysgol – un yn Aberystwyth, a’r llall yn Llanbedr Pont Steffan. Mae’r sefydliadau hyn yn darparu ar gyfer oddeutu 10,000 o fyfyrwyr bob blwyddyn.
Mae gan y rhanbarth dair prif ganolfan poblogaeth - Aberystwyth yn y gogledd, Llanbedr Pont Steffan ar yr ochr ddwyreiniol, ac Aberteifi yn y De. Mae gweddill y rhanbarth yn gasgliad o drefi a phentrefi wedi’u gwasgaru ar hyd y prif systemau ffyrdd o fewn y sir, ac ardaloedd gwledig eang â phoblogaeth wasgaredig.
Mae Ceredigion yn ardal ddiogel i fyw, gweithio ac ymweld â hi o’i chymharu ag ardaloedd tebyg o fewn y Deyrnas Unedig. Mae gan y prif asiantaethau sy’n gweithio o fewn y sir ddyletswydd i sicrhau fod hyn yn parhau trwy leihau trosedd ac ofn trosedd, ac maent wedi uno â’r heddlu er mwyn gweithio mewn partneriaeth gyda’i gilydd. Mae hyn wedi arwain at Strategaeth Diogelwch Cymunedol tair blynedd. Rydym wedi ymrwymo i gyflwyno’r strategaeth trwy weithio gyda’n gilydd.
