Cenarth, Castell Newydd Emlyn a Llangeler

Ymunodd yr Arolygydd Steve Lee â Heddlu Dyfed-Powys ym 1996 ar ôl gweithio yn y diwydiant gwasanaethau cyhoeddus am 19 mlynedd. Bu’n gweithio fel PC yn Rhydaman a Chydweli cyn cael ei ddyrchafu’n Sarjant. Yna, bu’n gweithio yn Llanelli, Llambed a Sanclêr cyn cychwyn yn ei swydd gyfredol fel Arolygydd dros Adran Caerfyrddin Wledig. Dywedodd: “Rwy’n byw yn lleol ac mae’r ffaith fy mod yn gyfarwydd â’r gymuned leol wedi fy helpu i adnabod a delio gyda phryderon a phroblemau'r adran hon. Rwy’n disgwyl ymlaen i ehangu’r cysylltiadau sydd eisoes wedi cael eu ffurfio gyda’r cymunedau lleol a’n partner-asiantaethau, gyda’r bwriad o leihau nifer y troseddau a’r achosion o ymddygiad gwrthgymdeithasol, ac i godi proffil fy nhîm plismona bro.”

Ymunodd y Sarjant Simon Wright â Heddlu Dyfed-Powys ym 1987.  Bu’n gwasanaethu fel swyddog mewn iwnifform ym Mhowys, Sir Benfro a Cheredigion yn ogystal â pherfformio rôl Arolygydd Rhanbarthol a rheolwr Uned Datblygiad Proffesiynol Rhanbarth Sir Gaerfyrddin cyn cychwyn fel Sarjant Tîm Plismona Bro ardal Caerfyrddin Wledig.   Mae ganddo Radd BA gydag Anrhydedd mewn Gwyddorau’r Heddlu o Brifysgol Morgannwg.  Mae Sarjant Wright yn awyddus i fynd i’r afael ag ymddygiad gwrthgymdeithasol, cyffuriau a throseddau treisgar a’i nod yw gwella hyder cymunedau ardal Caerfyrddin Wledig yn yr heddlu.

Mae PC Ian Ayers wedi bod yn swyddog heddlu ers 11 mlynedd, ac ar hyn o bryd, ef yw’r swyddog Plismona Bro ar gyfer Cenarth, Castellnewydd Emlyn a Llangeler. Ymunodd â’r tîm ym mis Mehefin 2011 ar ôl iddo fod yn swyddog bît yn yr ardal ers mis Chwefror 2007. Bu hefyd yn gweithio yn Llanelli, Rhydaman a Llwynhendy. Dywedodd, “Rwy’n teimlo bod y gallu i siarad Cymraeg yn fy ngalluogi i gyfathrebu’n well gyda’r cyhoedd yn yr ardal.”

Dechreuodd PCSO Jeff Kedward ei hyfforddiant ym mis Ionawr 2007, a bellach mae wedi’i leoli yng Nghastell Newydd Emlyn. Ar ôl ugain mlynedd yn ffarmwr llaeth, fe ddaeth yn borthor mewn clwb nos yng Nghaerfyrddin, ac yna treuliodd ddeunaw mis fel cwnstabl arbennig cyn dod yn PCSO.

Mae PCSO Luke Taylor yn gweithio yn ardaloedd Castell Newydd Emlyn a Phencader. Fe’i lleolwyd yn Aberystwyth yn wreiddiol, ac mae wedi bod yn ei swydd bresennol ers mis Ebrill 2011. Cyn ymuno â’r heddlu, roedd yn beiriannydd gyda chwmni BT. Mae’n edrych ymlaen at ymdrin â sialensiau plismona bro gwledig a bydd yn ymgysylltu â’r gymuned er mwyn darganfod pa faterion sy’n bwysig i’r bobl leol. Yn ei amser hamdden, mae’n mwynhau cerdded o gwmpas bryniau canolbarth Cymru.