Felinfoel, Dafen a Dyffryn y Swistir

Mae’r Arolygydd James Davies wedi bod yn y gwasanaeth ers ugain mlynedd.  Treuliodd y cyfnod diweddaraf yn Sir Gaerfyrddin - yn Llanelli a Chaerfyrddin ac fel arolygydd plismona bro gyda chyfrifoldeb dros ardal Tywi-Gwendraeth. Mae e hefyd wedi ei hyfforddi’n gomander trefn gyhoeddus yr heddlu. Mae wedi gweithio yn ystafell reoli’r heddlu yn y Pencadlys yn Llangynnwr ac mae hefyd wedi gwasanaethu ym Mhowys a gyda Heddlu Metropolitan Llundain, lle bu’n gweithio am 8 mlynedd gyntaf ei yrfa gyda’r heddlu, gan weithio’n bennaf yng Ngorllewin a De Llundain.

Ymunodd y Sarjant Eddie Donnelly â Heddlu Dyfed-Powys ym 1983.  Aeth i weithio yn gyntaf i Lanelli lle bu’n Gwnstabl ac yna’n Dditectif Gwnstabl  cyn cael ei ddyrchafu’n Sarjant yng Nghaerfyrddin ym 1989. Ers hynny, bu’n gweithio yn Cross Hands, Porth Tywyn, Llanelli a Rhydaman. Aeth i Felinfoel yn 2006 ac yna fe’i gwnaed yn gyfrifol am Lwynhendy and Felinfoel. Ar ddiwedd mis Mai 2010 gofynnwyd iddo fod yn gyfrifol dros Blismona Bro yn Llwynhendy a Felinfoel. Mae Sarjant Donnelly sy’n byw yn lleol yn ŵr priod ac mae ganddo ddau fab.

Ymunodd PC Steve Kettle â Heddlu Dyfed-Powys yn 2006.  Cyn hynny, bu’n gwasanaethu gyda Heddlu Llundain ym mwrdeistref Hounslow, ond cychwynnodd ei yrfa fel heddwas gyda heddlu Manceinion Fawr yn ardal Moss Side. Cyn ymuno a’r heddlu bu Steve yn gweithio i’r Asiantaeth Fudd-daliadau ac roedd hefyd yn hyfforddwr  sgwba-blymio bryd hynny.  Mae Steve wedi treulio’r rhan fwyaf o’i amser yn y gwasanaeth yn gweithio ar dimau ymateb, ond pan oedd yn Llundain bu’n gweithio mewn unedau trosedd ac fel swyddog CID yn taclo troseddau ar y stryd, cyffuriau a byrgleriaeth.  Lleolwyd Steve yn nhref Llanelli i ddechrau, ond yn gynnar yn 2007 aeth i Felinfoel. Mae’n dweud, “Ar ôl gweithio fel swyddog ymateb yn yr ardal yn ystod y blynyddoedd diwethaf, rwy’n ymwybodol o’r materion a’r problemau sy’n effeithio ar y gymuned.  I mi, dyma beth yw plismona - siarad â phobl yn y gymuned a gweithio gyda nhw a phartner-asiantaethau i wneud y gymuned y lle gwell a mwy diogel i fyw ynddo.”

Ymunodd PCSO Gary Payne â Heddlu Dyfed-Powys ym 1985 a chael ei leoli yn Llanelli. Ymhen nifer o flynyddoedd daeth yn aelod o CID yn Llanelli ac arhosodd yn yr adran honno hyd nes iddo gael ei ddyrchafu’n sarjant mewn lifrau, ac yna bu’n gweithio yn ardaloedd Caerfyrddin, Llanelli a Rhydaman mewn nifer o rolau gweithrediadol. Ymddeolodd o’r Heddlu ym mis Mawrth 2010 ac ailymuno fel PCSO gan ei fod yn mwynhau cerdded a siarad â phobl yn y gymuned. Mae’n gefnogwr rygbi brwd ac yn cefnogi Dreigiau Casnewydd Gwent gan ei fod yn wreiddiol o Gasnewydd.

Ymunodd Cwnstabl Gwirfoddol Catrin Rees â Heddlu Dyfed-Powys ym mis Mai 2006 gan ddechrau gweithio yn nhref Llanelli lle roedd yn cydweithio gyda swyddogion arferol ac yn eu cynorthwyo gyda’u hymholiadau troseddol a dyletswyddau eraill. Yn Ebrill 2008, symudodd Catrin i Orsaf Heddlu Felin-foel lle ymunodd â Thîm Plismona Bro Felin-foel. Yn ei swydd amser llawn mae Catrin hefyd yn gweithio yn un o adrannau Heddlu Dyfed-Powys fel swyddog gweinyddol. Meddai, “Ers ymuno â’r Tîm Plismona Bro rydw i wedi mwynhau bod yn rhan o amrywiaeth eang o fentrau cymunedol fel y Disgo Golau Glas, marcio eiddo, diwrnodau atal trosedd, diwrnodau recriwtio Cwnstabliaid Gwirfoddol, carnifalau a chynnau goleuadau’r Nadolig. Rydw i hefyd yn mwynhau datrys problemau lleol sy’n effeithio fwyaf ar y gymuned.”