Mae Heddlu Sir Gaerfyrddin Wedi Gweld Cynnydd yn Nifer y Sgamiau Sy’n Cael Eu Riportio

Mae Heddlu Sir Gaerfyrddin wedi gweld cynnydd yn nifer y sgamiau sy’n cael eu riportio. Yn ffodus, mae’r rhai hynny sy’n riportio’r sgam yn sylweddoli mai sgam ydyw ac yn rhoi gwybod i’w heddlu lleol ac nid ydynt wedi dioddef o’i herwydd.

Mae Heddlu Sir Gaerfyrddin wedi’u hymrwymo i leihau effeithiau pob math o dwyll. Mae nifer o’r sgamiau a restrir isod yn cael eu gweithredu gan dwyllwyr o’r tu allan i’r Deyrnas Unedig ac ni allwn gwblhau ymchwiliad ystyrlon oherwydd materion awdurdodaeth. Ein blaenoriaethau ni felly yw atal ac amharu ar y sgamiau.

Os ydych yn derbyn llythyr yna gwnewch beth fyddech yn ei wneud gydag unrhyw bost sothach, sef ei daflu yn y bin ar ôl ei rwygo’n fân.
Os ydych yn derbyn e-bost peidiwch ag ateb. Anfonwch y neges ymlaen at wasanaeth camddefnydd darparwr y Gwasanaeth Rhyngrwyd a oedd yn gyfrifol am anfon y neges. Gweithredwch eich rhwystrydd spam yn erbyn y cyfeiriad e-bost a anfonodd y neges ac yna dilëwch y neges.
Os cysylltir â chi dros y ffôn peidiwch â rhoi unrhyw wybodaeth a rhowch y ffôn i lawr.

Yn aml mae gan sgamiau nodweddion tebyg a all eich rhybuddio eu bod o bosibl yn dwyllodrus:

os yw’n swnio’n rhy dda i fod yn wir yna y mae mwy na thebyg yn rhy dda i fod yn wir;
gofynnir i chi newid arian ymlaen llaw i dalu am ffioedd annisgwyl (fel trethi neu daliadau) cyn i’ch ‘gwobr’, ‘enillion’ neu ‘elw’ gael ei ryddhau;
gofynnir i chi roi manylion eich cyfrif banc, cardiau credyd neu unrhyw wybodaeth bersonol sensitif;
rhoddir pwysau arnoch i ateb yn syth “neu bydd yr arian yn cael ei roi i rywun arall”; ac
gofynnir i chi gadw’r manylion yn gyfrinachol.

Cofiwch nad ydych chi wedi cael eich targedu’n bersonol. Anfonir miloedd o lythyrau sgam, negeseuon e-bost, galwadau ffôn a negeseuon ffacs i unigolion a chwmnïau ar draws y byd bob dydd.

Os ydych chi wedi dioddef twyll ac yn byw yn Sir Gaerfyrddin dylech gysylltu â Chanolfan Gyfathrebu Heddlu Dyfed-Powys drwy ffonio 101.