Seremoni Wobrwyo Comander Rhanbarthol Powys

Cynhaliwyd pedwaredd Seremoni Wobrwyo Comander Rhanbarthol Powys ym Maes Sioe Frenhinol Cymru ar yr 28ain o fis Ionawr - ac eleni eto roedd yn achlysur i’w gofio!

Yn ogystal â Heddweision, staff a theulu a ffrindiau’r enillwyr, daeth nifer o bobl bwysig ac adnabyddus y sir i’r digwyddiad. Roedd y rheiny’n cynnwys Arglwydd Raglaw Powys Shân Legge-Bourke, Uchel Siryf Powys David Lloyd a’i wraig Sophia, a Phrif Weithredwr Cyngor Sir Powys Jeremy Patterson, yn ogystal â Meiri Llandrindod (Patricia Hill), Y Drenewydd (Joy Jones) a’r Trallwng (Annie Holloway).

Fel arfer, roedd Heddweision, PCSOs a Chwnstabliaid Gwirfoddol yn derbyn gwobrau ond eleni am y tro cyntaf gwahoddwyd y cyhoedd i gymryd rhan yn yr enwebiadau. A diolch i’w hymdrechion, enwebwyd nifer o Swyddogion am eu gwaith caled a’u proffesiynoldeb.

Meddai’r Comander Rhanbarthol, y Prif Uwch-arolygydd Steve Hughson: “Mae’r achlysur hwn yn arwydd o wir ymroddiad swyddogion sydd wedi gwneud cyfraniad arbennig i sicrhau bod aelodau o’n cymunedau amrywiol yn cadw’n ddiogel. Mae gennyf wir reswm i ymfalchïo yn llwyddiant pob un o’m staff a byddaf yn parhau i wobrwyo a chydnabod eu cyfraniad, yn enwedig y rheiny sydd wedi gwneud gwaith arbennig o dda.

“Hoffwn hefyd ddiolch i bobl am gymryd yr amser i gysylltu â’r gwasanaeth er mwyn enwebu eu Heddwas y Flwyddyn ar gyfer y Wobr Gymunedol. Hoffwn hefyd gydnabod aelodau o’n cymuned sy’n cefnogi a chynorthwyo Rhanbarth Powys i ddarparu gwasanaeth plismona. Byddaf i, ynghyd â’m staff a’n partneriaid, yn dal ati i chwilio am ffyrdd o ddarparu gwell gwasanaeth er mwyn sicrhau bod Powys yn parhau i fod yn ardal ddiogel i fyw, gweithio ac ymweld â hi.

“Rwyf am i bobl Powys deimlo’n hyderus ynghylch eu Gwasanaeth Plismona ac yn hollol fodlon â’r hyn a wnawn. Mae’r gwobrau hyn yn arwydd o’n hymroddiad ac yn gyfle i ni ddangos ein bod yn gweithio dan amgylchiadau heriol er mwyn gwireddu’r addewid hwnnw.”

Yn dilyn y cyflwyniad agoriadol, bu Shân Legge-Bourke yn annerch y gynulleidfa a phwysleisiodd ei balchder o gael bod ymhlith cwmni mor arbennig. Mynegodd ganmoliaeth hefyd am ymdrechion yr Heddlu wrth barhau i gadw ein cymunedau yn ddiogel.

Ar ôl cyflawni’r defodau ffurfiol, cafodd yr enillwyr a’r gwesteion gyfle i gymysgu gyda Heddweision a Thîm Uwch Reolwyr Powys a sgwrsio am amryw o faterion, o’r enillwyr i blismona yn eu hardal hwy.

Cafodd y rhai oedd yn bresennol hefyd gyfle i siarad â Thîm Achub Mynydd y Sir a’r Tîm Plismona Bro, oedd wedi gosod stondinau i arddangos y gwaith ardderchog a wneir ganddynt i sicrhau fod gan Bowys un o’r graddfeydd troseddu isaf ar draws Cymru a Lloegr.

Yr enillwyr:

Gwobr Arweinyddiaeth: Arolygydd Diane Davies: Am feithrin balchder yn yr adran ac annog gwaith tîm effeithiol, sydd wedi arwain at ganlyniadau ardderchog o ran atal a datrys troseddau.
Gwobr Blaengaredd: Cynllun Bugeiliaid Stryd, Y Drenewydd: Am ymrwymiad ac ymroddiad y 12 gwirfoddolwr i helpu i gadw Powys yn ddiogel.
Gwobr Bartneriaeth: Tîm Achub a Chwilio Gogledd Ddwyrain Cymru,Tîm Achub Mynydd Aberhonddu a Thîm Achub Mynydd Longtown: Am eu sgiliau a’u cymorth amhrisiadwy wrth ddarganfod ac achub pobl sydd ar goll.
Gwobr Ymchwilio: DC Noel Blakeman: Am ei waith mewn achos o wenwyno angheuol yn ymwneud â charbon monocsid, oedd yn cynnwys cysylltu ag amryw o asiantaethau megis yr Awdurdod Gweithredol Iechyd a Diogelwch a thystion arbenigol.
Gwobr Weithrediadol: PS Jonathan Rees, PC Jenna Darby, PC Rob Gallier: Am ymchwilio i achos o anhrefn cyhoeddus treisgar a difrifol yn Llanidloes
Gweithredu y Tu Hwnt i Ofynion y Swydd: PS Nigel Brace, PC Fraser Scott, PC Dai Morgan, PC Wayne Ballard: Am eu dewrder wrth achub pobl o dân mewn tŷ.
DC Darren Abraham, DC Lynsey Bowen: Am eu dewrder wrth achub pobl o dân mewn tŷ.
Gwobr Tîm: Tîm Gweinyddu/Cyllid Powys: Am gyflwyno gwelliannau mawr o ran y cyfleusterau mewn gorsafoedd ar draws y Rhanbarth.
WAAT 4 – Prif Arolygydd Norman Welch a Gary Philpott: Am ymdrechion nodedig eu tîm yn codi £ 21,513.82 yn ystod Her WAAT 4
Gwobr Staff yr Heddlu: Allan Jones a Ray Morgan: Am eu hymroddiad i’w dyletswyddau beunyddiol a’u gwybodaeth leol eang sy’n werthfawr adeg digwyddiadau mawr.
Disgybl-Gwnstabl y Flwyddyn: PC 167 Amy Davies: Am ei chyfradd arestio a rhagweithgarwch ynghyd â’i hymroddiad a’i brwdfrydedd.
Gwobr Gymunedol: PC Mike Clark: am ei broffesiynoldeb a’i ddiwydrwydd wrth ddelio ag ymchwiliad.

Os hoffech gysylltu â’ch Tîm Plismona Bro i drafod materion yn eich ardal chi, ffoniwch 101