Gwarchod Eich Gardd

Mae’n wanwyn felly mae Heddlu Dyfed-Powys wedi lansio menter plannu amddiffynnol i gadw eich gardd yn ddiogel!

Rydyn ni bob amser yn cael ein hatgoffa ynghylch sut i gadw ein heiddo’n ddiogel, ond mae Heddlu Dyfed-Powys yn tynnu sylw at ddull nad yw’n cynnwys clo, larwm na golau diogelwch – dim ond planhigion!

Plannu amddiffynnol yw dull natur o helpu i leihau trosedd. Fydd lladron ddim yn dymuno dringo trwy blanhigion a chloddiau pigog - yn enwedig gan y gallai’r diferyn lleiaf o waed neu ddarn bach o ddilledyn wedi ei rwygo helpu’r heddlu i’w hadnabod.

Felly beth allwch chi ei wneud i gadw eich gardd yn ddiogel? “Mae amrywiaeth o ffyrdd i drechu trosedd yn yr ardd drwy ddilyn y llwybr ecogyfeillgar,” meddai Prif Uwch-arolygydd Powys, Steve Hughson.

“Mae lladron proffesiynol yn llawn ymwybodol y gall eiddo drud a deniadol gael eu cadw mewn gerddi, megis offer garddio fel peiriannau torri lawnt a pheiriannau torri cloddiau.

Ceir hefyd llawer iawn o olew gwresogi mewn gerddi, ac y mae angen diogelu hwn.”

Mae Heddlu Dyfed-Powys yn tynnu sylw at fanteision plannu amddiffynnol. Gall llwyni pigog fod yn ddull effeithiol ac addurniadol o atal lladron, os cânt eu plannu o amgylch eich tanc olew, er enghraifft.

Ychwanega’r Prif Uwch-arolygydd Steve Hughson: “Dylai aelodau’r gymuned wybod fod y math hwn o drosedd yn anghyffredin iawn. Fodd bynnag, rhaid i bawb fod yn wyliadwrus wrth ddiogelu eu heiddo a riportio gweithgarwch amheus yn eu hardal. Er mwyn cefnogi hyn mae Timau Plismona Bro yn weladwy ar draws y sir ac maent ar gael i breswylwyr gysylltu â nhw ac i roi cyngor atal trosedd a chefnogaeth i breswylwyr lle bod angen.”

Mae’r cynllunydd garddio a’r ddarlledwraig enwog Lynne Allbutt hefyd yn cefnogi’r fenter. Meddai: “Rydw i’n fwy cyfarwydd â chynghori pobl ynghylch plâu mwy traddodiadol yn yr ardd. Mae’n drueni bod y math â dwy goes hefyd yn mynd i erddi’n ddiwahoddiad.

“Gwell atal na gwella, ac rydw i eisiau i bobl gymryd cyfrifoldeb am ddiogelwch eu gerddi drwy ddulliau syml fel peidio â chadw offer garddio drud mewn tai gwydr. Ar yr adeg hon o’r flwyddyn efallai y bydd pobl yn prynu peiriant torri lawnt neu glawdd newydd, felly mae’n bwysig eu bod yn ofalus i beidio â gadael bocsys gwag y nwyddau newydd hyn y tu allan i’w tai – gan y gall hwn fod yn wahoddiad i ladron.”

Mae Lynne hefyd yn pwysleisio bod agweddau eraill yn ogystal â ‘phlannu amddiffynnol’ i gadw eich gardd yn ddiogel, ac mae’r rhain yn cynnwys:

Trwsio pob panel ffens sydd wedi torri a llenwi bylchau yn eich ffiniau. Mae tyllau mewn ffensys neu gloddiau fel arwyddion ‘croeso’ i leidr.
Ystyriwch yn ofalus ble rydych yn gosod delltwaith. Yn y man anghywir gall y dellt fod fel ysgol, yn rhoi mynediad rhwydd i leidr. Gall ddelltwaith sydd wedi ei osod wrth wal tŷ, er enghraifft, roi mynediad i ffenestr ystafell wely.
Yn lle gosod sied o’r golwg yn eich gardd, ailystyriwch gynllun eich gardd a gwnewch eich sied yn nodwedd neu’n ganolbwynt. Peintiwch hi’r un lliw â ffens gyfagos ac i weddu i feinciau a gwaith pren arall er mwyn creu effaith.
Dewiswch adeilad sydd â rhan sy’n sied a rhan sy’n dŷ haf, neu gosodwch pergola wrth ochr sied syml er mwyn ei gwneud yn fwy deniadol.
Peidiwch â chadw offer a phethau gwerthfawr mewn hen dŷ gwydr, lle maent yn y golwg; os ydych angen lle i gadw pethau cewch wared y tŷ gwydr a phrynwch sied.

Er mwyn sicrhau eich bod yn cael y gorau o’ch plannu:

Defnyddiwch lwyni pigog fel Berberis Julianae neu Ilex
Defnyddiwch lwyni isel lle bod angen fel na fyddwch yn rhwystro eich gallu i gadw gwyliadwriaeth
Gall nodweddion dŵr hefyd fod yn rhan o ffin amddiffynnol.
Gosodwch raean fel y byddwch yn gallu clywed pobl neu gerbydau’n nesáu.

Cynghorir preswylwyr sydd ag olew gwresogi mewn tanciau i:

Fod yn ymwybodol o lefelau’r olew a gwirio hynny’n aml. Os yn bosibl cadwch eich lefelau’n isel, gan gynnwys wrth ail-lenwi.
Siaradwch â’ch cyflenwr ynghylch cael cyflenwadau amlach ond llai.
Os oes gennych danc plastig, ystyriwch godi ffens o’i amgylch gydag un pen colfachog ac wedi ei gloi ar gyfer llenwi.
Os oes gennych danc dur, gosodwch glo clap gefyn o ansawdd ac na ellir ei dorri.
Os oes gennych oleuadau diogelwch y tu allan, sicrhewch fod y system yn gweithio a bod y synwyryddion wedi eu gosod yn gywir er mwyn adnabod symudiad.