Mae’n ‘20’ am reswm!

Using the speed camera in Penrhos

Bu plant Ysgol Gynradd Penrhos, Ystradgynlais, yn cymryd rhan mewn
menter lleihau cyflymder fel rhan o ymdrech gydweithredol rhwng Heddlu
Dyfed-Powys a Chyngor Sir Powys. 

Rhoddodd PC Craig Morgan, PCSO Dan Garnell a PCSO Zara Simisker
wers i ddisgyblion blwyddyn chwech
ynghylch peryglon goryrru – i yrwyr a cherddwyr fel ei gilydd.

Yna dechreuodd yr hwyl wrth iddynt gael eu gwahodd i gymryd rhan mewn
arddangosiad rhyngweithiol yn ymwneud â phellteroedd stopio. Aed a’r plant i’r
clos chwarae a gofynnwyd iddynt osod côn i ddynodi beth yn eu barn hwy oedd y
pellter stopio ar gyfer cerbyd sy’n teithio 30 milltir yr awr ac yna 20 milltir
yr awr.

Cawsant eu rhannu’n grwpiau, ac roedd y disgyblion a ddyfalodd y pellter
i gyd yn anghywir. Credant fod y pellter stopio ar gyfer cerbyd sy’n teithio 30mya
yn llai na 23 medr, sef y pellter cywir, ac sy’n ddigon i achosi damwain
angheuol. Yna, pan ofynnwyd iddynt ddyfalu pellter stopio cerbyd sy’n teithio
ar gyflymder o 20mya, roedd y rhan fwyaf ohonynt yn credu ei fod yn fwy na 12
metr, sef y pellter cywir, gan ddangos yn glir arwyddocâd y cyfyngiad cyflymder
hwn ger ysgolion. 

Ar ôl y gêm hon aed â’r disgyblion y tu allan i gât yr ysgol a chafodd
pob un yn ei dro gyfle i ddefnyddio’r Gwn Cyflymder i fesur a oedd modurwyr yn
cadw at y cyfyngiad cyflymder o 20 milltir yr awr.

Dywedodd PCSO Dan Garnell, “Wrth lwc, nifer bychan iawn a gafodd eu dal
yn torri’r cyfyngiad cyflymder, felly nid oedd rhaid i’r disgyblion cael gair
bach tawel yng nghlust llawer o yrwyr! Roedd môr o siacedi melyn i’w gweld, a
allai fod wedi dylanwadu ar fodurwyr. Dangosai hyn fod amlygrwydd yn ffordd
effeithiol o arafu gyrwyr.”

Ar ôl yr ymarfer hwnnw, rhoddwyd taflenni i’r plant wrth ‘Cymunedau’n
Gyntaf’. Gofynnwyd iddynt fynd adref â’r taflenni a thrafod yr hyn a wnaethant
gyda’u rhieni er mwyn sicrhau fod y neges yn cael ei throsglwyddo.

Ychwanegodd Nichola Davies, Swyddog Diogelwch y Ffyrdd Cyngor Sir Powys,
“Roedd y gweithdy’n llwyddiannus dros ben, ac roedd y plant yn meddwl ac yn
dysgu am y peryglon sy’n gysylltiedig â goryrru. Rwy’n ffyddiog y byddant yn
llysgenhadon brwdfrydig yn y dyfodol, ac y gwnânt godi ymwybyddiaeth y cyhoedd
ynghylch Wythnos Genedlaethol Ymwybyddiaeth Cyflymder.”