Heddlu’n ymchwilio i achos o dyfu canabis ym Mhorth Tywyn

Mae’r heddlu wedi cychwyn ymchwiliad ar ôl darganfod ffatri ganabis mewn eiddo wedi’i rhentu yn Nheras Springfield, Porth Tywyn.

Aeth swyddogion i’r tŷ ar ôl i landlord cyfagos eu ffonio i gwyno ynghylch gorlif yn yr eiddo.

Wrth chwilio’r tŷ, daethpwyd o hyd i 400 o blanhigion canabis.  

“Mae ymchwiliadau’n parhau ar hyn o bryd i geisio dod o hyd i’r un sydd wedi bod yn rhentu’r eiddo hwn,” meddai’r Ditectif Arolygydd Gary Phillips. “Ond mae’n werth atgoffa landlordiaid i wirio pwy yw’r bobl y maent yn rhentu eu heiddo iddynt.

“Gall tyfu canabis achosi difrod i adeiledd a thrydanwaith adeiladau. Mae maint yr ymyrraeth yn creu risg sylweddol o dân, felly mae’n werth i landlordiaid dalu sylw i ychydig o ganllawiau syml.

“Gall ffatrïoedd canabis cael eu gosod am dymor byr neu am dymor hir, a chyn hir, bydd yr hyn sy’n edrych fel teulu bach yn newid i fod yn unigolyn sy’n byw ar ben ei hun. 

“Bydd diffyg trefn, felly ni fydd plant na phobl sy’n gweithio, ac ni fydd amserau penodol lle y mae pobl yn mynd a dod. Yn hytrach, fel arfer, bydd dyn ar ei ben ei hun a fydd braidd byth yn gadael yr eiddo.  

“Efallai y bydd synau trydanol rheolaidd, megis moduron tawel neu eneradur bychan, yn dod o’r cyfeiriad, ac efallai y sylwch ar wahanol arogleuon yn dod o’r ardal o gwmpas yr eiddo.

“Bydd y rhan fwyaf o lenni yn yr eiddo ar gau o hyd, ac efallai y bydd rhai ffenestri ar agor yn gyson, hyd yn oed mewn tywydd oer.

“Peth arall i fod yn wyliadwrus yn ei gylch yw taliadau rhent rheolaidd mewn arian parod.

“Os oes gennych amheuon, cysylltwch â’r heddlu ar 101.”