Cwestiynau cyffredin Cwnstabliaid Gwirfoddol
A wyf yn gymwys?
Ceir manylion am ein meini prawf cymhwysedd yn llawn yn yr adran 'Ydw i'n gymwys?'. Fodd bynnag, os oes gennych unrhyw gwestiynau nad ydym wedi’u hateb, mae croeso i chi gysylltu â ni’n uniongyrchol.
Ydw i’n rhy hen i fod yn Gwnstabl Gwirfoddol?
Nid oes cyfyngiad uchafswm oed (18 yw’r isafswm oed) cyn belled â’ch bod chi’n gorfforol ffit ac abl er mwyn llwyddo mewn prawf meddygol a phrawf ffitrwydd. Cewch ragor o wybodaeth am hyn ar ein tudalen ‘Ydw i’n Gymwys?’.
Rwy’n gweithio i Heddlu Dyfed-Powys fel aelod staff. A gaf i wneud cais i fod yn Gwnstabl Gwirfoddol?
Yr ydych yn gymwys i wneud cais i fod yn Gwnstabl Gwirfoddol oni bai eich bod yn SCCH neu rôl Staff Heddlu arall lle byddai potensial ar gyfer gwrthdaro o ran dyletswyddau. Wrth wneud cais ar gyfer y swydd, mae’n rhaid ichi ddweud wrth eich rheolwr llinell.
Beth yw’r broses recriwtio?
- Proses ymgeisio ar-lein sy'n cynnwys nifer o brofion ar-lein a ffurflen gais. Rhaid cwblhau pob prawf yn llwyddiannus cyn y cewch gwblhau’r ffurflen gais.
- Cyfweliad yr Heddlu
- Prawf ffitrwydd, prawf biometrig a phrawf cyffuriau.
- Prawf meddygol a phroses fetio.
- Geirdaon gan Gyflogwyr
Am ragor o wybodaeth, gweler yr adran 'Y Broses Recriwtio' ar ein gwefan.
Noder fod pob cais yn wahanol. Gan hynny, gall gymryd 4-6 mis i gwblhau’r broses recriwtio.
Mae gennyf anabledd. A gaf i dal wneud cais?
Mae Heddlu Dyfed-Powys yn croesawu ceisiadau gan bobl ag anableddau.
Os ydych chi’n ystyried bod gennych anabledd, rhowch wybod inni am y math o addasiadau a allai fod angen arnoch i’ch cynorthwyo i gymryd rhan yn y broses recriwtio a dethol. Bydd Heddlu Dyfed-Powys yn ceisio gwneud yr addasiadau rhesymol sydd angen lle bo modd.
A gaf i ymuno os oes gennyf gofnod troseddol?
Efallai y cewch dal ymuno â’r gwasanaeth heddlu os oes gennych rybuddion/euogfarnau mân, ond mae rhai troseddau ac amodau a fydd yn eich gwneud yn anghymwys.
A gaf i ymuno os oes gennyf datŵau?
Nid yw tatŵau yn eich atal rhag cael eich penodi. Fodd bynnag, mae’n bosibl y gall rhai tatŵs beri tramgwydd i’r cyhoedd neu gydweithwyr, neu ddwyn anfri ar Wasanaeth yr Heddlu. Am wybodaeth lawn, cyfeiriwch at yr adran ‘Ydw i’n Gymwys?’.
Mae clefyd y siwgr arnaf. A gaf i dal ymuno?
Cewch, cyn belled â bod eich salwch dan reolaeth. Bydd angen i’ch meddyg ddarparu adroddiad meddygol er mwyn cadarnhau hyn.
A oes modd dod yn Gwnstabl Gwirfoddol os ydych chi’n gwisgo sbectol neu lensys cyffwrdd?
Os fyddwch chi’n llwyddo i gyrraedd cam archwiliad meddygol y broses recriwtio, bydd angen ichi gael prawf llygaid. Rhaid bod gan recriwtiaid newydd olwg 6/12 o leiaf yn eu llygad dde neu chwith, neu olwg 6/6 o leiaf yn y ddwy lygad. Rhaid bod gan bobl sy’n gwisgo sbectol neu lensys cyffwrdd olwg 6/36 o leiaf yn y ddwy lygad heb wisgo sbectol neu lensys cyffwrdd.
A fydd fy statws ariannol yn effeithio ar fy nghais?
Bydd statws ariannol ymgeiswyr yn cael ei wirio. Cynhelir y gwiriadau hyn gan fod mynediad gan swyddogion/staff heddlu at wybodaeth freintiedig a allai eu gwneud yn agored i lygredigaeth.
Gwrthodir ymgeiswyr â dyfarniadau Llys Sirol heb eu talu neu sydd wedi’u cofrestru’n fethdalwyr gyda dyledion sydd heb eu talu.
A oes cyfyngiad o ran taldra?
Na, does dim uchafswm nac isafswm taldra.
Beth sydd yn y profion ymgeisio ar-lein?
Mae dau brawf y mae’n rhaid i bawb sy’n gwneud cais i fod yn Gwnstabl Gwirfoddol gwblhau, sef prawf Crebwyll mewn Sefyllfa a Holiadur Arddull Ymddygiadol. Mae’n rhaid i chi lwyddo yn y ddau brawf hyn er mwyn parhau i’r broses gais.
Os fyddwch chi’n cwblhau’r profion uchod yn llwyddiannus ond yn methu mewn rhan o’r broses recriwtio, ni fydd rhaid ichi sefyll y profion hyn eto os fyddwch chi eisiau gwneud cais arall ar ôl 6 mis.
A allaf benderfynu tynnu’n ôl o’r broses recriwtio ar unrhyw adeg?
Yn syml, gallwch. Mae plismona yn rôl gyffrous a heriol, ond nid yw at ddant pawb. Fodd bynnag, gofynnwn i holl ddarpar swyddogion yr heddlu ystyried yr heriau hyn a’u haddasrwydd yn llawn cyn cyflwyno eu cais.
Os byddaf yn methu ar unrhyw adeg o’r broses recriwtio, a allaf ailsefyll?
Os byddwch yn methu ar unrhyw adeg o’r broses, bydd yr heddlu yn rhoi gwybod i chi. Mewn achosion lle na fydd yn bosibl i chi ailsefyll, gallwch wneud cais arall o fewn chwe mis i gael gwybod.
Beth yw’r Heddlu Gwirfoddol?
Gwasanaeth heddlu gwirfoddol y DU yw’r Heddlu Gwirfoddol, ac mae Cwnstabliaid Gwirfoddol yn patrolio eu hardaloedd lleol gyda phwerau heddlu llawn. Mae Cwnstabliaid Gwirfoddol yn chwarae rôl hollbwysig o ran diogelu ein cymunedau a rhoi rhywbeth yn ôl i’r gymdeithas wrth ennill sgiliau ychwanegol.
Byddwch chi’n gwisgo’r un lifrai â Swyddog Heddlu cyflogedig, ond bydd ‘CG’ (Cwnstabl Gwirfoddol) ar yr ysgwyddarnau.
Faint o amser sydd angen imi wirfoddoli?
16 awr y mis o leiaf.
Does dim terfyn ar nifer yr oriau y medrwch roi. Mae’r rhan fwyaf o’n swyddogion gwirfoddol yn gwirfoddoli o gwmpas eu prif swydd.
A gaf i ddewis yr orsaf rwy’n gweithio ohoni?
Bydd eich llythyr cynnig diamod yn dweud wrthych ba orsaf fyddwch chi’n gweithio ohoni. Os oes gennych hoffter, cewch ddweud wrth y tîm recriwtio, ond mae hyn yn dibynnu ar gapasiti’r tîm plismona yr ydych wedi gofyn am gael ymuno ag ef.
A fyddaf yn rhan o Weithrediadau a digwyddiadau?
Byddwch. Fel Cwnstabl Gwirfoddol, rydych chi’n adnodd pwysig. Gan hynny, byddwch chi’n cael eich defnyddio mewn sawl ffordd, a allai gynnwys cymryd rhan mewn gweithrediadau lleol a mentrau’r heddlu.
Pa hyfforddiant a ddarperir?
Ein tîm Dysgu a Datblygu fydd yn darparu’r holl hyfforddiant. Yr ydym yn cynnig amserlen cyffroes o gyrsiau/cyflwyniadau a fydd yn eich paratoi ar gyfer eich sifft gyntaf fel Cwnstabl Gwirfoddol gyda Heddlu Dyfed-Powys. Mae hyfforddiant cychwynnol yn cymryd tua 6 mis, gydag dau penwythnos o hyfforddiant bob mis ym Mhencadlys yr Heddlu, Caerfyrddin, wedi’i gefnogi gan sesiynau a gyflwynir ar-lein a llyfrau gwaith hunan-astudio. Er mwyn ymuno â’r sesiynau ar-lein a chwblhau’r dysgu hunan-astudio, bydd angen mynediad arnoch i gyfrifiadur neu ddyfais sydd wedi’i chysylltu â’r rhyngrwyd. Disgwylir i rywfaint o ddysgu gael ei wneud o bell yn eich amser eich hun. Wrth hyfforddi yn y pencadlys, gellir cynnig llety i’r myfyrwyr hynny sy’n byw dros 30 milltir i ffwrdd.
Rhaid eich bod yn rhydd i fynd i’r penwythnosau hyfforddi o 2y.h. ddydd Gwener tan 5y.h. ddydd Sul.
Unwaith y bydd yr hyfforddiant cychwynnol wedi’i gwblhau, byddwch yn patrolio gyda swyddogion profiadol wrth ichi ddechrau’r cam ‘Patrôl Gyda Chwmni’ i’ch datblygu fel swyddog.
Faint gaf i fy nhalu?
Swyddogion heddlu gwirfoddol yw Cwnstabliaid Gwirfoddol. Er na fyddwch chi’n cael eich talu, bydd eich hyfforddiant a’ch dyletswyddau’n rhoi profiadau unigryw i chi, sgiliau newydd a gwerthfawr, ac ymdeimlad o gyflawniad wrth ichi wneud rhywbeth gwerth chweil dros eich cymuned. Yr ydym yn talu treuliau, felly ni fyddwch ar eich colled yn ariannol am roi eich amser i Heddlu Dyfed-Powys.
A fydd rhaid imi fynd i’r llys?
Os fyddwch chi’n gwneud arést fel Cwnstabl Gwirfoddol ac mae’r achos yn mynd i’r llys, efallai bydd angen ichi fynd i’r llys fel tyst neu er mwyn rhoi tystiolaeth.
A fyddwn wedi cael fy yswirio pe bawn i’n cael fy anafu ar ddyletswydd?
Byddech. Fe fyddech yn dod o dan yswiriant Heddlu Dyfed-Powys pe baech chi’n cael eich anafu ar ddyletswydd fel swyddog heddlu gwirfoddol.
A fydd bod yn Gwnstabl Gwirfoddol yn fy helpu i ddod yn Swyddog Heddlu?
Bydd bod yn Gwnstabl Gwirfoddol yn eich galluogi i brofi pob agwedd o waith yr heddlu ac ennill cyfoeth o wybodaeth broffesiynol. Mae cyfleoedd ar gyfer dyrchafiad o fewn yr Heddlu Gwirfoddol drwy ei strwythur rheng ei hun. Fodd bynnag, ni fydd gwasanaethu fel Swyddog Gwirfoddol yn sicrhau y cewch eich cyflogi fel swyddog heddlu, a bydd angen ichi gwblhau’r broses ymgeisio arferol. Byddai angen i Gwnstabliaid Gwirfoddol sy’n ymgeisio ar gyfer y broses swyddog heddlu gwblhau 18 mis o wasanaeth fel Cwnstabl Gwirfoddol cyn y cânt eu penodi.
Rwy’n gwirfoddoli fel Swyddog Gwirfoddol ar hyn o bryd. A gaf i drosglwyddo?
Wrth gwrs. Yr ydym yn croesawu ceisiadau gan bobl sydd eisoes yn Gwnstabliaid Gwirfoddol ac sydd eisiau trosglwyddo i Heddlu Dyfed-Powys. Am ragor o wybodaeth, gweler yr adran ‘Cwnstabliaid Gwirfoddol sy’n Trosglwyddo’.
Pwy allaf i gysylltu â nhw os oes gennyf gwestiwn penodol?
Peidiwch ag oedi i gysylltu â’r tîm recriwtio drwy anfon e-bost at [email protected] os oes gennych unrhyw gwestiynau.