Cadetiaid Gwirfoddol Heddlu Dyfed-Powys

Nod y cynllun yw rhoi’r cyfle i bobl ifanc rhwng 13 ac 17 oed ddatblygu eu rhinweddau a’u sgiliau trwy raglen strwythuredig ac i wella’r berthynas rhwng y cyhoedd a’r heddlu.

Mae Cadetiaid Gwirfoddol Heddlu Dyfed-Powys yn dod o bob un o’n cymunedau amrywiol, beth bynnag fo’u cefndir neu eu hamgylchiadau ariannol, ac yn cynnwys y rhai sydd mewn perygl o ddioddef trosedd neu allgáu cymdeithasol.

Mae rhaglen Cadetiaid Gwirfoddol yr Heddlu yn cynnig amrywiaeth gwych o gyfleoedd i’r bobl ifanc dan sylw.

Bydd cadetiaid yn:

• cael eu harwain gan Arweinwyr Cadetiaid Gwirfoddol yr Heddlu sy’n swyddogion heddlu, staff yr heddlu a gwirfoddolwyr cefnogi’r heddlu.
• dysgu am y gyfraith ac adrannau arbenigol yr heddlu yn ogystal â chymryd rhan mewn driliau ac archwiliadau.
• cymryd rhan mewn mentrau plismona bro ac atal, yn ogystal â gweithgareddau a digwyddiadau cymunedol.

Y nod yw paratoi pobl ifanc ar gyfer eu dyfodol trwy ddarparu gweithgareddau a chyfleoedd amrywiol i ddatblygu a gwella sgiliau rhyngbersonol a hyder, a chyflawni ymdeimlad o falchder trwy gefnogi plismona cymunedol.

Tra bod Cadetiaid Gwirfoddol Heddlu Dyfed-Powys yn rhan o’r mudiad cenedlaethol, rydym yn rheoli ein risg ein hunain mewn perthynas â diogelwch ein cadetiaid a’n harweinwyr. Disgwyliwn i’n holl swyddogion heddlu, staff yr heddlu a gwirfoddolwyr cefnogi’r heddlu sy’n cefnogi unedau cadetiaid gynnal y safonau uchaf o ran diogelu, amddiffyn a goruchwylio plant. Fel rhan o hyn, mae pob arweinydd yn cael ei fetio cyn gallu cymryd rhan a chefnogi gweithgareddau’r uned cadetiaid yn ogystal â chael gwiriadau manylach y Gwasanaeth Datgelu a Gwahardd.

Mae Heddlu Dyfed-Powys yn dilyn y fframwaith diogelu cenedlaethol y cytunwyd arno gan Gyngor Cenedlaethol Penaethiaid yr Heddlu ac mae pob Prif Gwnstabl wedi cytuno i fabwysiadu hwn. Mae’n cynnig dull symlach a chyson o adrodd a rheoli pryderon diogelu, recriwtio arweinwyr, hyfforddi, trefnu gweithgareddau a thu hwnt. Mae hyn yn sicrhau bod pawb sy’n ymwneud â Chadetiaid Gwirfoddol yr Heddlu yn gwybod beth a ddisgwylir ganddynt ar lefel leol a chenedlaethol a bod adrodd ac ymchwilio cyfrinachol yn cael ei wneud mewn modd cyson.

Rydym yn gweithio ochr yn ochr â’r Rheolwr Diogelu Cenedlaethol sy’n gyfrifol am gadw mewn cysylltiad â heddluoedd ynglŷn â’r cyfrifoldeb hollbwysig hwn ac am y safonau a’r codau ymddygiad a ddisgwylir ar lefel genedlaethol fel y gallwn barhau i weithio tuag at ddarparu’r safonau mwyaf diogel ac uchaf o ran diogelu ieuenctid yn genedlaethol.

Os oes gennych chi neu unrhyw un yr ydych yn ei adnabod unrhyw bryderon am ddiogelwch unrhyw un sy’n ymwneud â Chadetiaid Gwirfoddol yr Heddlu adroddwch hynny.

Os oes rhywun mewn perygl dybryd, dylid cysylltu â’r heddlu ar 999.

Fel arall, os nad oes perygl / bygythiad uniongyrchol gallwch roi gwybod am unrhyw bryderon sydd gennych am gadét neu arweinydd cadetiaid trwy anfon neges e-bost at:

• [email protected]
• Rheolwr Diogelu Cenedlaethol Cadetiaid Gwirfoddol yr Heddlu(oriau swyddfa yn unig)
• Swyddog Cadetiaid Heddlu Dyfed-Powys (oriau swyddfa yn unig)
• Swyddog Diogelu Cadetiaid Gwirfoddol Heddlu Dyfed-Powys (oriau swyddfa yn unig)

Pwyntiau cyswllt eraill:

• Llinell gymorth yr NSPCC 08080 800 5000 neu anfonwch e-bost at [email protected]
• Llinell gymorth Childline 0800 1111
• Swyddfa Annibynnol Ymddygiad yr Heddlu 0300 020 0096 neu  [email protected]

Cynhelir sesiynau cadetiaid yn y lleoliadau canlynol yn ystod y tymor yn unig.

Gellir trefnu gweithgareddau ychwanegol yn ystod gwyliau ysgol. 

Aberhonddu – nos Iau 6pm-8pm

Y Drenewydd – nos Fercher 6.30pm-8.30pm

Caerfyrddin – nos Iau 6pm-8pm

Rhydaman – nos Iau 6pm-8pm 

Llanelli – nos Iau 6pm-8pm

Doc Penfro – nos Fercher 6.30pm-8.30pm

Bydd holl Gadetiaid Gwirfoddol yr Heddlu yn cael gwisg cadetiaid am ddim gan gynnwys bŵts. Rhoddir manylion llawn wrth ymuno.

I wneud cais i ymuno â Chadetiaid Gwirfoddol yr Heddlu bydd angen i chi fod rhwng 13 oed a 17 oed.

Rhaid i gadetiaid 18 oed adael y rhaglen ond gallant wneud cais i ddod yn Arweinydd Cadetiaid Gwirfoddol yr Heddlu o fewn uned Cadetiaid Gwirfoddol yr Heddlu wahanol.

Os ydych yn hŷn na 18 oed, gallwch hefyd wirfoddoli i fod yn Arweinydd Cadetiaid 

Ni chodir tâl am ymuno â Chadetiaid Gwirfoddol yr Heddlu.

• Bydd unrhyw unigolyn ifanc yn cael ei ystyried ar gyfer y cadetiaid.
• Ni chynhelir unrhyw fetio neu wiriadau cefndir ar unrhyw gadét sy’n dymuno ymuno.
• Mae ein Cadetiaid Gwirfoddol yr Heddlu yn cynrychioli Heddlu Dyfed-Powys felly mae’n ofynnol bod pob cadét yn dangos safonau uchel o ymddygiad ac yn cadw at y cod ymddygiad.  

Mae cadetiaid yn cyfarfod yn wythnosol a disgwylir y byddwch yn mynychu pob sesiwn. Addysg fydd yn dod gyntaf bob amser.

Efallai y gofynnir i chi hefyd fynychu gweithgareddau a digwyddiadau y tu allan i’r cyfarfodydd rheolaidd ac argymhellir yn gryf eich bod yn bresennol.

Bydd rhaglen Cadetiaid Gwirfoddol yr Heddlu yn rhoi cipolwg i chi ar blismona a bydd yn eich helpu i wneud dewisiadau gyrfa. Fodd bynnag, nid yw aelodaeth yn llwybr gwarantedig i ddod yn swyddog heddlu neu unrhyw gyflogaeth arall o fewn gwasanaeth heddlu.

Mae ein rhaglen yn agored i bob person ifanc beth bynnag yw eu huchelgeisiau gyrfa neu alluoedd. Gallwch ymuno â’r cadetiaid hyd yn oed os nad ydych yn dymuno dilyn gyrfa ym maes plismona yn y dyfodol.

Mae Heddlu Dyfed-Powys yn falch o wasanaethu’r bobl sy’n byw ac yn gweithio yn yr ardal ac yn ymweld â hi. Ein nod yw darparu gwasanaeth o safon uchel y gall pawb ei ddefnyddio ac sy’n deg i bawb. Rydym hefyd yn darparu gwasanaeth sy’n annog agweddau cadarnhaol ac yn dileu gwahaniaethu. 

Gallwch ymweld â'n tudalen gweithredu cadarnhaol yma

Mae Cadetiaid Gwirfoddol yr Heddlu yn cynnig amgylchedd diogel a chyfeillgar i bobl ifanc ddatblygu i fod yn ddinasyddion da. Rydym yn grŵp ieuenctid mewn lifrai cwbl gynhwysol sy’n croesawu cadetiaid o unrhyw grŵp cymdeithasol, economaidd, ethnig, rhywedd, gallu neu anabledd. Rydym yn annog pobl ifanc a all deimlo dan anfantais oherwydd trosedd neu allgáu cymdeithasol i ymuno â Chadetiaid Gwirfoddol yr Heddlu.

Mae Cadetiaid Gwirfoddol yr Heddlu yn cymryd rhan mewn amrywiaeth eang o weithgareddau sy’n berthnasol i’w gallu a’u hoedran a gofynnir i chi lenwi ffurflen iechyd a chaniatâd ar eu cyfer, er mwyn sicrhau bod gan eu huned yr wybodaeth ddiweddaraf am unrhyw faterion sy’n ymwneud ag iechyd. Bydd angen llenwi ffurflen iechyd a chaniatâd ar gyfer pob digwyddiad.

Cedwir yr holl fanylion personol dan amodau diogelwch a gydnabyddir yn genedlaethol ac ni chânt eu rhannu â sefydliadau y tu allan i wasanaeth yr heddlu.

Darllenwch ein polisi diogelu i gael gwybodaeth am sut y byddwn yn gofalu am eich pobl ifanc tra byddant gyda ni.

Os oes gennych unrhyw bryderon am gadét neu arweinydd cadetiaid gallwch eu codi gan ddefnyddio’r manylion cyswllt a amlinellir yma. Gall unrhyw un ddefnyddio’r broses hon: rhiant, cadét, arweinydd cadetiaid neu aelod o’r cyhoedd.   

Does dim ots pa mor fach y gall problem ymddangos, na phwy yw’r arweinydd neu’r cadét, byddem yn eich annog i gysylltu â ni i roi gwybod i ni am y sefyllfa. 

Mae’n bwysig bod pobl yn teimlo y gallant godi pryderon, ni waeth am bwy y maent, gan fod hyn yn ein helpu i gynnal amgylchedd diogel i gadetiaid. Os ydych chi’n gweld neu’n profi rhywbeth nad ydych chi’n hapus yn ei gylch, rhowch wybod amdano.