Ymgyrch Makesafe

Menter genedlaethol yw Ymgyrch Makesafe sy’n canolbwyntio ar sicrhau bod y cyhoedd cyffredinol a phobl sy’n gweithio yn y sectorau busnes yn ymwybodol o arwyddion cynnar camfanteisio ar blant ac yna’n gwybod sut i adrodd am bryderon wrth yr heddlu.  

Mae tystiolaeth leol a chenedlaethol yn dangos y gall camfanteisio ar blant ddigwydd mewn gwestai, tafarndai, siopau prydau parod, a llefydd sydd â thrwydded i werthu alcohol. Rydyn ni’n gweithio i sicrhau bod pobl sy’n gweithio yn yr amgylcheddau hynny’n medru adnabod yr arwyddion rhybudd a bod ganddynt yr hyder i adrodd am eu pryderon wrth yr heddlu er mwyn diogelu unrhyw blant mewn perygl. 

Ein nodau

Diben Ymgyrch Makesafe yw grymuso busnesau a sefydliadau i fynd i’r afael â chamfanteisio ar blant drwy fwy o ymwybyddiaeth a hyfforddiant.

Mae’r ymgyrch yn anelu i gyflawni’r canlynol:

• Nodi dioddefwyr posibl a sicrhau ymateb diogelu effeithiol.
• Cydweithio â busnesau er mwyn gwella sgiliau staff a gwarchod plant sy’n agored i niwed rhag camfanteisio.
• Rhoi tawelwch meddwl i’r cyhoedd a chyflwyno mesurau ataliol effeithiol.
• Gwella diogelwch a hyder y cyhoedd.

Lluniwyd yr ymgyrch hon i helpu perchnogion busnes a’u gweithwyr i nodi dioddefwyr posibl camfanteisio ar blant, a lle bo angen, hysbysu swyddogion heddlu fel eu bod nhw’n medru ymyrryd cyn bod unrhyw unigolyn ifanc yn cael ei niweidio.

Nid yw’n hawdd adnabod camfanteisio ar blant bob amser, ond mae arwyddion i sylwi arnyn nhw, ar gyfer busnesau a’r cyhoedd cyffredinol:

Arwyddion rhybudd cyffredinol i sylwi arnynt:

• Unigolyn ifanc yn cario llawer o arian.
• Unigolyn ifanc gyda mwy nag un ffôn.
• Unigolyn ifanc yng nghwmni unigolyn, neu grŵp o bobl, sy’n edrych yn hŷn nag ef/hi, ac o bosibl o dan ddylanwad cyffuriau neu alcohol.
• Unigolyn ifanc yn edrych fel pe bai ar goll neu mewn amgylchoedd anghyfarwydd.
• Unigolyn ifanc yn teithio ar ben ei hun, yn arbennig yn ystod oriau ysgol, yn hwyr y nos, neu’n aml.
• Unigolyn ifanc sy’n ymddangos yn orbryderus, yn ofnus neu’n grac, neu sy’n dangos ymddygiadau sy’n gwneud ichi boeni amdano/amdani.
• Unigolyn ifanc yn cardota mewn man cyhoeddus.

Arwyddion rhybudd ar gyfer pobl sy’n gweithio mewn gwestai: 

• Oedolion yn cymryd ystafell mewn gwesty ar gyfer pobl ifainc ar adegau rhyfedd o’r dydd neu’r nos a heb fagiau na phrawf adnabod.
• Pobl ifainc gydag oedolion sydd ddim yn ymddangos fel aelodau o’r teulu.
• Cymryd ystafell mewn gwesty ar y funud olaf neu drwy gerdded i mewn.
• Gwesteion sy’n ymddangos yn gyfrinachol am eu hymweliad neu’n ceisio cuddio’r ffaith eu bod nhw yng nghwmni unigolyn ifanc.
• Tystiolaeth o daclau cyffuriau, condomau, neu sawl ffôn symudol yn cael eu canfod mewn ystafell mewn gwesty.
• Gwesteion sy’n oedolion yn mynnu talu mewn arian parod ac yn gwrthod gadael ôl cerdyn credyd.
• Archebion ystafell mewn gwesty’n cael eu gwneud mewn enw gwahanol i’r rhai sy’n cymryd yr ystafell.
• Nifer o bobl yn ymweld â’r un ystafell.
• Ystafelloedd yn defnyddio arwydd ‘Dim Tarfu’ am gyfnod anarferol o hir.
• Sianeli pornograffi’n cael eu defnyddio mewn ystafelloedd gyda phlant.

Arwyddion rhybudd ar gyfer pobl sy’n gweithio yn y diwydiant tacsi: 

• Oedolion yn rhoi rhywun ifanc mewn tacsi, a allai fod o dan ddylanwad alcohol neu gyffuriau.  
• Pobl ifainc yn cael eu casglu a’u cymryd i westai neu lety AirBnB, yn enwedig yn ystod amserau rhyfedd o’r dydd a’r nos.
• Pobl ifainc yn teithio pellter hir, yn enwedig yn ystod amserau rhyfedd o’r dydd a’r nos.
• Oedolion sy’n ymddwyn yn rhyfedd yng nghwmni pobl ifainc.
• Unigolyn ifanc sy’n edrych yn bryderus neu’n ofnus wrth deithio gyda rhywun arall.
• Teithiwr sy’n rhy ifanc i fod yn teithio ar ben ei hun, yn gwisgo gwisg ysgol yn ystod oriau ysgol, neu’n teithio gyda rhywun sydd ddim yn ymddangos fel ffrind neu aelod o’r teulu.

Arwyddion rhybudd ar gyfer pobl sy’n gweithio mewn tafarndai, caffis neu fwytai: 

• Oedolyn gydag unigolyn ifanc y mae’n cyffwrdd ynddo/ynddi neu’n ymddwyn yn glòs gydag ef/hi. 
• Oedolion yn dod yn gyfaill i bobl iau, gan gynnwys prynu bwyd a diod iddynt.
• Oedolion sy’n dod i mewn ar ben eu hunain ac sydd bob amser yn targedu pobl ifainc.
• Oedolion yn prynu diodydd alcoholig rydych chi’n amau sydd ar gyfer rhywun sy’n iau na 18 oed.
• Oedolion yn dod i mewn gyda phobl ifainc o dan ddylanwad alcohol neu gyffuriau.

OS FYDDWCH CHI’N EI WELD, ADRODDWCH AMDANO