Os ydych chi wedi cael llythyr ysgogi camera cyflymder
Mae angen ichi lenwi adrannau priodol yr hysbysiad a'i anfon i'r cyfeiriad ar flaen y ffurflen o fewn 28 diwrnod.
Fel arfer wedyn, byddwch yn cael cynnig amodol o gosb benodedig, sef dirwy o £100 ac ychwanegu tri phwynt cosb at eich trwydded. Er hynny, efallai y byddwch yn gymwys i wneud cwrs Cynllun Ailhyfforddi Troseddwyr Gyrru Cenedlaethol yn lle hynny.
Os na fyddwch yn ymateb i'r hysbysiad caiff eich achos ei gyfeirio i'r llys oherwydd i chi fethu â darparu'r wybodaeth y gofynnwyd amdani i’r Heddlu.
Peidiwch ag anfon unrhyw daliad na'ch trwydded yrru at yr Heddlu.
Troseddau cyflymder uchel
Os ydych chi wedi cael eich recordio ar yr hyn sy’n cael ei ystyried yn gyflymder uchel caiff y digwyddiad ei atgyfeirio i’r llys yn y lle cyntaf. Bydd yn dal angen i chi ddychwelyd y ffurflen wedi’i llenwi ac unwaith y bydd wedi’i phrosesu byddwch yn derbyn gwŷs llys.
Os oes gennych naw pwynt ar eich trwydded yn barod
Mae angen ichi lenwi adrannau priodol yr hysbysiad a'i anfon i'r cyfeiriad ar flaen y ffurflen o fewn 28 diwrnod.
Efallai y byddwch yn gymwys i wneud cwrs Cynllun Ailhyfforddi Troseddwyr Gyrru Cenedlaethol, ond os nad ydych, yna caiff y mater ei gyfeirio at y llys.
Cyrsiau ymwybyddiaeth gyrwyr
Unwaith y byddwch wedi ymateb i’r hysbysiad, ac wedi gwneud hynny o fewn yr amserlen sy’n ofynnol, gallech dderbyn:
- opsiwn i fynychu cwrs ymwybyddiaeth gyrwyr
- hysbysiad cosb benodedig
- neu lythyr yn dweud wrthych am fynd i’r llys
Bydd yr heddlu’n ystyried y seiliau canlynol wrth asesu eich cymhwysedd ar gyfer y cwrs ymwybyddiaeth gyrwyr:
- os oedd eich cyflymder ychydig bach yn fwy na'r terfyn ac yn dod o fewn y canllawiau a nodwyd gan Gyngor Cenedlaethol Prif Swyddogion yr Heddlu (NPCC) hyd at:
- 31 mya mewn ardal 20 mya
- 42 mya mewn ardal 30 mya
- 53 mya mewn ardal 40 mya
- 64 mya mewn ardal 50 mya
- 75 mya mewn ardal 60 mya
- 86 mya mewn ardal 70 mya
- os nad ydych eisoes wedi cwblhau cwrs o fewn tair blynedd neu wedi trefnu lle ar gwrs sydd yn yr arfaeth
Sylwch:
Nid oes hawl gyfreithiol i gwrs, caiff y rhain eu cynnig yn ôl disgresiwn yr heddlu yn unig, ac nid oes gan y llysoedd unrhyw bwerau dros gyrsiau. Os cynigir cwrs i chi, gall yr heddlu dynnu’r cynnig yn ôl ar unrhyw adeg cyn i’r cwrs gael ei gwblhau’n llwyddiannus.
Bydd gofyn i chi anfon manylion cywir eich trwydded yrru a’ch dyddiad geni atom. Os ydych yn wladolyn tramor ac wedi cael trwydded gan y DVLA yna dylech ddarparu manylion y drwydded a roddwyd gan y DVLA. Os nad oes gennych drwydded y DU yna mae’n rhaid i chi anfon rhif y drwydded a’r wlad y tu allan i’r DU a roddodd eich trwydded atom.