Dronau
Eich cyfrifoldeb chi
Os ydych chi'n hedfan drôn neu'n berchen ar ddrôn, eich cyfrifoldeb chi yw sicrhau bod pob hediad yn ddiogel a chyfreithlon.
Awyren sy'n cael ei rheoli o bell ac sydd heb beilot ar ei bwrdd yw drôn. Mae dronau'n amrywio o deganau bach i blant i systemau milwrol mawr. Mae hyn yn cynnwys modelau o awyrennau a hofrenyddion sy’n cael eu rheoli o bell.
Mae rheolau gwahanol ar gyfer gwahanol fathau (categorïau) o hediad drôn. Mae'r categorïau'n dibynnu'n bennaf ar bwysau’r drôn, ble rydych chi'n bwriadu hedfan, a pha mor agos fyddwch chi at bobl ac ardaloedd adeiledig (trefi a dinasoedd).
Cod Dronau ac Awyrennau Model
Mae'r Cod Dronau ac Awyrennau Model yn debyg i Reolau’r Ffordd Fawr ar gyfer dronau. Cafodd ei greu gan yr Awdurdod Hedfan Sifil (CAA) ac mae'n dweud wrthoch chi sut i hedfan drôn yn gyfreithlon a diogel.
Cofrestru
Y gweithredydd
Perchennog y drôn yw’r gweithredydd fel arfer.
Os nad yw’r drôn yn perthyn i un person, yna person dynodedig o’r enw y rheolwr yw'r gweithredydd. Er enghraifft, os yw’r drôn yn perthyn i glwb a bod yr aelodau’n cael ei ddefnyddio, yna mae'n rhaid i'r clwb ddynodi rheolwr ar gyfer y drôn.
Os chi yw'r gweithredydd, rhaid ichi gofrestru gyda'r Awdurdod Hedfan Sifil (CAA) a sicrhau ID Gweithredydd os yw'r drôn:
- yn pwyso dros 250g, neu
- â chamera sy’n gallu tynnu lluniau neu recordio fideo
Rhaid ichi ddangos eich ID Gweithredydd yn glir ar bob drôn sy’n perthyn ichi neu'n cael ei reoli gennych.
Teganau
Does dim angen ID Gweithredydd arnoch ar gyfer drôn sy'n cael ei ystyried yn degan.
Mae’ch drôn yn debyg o fod yn degan:
- os yw'r gwneuthurwr neu'r siop yn ei ddisgrifio fel tegan
- os prynoch chi'r drôn o siop deganau
- os yw wedi'i farcio fel un addas i rai dan 14 oed
- os cafodd ei hysbysebu neu ei becynnu i ddenu plant
Y peilot
Rhaid i unrhyw un sy'n hedfan (peilota) drôn sy'n pwyso dros 250g basio prawf sylfaenol gyda'r CAA i gael ID Hedfanwr. Rhaid iddyn nhw gario manylion eu ID Hedfanwr bob amser wrth hedfan.
Mae rhai categorïau yn cynnwys gofynion ychwanegol ar gyfer peilotiaid.
Yswiriant
Mae arnoch chi angen yswiriant:
- os nad ydych chi’n defnyddio’r drôn at chwaraeon neu hamdden – er enghraifft ei ddefnyddio ar gyfer gwaith neu
- os yw’ch drôn yn pwyso dros 20kg
Rhaid i’r yswiriant fod o safon EC 785/2004 o leiaf.
Rheolau hedfan
Mae'r crynodeb hwn o'r rheolau yn gymwys i'r rhan fwyaf o hediadau drôn. Ond rhaid ichi sicrhau eich bod yn gwybod i ba gategori mae’ch drôn yn perthyn a pha reolau yn union sy'n gymwys.
- Peidiwch â pheryglu neb na dim wrth hedfan drôn.
- Rhaid ichi allu gweld y drôn (gan gynnwys y gofod o'i gwmpas) bob amser.
- Peidiwch â hedfan os ydych chi wedi yfed alcohol neu wedi cymryd cyffuriau.
- Parchwch breifatrwydd pobl eraill, a mynnwch wybod beth gewch chi ei wneud gyda lluniau a fideos a beth na chewch chi ei wneud.
Peidiwch â hedfan:
- dros dorfeydd (sy'n cael eu galw'n 'gynulliadau' yn y rheolau)
- dros 400 troedfedd (120m) o'r ddaear
- mewn Gofod Awyr Cyfyngedig, er enghraifft ger meysydd awyr, oni bai eich bod wedi cael caniatâd
- lle bo'r gwasanaethau tân, heddlu neu ambiwlans yn ymateb i argyfwng, oni bai eich bod wedi cael caniatâd
Gan ddibynnu ar ba gategori o drôn rydych chi'n ei hedfan, fe all fod angen ichi aros o leiaf:
- 50m i ffwrdd o dorfeydd a phobl eraill
- 150m i ffwrdd o ardaloedd adeiledig (trefi a dinasoedd)
Y gyfraith
Mae'r gyfraith ar hedfan dronau i’w chael yng Ngorchymyn Llywio yn yr Awyr 2016.
Yn y gyfraith:
- mae drôn yn cael ei enw’n Awyren Ddi-griw (UA)
- mae’r system gyfan sy’n cael ei defnyddio i hedfan drôn (gan gynnwys y rheolwr neu'r ap symudol) yn cael ei galw’n System Awyren Ddi-griw (UAS)
- Gweithredydd y Drôn yw'r person neu'r sefydliad mae’r drôn yn perthyn iddyn nhw neu'n cael ei reoli ganddyn nhw
- Peilot y Drôn yw pwy bynnag sy'n hedfan y drôn mewn gwirionedd
Adrannau pwysicaf y rheolau ar gyfer dronau yw erthyglau 265A i 265F, sef y rheolau ar Weithredwyr Dronau, Peilotiaid Dronau a Chategorïau Hedfan.
Os ydych chi'n meddwl y gallai rhywun fod yn torri'r gyfraith
Oes yna argyfwng?
Ffoniwch 999 nawr mewn sefyllfaoedd brys fel y rhain:
- mae yna berygl i fywyd ar hyn o bryd
- mae rhywun yn defnyddio trais neu'n bygwth bod yn dreisgar
- mae rhywun yn hedfan drôn mewn parth dim hedfan, fel carchar neu faes awyr
Amhariad ar y clyw neu’r lleferydd
- Os ydych chi wedi cofrestru ymlaen llaw gyda’r gwasanaeth SMSbrys, defnyddiwch ein gwasanaeth ffôn testun 18000 neu anfonwch neges destun aton ni ar 999.
- Ffoniwch 999 BSL er mwyn defnyddio cyfieithydd Iaith Arwyddion Prydain.
Os nad yw'n argyfwng
Riportio ar-lein
Os ydych chi wedi darllen y rheolau a'ch bod yn credu bod rhywun yn torri'r gyfraith ond nid yw'n argyfwng, gallwch riportio trosedd inni ar-lein.
Pwerau'r heddlu
Mae ein pwerau ni ynglŷn â dronau i’w gweld yn rhan 3 o Ddeddf Rheoli Traffig Awyr ac Awyrennau Di-griw 2021.
Os ydyn ni’n credu y gallai drôn fod yn gysylltiedig â throsedd, fe allwn ni:
- wneud ichi lanio'ch drôn
- stopio a chwilio pobl neu gerbydau i ddod o hyd i ddronau neu offer dronau
- atafaelu a chadw dronau neu offer dronau a ganfyddir yn ystod chwiliad
Rydyn ni hefyd yn cael ei gwneud yn ofynnol ichi ddangos y canlynol inni:
- manylion cofrestru a gwybodaeth arall (ar gyfer peilotiaid a gweithredwyr)
- tystiolaeth o ganiatâd i hedfan lle bo’i angen (er enghraifft i hedfan ger maes awyr)
Rydyn ni hefyd yn cael gwirio drôn er mwyn deall pa reolau sy'n gymwys iddo.