Stelcio ac aflonyddu
Yn yr adran yma:
Beth yw stelcio ac aflonyddu?
Mae stelcio ac aflonyddu yn droseddau tebyg. Maent yn cynnwys ymddygiad digroeso dro ar ôl tro gan berson arall tuag atoch. Mae’r ymddygiad digroeso hwn yn effeithio ar eich bywyd neu’ch gweithgareddau dyddiol.
Os yw’r ymddygiad hwn wedi digwydd ddwywaith neu fwy, gall fod yn drosedd a gallwch ei riportio i ni.
Fodd bynnag, os bydd ymddygiad digroeso yn digwydd unwaith, gall fod yn fath gwahanol o drosedd. Riportiwch y digwyddiad i ni. Rydym am wybod am ymddygiad digroeso cyn gynted â phosibl fel y gallwn eich helpu a chymryd y camau cywir.
Mae stelcio ac aflonyddu yn droseddau o dan Ddeddf Diogelu rhag Aflonyddu 1997. Rydym yn cymryd y troseddau hyn o ddifrif ac rydym yma i’ch cefnogi.
Os nad ydych yn siŵr a yw’r digwyddiad yn stelcio neu’n aflonyddu, gan y gallant fod yn debyg - dywedwch wrthym beth sydd wedi bod yn digwydd a byddwn yn egluro a oes trosedd wedi digwydd a beth ydyw.
Aflonyddu
Aflonyddu yw pan fydd rhywun yn eich targedu dro ar ôl tro gydag ymddygiad digroeso. Mae’r ymddygiad digroeso hwn yn effeithio ar eich bywyd.
Gall aflonyddu gynnwys:
- anfon negeseuon, delweddau, e-byst, neu fath arall o gyfathrebu sy’n sarhaus, yn fygythiol neu’n ddigroeso
- postio cynnwys sarhaus ar gyfryngau cymdeithasol
- cam-drin parhaus neu ddifrod i eiddo
- ymddygiad gwrthgymdeithasol dro ar ôl tro
- gwneud galwadau ffôn digroeso neu sarhaus
Rhaid iddo ddigwydd ddwywaith neu fwy er mwyn iddo fod yn drosedd aflonyddu.
Stelcio
Stelcio yw pan fydd rhywun yn eich targedu dro ar ôl tro gydag ymddygiad digroeso. Mae’r ymddygiad yn obsesiynol a gall olygu bod yn rhaid i chi newid eich bywyd neu’ch gweithgareddau dyddiol.
Gall stelcio gynnwys:
- dilyn rhywun
- mynd i’w cartref, gweithle, ysgol neu leoliadau eraill heb wahoddiad
- loetran yn rhywle maen nhw’n gwybod bod y person yn mynd yno’n aml
- gwylio neu ysbïo ar rywun
- dwyn hunaniaeth (cofrestru ar gyfer gwasanaethau, prynu pethau yn enw rhywun)
- ysgrifennu neu bostio ar-lein am rywun os yw hynny’n ddigroeso neu nad yw’r person yn gwybod
Rhaid iddo ddigwydd ddwywaith neu fwy iddo fod yn drosedd stelcio.
Stelcio neu aflonyddu ar-lein
Gall stelcio neu aflonyddu ddigwydd ar-lein gan ddefnyddio’r rhyngrwyd, apiau, neu blatfformau digidol eraill, neu drwy ddefnyddio technoleg arall megis dyfeisiau olrhain neu feddalwedd ysbïo.
Gall stelcio neu aflonyddu ar-lein gynnwys:
- monitro defnydd rhywun o’r rhyngrwyd, e-bost neu gyfathrebu electronig arall
- anfon negeseuon, delweddau, fideos rhywiol neu bersonol digroeso neu ddeunydd dinoethol arall, gan gynnwys delweddau o organau rhywiol
- cael mynediad at gyfrifon e-bost a chyfryngau cymdeithasol rhywun
- sbamio ac anfon firysau
- dwyn hunaniaeth rhywun
- bygwth rhannu gwybodaeth, ffotograffau, copïau o negeseuon preifat
- ychwanegu meddalwedd olrhain at ddyfeisiau rhywun
Os yw’r ymddygiad digroeso hwn wedi digwydd ddwywaith neu fwy, gall fod yn stelcio neu’n aflonyddu. Os yw wedi digwydd unwaith, gall fod yn fath gwahanol o drosedd.
Effaith stelcio ac aflonyddu
Gall stelcio ac aflonyddu gael effaith ddifrifol ar eich iechyd meddwl, eich lles corfforol a’ch bywyd bob dydd. Mae rhai pobl sydd wedi cael eu stelcio neu eu haflonyddu wedi gorfod gwneud newidiadau i’w bywydau bob dydd; mae rhai wedi newid swyddi neu symud tŷ.
Mae’n bwysig eich bod chi’n cael y cymorth sydd ei angen arnoch os yw hyn yn rhywbeth rydych chi’n ei brofi. Nid ydych chi ar eich pen eich hun, mae cefnogaeth ar gael i chi.
Os nad ydych chi’n barod i riportio’r peth i ni, mae hynny’n iawn, mae sefydliadau eraill a all roi cyngor a help i chi.