Hyfforddiant Canabis Meddygol 981/2023
Cyfeirnod Rhyddid Gwybodaeth: 981/2023
Cais 1 - 4:
- Pa raglenni neu gyrsiau hyfforddi sydd wedi'u darparu i swyddogion Heddlu Dyfed-Powys ynghylch canabis meddygol, ac a yw'r hyfforddiant hwn yn cwmpasu'r gwahaniaeth rhwng CanCard a chynhyrchion sy'n seiliedig ar ganabis at ddefnydd meddyginiaethol (CBPM) a ragnodwyd yn gyfreithiol?
- Pa mor aml y caiff yr hyfforddiant hwn ei ddiweddaru i hysbysu swyddogion am ddatblygiadau mewn cyfreithiau a rheoliadau o ran canabis meddygol?
- A oes canllawiau ar waith i swyddogion wahaniaethu rhwng cleifion canabis meddygol cyfreithlon ag anghenion meddygol cyfreithlon ac unigolion sy'n defnyddio canabis at ddibenion hamdden?
- Pa weithdrefnau sy'n cael eu dilyn wrth ddod ar draws unigolion sy'n meddu ar ganabis meddygol am resymau meddygol dilys, a sut mae dilysrwydd presgripsiwn neu CBPM wedi'i gadarnhau?
Ymateb 1:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Mae’r Tîm Dysgu a Datblygu yn gallu rhannu gwybodaeth a roddir i recriwtiaid newydd dan hyfforddiant.
Yn yr wybodaeth a roddir ar gamddefnyddio cyffuriau, mae CBMP yn cael ei gynnwys a chynghorir y myfyrwyr i ymdrin ag unrhyw honiadau bod eitemau a ganfuwyd yn ystod chwiliad yn CBMP yn y modd a ganlyn:-
Dywedir wrthynt na fydd canabis llysieuol neu resin canabis yn CBMP ac os byddant yn dod o hyd i ganabis llysieuol neu resin canabis, dylent ddelio ag ef fel y byddent yn ei wneud ag unrhyw gyffur arall a ddosbarthwyd o dan Ddeddf Camddefnyddio Cyffuriau 1971.
Os nad yw’r swyddog heddlu’n fodlon ei fod wedi profi’n ddigonol ei hawl i’r CBMP, dylai gymryd camau gweithredol yn unol ag un o’r camau canlynol:-
Atafaelu’r cynhyrchion ac arestio a chyfweld yr unigolyn y canfuwyd bod y CBMP yn ei feddiant er mwyn ymchwilio i weld a yw mewn meddiant cyfreithlon ohono.
Atafaelu'r cynhyrchion a threfnu cyfweliad gwirfoddol er mwyn ymchwilio i weld a yw mewn meddiant cyfreithlon ohonynt.
Mae swyddogion yn cael gwybod y dylent bob amser ystyried bod y rhai sy’n cyflwyno eu hunain fel rhai sy’n meddu ar CBMP yn gyfreithlon yn aml yn aelodau o’n cymunedau sydd fwyaf agored i niwed ac yn aml ag anableddau ac y dylid ystyried hyn cyn penderfynu ar y camau gweithredu y maent yn eu cymryd. Fodd bynnag, dywedir wrthynt na ddylent dderbyn yr hyn a ddywedir wrthynt yn unig ac y dylent ymchwilio'n llawn i weld a yw'r unigolyn yn meddu ar y CBMP yn gyfreithlon ai peidio.
Ymateb 2:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Adolygir hyfforddiant yn flynyddol oni bai fod darn newydd o ddeddfwriaeth yn cael ei weithredu yn y cyfamser. Mae'r cynnwys yn cael ei ddiweddaru yn unol â disgrifyddion dysgu'r Coleg Plismona.
Ymateb 3:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Os bydd swyddogion yn dod o hyd i’r hyn y maent yn ei gredu yw CBMP, neu’r hyn a nodir yn CBMP gan y sawl sy’n cael ei chwilio, dylai’r swyddog ofyn i’r unigolyn hwnnw gyflwyno tystiolaeth o un neu fwy o’r canlynol:-
Copi o'r presgripsiwn
Llythyr gan y meddyg sy'n rhagnodi yn amlinellu ei hawl i'r CBMP
Y pecyn gwreiddiol gydag enw’r unigolyn arno fel yr unigolyn sydd â hawl i gael y CBMP
Math o brawf adnabod llun derbyniol, megis trwydded yrru neu basbort, i sicrhau manylion yr unigolyn sydd â hawl i gael y CBMP
Ymateb 4:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Os bydd swyddogion yn dod o hyd i’r hyn y maent yn ei gredu yw CBMP, neu’r hyn a nodir yn CBMP gan y sawl sy’n cael ei chwilio, dylai’r swyddog ofyn i’r unigolyn hwnnw gyflwyno tystiolaeth o un neu fwy o’r canlynol:-
Copi o'r presgripsiwn
Llythyr gan y meddyg sy'n rhagnodi yn amlinellu ei hawl i'r CBMP
Y pecyn gwreiddiol gydag enw’r unigolyn arno fel yr unigolyn sydd â hawl i gael y CBMP
Math o brawf adnabod llun derbyniol, megis trwydded yrru neu basbort, i sicrhau manylion yr unigolyn sydd â hawl i gael y CBMP
Dylid nodi, o ganlyniad i'r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o'r fath, y gallai'r wybodaeth a ryddheir fod yn gywir neu beidio.
(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 23 Ebrill 2024)