Codau ymarfer 647/2024
Cyfeirnod Rhyddid Gwybodaeth: 647/2024
Cais:
Ysgrifennaf i ofyn am wybodaeth o dan Ddeddf Rhyddid Gwybodaeth 2000. Mae fy nghais yn ymwneud â’r codau ymarfer ar gyfer pobl yn y ddalfa, fel y darperir o dan Ddeddf yr Heddlu a Thystiolaeth Droseddol 1984 (PACE) a’r Codau Ymarfer PACE sy’n cyd-fynd â hi.
Yn ôl Deddf yr Heddlu a Thystiolaeth Droseddol 1984, yn benodol Cod C, mae gan garcharorion yn nalfa’r heddlu hawl i weld y codau ymarfer sy’n amlinellu eu hawliau a’r gweithdrefnau y mae’n rhaid i’r heddlu eu dilyn. Yng ngoleuni’r ddarpariaeth hon, hoffwn ofyn am yr wybodaeth ganlynol:
- Nifer y copïau o godau ymarfer:
Cadarnhewch nifer y copïau o Godau Ymarfer PACE a gedwir ym mhob dalfa y mae eich heddlu yn gyfrifol amdanynt.
- Ceisiadau am godau ymarfer:
Hoffwn wybod sawl gwaith y mae rhywun yn y ddalfa ym mhob dalfa wedi gofyn am Godau Ymarfer PACE dros y tair blynedd diwethaf.
Er eglurder, rwy’n cyfeirio at y codau ymarfer y mae gan garcharorion hawl i’w darllen a chyfeirio atynt yn ystod eu cyfnod yn y ddalfa, yn unol â mandad Deddf yr Heddlu a Thystiolaeth Droseddol 1984 a’i chodau ymarfer cysylltiedig.
Ymateb
Mae adran 1 o Ddeddf Rhyddid Gwybodaeth 2000 yn gosod dwy ddyletswydd ar awdurdodau cyhoeddus. Oni bai bod esemptiadau yn gymwys, y ddyletswydd gyntaf yn adran 1(1)(a) yw cadarnhau neu wadu a ydyw’r wybodaeth a bennir mewn cais yn cael ei chadw. Yr ail ddyletswydd yn adran 1(1)(b) yw datgelu gwybodaeth y cadarnhawyd ei bod yn cael ei chadw.
Lle dibynnir ar esemptiadau mae adran 17 o Ddeddf Rhyddid Gwybodaeth 2000 yn ei gwneud yn ofynnol i Heddlu Dyfed-Powys, wrth wrthod darparu gwybodaeth o’r fath (gan fod yr wybodaeth wedi’i hesemptio), roi i chi, y ceisydd, hysbysiad sydd: (a) yn datgan y ffaith honno, (b) yn pennu’r esemptiad o dan sylw, ac (c) yn datgan (os na fyddai hynny’n amlwg fel arall) pam bod yr esemptiad yn gymwys.
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod. Fodd bynnag, rydym yn atal yr holl wybodaeth y gofynnwyd amdani gan ein bod yn ystyried bod esemptiad adran 12(1) – Esemptiad lle mae’r gost cydymffurfio yn uwch na’r terfyn priodol, yn gymwys iddi.
Adran 12(1) – Y gost cydymffurfio yn uwch na’r terfyn priodol
Mae adran 12(1) yn datgan: “Nid yw adran 1(1) yn ei gwneud yn ofynnol i awdurdod cyhoeddus gydymffurfio â chais am wybodaeth os ydyw’r awdurdod yn amcangyfrif y byddai’r gost o gydymffurfio â’r cais yn uwch na’r terfyn priodol.”
Mae’r gost o ddarparu’r wybodaeth y gofynnir amdani mewn perthynas â’ch cais yn uwch na’r swm y mae’n ofynnol yn gyfreithiol i ni ymateb iddo; h.y. mae’r gost o leoli ac adalw’r wybodaeth yn uwch na’r ‘terfyn priodol’ fel y nodir yn Rheoliadau Rhyddid Gwybodaeth a Diogelu Data (Terfyn a Ffioedd Addas) 2004. Amcangyfrifir y byddai’n cymryd yn hwy na 18 awr (h.y. lleiafswm o 7323 awr) i gydymffurfio â’r rhan hon o’ch cais. Gellir dod o hyd i’r rheoliadau yn https://www.legislation.gov.uk/cy/uksi/2004/3244.
Mae’r adran Rhyddid Gwybodaeth wedi cael ei hysbysu nad yw’r wybodaeth mewn perthynas â chwestiwn 2 eich cais, yn cael ei chadw mewn fformat hawdd ei adalw, ers mis Mai 2023, oherwydd newid mewn systemau.
Yng ngoleuni hyn ac er mwyn cael yr wybodaeth sy’n berthnasol i’ch cais o fewn yr amserlen a nodwyd yn gywir, byddai’n rhaid i Heddlu Dyfed-Powys gyrchu ac adolygu 87,877 o gofnodion, a byddai’n rhaid adolygu pob cofnod â llaw.
Mae hefyd wedi’i nodi y byddai’n cymryd o leiaf pum munud i adolygu a chael yr wybodaeth ar gyfer un cofnod mewn perthynas â’ch cais (fel yr amlinellwyd uchod). Byddai’r broses a amlinellir yn arwain at yr amcangyfrif amser a geir isod.
87,877 x 5 munud = 7,323 awr
Amcangyfrif amser i gwblhau’r dasg = 7323 awr
Yn unol â Deddf Rhyddid Gwybodaeth 2000, mae’r llythyr hwn yn gweithredu fel hysbysiad gwrthod i’r cyfan o’r cais hwn o dan adran 17(5). Rhaid i awdurdod cyhoeddus sydd, mewn perthynas ag unrhyw gais am wybodaeth, yn dibynnu ar hawliad bod adran 12 neu adran 14 yn gymwys, roi hysbysiad i’r ceisydd yn datgan y ffaith honno o fewn yr amser ar gyfer cydymffurfio ag adran 1(1).
Efallai y byddwch am fireinio ac ailgyflwyno’ch cais fel ei fod yn lleihau’r amser a ddangosir uchod er mwyn bod o fewn y 18 awr. Os bydd arnoch angen rhagor o gyngor mewn perthynas â’r mater hwn, mae croeso i chi gysylltu â’r Uned Rhyddid Gwybodaeth. Sylwch hefyd, os caiff y cais ei fireinio, nid yw’n dileu hawl yr awdurdod cyhoeddus i ddyfynnu esemptiadau os ydynt yn gymwys.
Er bod costau ychwanegol yn dileu rhwymedigaethau’r heddlu o dan y Ddeddf Rhyddid Gwybodaeth i ddarparu unrhyw wybodaeth bellach, fel arwydd o ewyllys da, rwyf wedi darparu gwybodaeth, mewn perthynas â chwestiynau 1 a 2 o’ch cais, y mae’n hawdd ei hadalw a’i hamlinellu isod. Hyderaf fod hyn yn ddefnyddiol, ond nid yw’n effeithio ar ein hawl gyfreithiol i ddibynnu ar y rheoliadau ffioedd ar gyfer gweddill eich cais.
Ymateb i C1
Cedwir 1-3 copi o Godau Ymarfer PACE ym mhob dalfa. Os oes angen rhagor o gopïau, gellir eu hargraffu.
Ymateb i C2
Blwyddyn Cyfanswm y ceisiadau gan rywun yn y ddalfa.
2021 51
2022 41
2023 62
Dylid nodi, o ganlyniad i’r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o’r fath, y gallai’r wybodaeth a ryddhawyd fod yn gywir neu beidio.
Ymhellach, dylid nodi hefyd ei bod yn ofynnol i heddluoedd yn y Deyrnas Unedig ddarparu ystadegau troseddau i gyrff y llywodraeth yn rheolaidd, a gosodir y meini prawf cofnodi yn genedlaethol. Fodd bynnag, nid yw’r systemau a ddefnyddir ar gyfer cofnodi’r ffigurau hyn yn rhai generig, nac ychwaith y gweithdrefnau a ddefnyddir yn lleol i gasglu’r data. Dylid nodi, am y rhesymau hyn, na ddylid defnyddio ymateb yr heddlu hwn i’ch cwestiynau at ddibenion cymharu ag unrhyw ymateb arall a gewch.
(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 15 Gorffennaf 2024)