Ystadegau defnyddio grym 601/2024

Cyfeirnod Rhyddid Gwybodaeth: 601/2024

Cais:

Ystadegau defnyddio grym yn ôl rhywedd swyddogion o’r data mwyaf cyfredol a gofnodwyd (yn debygol o fod rhwng mis Ebrill 2022 a mis Mawrth 2023, os nad yw data mis Ebrill 2023 i fis Mawrth 2024 wedi’u casglu eto).

Hoffwn weld dadansoddiad yn ôl y swyddogion gwrywaidd a benywaidd mewn perthynas â’r canlynol:

- tactegau a ddefnyddiwyd

- cyfanswm nifer y tactegau a ddefnyddiwyd

- rhesymau dros ddefnyddio grym

- ffactorau sy’n cyfrannu/effeithio (e.e. alcohol, cyffuriau, argyfwng iechyd meddwl ac ati)

- oedran tybiedig yr unigolion y defnyddiwyd grym arnynt

- rhywedd yr unigolyn dan sylw

- ethnigrwydd yr unigolyn

- sefyllfa lle mae grym yn cael ei ddefnyddio (arestio, stopio a chwilio, cadw o dan y Ddeddf

  Iechyd Meddwl ac ati)

- nodweddion yr unigolion (e.e. cyflyrau iechyd meddwl a chorfforol)

- canlyniad y grym a ddefnyddiwyd

- y rheswm dros ddefnyddio grym

- lleoliadau

- defnyddio Taser (gan gynnwys estyn allan, dot coch, wedi’i anelu, tanio, rhesymau dros

  ddefnyddio / ffactorau effaith)

- anafiadau i’r unigolyn (mân a difrifol)

- anafiadau i’r swyddog (mân a difrifol)

- unrhyw ffactorau eraill sy’n cael eu mesur ar ffurflen defnyddio grym

Ymateb 

Mae adran 1 o Ddeddf Rhyddid Gwybodaeth 2000 yn gosod dwy ddyletswydd ar awdurdodau cyhoeddus. Oni bai bod esemptiadau yn gymwys, y ddyletswydd gyntaf yn adran 1(1)(a) yw cadarnhau neu wadu a ydyw’r wybodaeth a bennir mewn cais yn cael ei chadw. Yr ail ddyletswydd yn adran 1(1)(b) yw datgelu gwybodaeth y cadarnhawyd ei bod yn cael ei chadw.

Lle dibynnir ar esemptiadau mae adran 17 o Ddeddf Rhyddid Gwybodaeth 2000 yn ei gwneud yn ofynnol i Heddlu Dyfed-Powys, wrth wrthod darparu gwybodaeth o’r fath (gan fod yr wybodaeth wedi’i hesemptio), roi i chi, y ceisydd, hysbysiad sydd: (a) yn datgan y ffaith honno, (b) yn pennu’r esemptiad o dan sylw, ac (c) yn datgan (os na fyddai hynny’n amlwg fel arall) pam bod yr esemptiad yn gymwys.

Gallaf gadarnhau bod Heddlu Dyfed-Powys yn cadw’r wybodaeth yr ydych wedi gofyn amdani. Fodd bynnag, rydym yn atal yr holl wybodaeth y gofynnwyd amdani gan ein bod yn ystyried bod adran 12(1) ‘Esemptiad lle mae’r gost cydymffurfio yn uwch na’r terfyn priodol’, yn gymwys iddi.

Adran 12(1) – Esemptiad lle mae’r gost cydymffurfio yn uwch na’r terfyn priodol

Mae adran 12(1) yn datgan: “Nid yw adran 1(1) yn ei gwneud yn ofynnol i awdurdod cyhoeddus gydymffurfio â chais am wybodaeth os yw’r awdurdod yn amcangyfrif y byddai’r gost o gydymffurfio â’r cais yn uwch na’r terfyn priodol.”

Mae’r gost o ddarparu’r wybodaeth y gofynnir amdani mewn perthynas â’ch cais yn uwch na’r swm y mae’n ofynnol yn gyfreithiol i ni ymateb iddo, h.y. mae’r gost o leoli ac adalw’r wybodaeth yn uwch na’r ‘lefel briodol’ fel y nodir yn Rheoliadau Rhyddid Gwybodaeth a Diogelu Data (Terfyn a Ffioedd Addas) 2004.Amcangyfrifir y byddai’n cymryd yn hwy na 18 awr (h.y. lleiafswm o 721 awr) i gydymffurfio â’r rhan hon o’ch cais. Gellir dod o hyd i’r rheoliadau yn https://www.legislation.gov.uk/cy/uksi/2004/3244

Mae’r Adran Rhyddid Gwybodaeth wedi cael ei hysbysu nad yw’r wybodaeth mewn perthynas â’ch cais am ystadegau defnyddio grym yn ôl rhywedd swyddogion yn cael ei chadw mewn fformat hawdd ei adalw.Yng ngoleuni hyn ac er mwyn cael yr wybodaeth sy’n berthnasol i’ch cais o fewn yr amserlen a bennwyd yn gywir, byddai angen i Heddlu Dyfed-Powys gyrchu ac adolygu 8,653 o gofnodion, a byddai’n rhaid adolygu pob cofnod â llaw i ganfod rhywedd y swyddogion.

Canfuwyd hefyd y byddai’n cymryd o leiaf pum munud i adolygu a chael yr wybodaeth ar gyfer un cofnod mewn perthynas â’ch cais. 

Mae’r broses a amlinellir yn arwain at yr amcangyfrif amser isod.

Ebrill 2022 – Mawrth 2023: 8,653 x 5 munud = 43,265/60 = 721 awr

Amcangyfrif amser i gwblhau’r dasg = 721 awr

Yn unol felly â Deddf Rhyddid Gwybodaeth 2000, mae’r llythyr hwn yn gweithredu fel hysbysiad gwrthod i’r cyfan o’r cais hwn o dan adran 17(5), sef bod rhaid i awdurdod cyhoeddus sydd, mewn perthynas ag unrhyw gais am wybodaeth, yn dibynnu ar hawliad y mae adran 12 neu adran 14 yn gymwys iddo, roi hysbysiad i’r ymgeisydd yn datgan y ffaith honno o fewn yr amser ar gyfer cydymffurfio ag adran 1(1).

Efallai y byddwch am fireinio ac ailgyflwyno’ch cais fel ei fod yn lleihau’r amser a ddangosir uchod er mwyn bod o fewn y 18 awr. Os bydd arnoch angen rhagor o gyngor mewn perthynas â’r mater hwn, mae croeso i chi gysylltu â’r Uned Rhyddid Gwybodaeth. Sylwer hefyd, os caiff y cais ei fireinio, nad yw’n dileu hawl yr awdurdod cyhoeddus i ddyfynnu esemptiadau os ydynt yn berthnasol.                                               

Dylid nodi, o ganlyniad i’r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o’r fath, y gallai’r wybodaeth a ryddheir fod yn gywir neu beidio.

Ymhellach, dylid nodi hefyd ei bod yn ofynnol i heddluoedd yn y Deyrnas Unedig ddarparu ystadegau trosedd i gyrff y llywodraeth yn rheolaidd, a gosodir y meini prawf cofnodi yn genedlaethol. Fodd bynnag, nid yw’r systemau a ddefnyddir ar gyfer cofnodi’r ffigurau hyn yn rhai generig, nac ychwaith y gweithdrefnau a ddefnyddir yn lleol i gasglu’r data. Dylid nodi, am y rhesymau hyn, na ddylid defnyddio ymateb yr heddlu hwn i’ch cwestiynau at ddibenion cymharu ag unrhyw ymateb arall a gewch.

(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 11 Gorffennaf 2024)