Hunanladdiad tybiedig ymhlith menywod 288/2024

Cyfeirnod Rhyddid Gwybodaeth: 288/2024

Cais:

O dan y Ddeddf Rhyddid Gwybodaeth, a fyddech cystal â dweud wrthyf, ar gyfer y blynyddoedd 2018, 2019, 2020, 2021, 2022 a 2023 [nifer cyfredol ar 12 Hydref]:

1. Nifer yr achosion o hunanladdiad tybiedig ymhlith menywod yr ymwelwyd â hwy gan swyddogion heddlu lle bu cam-drin domestig yn bryder / wedi’i gofnodi’n flaenorol [gall hyn fod yn adroddiadau blaenorol sy’n gysylltiedig â’r cyfeiriad neu’r unigolyn penodol hwnnw].
2. Os yw’n berthnasol, nifer yr euogfarnau o droseddwr gwrywaidd am droseddau cam-drin domestig ar ôl i fenyw ladd ei hun.

Eglurhad:

A ydyw ‘euogfarnau’ yn cyfeirio at eu gorchymyn i ymddangos gerbron llys neu eu cael yn euog yn y llys?

Lle y’u cafwyd yn euog yn y llys. 

Ymateb:

Mae adran 1 o Ddeddf Rhyddid Gwybodaeth 2000 yn gosod dwy ddyletswydd ar awdurdodau cyhoeddus. Oni bai bod esemptiadau’n gymwys, y ddyletswydd gyntaf yn adran 1(1)(a) yw cadarnhau neu wadu a ydyw’r wybodaeth a bennir mewn cais yn cael ei chadw. Yr ail ddyletswydd yn adran 1(1)(b) yw datgelu gwybodaeth y cadarnhawyd ei bod yn cael ei chadw.

Gallaf gadarnhau bod y gost o benderfynu a ydyw unrhyw wybodaeth sy’n ymwneud â’r cais hwn yn cael ei chadw ai peidio yn uwch na’r swm y mae’n ofynnol yn gyfreithiol i ni ymateb iddo, felly rydym yn atal yr holl wybodaeth y gofynnwyd amdani gan ein bod yn ystyried bod adran 12(2) ‘Esemptiad lle mae’r gost cydymffurfio yn uwch na’r terfyn priodol’, yn gymwys iddi.

Lle dibynnir ar esemptiadau, mae adran 17 o Ddeddf Rhyddid Gwybodaeth 2000 yn ei gwneud yn ofynnol i Heddlu Dyfed-Powys, wrth wrthod darparu gwybodaeth o’r fath (gan fod yr wybodaeth wedi’i hesemptio), roi i chi, y ceisydd, hysbysiad sydd: (a) yn datgan y ffaith honno, (b) yn pennu’r esemptiad o dan sylw, ac (c) yn datgan (os na fyddai hynny’n amlwg fel arall) pam bod yr esemptiad yn gymwys. Mae’r esemptiad canlynol wedi’i gymhwyso i’r holl wybodaeth yr ydych wedi gofyn amdani:

Adran 12(2) – Esemptiad lle mae’r gost cydymffurfio yn uwch na’r terfyn priodol

Mae adran 12(2) yn datgan: “Nid yw is-adran (1) yn esemptio’r awdurdod cyhoeddus rhag ei rwymedigaeth i gydymffurfio â pharagraff (a) o adran 1(1) oni bai y byddai’r gost amcangyfrifedig o gydymffurfio â’r paragraff hwnnw yn unig yn uwch na’r terfyn priodol.”

Mae’r gost o benderfynu pa wybodaeth sy’n cael ei chadw, os o gwbl, sy’n berthnasol i’ch cais yn uwch na’r swm y mae’n ofynnol yn gyfreithiol i ni ymateb iddo; h.y. mae’r gost o leoli ac adalw’r wybodaeth yn uwch na’r ‘lefel briodol’ fel y nodir yn Rheoliadau Rhyddid Gwybodaeth a Diogelu Data (terfyn a ffioedd addas) 2004. Amcangyfrifir y byddai’n cymryd yn hwy na 18 awr (h.y. lleiafswm o 345 awr) i gydymffurfio â’ch cais. Gellir gweld y rheoliadau yn

https://www.legislation.gov.uk/cy/uksi/2004/3244.

Mae’r Adran Rhyddid Gwybodaeth wedi cael ei hysbysu nad yw’r wybodaeth mewn perthynas â’r cais cyfan yn cael ei chadw mewn fformat hawdd ei adalw. Mae hyn oherwydd y ffaith, gyda’n systemau cofnodi presennol, y byddai’n rhaid i ni adolygu pob cofnod ‘marwolaeth sydyn / hunanladdiad’ yn unigol i ganfod a oedd yn cynnwys gwybodaeth sy’n berthnasol i’ch cais, gan nad oes gennym unrhyw hidlwyr cymwys i graffu ar y data.

Felly, er mwyn canfod a ydym yn cadw unrhyw wybodaeth sy’n berthnasol i’ch cais, byddai angen archwilio pob cofnod o farwolaeth sydyn / hunanladdiad a grëwyd yn ystod yr amserlen a bennir.

Canfuwyd bod cyfanswm o 4,144 o gofnodion galwadau marwolaeth sydyn / hunanladdiad wedi’u cofnodi o fewn yr amserlen benodedig ac amcangyfrifwyd y byddai’n cymryd 10 munud ar gyfartaledd i ymchwilio i bob cofnod unigol. Manylir ar yr amcangyfrif amser perthnasol isod:

2020 – 1,182 o gofnodion perthnasol x 5 munud fesul cofnod = 98.5 awr

2021 – 1,120 o gofnodion perthnasol x 5 munud fesul cofnod = 93.3 awr

2022 – 1,182 o gofnodion perthnasol x 5 munud fesul cofnod = 98.5 awr

2023 (hyd at 12 Hydref 2023) – 660 o gofnodion perthnasol x 5 munud fesul cofnod = 55 awr

Sylwer: Mewn perthynas â 2018 a 2019, nid yw nifer y cofnodion y byddai angen eu holi wedi’u hadfer ar gyfer y blynyddoedd hyn oherwydd newid diweddar yn systemau’r heddlu ar gyfer cofnodi digwyddiadau. Fodd bynnag, byddai ffigurau tebyg wedi cael eu cofnodi yn y blynyddoedd hynny ag a gofnodwyd yn 2020 – 2022, felly byddai amcangyfrif amser ychwanegol i’r uchod yn berthnasol er mwyn darparu ymateb mewn perthynas â 2018 a 2019.

Amser a amcangyfrifir ar gyfer y cais cyfan = 345.3 awr

Yn unol â Deddf Rhyddid Gwybodaeth 2000, mae’r llythyr hwn yn gweithredu fel hysbysiad gwrthod i’r cyfan o’r cais hwn o dan Adran 17(5). Rhaid i awdurdod cyhoeddus sydd, mewn perthynas ag unrhyw gais am wybodaeth, yn dibynnu ar hawliad y mae adran 12 neu adran 14 yn gymwys iddo, roi hysbysiad i’r ceisydd yn datgan y ffaith honno o fewn yr amser ar gyfer cydymffurfio ag adran 1(1). Efallai y byddwch am fireinio ac ailgyflwyno’ch cais fel ei fod yn lleihau’r amser a ddangosir uchod er mwyn bod o fewn y 18 awr. Os bydd arnoch angen rhagor o gyngor mewn perthynas â’r mater hwn, mae croeso i chi gysylltu â mi.

Sylwer hefyd, os caiff y cais ei fireinio, nid yw’n dileu hawl yr heddlu i ddyfynnu esemptiadau os ydynt yn berthnasol.                                              

Dylid nodi, o ganlyniad i’r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o’r fath, y gallai’r wybodaeth a ryddheir fod yn gywir neu beidio.

(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 22 Mawrth 2024)