Troseddau’r metafyd 226/2024

Cyfeirnod Rhyddid Gwybodaeth: 226/2024

Cais:

Cais gwreiddiol:

Faint o droseddau yn y metafyd sydd wedi cael eu hadrodd i’ch heddlu ers 2021? Gofod realiti rhithwir yw’r metafyd lle gall defnyddwyr ryngweithio o fewn amgylchedd a gynhyrchir gan gyfrifiadur, e.e. gêm Meta Horizon Worlds. Os yn bosibl, a allwch chi fanylu ar natur y drosedd honedig, yr amser yr adroddwyd amdani ac ai’r penderfyniad yn yr achos oedd ymchwilio ai peidio?

Cais diwygiedig:

Er mwyn cyfyngu’r chwilio, a allwch chi edrych am y termau canlynol?

Metafyd

Realiti rhithwir

Horizon Worlds

Ymateb:

Mae adran 1 o Ddeddf Rhyddid Gwybodaeth 2000 yn gosod dwy ddyletswydd ar awdurdodau cyhoeddus. Oni bai bod esemptiadau’n gymwys, y ddyletswydd gyntaf yn adran 1(1)(a) yw cadarnhau neu wadu a ydyw’r wybodaeth a bennir mewn cais yn cael ei chadw. Yr ail ddyletswydd yn adran 1(1)(b) yw datgelu gwybodaeth y cadarnhawyd ei bod yn cael ei chadw.

Gallaf gadarnhau bod y gost o benderfynu a ydyw unrhyw wybodaeth sy’n ymwneud â’r cais hwn yn cael ei chadw ai peidio yn uwch na’r swm y mae’n ofynnol yn gyfreithiol i ni ymateb iddo, felly rydym yn atal yr holl wybodaeth y gofynnwyd amdani gan ein bod yn ystyried bod adran 12(2) ‘Esemptiad lle mae’r gost cydymffurfio yn uwch na’r terfyn priodol’, yn gymwys iddi.

Lle dibynnir ar esemptiadau, mae adran 17 o Ddeddf Rhyddid Gwybodaeth 2000 yn ei gwneud yn ofynnol i Heddlu Dyfed-Powys, wrth wrthod darparu gwybodaeth o’r fath (gan fod yr wybodaeth wedi’i hesemptio), roi i chi, y ceisydd, hysbysiad sydd: (a) yn datgan y ffaith honno, (b) yn pennu’r esemptiad o dan sylw, ac (c) yn datgan (os na fyddai hynny’n amlwg fel arall) pam bod yr esemptiad yn gymwys. Mae’r esemptiad canlynol wedi’i gymhwyso i’r holl wybodaeth yr ydych wedi gofyn amdani:

Adran 12(2) – Esemptiad lle mae’r gost cydymffurfio yn uwch na’r terfyn priodol

Mae adran 12(2) yn datgan: “Nid yw is-adran (1) yn esemptio’r awdurdod cyhoeddus rhag ei rwymedigaeth i gydymffurfio â pharagraff (a) o adran 1(1) oni bai y byddai’r gost amcangyfrifedig o gydymffurfio â’r paragraff hwnnw yn unig yn uwch na’r terfyn priodol.”

Mae’r gost o benderfynu pa wybodaeth sy’n cael ei chadw, os o gwbl, sy’n berthnasol i’ch cais yn uwch na’r swm y mae’n ofynnol yn gyfreithiol i ni ymateb iddo; h.y. mae’r gost o leoli ac adalw’r wybodaeth yn uwch na’r ‘lefel briodol’ fel y nodir yn Rheoliadau Rhyddid Gwybodaeth a Diogelu Data (Terfyn a Ffioedd Addas) 2004. Amcangyfrifir y byddai’n cymryd yn hwy na 18 awr (h.y. lleiafswm o 36,687 awr) i gydymffurfio â’ch cais. Gellir gweld y rheoliadau yn

https://www.legislation.gov.uk/cy/uksi/2004/3244.

Mae’r Adran Rhyddid Gwybodaeth wedi cael ei hysbysu nad yw’r wybodaeth mewn perthynas â’r cais cyfan yn cael ei chadw mewn fformat hawdd ei adalw. Mae hyn oherwydd y ffaith na allwn, gyda’n system cofnodi troseddau bresennol, chwilio am eiriau allweddol ac felly byddai’n rhaid i ni adolygu pob cofnod o ddigwyddiad â llaw i ganfod a ydoedd wedi’i restru yn cynnwys y geiriau metafyd/realiti rhithwr/Horizon Worlds.

Felly, er mwyn canfod a oes unrhyw wybodaeth berthnasol i’ch cais, byddai angen ymchwilio i bob cofnod digwyddiad a grëwyd yn ystod yr amserlen a nodwyd.

Canfuwyd bod cyfanswm o 440,247 o ddigwyddiadau wedi’u cofnodi y byddai angen eu hymchwilio’n unigol ac amcangyfrifwyd y byddai’n cymryd pum munud ar gyfartaledd i ymchwilio i bob cofnod unigol. Manylir ar yr amcangyfrif amser perthnasol isod:

2021 – 136,328 o gofnodion digwyddiadau x 5 munud = 11,360.7 awr

2022 – 138,304 o gofnodion digwyddiadau x 5 munud = 11,525.3 awr

2023 – 55,951 + 97,451 o gofnodion digwyddiadau x 5 munud =  12,783.5 awr

2024 (hyd at 31 Ionawr 2024) – 12,213 o gofnodion digwyddiadau x 5 munud = 1,017.7 awr

Amser a amcangyfrifir ar gyfer y cais cyfan = 36,687 awr

Yn unol â Deddf Rhyddid Gwybodaeth 2000, mae’r llythyr hwn yn gweithredu fel hysbysiad gwrthod i’r cyfan o’r cais hwn o dan adran 17(5), sef bod rhaid i awdurdod cyhoeddus sydd, mewn perthynas ag unrhyw gais am wybodaeth, yn dibynnu ar hawliad y mae adran 12 neu adran 14 yn gymwys iddo roi hysbysiad i’r ymgeisydd yn datgan y ffaith honno o fewn yr amser ar gyfer cydymffurfio ag adran 1(1). Efallai y byddwch am fireinio ac ailgyflwyno’ch cais fel ei fod yn lleihau’r amser a ddangosir uchod er mwyn bod o fewn y 18 awr. Os bydd arnoch angen rhagor o gyngor mewn perthynas â’r mater hwn, mae croeso i chi gysylltu â mi.

Sylwer hefyd, os caiff y cais ei fireinio, nad yw’n dileu hawl yr heddlu i ddyfynnu esemptiadau os ydynt yn berthnasol.                                               

Dylid nodi, o ganlyniad i’r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o’r fath, y gallai’r wybodaeth a ryddheir fod yn gywir neu beidio.

Ymhellach, dylid nodi hefyd ei bod yn ofynnol i heddluoedd yn y Deyrnas Unedig ddarparu ystadegau trosedd i gyrff y llywodraeth yn rheolaidd, a gosodir y meini prawf cofnodi yn genedlaethol. Fodd bynnag, nid yw’r systemau a ddefnyddir ar gyfer cofnodi’r ffigurau hyn yn rhai generig, nac ychwaith y gweithdrefnau a ddefnyddir yn lleol i gasglu’r data. Dylid nodi, am y rhesymau hyn, na ddylid defnyddio ymateb yr heddlu hwn i’ch cwestiynau at ddibenion cymharu ag unrhyw ymateb arall a gewch.

(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 8 Mawrth 2024)