Damweiniau traffig ar y ffyrdd 548/2024
Cyfeirnod Rhyddid Gwybodaeth: 548/2024
Cais:
Hoffwn wybod, yn benodol, cyfanswm nifer y damweiniau traffig ar y ffyrdd wedi’u dadansoddi yn ôl terfyn cyflymder ffyrdd (e.e. 20mya, 30mya, 40mya ac ati), yn ôl difrifoldeb y damweiniau, ac yn ôl y cyfnodau canlynol:
- Damweiniau yn ystod y chwe mis cyn cyflwyno’r terfyn cyflymder diofyn o 20mya
- Damweiniau yn ystod y chwe mis ar ôl cyflwyno’r terfyn cyflymder diofyn o 20mya
Rwyf am i’r data hyn nodi unrhyw effaith gadarnhaol o gyflwyno’r terfyn cyflymder o 20mya o ran damweiniau.
Ymateb:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, ond mae’r esemptiad canlynol wedi’i gymhwyso i’r wybodaeth honno:
Adran 21 – Gwybodaeth sy’n hygyrch drwy ddulliau eraill
Mae adran 1 o Ddeddf Rhyddid Gwybodaeth 2000 yn gosod dwy ddyletswydd ar awdurdodau cyhoeddus. Oni bai bod esemptiadau’n gymwys, y ddyletswydd gyntaf yn adran 1(1)(a) yw cadarnhau neu wadu a ydyw’r wybodaeth a bennir mewn cais yn cael ei chadw. Yr ail ddyletswydd yn adran 1(1)(b) yw datgelu gwybodaeth y cadarnhawyd ei bod yn cael ei chadw.
Lle dibynnir ar esemptiadau, mae adran 17 o Ddeddf Rhyddid Gwybodaeth 2000 yn ei gwneud yn ofynnol i Heddlu Dyfed-Powys, wrth wrthod darparu gwybodaeth o’r fath (gan fod yr wybodaeth yn esempt), roi hysbysiad i chi, y ceisydd, sydd:
(a) yn datgan y ffaith honno,
(b) yn pennu’r esemptiad dan sylw, ac
(c) yn datgan (os na fyddai hynny’n amlwg fel arall) pam fod yr esemptiad yn gymwys.
Mae’r esemptiad uchod wedi’i gymhwyso mewn perthynas â’r holl ddata a gofnodwyd hyd at ddiwedd 2023, oherwydd bod yr wybodaeth y gofynnwyd amdani eisoes wedi’i chyhoeddi, a bod modd ei chyrchu drwy’r hyperddolen ganlynol:
Gwrthdrawiadau ffyrdd wedi’u cofnodi gan yr heddlu: dangosfwrdd rhyngweithiol | LLYW.CYMRU
Yn ogystal â hyn, mae’r esemptiad canlynol wedi’i gymhwyso mewn perthynas â’r holl ddata a gofnodwyd ers 2024:
Adran 22 – Gwybodaeth y bwriedir ei chyhoeddi yn y dyfodol
“(1) Mae gwybodaeth yn wybodaeth esempt—
(a) os ydyw’r wybodaeth yn cael ei chadw gan yr awdurdod cyhoeddus gyda’r bwriad o’i chyhoeddi, gan yr awdurdod neu unrhyw unigolyn arall, ar ryw ddyddiad yn y dyfodol (boed hynny wedi’i benderfynu ai peidio),
(b) os oedd yr wybodaeth eisoes yn cael ei chadw gyda golwg ar gyhoeddiad o’r fath ar yr adeg y gwnaed y cais am wybodaeth, ac
(c) os ydyw’n rhesymol ym mhob amgylchiad i atal yr wybodaeth rhag cael ei datgelu tan y dyddiad y cyfeirir ato ym mharagraff (a).”
Mae adran 22 yn esemptiad amodol ar sail dosbarth a rhaid ystyried a fyddai darparu’r wybodaeth cyn y dyddiad cyhoeddi disgwyliedig o fudd i’r cyhoedd.
Prawf budd y cyhoedd
Ystyriaethau o blaid datgelu:
Mae Heddlu Dyfed-Powys wedi ymrwymo i ddangos ethos o ddidwylledd, tryloywder ac atebolrwydd, a byddai datgelu’r wybodaeth yn cael ei weld fel rhywbeth sy’n rhoi’r wybodaeth ddiweddaraf ac yn dangos ymwybyddiaeth barhaus. Byddai gwybodaeth gyfredol yn gwella gwybodaeth y cyhoedd o’r pwnc ac efallai y byddai hynny’n llywio trafodaeth gyhoeddus ar y pwnc hwn yn well.
Ystyriaethau o blaid peidio â datgelu:
Mae’r wybodaeth y gofynnwyd amdani yn cael ei chyhoeddi’n rhagweithiol, ac yn cael ei choladu a’i gwirio ar hyn o bryd cyn ei chyhoeddi. Felly, byddai datgelu’r wybodaeth y gofynnwyd amdani o dan y Ddeddf Rhyddid Gwybodaeth yn achub y blaen ar y datgeliad hwn. Mae prosesau cyhoeddi ar waith a bydd datgelu y tu allan i’r prosesau hynny a drefnwyd yn golygu bod prosesau o’r fath yn anarferedig. Mae prosesau o’r fath ar waith i sicrhau bod gwybodaeth yn cael ei chyhoeddi’n rhagweithiol, sy’n cyd-fynd â’r ethos o fod yn agored ac yn dryloyw, a geir yn Neddf Rhyddid Gwybodaeth 2000.
Prawf cydbwysedd
Mae angen cydbwyso ffactorau i weld a ydynt o blaid datgelu neu beidio â datgelu’r wybodaeth. Yn yr achos hwn, yr ystyriaeth gryfaf ar gyfer datgelu yw dangos ethos o fod yn agored, yn dryloyw ac yn atebol, gan bwyso a mesur yn erbyn yr ystyriaeth am beidio â datgelu, sef, yn yr achos hwn, bod yr wybodaeth y gofynnwyd amdani yn cael ei chynhyrchu a’i chyhoeddi’n rhagweithiol. Mae cyhoeddi gwybodaeth yn rhagweithiol yn helpu i fodloni prawf budd y cyhoedd, byddai datgelu’r wybodaeth yn gynharach yn golygu bod prosesau o’r fath yn anarferedig, a byddai’n rhaid i’r heddlu gyflwyno ceisiadau rhyddid gwybodaeth yn barhaus pan fydd proses yn ei lle sy’n sicrhau bod yr heddlu yn agored ac yn dryloyw mewn perthynas â gwybodaeth o’r fath. Felly, ar hyn o bryd, nid yw’r prawf cydbwysedd ar gyfer datgelu yn cael ei wireddu.
Felly, o fewn holl amgylchiadau’r achos, mae budd y cyhoedd o gadw’r esemptiad yn drech na budd y cyhoedd o ddatgelu’r wybodaeth.
Dylid nodi, o ganlyniad i’r systemau a fabwysiadwyd gan Heddlu Dyfed-Powys mewn perthynas â chofnodi gwybodaeth o’r fath, y gallai’r wybodaeth a ryddheir fod yn gywir neu beidio.
(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 20 Mehefin 2024)