Polisi Adleoli Swyddogion Heddlu

1. DATGANIAD POLISI

1.1      Diben y polisi hwn yw amlinellu meini prawf cymhwysedd a lefelau tâl sydd ar gael i unigolion, mewn perthynas â chymorth adleoli.  

1.2      Lle y’i cymeradwyir yn briodol, bydd yr heddlu’n ariannu costau symud ac adleoli penodol o fewn terfyn ariannol gosod.

1.3      Nod y polisi hwn yw:

• Er mwyn hwyluso trosglwyddo swyddogion heddlu’n effeithiol o gwmpas yr ardal Heddlu, mae treuliau adleoli ar gael i ymgeiswyr llwyddiannus sy’n adleoli eu cartref ar ôl cael eu penodi i swydd newydd mewn lleoliad newydd o fewn yr ardal Heddlu.
• Yn amodol ar gymeradwyaeth ymlaen llaw gan Gyfarwyddwr yr Adran Datblygu Pobl a’r Sefydliad, nodir hawl ar gyfer treuliau adleoli yn yr hysbyseb ar gyfer y swydd, ac fe’i cadarnheir drwy’r llythyr penodi.
• Mae treuliau adleoli ond yn daladwy lle mae Cyfarwyddwr yr Adran Datblygu Pobl a’r Sefydliad wedi cytuno cyn hysbysebu. Bydd y daliwr cyllideb yn gyfrifol am y costau, gyda chyfraniad y cytunir arno o’r gyllideb Datblygu Pobl a’r Sefydliad ganolog.

1.4      Gall treuliau fod ar gael hefyd yn ôl disgresiwn y Prif Gwnstabl oherwydd rheidiau dyletswydd heddlu neu er budd effeithlonrwydd yr Heddlu.

1.5      Ni fydd treuliau adleoli’n cael eu talu i swyddogion islaw rheng Prif Gwnstabl Cynorthwyol sy’n trosglwyddo’n wirfoddol o un Heddlu i un arall.

1.6      Bydd pecynnau adleoli ond yn cael eu darparu os pennwyd bod eu hangen o ganlyniad i angen busnes sefydliadol ac yn unol â Rheoliadau’r Heddlu 2003.

 

2. PWERAU A GOFYNION POLISI/CYFREITHIOL

2.1      Allanol:

• Rheoliadau a Phenderfyniadau’r Heddlu 2003
• Deddf Treth Incwm (Enillion a Phensiynau) 2003
• Canllawiau “Cyfraniadau treth incwm ac Yswiriant Gwladol ar becynnau adleoli” CThEF

 

CYFRIFOLDEBAU

2.2      Yr Arbenigwr Cyflogres (yr Adran Datblygu Pobl a’r Sefydliad) sydd â chyfrifoldeb cyffredinol am weithrediad effeithiol y polisi hwn ac am sicrhau cydymffurfiaeth â’r fframwaith statudol perthnasol.

2.3      Yr Arbenigwr Cyflogres a Phennaeth yr Adran Adnoddau Dynol fydd â chyfrifoldeb o ddydd i ddydd am weithredu’r polisi a sicrhau ei fod yn cael ei gynnal a’i adolygu.

2.4      Rhaid i’r Cyfarwyddwr Cyllid / Prif Swyddog Cyllid gytuno ar unrhyw amcangyfrifon cyn ymrwymo i unrhyw ymrwymiadau.

 

3. CYMHWYSEDD

3.1      Fel arfer, pennir yr hawl i becynnau adleoli yn seiliedig ar yr amgylchiadau canlynol:

• Mae’r unigolyn yn aelod o reng Cymdeithas Prif Swyddogion yr Heddlu (h.y. Prif Gwnstabl Cynorthwyol, Dirprwy Brif Gwnstabl neu Brif Gwnstabl) a disgwylir iddo symud cartref pan fydd yn ymuno â’r Heddlu.
• Mewn achosion eraill, disgwylir iddo drosglwyddo’n statudol a symud cartref, yn seiliedig ar farn y Prif Gwnstabl, er budd effeithlonrwydd y Sefydliad a/neu oherwydd rheidiau dyletswydd. (Nid yw hyn yn berthnasol ar gyfer trosglwyddiadau gwirfoddol)

3.2      Nid yw pecynnau adleoli’n berthnasol ar gyfer swyddogion heddlu sy’n ymuno â Heddlu Dyfed-Powys i gychwyn.

 

4. GWARIANT A GANIATEIR

4.1      Lle mae Swyddog Heddlu’n symud cartref, yn seiliedig ar y dybiaeth:

• Mai’r Swyddog Heddlu oedd perchennog y cartref blaenorol; neu
• Na allai’r swyddog fod wedi derbyn tŷ addas neu ddod o hyd i lety rhent addas o fewn pellter rhesymol o’i fan gwaith arferol
• Na fyddai’n ymarferol i’r Swyddog gymudo i’w le gwaith newydd bob dydd.
• Ei fod yn byw 30 milltir neu fwy i ffwrdd o ffin Heddlu Dyfed-Powys.

4.2      Mae’r canlynol yn daladwy o dan Reoliadau’r Heddlu:

• Costau sy’n deillio’n rhesymol o symud, gan gynnwys ffioedd symud a chostau storio, yn erbyn amcangyfrifon y cytunwyd arnynt ymlaen llaw
• Ffioedd cyfreithwyr ac asiantiaid tai sy’n deillio’n rhesymol o gael gwared ar gartref blaenorol, yn erbyn amcangyfrifon y cytunwyd arnynt ymlaen llaw
• Ffioedd cyfreithwyr a Threth Stamp sy’n deillio’n rhesymol o gael eiddo newydd, yn erbyn amcangyfrifon y cytunwyd arnynt ymlaen llaw,

4.3      Lle mae’r Swyddog Heddlu’n berchen ar ddau eiddo a/neu’n denant cyfreithiol dau eiddo ar yr un pryd, mae’r canlynol hefyd yn daladwy o dan Reoliadau’r Heddlu:

• Llog morgais neu rent sy’n daladwy mewn perthynas â’r cartref blaenorol am y 26 wythnos gyntaf ar ôl symud, a all gael ei estyn yn ôl disgresiwn y Prif Gwnstabl ar yr amod ei fod yn fodlon bod pob cam rhesymol yn cael ei gymryd i gael gwared ar yr eiddo.
• Unrhyw wahaniaeth mewn atebolrwydd Treth Gyngor o’i gymharu â’r atebolrwydd a oedd yn bodoli ar yr eiddo blaenorol am y 26 wythnos gyntaf ar ôl symud, a all gael ei estyn yn ôl disgresiwn y Prif Gwnstabl ar yr amod ei fod yn fodlon bod pob cam rhesymol yn cael ei gymryd i gael gwared ar yr eiddo.

4.4      Ad-dalu treuliau achlysurol mewn perthynas â symud o eitemau sy’n gysylltiedig â gwerthu’r cartref blaenorol, e.e. Newid a/neu ailosod llenni, carpedi, cysgodlenni a gosodiadau cysylltiedig; ailosod gorchudd llawr; glanhau carpedi; gosod peiriannau golchi; gosod ffwrn nwy/trydan; gosod oergell/rhewgell nwy; gosod erial teledu; ailaddurno tu mewn – deunyddiau a llafur. Rhaid i unrhyw gais gael ei gefnogi gan anfonebau manwl wedi eu derbynebu.

4.5      Rhaid i unigolion sydd wedi derbyn arian am werthu eitemau o’u hen gartref sy’n cael eu newid am eitemau newydd o dan 4.4 uchod dynnu’r symiau hynny o’u hawl ar gyfer ad-daliad er mwyn osgoi oblygiadau treth.

4.6      Dylid rhoi amcangyfrif a chytuno â’r Cyfarwyddwr Cyllid / Prif Swyddog Cyllid cyn ymrwymo i unrhyw ymrwymiadau. Er mwyn bod yn gymwys ar gyfer ad-daliad, rhaid i eitem o wariant symud fod yn ofynnol, yn rhesymol, ac wedi’i gefnogi gan dderbynneb.

4.7      Mae’n bwysig nodi nad yw ad-daliadau morgais a threth gyngor yn gymwys ar gyfer eithriad o dreth ac yn ddarostyngedig i dreth a Chyfraniadau Yswiriant Gwladol yn llawn.

 

5. TERFYN ARIANNOL

5.1      Caiff Swyddogion Heddlu hawlio hyd at £19,000 mewn treuliau adleoli bob tro maen nhw’n symud.

 

6. RHWYMEDIGAETH TRETH

6.1      Codir treth ar bob cost adleoli uwchlaw trothwy CThEF o £8,000 yn ogystal â chyfraniadau Yswiriant Gwladol Dosbarth 1A (Cyflogwyr).

6.2      Bydd rhai eitemau, megis llog morgais, yn denu cyfraniadau treth ac Yswiriant Gwladol Dosbarth 1A (Cyflogwyr) hyd yn oed os nad yw gwerth y pecyn cyffredinol yn fwy na throthwy Cyllid y Wlad.

6.3      Daw costau yn sgil rhwymedigaeth treth personol ar symiau a dderbynnir sy’n uwch na therfynau presennol CThEF, sef £8,000, a’r Swyddog Heddlu unigol sydd fel arfer yn gyfrifol am dalu unrhyw dreth sy’n daladwy.

6.4      Bydd yr Heddlu’n hysbysu CThEF am y budd trethadwy uwchlaw’r trothwy o £8,000 yn flynyddol drwy ddatganiad treth P11d.

6.5      Mae Cyllid a Thollau EF yn gosod terfyn amser ar adleoli. Rhaid adleoli cyn diwedd y flwyddyn dreth (5 Ebrill) ar ôl yr un lle mae’r unigolyn yn dechrau ei swydd newydd.

 

7. COFNODION ARIANNOL

7.1      Dylid glynu wrth weithdrefnau caffael yn llawn a rhaid cael tri dyfynbris ar gyfer ffioedd adleoli a symud.

7.2      Dylai’r Swyddog Heddlu dalu anfonebau mewn perthynas â threuliau adleoli dilys yn y lle cyntaf. Bydd y costau hyn yn cael eu hadennill drwy’r ffurflen dreuliau, wedi’i hawdurdodi’n briodol gyda chopïau o anfonebau ynghlwm. Rhaid cyflwyno tystiolaeth hefyd sy’n dangos bod gweithdrefnau caffael wedi’u dilyn.

7.3      Dylai’r tîm Adnoddau Dynol anfon y ffurflenni treuliau wedi’u hawdurdodi a gwaith papur ategol at yr Arbenigwr Cyflogres, a fydd yn cynnal cofnod o dreuliau adleoli ar gyfer dibenion treth.

7.4      Lle mae’r Prif Gwnstabl o’r farn nad yw’r Swyddog Heddlu wedi cymryd pob cam rhesymol i leihau neu derfynu ei dreuliau, gellir cyfyngu ad-daliad i daliadau y byddai’n rhaid i’r Swyddog Heddlu fod wedi’u gwneud pe bai wedi cymryd pob cam rhesymol i leihau’r atebolrwydd.

 

 

8. TERFYNU CYFLOGAETH

8.1      Disgwylir i unigolion sy’n gadael Heddlu Dyfed-Powys o fewn tair blynedd ar ôl ymuno ad-dalu symiau canlynol eu pecyn adleoli, heblaw bod y Tîm Prif Swyddogion yn penderfynu fel arall. (Nid yw’r ddarpariaeth hon yn berthnasol ar gyfer swyddogion heddlu sy’n trosglwyddo i Heddlu arall):

Cyfnod gwasanaeth (o’r dyddiad y talwyd treuliau)	Swm i’w ad-dalu (fel % o gyfanswm y treuliau)
Gadael 0-12 mis o’r dyddiad y talwyd treuliau	100%
Gadael 13-24 mis o’r dyddiad y talwyd treuliau	50%
Gadael 25-36 mis o’r dyddiad y talwyd treuliau	Yn lleihau o 25% o 1/12fed o 25% am bob mis a gwblhawyd hyd at 36 mis

 

8.2      Os na fydd yr unigolyn yn adleoli, gofynnir iddo dalu unrhyw lwfans adleoli a roddwyd yn ôl, neu ran ohono.

 

SEIBIANT GYRFA     

8.3      Ar gyfer swyddogion heddlu sy’n gofyn am gael cymryd seibiant gyrfa, bydd hyd eu gwasanaeth yn cael ei atal o’r dyddiad y mae’r seibiant gyrfa’n cychwyn.

8.4      Rhaid i unigolion sydd heb wasanaethu am dair blynedd, ac sydd ddim eisiau talu rhan o’u pecyn adleoli yn ôl, ddychwelyd i’r gwaith am weddill y tair blynedd cyn gadael o leiaf.

8.5      Pan fydd cyfanswm o dair blynedd o wasanaeth, gan gyfuno’r cyfnod cyn a’r cyfnod ar ôl y seibiant gyrfa, wedi’u cwblhau, ni fydd yn rhaid i’r unigolyn dalu unrhyw ran o’r pecyn adleoli yn ôl mwyach.

 

9. GWNEUD CAIS

9.1      Lle mae’r Heddlu wedi penderfynu y bydd yn ystyried talu treuliau adleoli, rhaid i unigolion gyflwyno eu cais yn ysgrifenedig i Gyfarwyddwr yr Adran Datblygu Pobl a’r Sefydliad.

9.2      Rhaid i geisiadau gynnwys cyfrifon gyda derbynneb TAW, a chopïau o dri dyfynbris lle mae hynny’n berthnasol (e.e. ar gyfer costau symud/cyfreithiwr). Bydd y dyfynbris isaf yn cael ei ad-dalu gan Heddlu Dyfed-Powys, heblaw mewn amgylchiadau eithriadol (i’w cymeradwyo gan y Cyfarwyddwr Cyllid).

9.3      Bydd ceisiadau’n cael eu hanfon at yr Arbenigwr Cyflogres ar gyfer prosesu, a fydd yn ymgysylltu’n uniongyrchol ag unigolion ynghylch y taliad.

9.4      Rhaid cynnwys treuliau achlysurol yn y cais ar gyfer treuliau adleoli a’u cyflwyno fel yr amlinellir uchod.

9.5      Rhaid hawlio pob traul adleoli o fewn 6 mis ar ôl cychwyn gweithio i Heddlu Dyfed-Powys.

 

10.             ADOLYGU

Bydd y polisi hwn yn cael ei adolygu’n flynyddol er mwyn sicrhau ei fod yn addas ar gyfer y diben, sicrhau ei fod yn effeithiol, unrhyw newidiadau i ddeddfwriaeth ac unrhyw heriau a wnaed i’r polisi. Mae’r Arbenigwr Cyflogres yn gyfrifol am sicrhau bod adolygiad yn cael ei gynnal.  

Bydd unrhyw ddiwygiadau neu newidiadau i’r polisi hwn yn cael eu gweithredu drwy’r Cyd-bwyllgor Ymgynghori a Thrafod a’u gweithredu ar ôl cymeradwyaeth y Bwrdd Cyd-bwyllgor Ymgynghori a Thrafod.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mai 2026