Polisi Aflonyddu Rhywiol yn y Gweithle

1. Datganiad Polisi

• Mae Heddlu Dyfed-Powys wedi ymrwymo i ddarparu amgylchedd cynhwysol a chroesawgar i’r holl swyddogion, staff a gwirfoddolwyr, heb aflonyddu rhywiol ac erledigaeth a lle gall pawb deimlo eu bod yn ddiogel, yn cael eu cefnogi, ac yn cyflawni eu potensial.
• Mae gan Heddlu Dyfed-Powys bolisi dim goddefgarwch mewn perthynas ag aflonyddu rhywiol.
• Mae aflonyddu rhywiol yn anghyfreithlon o dan Deddf Cydraddoldeb 2010.

Nod y polisi hwn yw fel a ganlyn:

• Cynghori ar yr hyn sy'n gyfystyr ag aflonyddu rhywiol
• Gwneud yn glir yr ymddygiad proffesiynol a ddisgwylir gan holl swyddogion, staff a gwirfoddolwyr cefnogi’r heddlu, cadetiaid, contractwyr, gweithwyr a darpar ymgeiswyr am swyddi.
• Grymuso'r rheini i leisio cwyn drwy nodi proses glir.
• Cefnogi'r rhai sy'n cael eu heffeithio gan aflonyddu rhywiol.
• Gwneud cyfrifoldeb yr heddlu a rheolwyr yn glir i ddileu aflonyddu rhywiol o'r gweithle.
• Gwneud yn glir y disgwyliad sydd ar bob aelod i beidio â chadw’n dawel, gan herio achos o aflonyddu rhywiol os gwelir achos neu os credir ei fod yn digwydd yn y gweithle.
• Sicrhau bod unigolion yn gwybod am y cymorth sydd ar gael gan Heddlu Dyfed-Powys.

Yn berthnasol (ond heb fod yn gyfyngedig) i’r canlynol: Pob categori o swyddogion a staff Heddlu Dyfed-Powys, boed yn weithwyr llawn amser, rhan amser, parhaol, gweithwyr am gyfnod penodol, gweithwyr dros dro (gan gynnwys staff asiantaeth, partneriaid a chontractwyr) neu staff ar secondiad a gwirfoddolwyr. Rhaid i swyddogion heddlu, staff a gwirfoddolwyr sy’n cyrchu a defnyddio asedau ac eiddo’r Heddlu roi sylw dyledus i gynnwys y polisi hwn.

2.     Cwmpas y Polisi

Mae'r polisi hwn yn berthnasol i aelodau o Heddlu Dyfed-pOwys, sy'n cynnwys staff yr heddlu, holl swyddogion yr heddlu gan gynnwys swyddogion dan hyfforddiant, cwnstabliaid gwirfoddol, gwirfoddolwyr cefnogi'r heddlu, cadetiaid, staff asiantaeth, swyddogion cyswlly a chontractwyr, a staff ar secondiad. 

 

3.     Pwerau a Pholisi / Gofynion Cyfreithiol

Aflonyddu rhywiol:

Mae'n digwydd pan fydd unigolyn yn ymddwyn yn ddigroeso mewn natur rywiol sydd â'r pwrpas neu'r effaith canlynol:

• Tarfu ar urddas rhywun, p'un ai a fwriedir ai peidio.
• Creu amgylchedd bygythiol, gelyniaethus, diraddiol, bychanol neu sarhaus ar ei gyfer, p'un ai a fwriedir ai peidio.

Er y gall unrhyw un brofi aflonyddu rhywiol, mae menywod yn fwy tebygol o brofi aflonyddu rhywiol na dynion ac mae'r mwyafrif llethol o'r rhai sy'n cyflawni aflonyddu rhywiol yn ddynion.

Erledigaeth:

Pan fyddwch chi'n cael eich trin yn wael neu'n annheg oherwydd eich bod wedi gwneud cwyn yn ymwneud â nodwedd warchodedig, neu eich bod wedi helpu rhywun arall sydd wedi lleisio cwyn ac fe’ch gwelir yn ochri gyda nhw ac yna rydych chi’n cael eich trin yn wael.

 

4.    Dewisiadau a Chynlluniau Wrth Gefn

Rhaid darllen y polisi hwn ar y cyd â’r canlynol:

• Gweithdrefn Camymddwyn Staff yr Heddlu - Heddlu Dyfed-Powys
• Polisi Urddas yn y Gweithle Heddlu Dyfed-Powys 2019
• Deddf Cydraddoldeb 2010 – Adran 4 ‘Dyletswydd Cydraddoldeb y Sector Cyhoeddus’.
• Polisi Tegwch yn y Gweithle Heddlu Dyfed-Powys.
• Rheoliadau Ymddygiad yr Heddlu 2020
• Polisi Camymddwyn Staff yr Heddlu 2022

 

5.     Camau gweithredu ac adolygu

I ddechrau, bydd y polisi hwn yn cael ei adolygu bob blwyddyn ac yna bob dwy flynedd wedi hynny gan y Gwasanaethau Pobl. Bydd yr holl ddiwygiadau i'r polisi hwn yn cael eu cymeradwyo gan y Bwrdd Pobl, Diwylliant a Moeseg. I gael rhagor o gyngor ynghylch y polisi hwn, cysylltwch â Gwasanaethau Pobl.

Bydd yr adolygiad ac unrhyw ddiwygiadau yn ystyried y canlynol:

• Effeithiolrwydd y polisi, fel y’i haseswyd gan y Bwrdd Pobl, Diwylliant a Moeseg ac archwiliad mewnol / allanol
• Unrhyw newidiadau i ddeddfwriaeth / canllawiau'r Swyddfa Gartref
• Unrhyw aneffeithlonrwydd a nodwyd mewn perthynas â gweithredu

 

6.     Cyfrifoldebau

Mae gan bob un ohonom gyfrifoldeb i greu a chynnal amgylchedd gwaith heb aflonyddu ac erledigaeth ac i drin ein cydweithwyr ag urddas a phrach. 

Mae unirgolion yn gyfrifol am y canlynol:

• Bod yn ymwybodol o sut y gall eu hymddygiad effeithio ar eraill.
• Trin cydweithwyr ag urddas a pharch.
• Gwneud safiad os oes jôcs, sylwadau neu ystumiau amhriodol yn cael eu gwneud.
• Gwneud yn glir i eraill pan fydd eu hymddygiad yn annerbyniol.
• Ymyrryd i atal aflonyddu rhywiol ac ymddygiad annheilwng a rhoi cymorth i unrhyw un a allai fod wedi bod yn destun aflonyddu.
• Rhoi gwybod am aflonyddu i reolwr neu’r adran Safonau Proffesiynol a chydweithredu yn ôl yr angen mewn ymchwiliadau.
• Os gwneir cwyn am aflonyddu, peidio â rhagfarnu, neu erlid yr achwynydd neu'r aflonyddwr honedig.

Sylwch nad yw’n dderbyniol anwybyddu a/neu gerdded i ffwrdd o ddigwyddiadau o’r fath neu wrthod cymryd rhan a gall hyd yn oed gael ei ystyried yn gydgynllwynio iddo barhau o fewn diwylliant plismona. 

Mae gan reolwyr gyfrifoldeb am y canlynol: 

• Gweithredu'r polisi dim goddefgarwch o ran aflonyddu rhywiol.
• Gosod esiampl dda trwy eu hymddygiad eu hunain.
• Sicrhau bod yr amgylchedd gwaith yn rhagweithiol a chefnogol.
• Sicrhau bod y staff yn gwybod y safon ymddygiad a ddisgwylir ganddynt.
• Ymyrryd i atal bwlio neu aflonyddu.
• Adrodd yn brydlon i uwch-reolwyr neu’r Adran Safonau Proffesiynol am unrhyw gŵyn am aflonyddu, neu unrhyw ddigwyddiad o aflonyddu y maent yn dyst iddo a sicrhau bod camau priodol yn cael eu cymryd.

Mae gan yr heddlu gyfrifoldeb i sicrhau na fydd aflonyddu rhywiol yn cael ei oddef yn y gweithle ac y bydd pob cwyn yn cael eu cymryd o ddifrif, yn cael eu trin yn gyflym ac yn cael eu trin fel troseddau disgyblu difrifol a gellir ei hystyried yn gamymddwyn difrifol.

 

7.     Cyffredinol

Gall aflonyddu rhywiol ddigwydd waeth beth fo hunaniaeth rhywedd neu gyfeiriadedd rhywiol yr unigolyn sy’n destun aflonyddu neu’r unigolyn sy’n cyflawni’r aflonyddu honedig.

Fodd bynnag, mae'r heddlu'n cydnabod, bod menywod yn sylweddol fwy tebygol o brofi aflonyddu rhywiol na dynion, a bod yna fater cydraddoldeb rhyw mewn perthynas ag aflonyddu rhywiol.Os bod ymddygiad rhywiol a merched yn cael eu gwneud yn wrthrychau rhywiol yn ymddygiad y deellir ei fod yn cael ei oddef yn y gweithle, mae'n fwy tebygol y bydd aflonyddu rhywiol yn digwydd.

Mae’r heddlu hefyd yn cydnabod bod mater croestoriadedd nodweddion gwarchodedig yn bodoli mewn perthynas ag aflonyddu rhywiol, ac y gallai fod pryderon ychwanegol i swyddogion a staff Du neu ethnig leiafrifol, pobl lesbiaidd, hoyw, ddeurywiol a thrawsryweddol (LHDT+), swyddogion heddlu, staff a gwirfoddolwyr anabl ac iau lle gallai’r aflonyddu fod yn gysylltiedig â mathau eraill o wahaniaethu.

Gall y canlynol fod yn gyfrifol am aflonyddu rhywiol yn y gweithle:

• Rhywun rydych chi'n gweithio gyda nhw.
• Rheolwr, goruchwyliwr neu rywun arall mewn swydd o awdurdod.
• Aelod o'r cyhoedd / ymwelydd.

Mae aflonyddu rhywiol yn cynnwys ystod eang o ymddwyn gan gynnwys ond heb fod yn gyfyngedig i’r canlynol:

• Sylwadau rhywiol neu jôcs.
• Arddangos lluniau, posteri neu ffotograffau rhywiol.
• Edrychiadau awgrymog, syllu neu gilwenu.
• Gwneud cynhigion ac awgrymiadau rhywiol.
• Gwneud addewidion yn gyfnewid am ffafrau rhywiol.
• Ystumiau rhywiol.
• Trafod bywyd rhywiol rhywun heb wahoddiad i wneud hynny neu drafod bywyd rhywiol yn amhriodol.
• Postiadau rhywiol neu gyswllt ar gyfryngau cymdeithasol.
• Lledaenu sibrydion rhywiol am unigolyn.
• Anfon e-byst neu negeseuon testun rhywiol diamwys.
• Cyffwrdd digroeso, cofleidio, tylino neu gusanu.
• Ymddygiad ysglyfaethus.
• Ymddygiad troseddol, gan gynnwys ymosodiad rhywiol, stelcian, meithrin perthynas amhriodol, dinoethi anweddus ac anfon cyfathrebiadau sarhaus.

Unigolyn neu grŵp lleiafrifol sydd fel arfer yn destun aflonyddu rhywiol, ond nid yw hyn bob amser yn wir.  Gall gael ei gyflawni gan un unigolyn, pâr, grŵp bach, neu gall dreiddio trwy adran gyfan o'r heddlu.

Weithiau gall fod diwylliant o aflonyddu rhywiol mewn gweithle nad yw wedi’i anelu’n benodol at un unigolyn – fel rhannu delweddau rhywiol a chilwenu ar aelodau o’r cyhoedd.  Gallai rhywun dal wneud cwyn am aflonyddu rhywiol yn y sefyllfa hon.

Gall unigolyn brofi aflonyddu rhywiol gan rywun o’r un rhyw neu gan rywun o ryw gwahanol a’r un sy’n destun yr ymddygiad sy’n penderfynu a oedd y dull yn annerbyniol neu’n ddiurddas.

Gall aflonyddu rhywiol fod yn ddigwyddiad untro ac efallai nad yw’n cael ei gyfeirio at unigolyn.  Gellir bod yn dyst iddo neu ei glywed.  Gall ymddygiad rhywiol sydd wedi’i groesawu neu ei oddef yn y gorffennol, dros amser, ddod yn ymddygiad digroeso ac os bydd yn parhau bydd hyn yn aflonyddu.

Bydd yr heddlu yn atebol am aflonyddu rhywiol a gyflawnir gan eu swyddogion, staff neu wirfoddolwyr yn ystod eu cyflogaeth / cyfnod gwirfoddoli oni bai y gallant ddangos eu bod wedi cymryd pob cam rhesymol i atal yr aflonyddu. Mae ‘yn ystod y cyflogaeth’ yn cynnwys gweithredoedd a gyflawnir mewn unrhyw leoliad arall lle gwneir gwaith megis oddi ar y safle, mewn cwrs hyfforddi, cynhadledd neu gyfarfod allanol, yn ogystal ag amgylchiadau eraill pan nad yw’r swyddog, staff neu wirfoddolwr yn gweithio mewn gwirionedd ond yn ymwneud â gwaith megis parti gadael neu ddigwyddiad cymdeithasol arall.

  

8.     Cyfrifoldeb yr Heddlu / Cymryd Camau Gweithredu  

Mae Heddlu Dyfed-Powys eisiau darparu amgylchedd gwaith proffesiynol ar gyfer ei swyddogion, staff a gwirfoddolwyr ac mae ganddo ‘ddyletswydd gofal’ i wneud hynny. 

Bydd Heddlu Dyfed-Powys yn sicrhau bod camau rhesymol yn cael eu cymryd i atal aflonyddu rhywiol yn y gweithle a sicrhau bod cymorth ar gael i unrhyw un sy’n teimlo bod eu hurddas wedi’i fradychu neu lle mae unigolyn (unigolion) wedi creu amgylchedd ymosodol, bygythiol, gelyniaethus, diraddiol, bychanol neu sarhaus, p'un ai a fwriedir ai peidio.

Mae camau gweithredu rhesymol yn cynnwys y canlynol:

• Gosod safonau a diwylliant, fel bod pawb yn ymwybodol na fydd ymddygiad o'r fath yn cael ei oddef.
• Darparu cyfleoedd i dimau drafod aflonyddu rhywiol a phwysigrwydd mynd i’r afael ag arferion anghyfreithlon a gwahaniaethol.
• Sicrhau bod proses adrodd glir ar waith.
• Sicrhau yr ymchwilir yn llawn i gyhuddiadau a bod camau gweithredu priodol yn cael eu cymryd.
• Sicrhau bod cymorth ar gael i unigolion yr effeithir arnynt gan aflonyddu rhywiol.

9.     Gosod Safonau

Gosodir safonau ymddygiad proffesiynol gan Reoliadau Ymddygiad yr Heddlu 2020, Cyd-Gylchlythyr 54 Cyngor Staff yr Heddlu a'r codau moeseg.

Y cod moeseg yw'r cam cyntaf i bawb sy'n gweithio ym maes plismona yng Nghymru a Lloegr ac mae'n nodi'r egwyddorion a'r safonau ymddygiad y disgwyliwn eu gweld gan weithwyr proffesiynol yr heddlu.  Mae’n berthnasol i bob unigolyn sy’n gweithio ym maes plismona, boed yn swyddog gwarantedig, yn aelod o staff yr heddlu, yn wirfoddolwr neu’n rhywun sydd wedi’i gontractio i weithio mewn heddlu.

At ddiben y polisi hwn, tynnir sylw at y safonau a ganlyn:

• Disgwylir i aelodau ymddwyn gyda hunanreolaeth a goddefgarwch, gan drin aelodau o'r cyhoedd a chydweithwyr gyda pharch a chwrteisi.
• Ni ddylai aelodau gamddefnyddio eu pwerau na’u hawdurdod ond yn hytrach dylent barchu hawliau pob unigolyn.
• Rhaid i bob aelod herio a rhoi gwybod am ymddygiad amhriodol.

 

Mae gan pawb yr hawl i amgylchedd gwaith heb aflonyddu, oddi wrth eraill o fewn y gwasanaeth ac aeoldau'r cyhoedd. Bydd Heddlu Dyfed-Powys yn cefnogi amgylchedd gwaith o'r fath yn rhagweithiol. 

Gallai torri safonau o'r fath niwedidio hyder y cyhoedd yng ngwasanaeth yr heddlu. 

Gallai unrhyw achos o dorri unrhyw un o'r safonau arwain at gamau disgyblu, a gallai arwain at ddiswyddo heb rybudd mewn achosion difrifol.

 

10.             Hyfforddiant

Mae hyfforddiant a gwybodaeth yn hanfodol i lwyddiant polisïau ar aflonyddu rhywiol ac i newid yr amgylchedd yn y gweithle.

Dylai rhaglenni hyfforddi gynnwys y canlynol:

• Manylion am y polisi, ei weithrediad a'i hyrwyddo.
• Yr hyn a olygir gan gasineb at fenywod, rhywiaeth ac aflonyddu rhywiol, eu heffeithiau a'u canlyniadau.
• Yr hyn a olygir gan erledigaeth.
• Sut i roi gwybod am ddigwyddiadau ac ymddygiad annerbyniol.
• Sut i fynd i'r afael â thrydydd mater aflonyddu os yw'n berthnasol.
• Sut i gael cefnogaeth.
• Y cymorth sydd ar gael i'r rhai sy'n destun aflonyddu.

Dylid cadw cofnodion i sicrhau bod pawb wedi'u hyfforddi a'u bod yn cael hyfforddiant gloywi yn rheolaidd.  Dylid annog swyddogion a staff hefyd i helpu ei gilydd, naill ai drwy roi cymorth neu roi gwybod i reolwyr am eu pryderon drwy'r sianeli priodol.  Dylai'r weithdrefn hefyd wneud yn glir bod gan y staff yr hawl i ddod â chynrychiolydd cymdeithas staff / undeb llafur gyda nhw ar bob cam.

 

11. Y Broses o Adrodd

Anogir unigolion i ddod ymlaen os ydynt yn credu eu bod wedi bod yn destun aflonyddu.  Mae gan Heddlu Dyfed-Powys weithdrefnau cadarn ar waith sydd wedi'u cynllunio i weithredu’n brydlon.

Lle bynnag y bo modd, bydd Heddlu Dyfed-Powys yn ceisio sicrhau nad yw'n ofynnol i'r unigolyn a'r aflonyddwr honedig weithio gyda'i gilydd wrth ymchwilio i'r gŵyn.

Dylai unigolion sydd wedi bod yn destun aflonyddu leisio’r mater a dweud wrth eu rheolwr llinell neu, os nad yw'n briodol, yna wrth yr Adran Safonau Proffesiynol.

Os bydd unigolyn yn ymwybodol o aflonyddu rhywiol rhwng cydweithiwr ac unigolyn arall rhaid iddo leisio’r mater a dweud wrth ei reolwr llinell neu, os nad yw’n briodol, yr Adran Safonau Proffesiynol.

Gall aflonyddu rhywiol hefyd achosi sefyllfaoedd lle mae ymddygiad gorfodol neu ysglyfaethus.  Os bydd cydberthnasau agos yn codi rhwng cydweithwyr a bod gan unrhyw unigolyn bryderon ynghylch unrhyw elfen ysglyfaethus neu orfodaeth i berthynas o'r fath, fe'i hanogir i adrodd am y mater i'w rheolwr llinell neu os nad yw'n briodol i'r Adran Safonau Proffesiynol.

Gall ymchwiliadau i gwynion neu honiadau o aflonyddu rhywiol hefyd arwain at gychwyn ymchwiliad troseddol.  Os oes pryderon bod gweithred droseddol wedi digwydd, rhaid cael cyngor gan yr Adran Safonau Proffesiynol.  Os amheuir gweithred droseddol rhaid i unrhyw gamau a gymerir osgoi rhagfarnu'r ymchwiliad troseddol.  Cymerir camau priodol yn dibynnu ar yr amgylchiadau.

Bydd unrhyw ymchwiliadau i honiadau o aflonyddu rhywiol gan swyddogion heddlu, aelodau staff yr heddlu, gwirfoddolwyr a chontractwyr yn cael eu cynnal gan yr Adran Safonau Proffesiynol.

Bydd cyfrinachedd yn cael ei gynnal, yn amodol ar unrhyw ofyniad i gynnwys asiantaethau allanol lle gallai trosedd fod wedi'i chyflawni neu lle byddai cadw cyfrinachedd yn peri risg i'r sawl sy'n gwneud yr adroddiad neu eraill.

 

12.  Proses Camymddwyn

Bydd y troseddwr honedig, os yw’n aelod o Heddlu Dyfed-Powys yn destun achos ymchwilio teg drwy'r broses briodol.

Bydd pob cwyn am aflonyddu rhywiol yn cael ei chymryd yn ddifrifol iawn.  Bydd Heddlu Dyfed-Powys yn ymdrin ag unrhyw ymchwiliad mewn ffordd deg a sensitif i’r canlynol:

• Yr unigolyn a wnaeth y gwyn
• Rhywun oedd yn dyst iddo
• Rhywun sydd wedi ei gyhuddo o aflonyddu rhywiol

Bydd unigolyn sy’n aflonyddu’n rhywiol ar rywun yn y gwaith yn cael ei ddal yn gyfrifol am ei weithredoedd ac os bydd aelod o Heddlu Dyfed-Powys yn wynebu ymchwiliad i’w ymddygiad yn y gwaith gallai hyn arwain at gamau disgyblu hyd at a chan gynnwys diswyddiad diannod.  Yn ogystal, gallai fod yn atebol yn bersonol i dalu iawndal mewn hawliadau cyfreithiol.

 

13. Cefnogaeth a Chyngor i Unigolion

Mae llawer o ffynonellau cymorth ar gael. Mae'r rhain yn cynnwys y canlynol:

• Rheolwyr llinell / Goruchwylwyr
• Personél Adnoddau Dynol
• Cymdeithas Staff
• Ffederasiwn yr Heddlu
• Tîm Cydraddoldeb ac Amrywiaeth
• Adran Iechyd Galwedigaethol
• Rheoli Risg Trawma
• Cefnogaeth cyfoedion
• Rhwydweithiau cefnogi staff
• Polisi Chwythu'r Chwiban Heddlu Dyfed-Powys

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Tachwedd 2023