Polisi Camymddwyn ar gyfer Staff yr Heddlu

1. Datganiad Polisi

Mae hyder cyhoeddus yn yr heddlu’n dibynnu ar aelodau o staff yr heddlu’n arddangos y lefel uchaf o safonau ymddygiad proffesiynol personol. Mae’r safonau hynny’n adlewyrchu’r disgwyliadau sydd gan y gwasanaeth heddlu a’r cyhoedd o ran y ffordd y dylai staff yr heddlu ymddwyn.

Mae Heddlu Dyfed-Powys wedi ymrwymo i sicrhau bod pob aelod staff yn cydymffurfio â’r safonau ymddygiad proffesiynol ar gyfer aelodau o staff yr heddlu. Gallai torri’r safonau hyn niweidio hyder yn y gwasanaeth heddlu ac arwain at gamau disgyblu, a allai arwain at ddiswyddo mewn achosion difrifol.

Mae’n berthnasol i’r canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, boed yn staff llawn amser, rhan amser, parhaol, tymor penodol, dros dro (gan gynnwys staff asiantaeth, contractwyr a chymdeithion) staff ar secondiad a gwirfoddolwyr. Dylai swyddogion, staff a gwirfoddolwyr yr Heddlu sy’n cael mynediad at asedau ac eiddo’r Heddlu ac sy’n eu defnyddio roi ystyriaeth ddyledus i gynnwys y polisi hwn.

 2. Cwmpas y Polisi

Nod y Polisi Camymddwyn ar gyfer Staff yr Heddlu yw:

• Darparu dull teg, agored a chymesur ar gyfer ymdrin â chamymddwyn honedig gan aelodau o staff yr heddlu.
• Sicrhau bod unrhyw gamau disgyblu’n cael eu gweithredu’n gyson ac amserol. Nid proses gosbol yw hon yn bennaf, ond yn hytrach, un a luniwyd i wella ymddygiad a pherfformiad.
• Annog diwylliant o ddysgu a datblygu ar gyfer staff.
• Annog diwylliant o ddysgu a datblygu ar gyfer y sefydliad.

3.  Pwerau a Gofynion Polisi/Cyfreithiol

Rhaid darllen y polisi hwn ar y cyd â’r Weithdrefn Gamymddwyn ar gyfer Staff Heddlu Dyfed-Powys.

Mae deddfwriaethau, polisïau, gweithdrefnau a chanllawiau cysylltiedig yn cynnwys:

Mewnol:

• Polisi Rheoli Perfformiad
• Polisi Rheoli Perfformiad
• Polisi Rheoli Staff Heddlu ar Brawf

Allanol:

• Coleg Plismona – Cod Moeseg
• Deddf Gydraddoldeb 2010
• Deddf Cysylltiadau Cyflogaeth 1999
• Deddf Hawliau Dynol 1998
• Deddf Hawliau Cyflogaeth 1996
• Deddf Diwygio’r Heddlu 2002
• Rheoliadau Rhestr Ymgynghorol a Gwaharddedig yr Heddlu 2017
• Deddf Diogelu Data 2018 a GDPR y DU
• Deddf Diogelu Cyflogaeth (Cydgrynhoi) 1978 (fel y’i diwygiwyd gan Ddeddf Gyflogaeth 1989)
• Cod Ymarfer y Gwasanaeth Cynghori, Cymodi a Chyflafareddu ar gyfer Gweithdrefnau Disgyblu a Chwynion.
• Llawlyfr 2021 Cyngor Staff yr Heddlu

4.  Opsiynau a Dewisiadau wrth Gefn

Mae’r Weithdrefn Gamymddwyn ar gyfer Staff yr Heddlu ar gael i bob aelod staff – mae’r polisi a’r dogfennau gweithdrefn yn nodi’n glir a chynhwysfawr y disgwyliadau perthnasol gan aelodau staff a’r lefelau cyfrifoldeb a gofynion o ran gwneud penderfyniadau.

Mae egwyddorion y Cod Moeseg yn berthnasol i’r polisi a’r weithdrefn hon:

• Dewrder
• Parch ac Empathi
• Gwasanaeth Cyhoeddus

5.  Gweithredu ac Adolygu

Mae’r polisi hwn yn eiddo i’r Adran Safonau Proffesiynol. Bydd y broses adolygu’n cael ei chynnal gan Uwch Reolwr yr Adran Safonau Proffesiynol bob dwy flynedd er mwyn sicrhau effeithiolrwydd parhaus y polisi, gan ystyried unrhyw newidiadau i ddeddfwriaethau a chanllawiau cenedlaethol.

Bydd effeithiolrwydd y polisi’n cael ei fonitro’n rheolaidd uwchlaw a thu hwnt i’r cyfnod adolygu dwy flynedd, a bydd unrhyw bryderon difrifol yn cael eu fel dwysáu fel y bo’n briodol.

Mae’r nod o adolygu’r effeithiolrwydd hefyd yn cynnwys adolygu ymwybyddiaeth drwy fesur nifer yr ymholiadau a gyfeirir at yr adran mewn perthynas â’r broses gamymddwyn ar gyfer staff yr heddlu. Bydd modd i randdeiliaid allweddol ac unrhyw aelodau staff sy’n ymwneud â’r polisi roi adborth ar y polisi. Rhoddir ystyriaeth ddyledus i’r adborth hwnnw.

Efallai bydd newidiadau i ddeddfwriaethau neu ganllawiau cenedlaethol gan Gyngor Staff yr Heddlu’n golygu bod angen adolygu cynnwys y weithdrefn / polisi.

Bydd y Cyd-bwyllgor Trafod ac Ymgynghori’n goruchwylio’r ddogfen weithdrefn hon.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mehefin 2025