Polisi Cysylltiad Hysbysadwy

1. Datganiad Polisi

Mae’r Gymuned Heddlu wedi ymrwymo i gynnal y lefelau uchaf o onestrwydd ac unplygrwydd, ac atal ymddygiad llwgr, anonest, anfoesegol neu amhroffesiynol.

Mae hysbysu’r heddlu am gysylltiad yn broses bwysig ar gyfer gwella unplygrwydd a diogelwch y gymuned heddlu. Nod y polisi hwn yw:

• Nodi’r hyn sy’n cael ei ystyried yn gysylltiad amhriodol a hysbysadwy.
• Nodi’r hyn y mae angen i swyddogion a staff ystyried cyn ymrwymo i gysylltiadau.
• Gwneud swyddogion a staff yn ymwybodol o faterion bregusrwydd mewn perthynas â chudd-wybodaeth, aelodau bregus o’r cyhoedd, gorfodi ac atal rhag llygredd a chyfaddawdu.
• Nodi cyfrifoldebau swyddogion a staff dros adrodd am gysylltiadau sydd o bosibl yn amhriodol.
• Amlinellu fframwaith a fydd yn galluogi’r heddlu i wneud penderfyniadau gwybodus sy’n seiliedig ar amgylchiadau achosion unigol.
• Bod yn deg a chymesur wrth reoli prosesau ac unrhyw benderfyniadau a wneir â’r nod o sicrhau hyder y cyhoedd a phersonél yr heddlu.
• Rheoli risg y materion a godir a bodloni anghenion cymorth a lles y rhai cysylltiedig yn unol â chyfrifoldebau Heddlu Dyfed Powys.
• Sicrhau y diogelir gweithwyr yr heddlu a’r cyhoedd.
• Nodi’r broses apêl pe bai gweithiwr yn anghytuno â phenderfyniad a wnaed.

Yn berthnasol (ond heb fod yn gyfyngedig) i’r canlynol: Pob categori o swyddogion a staff Heddlu Dyfed-Powys, boed yn weithwyr llawn amser, rhan amser, parhaol, gweithwyr am gyfnod penodol, gweithwyr dros dro (gan gynnwys staff asiantaeth, partneriaid, a chontractwyr), staff ar secondiad a gwirfoddolwyr. Rhaid i swyddogion heddlu, staff a gwirfoddolwyr sy’n cyrchu a defnyddio asedau ac eiddo’r heddlu roi sylw dyledus i gynnwys y polisi hwn.

 

 

2. Cwmpas y Polisi

Mae Heddlu Dyfed-Powys yn disgwyl gonestrwydd ac unplygrwydd gan ei holl sefydliad. Fel gweision cyhoeddus, disgwylir i swyddogion heddlu, staff yr heddlu a gwirfoddolwyr lynu wrth y safonau ymddygiad uchaf, fel y nodir yn y Cod Moeseg, sydd wedi’i wreiddio drwy’r heddlu i gyd.  

Mae’r heddlu’n cydnabod bod perygl y gallai cysylltiad â rhai unigolion, grwpiau neu sefydliadau, a allai fod yn amhriodol, gael canlyniadau difrifol i unplygrwydd unigolion Heddlu Dyfed-Powys yn ogystal ag unplygrwydd, effeithiolrwydd gweithredol ac enw da Heddlu Dyfed-Powys.

Mae’r polisi hwn a’r weithdrefn gysylltiedig yn atgyfnerthu’r safonau ymddygiad proffesiynol sydd angen eu dilyn, er mwyn sicrhau nad oes unrhyw amheuaeth ynghylch unplygrwydd y sefydliad a bod unigolion sy’n agored i niwed yn cael eu gwarchod rhag camddefnyddio awdurdod er budd rhywiol. Mae bwriad hefyd i warchod swyddogion, staff a gwirfoddolwyr rhag honiadau ynghylch llygredd a darparu mecanwaith adrodd a chymorth ar gyfer y rhai sydd â chysylltiad a allai fod yn amhriodol.

Mae’r polisi hwn a’r weithdrefn gysylltiedig yn anelu i fod yn deg a chymesur wrth reoli’r broses ac unrhyw benderfyniadau a wneir â’r nod o sicrhau hyder cyhoeddus a hyder personél yr heddlu.

Mae’r polisi hwn a’r weithdrefn gysylltiedig yn berthnasol ar gyfer swyddogion heddlu, staff yr heddlu a phawb sy’n gweithio’n wirfoddol neu dan gontract i Heddlu Dyfed-Powys. Rhaid i bawb a grybwyllwyd eisoes fod yn ymwybodol o ofynion y polisi hwn a’r weithdrefn gysylltiedig a disgwylir iddynt gydymffurfio â nhw.

 

3.  Pwerau a Gofynion Cyfreithiol/Polisi

Cod Moeseg y Coleg Plismona

Deddf yr Heddlu 1996

Confensiwn Ewropeaidd ar Hawliau Dynol

Deddf Cyfrinachau Swyddogol 1989

Deddf Iechyd a Diogelwch yn y Gwaith 1974

Deddf Diogelu Data 2018

Deddf Trosedd ac Anhrefn 1998

Deddf Diwygio’r Heddlu 2002

Rheoliadau’r Heddlu 2003

Rheoliadau Ymddygiad yr Heddlu 2020

Rheoliadau Perfformiad yr Heddlu 2020

Canllawiau Statudol Swyddfa Annibynnol Cwynion yr Heddlu ar gyfer Safonau Ymddygiad Proffesiynol (swyddogion a staff)

Gweithdrefn Cysylltiad Hysbysadwy Heddlu Dyfed-Powys

 

4.  Dewisiadau a Chynlluniau Wrth Gefn  

Rolau a Chyfrifoldebau

Swyddogion, Staff a Gwirfoddolwyr

Rhaid i swyddogion, staff a gwirfoddolwyr sy’n dod yn ymwybodol neu sy’n amau’n rhesymol bod ganddynt gysylltiad personol ag unigolyn, grŵp neu sefydliad sy’n amhriodol, neu a allai gael ei ystyried yn amhriodol, adrodd am y mater cyn gynted â phosibl. Er cyfrinachedd, nid oes rhaid cyflwyno’r adroddiad drwy eu rheolwr llinell. Gellir anfon yr adroddiad yn uniongyrchol at yr Adran Safonau Proffesiynol gan ddefnyddio’r e-ffurflen.

Lle y bydd swyddog, staff neu wirfoddolwr yn ymwybodol o gysylltiad rhwng aelod arall o’r Heddlu ac unigolyn, grŵp neu sefydliad y mae angen adrodd amdano o dan y polisi hwn, mae gan yr unigolyn hwnnw gyfrifoldeb i adrodd am y mater wrth yr Adran Safonau Proffesiynol.

Ni ddylai unigolyn ymchwilio systemau’r heddlu er mwyn cadarnhau neu wrthbrofi ei bryderon neu amheuon o dan unrhyw amgylchiadau.

 

 

Yr Adran Safonau Proffesiynol

Bydd yr Adran Safonau Proffesiynol yn cynnal ymchwil priodol sy’n gymesur i’r amgylchiadau yr adroddwyd amdanynt i gadarnhau neu wrthbrofi’r pryder. Bydd yr Adran Safonau Proffesiynol yn asesu unrhyw risg a nodir ac yn sicrhau bod cynllun asesu risg cychwynnol yn cael ei roi ar waith.

Bydd y canlyniad yn cael ei gyflwyno i Bennaeth yr Adran Safonau Proffesiynol a all ymgysylltu â swyddogion neu staff eraill fel y bo’n briodol cyn dod i benderfyniad, a bydd yn caniatáu i’r unigolyn dan sylw a/neu ei gynrychiolydd i gyflwyno sylwadau. Bydd Pennaeth yr Adran Safonau Proffesiynol hefyd yn adolygu’r cynllun rheoli risg ar yr adeg hon.

Yr Uned Fetio

Rhoddir gwybodaeth i’r Uned Fetio, a fydd yn diweddaru eu cofnodion yn unol â hynny.

Y Dirprwy Brif Gwnstabl

Bydd y Dirprwy Brif Gwnstabl (DBG) yn ystyried unrhyw apeliadau ac fe all glywed sylwadau gan yr unigolion a/neu eu cynrychiolydd.

Mae egwyddorion y Cod Moeseg yn berthnasol i’r polisi hwn -

• Dewrder
• Parch ac Empathi
• Gwasanaeth Cyhoeddus

 

5.  Gweithredu ac Adolygu  

Bydd yr Adran Safonau Proffesiynol yn monitro’r polisi hwn a’r ddogfen weithdrefn gysylltiedig bob yn eilflwydd er mwyn sicrhau -

• Ei effeithiolrwydd
• Unrhyw newidiadau i ddeddfwriaethau/Canllawiau’r Swyddfa Gartref/prosesau’r heddlu
• Heriau i’r polisi
• Unrhyw eitemau aneffeithlon a nodwyd mewn perthynas â gweithredu

Bydd yr Adran Safonau Proffesiynol yn rhoi unrhyw ddiwygiadau i’r polisi a’r ddogfen weithdrefn gysylltiedig ar waith a bydd y Cyd-bwyllgor Ymgynghori a Thrafod yn eu goruchwylio a’u cymeradwyo.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Medi 2025