Polisi Fforffedu Pensiwn

1. Datganiad polisi

• Mae gan Gomisiynydd yr Heddlu a Throseddu (CHTh) ddyletswydd i sicrhau heddlu effeithiol ac effeithlon yn ardal Dyfed-Powys.
• Mae Heddlu Dyfed-Powys wedi ymrwymo i feithrin ymddiriedaeth a hyder yn y cymunedau y maent yn eu gwasanaethu. Er mwyn cyflawni hyn, mae uniondeb holl swyddogion a staff Heddlu Dyfed-Powys yn hollbwysig.
• Trwy gydol y polisi hwn, cyfeirir at bob unigolyn y mae’r polisi hwn yn berthnasol iddo (fel y nodir isod) fel ‘Aelod(au) Cynllun Pensiwn’.
• Gellir ystyried fforffedu pensiwn yn yr amgylchiadau canlynol:
  1. pan fo aelod cynllun pensiwn wedi’i gael yn euog o frad neu o droseddau o dan ddeddfau Cyfrinachau Swyddogol 1911 a 1939 ac wedi’i ddedfrydu i gyfnod (neu gyfnodau) yn y carchar o ddeng mlynedd o leiaf; neu
  2. pan fo aelod cynllun pensiwn wedi’i gael yn euog o drosedd a gyflawnwyd mewn cysylltiad â’i wasanaeth fel aelod o’r heddlu, sydd wedi’i hardystio gan yr Ysgrifennydd Cartref yn drosedd a oedd yn niweidiol iawn i fuddiannau’r wladwriaeth, neu’n agored i arwain at golled ddifrifol o hyder yn y gwasanaeth cyhoeddus.
• Yn achos Heddlu Dyfed-Powys, Comisiynydd Heddlu a Throseddu Dyfed-Powys yw’r awdurdod goruchwylio pensiynau. Bydd Comisiynydd yr Heddlu a Throseddu (CHTh) yn gweithio gyda’r Prif Gwnstabl, neu ei gynrychiolydd enwebedig, sef yr Adran Safonau Proffesiynol i benderfynu a ydyw colli pensiwn yn briodol ar gyfer achosion unigol.
• Ni ellir gwneud cais i fforffedu mewn achosion lle nad oes euogfarn droseddol.

Yn berthnasol (ond heb fod yn gyfyngedig) i’r canlynol: Pob categori o swyddogion a staff Heddlu Dyfed-Powys, boed yn weithwyr llawn amser, rhan amser, parhaol, gweithwyr am gyfnod penodol, gweithwyr dros dro (gan gynnwys staff asiantaeth, partneriaid, a chontractwyr) a staff ar secondiad. Rhaid i swyddogion heddlu, staff a gwirfoddolwyr sy’n cyrchu a defnyddio asedau ac eiddo’r heddlu roi sylw dyledus i gynnwys y polisi hwn. Mae’r polisi hwn hefyd yn berthnasol i briod neu bartneriaid sy’n goroesi cyn-swyddogion neu staff sy’n cael eu herlyn am drosedd ar ôl marwolaeth eu priod neu eu partner. Trwy gydol y polisi hwn, cyfeirir at bob unigolyn y mae’r polisi hwn yn berthnasol iddo (fel y nodir isod) fel ‘Aelod(au) Cynllun Pensiwn’.

 

 

2. Cwmpas y polisi

• Y sail ddeddfwriaethol sy’n llywodraethu fforffedu pensiwn swyddogion heddlu yw rheoliad K5 o Reoliadau Pensiwn yr Heddlu 1987, rheoliad 55 Rhan 4 o Reoliadau Pensiwn yr Heddlu 2006, a Rhan 13 Pennod 5 o Reoliadau Pensiwn yr Heddlu 2015. Mae canllawiau ynghylch fforffedu pensiynau’r heddlu wedi’u cynnwys yng Nghanllawiau Fforffedu Pensiynau’r Swyddfa Gartref – mis Chwefror 2021.
• Ar gyfer staff yr heddlu, mae rheoliad 91 o Gynllun Pensiwn Llywodraeth Leol 2013 yn golygu, os caiff aelod ei gollfarnu o drosedd mewn cysylltiad â’i gyflogaeth, ac oherwydd hynny yn gadael ei gyflogaeth, gall cyn-gyflogwr y cynllun wneud cais i’r Ysgrifennydd Gwladol i gael tystysgrif fforffedu. Mae darpariaethau fforffedu wedi’u cwmpasu yn rheoliadau 91-95 Cynllun Pensiwn Llywodraeth Leol 2013.
• Diben y polisi yw nodi rolau diffiniedig Comisiynydd yr Heddlu a Throseddu a’r Prif Gwnstabl ynghylch y weithdrefn fforffedu pensiwn.

 

3.  Pwerau a pholisi / gofynion cyfreithiol

• Mae pob un o’r rheoliadau a grybwyllir uchod yn cynnwys darpariaethau sy’n caniatáu i’r Comisiynydd, fel yr ‘awdurdod goruchwylio pensiynau’, benderfynu ar fforffedu yn yr achosion canlynol:
• pan fo aelod cynllun pensiwn wedi’i gael yn euog o frad neu o droseddau o dan ddeddfau Cyfrinachau Swyddogol 1911 a 1939 ac wedi’i ddedfrydu i gyfnod (neu gyfnodau) yn y carchar o ddeng mlynedd o leiaf; neu
• pan fo aelod cynllun pensiwn wedi’i gael yn euog o drosedd a gyflawnwyd mewn cysylltiad â’i wasanaeth fel aelod o’r heddlu, sydd wedi’i hardystio gan yr Ysgrifennydd Cartref yn drosedd a oedd yn niweidiol iawn i fuddiannau’r wladwriaeth, neu’n agored i arwain at golled ddifrifol o hyder yn y gwasanaeth cyhoeddus.
• Mae Rheoliadau Pensiwn yr Heddlu 2006 (adran 55) yn manylu ar yr amgylchiadau lle gall y Comisiynydd wneud cais i fforffedu pensiwn swyddog heddlu:
  1. Swyddog heddlu rheolaidd neu gyn-swyddog heddlu rheolaidd;
  2. O dan reoliad 39, i oroeswr swyddog heddlu o’r fath; a
  3. O dan Ran 6, i aelod credyd pensiwn.
• Mae Rheoliadau Pensiwn yr Heddlu 2015, yn rheoliad 212, yn caniatáu fforffedu pensiwn goroeswr pan fo’r goroeswr wedi’i gael yn euog o drosedd a arweiniodd at farwolaeth yr aelod cynllun pensiwn. Nid yw’r ddarpariaeth hon yn bresennol yn Rheoliadau 2006.
• Mae rheoliad K5(4) o Reoliadau 1987 a rheoliad 55(2) a (4) o Reoliadau 2006 yn caniatáu i’r Comisiynydd, fel yr awdurdod goruchwylio pensiynau, benderfynu i ba raddau y dylid fforffedu’r pensiwn pan gyflawnir trosedd mewn cysylltiad â gwasanaeth aelod cynllun pensiwn fel aelod o’r heddlu. Gall hyn fod yn barhaol neu dros dro, a gall effeithio ar y pensiwn cyfan neu ran ohono. Mae gan Reoliadau 2015 ddarpariaeth debyg yn rheoliad 211(1).
• Mae’r gyfraith achosion berthnasol yn nodi nad oes angen i’r pensiynwr fod wedi bod yn swyddog mewn swydd ar adeg y drosedd er mwyn bodloni’r gofyniad bod yn rhaid i’r drosedd fod yn gysylltiedig â’i wasanaeth, e.e. trosedd a gyflawnwyd ar ôl i’r pensiynwr ymddeol.
• Ar gyfer staff yr heddlu, mae cyflogwr y cynllun yn asesu a ydyw’r euogfarn yn gysylltiedig â chyflogaeth aelod o staff yr heddlu ac yn cyflwyno crynodeb achos llawn i’r Weinyddiaeth Dai, Cymunedau a Llywodraeth Leol o fewn tri mis o euogfarn. Mae unrhyw gais sy’n dod i law ar ôl tri mis o’r euogfarn yn annilys o dan y rheoliadau pensiwn. Bydd yr Ysgrifennydd Gwladol yn ystyried a oedd y drosedd:
  1. yn niweidiol iawn i fuddiannau’r wladwriaeth, neu
  2. yn debygol o arwain at golled ddifrifol o hyder yn y gwasanaeth cyhoeddus.

Os felly, bydd yn rhoi tystysgrif i gyn-gyflogwr y cynllun. Yna, rhaid i gyflogwr y cynllun benderfynu a ddylid fforffedu pensiwn yr aelod staff ac i ba raddau.

Mae’n bosibl i’r Comisiynydd, fel yr ‘awdurdod goruchwylio pensiynau’, wneud cais i fforffedu pensiwn mewn perthynas ag aelod o staff yr heddlu, o dan Reoliadau Cynllun Pensiwn Llywodraeth Leol 2013. Cytunwyd rhwng Heddlu Dyfed-Powys a Swyddfa Comisiynydd yr Heddlu a Throseddu (SCHTh) y bydd unrhyw fforffediad o bensiwn staff yr heddlu yn cael ei gyfeirio at SCHTh fel yr awdurdod goruchwylio pensiynau.

• Mae’r polisi’n deillio o ddarpariaeth statudol a chanllawiau statudol. Mae mesurau diogelu wedi’u cynnwys yn y polisi, a dylid ei gymhwyso’n gyfartal.

 

 

4. Opsiynau a hapddigwyddiadau

• Rôl y Comisiynydd

Pan gaiff swyddog heddlu ei euogfarnu o drosedd, bydd y corff plismona lleol, fel yr awdurdod goruchwylio pensiynau ar gyfer swyddogion heddlu yng Nghymru a Lloegr, yn asesu a ydyw’r euogfarn yn gysylltiedig â gwasanaeth y swyddog. Os ydyw’r euogfarn yn gysylltiedig â gwasanaeth y swyddog, bydd y corff plismona lleol yn anfon crynodeb achos llawn i’r Swyddfa Gartref, a fydd yn adolygu ac yn prosesu’r cais, cyn ceisio penderfyniad gan yr Ysgrifennydd Gwladol. Bydd yr Ysgrifennydd Gwladol yn ystyried a oedd y drosedd:

• yn niweidiol iawn i fuddiannau’r wladwriaeth, neu
• yn debygol o arwain at golled ddifrifol o hyder yn y gwasanaeth cyhoeddus.

Os felly, bydd yn rhoi tystysgrif i’r corff plismona lleol. Yna, rhaid i’r corff plismona lleol benderfynu a ddylid fforffedu pensiwn y swyddog, ac i ba raddau (hyd at 65% o gyfraniadau’r cyflogwr).

 

• Rôl y Prif Gwnstabl

Mae gan y Prif Gwnstabl ddwy rôl wahanol yn yr achosion hyn:

• Nodi achosion pan allai fod yn briodol fforffedu pensiwn a rhoi gwybod i’r Comisiynydd; a
• Rhoi digon o wybodaeth i’r Comisiynydd er mwyn iddo ystyried gwneud cais i’r Ysgrifennydd Cartref i fforffedu pensiwn.

 

• PROSES

Mae gan y broses fforffedu pensiwn dri cham:

• Cam 1: Nodi achos
• Cam 2: Ystyriaeth gan yr Ysgrifennydd Cartref
• Cam 3: Y weithdrefn i’w dilyn ar ôl cael tystysgrif yr Ysgrifennydd Cartref

 

• CAM 1 – Nodi achos

Dylid adolygu pob achos lle mae aelodau cynllun pensiwn yn cael eu heuogfarnu o droseddau, a dylid ystyried a ydynt yn bodloni’r meini prawf sy’n berthnasol ar gyfer fforffedu pensiwn. Dylai’r Prif Gwnstabl (neu eu Swyddog Staff / cynrychiolydd) drafod y posibilrwydd o wneud cais i fforffedu â SCHTh, yr Adran Safonau Proffesiynol, yr Adran Gwasanaethau Cyfreithiol, ac arbenigwr pensiynau’r heddlu. Fel rhan o’r broses hon, dylid rhoi gwybod i’r aelod cynllun pensiwn a’i gymdeithas staff fod y Prif Gwnstabl (neu ei Swyddog Staff / cynrychiolydd) yn ystyried fforffedu pensiwn.

Mae canllawiau’r Gymdeithas Prif Weithredwyr Plismona a Throseddu yn nodi nad yw fforffedu pensiwn yn broses rhy gymhleth, ac er nad yw cyngor cyfreithiol yn ofyniad statudol, dylid ei ystyried ar gyfer pob achos, yn ôl ei rinweddau. Fel isafswm fodd bynnag, dylai’r CHTh gael cefnogaeth y Prif Weithredwr / Swyddog Monitro yn ei broses gwneud penderfyniadau. Gan fod gan y Swyddog Monitro ddyletswydd gyfreithiol i sicrhau bod proses gwneud penderfyniadau’r CHTh yn gyfreithlon, mae’n darparu mwy o ddiogelwch rhag heriau cyfreithiol yn y dyfodol. Efallai y bydd swyddfeydd comisiynwyr heddlu a throseddu hefyd am ystyried unigolion eraill a allai gynorthwyo’r broses o wneud penderfyniadau, fel aelodau panel annibynnol.

Bydd y Prif Gwnstabl (neu eu Swyddog Staff / cynrychiolydd) yn darparu adroddiad i’r Comisiynydd, yn nodi’n fyr manylion am unrhyw swyddog neu aelod o staff yr heddlu a gafwyd yn euog o droseddau nad ydynt wedi’u cyfeirio at y Comisiynydd er mwyn ystyried fforffedu a’r rhesymau dros hyn.

Unwaith y bydd Heddlu Dyfed-Powys wedi darparu’r wybodaeth berthnasol, os ydyw SCHTh yn teimlo bod achos dros wneud cais, dylid paratoi adroddiad fel y gall y Comisiynydd wneud penderfyniad rhagarweiniol ynghylch a ddylid gwneud cais i fforffedu, yn dilyn achos llys.

Os caiff yr aelod cynllun pensiwn ei euogfarnu yn y llys, ar ôl cael ei gyhuddo o drosedd a allai ddod o fewn y diffiniadau a nodir ym mharagraffau 2.1 a 2.2 uchod, dylai’r heddlu roi gwybod i SCHTh o fewn 14 diwrnod o’r euogfarn.

Os rhoddir caniatâd i’r aelod cynllun pensiwn apelio, dylai’r Comisiynydd aros am ganlyniad yr apêl honno. Nid yw’r ddarpariaeth hon yn berthnasol pan wrthodir caniatâd i apelio i ddechrau a bod yr aelod cynllun pensiwn yn ceisio caniatâd i lys uwch.

Os nad yw’r Prif Gwnstabl yn ystyried y dylid gwneud cais, bydd ei gynrychiolydd yn rhoi gwybod i’r Prif Weithredwr, a fydd yn cynghori’r Comisiynydd. Ni fydd fforffedu’n cael ei ystyried os na chaiff yr aelod cynllun pensiwn ei euogfarnu o drosedd. Bydd y broses yn dod i ben ar y cam hwn.

Os nad oes cysylltiad rhwng y drosedd, neu droseddau, a rôl yr aelod cynllun pensiwn, ni fydd y cais yn cael ei wneud a bydd y broses yn dod i ben ar y cam hwn.

Bydd troseddau ac euogfarnau a gafwyd mewn gwledydd tramor, ac euogfarnau sydd wedi digwydd ar ôl i’r swyddog adael cyflogaeth yr heddlu, hefyd yn cael eu hystyried at ddiben fforffedu.

Nid yw cyfnod o garchar yn hanfodol i gychwyn y broses fforffedu; fodd bynnag, byddai cosb lai yn tueddu i awgrymu bod y drosedd, neu droseddau, yn llai difrifol.

Mae canllawiau’r Gymdeithas Prif Weithredwyr Plismona a Throseddu yn nodi’r canlynol o ran ‘difrifoldeb’:

Ni ddylai comisiynwyr heddlu a throseddu gyfyngu eu hunain i’r hyn y gellid ei ystyried fel y troseddau mwyaf difrifol, fel trais rhywiol neu ymosodiadau rhywiol. Ni ddylid eu perswadio ychwaith nad yw trosedd yn ddigon ‘difrifol’ i warantu ystyriaeth. Er bod y canllawiau presennol yn nodi mai dim ond ar gyfer achosion ‘difrifol’ y dylid fforffedu, nid yw hyn wedi’i ddiffinio. Mater i’r CHTh, ac yna’r Ysgrifennydd Cartref, yw penderfynu beth maen nhw’n ei gredu sy’n ddifrifol.

Mae Dyfarniad Harrington (pwynt 50 ymlaen) yn rhoi mwy o ganllawiau yn y maes hwn (gweler canllawiau’r Swyddfa Gartref – atodiad A). Os gall y CHTh ddangos tystiolaeth y byddai’r achos yn cael effaith negyddol ar farn y cyhoedd o’r gwasanaeth heddlu, dylid bwrw ymlaen.

 

Bydd y Prif Gwnstabl (neu eu Swyddog Staff / cynrychiolydd) yn rhoi gwybod i’r Swyddog Heddlu, aelod staff yr heddlu, neu’r pensiynwr bod y Prif Gwnstabl yn llunio adroddiad i’r Comisiynydd, gan ofyn am ystyriaeth ynghylch a ydyw fforffedu’r pensiwn yn briodol pan fydd adroddiad yn cael ei lunio (i’r Comisiynydd).

 

• Adroddiad Heddlu Dyfed-Powys

Bydd yr adroddiad yn cynnwys crynodeb o’r amgylchiadau pam y teimlir y gallai’r Comisiynydd ddymuno ystyried a ydyw fforffedu’r pensiwn yn briodol.

Bydd yr adroddiad yn cynnwys digon o wybodaeth (gweler ffurflen gais y Swyddfa Gartref ar gyfer fforffedu pensiwn yr heddlu):

Er mwyn galluogi’r Comisiynydd i ystyried a ddylid gwneud cais i’r Ysgrifennydd Cartref am dystysgrif fforffedu pensiwn;

• Er mwyn galluogi’r Ysgrifennydd Cartref i ystyried a ddylid rhoi tystysgrif;
• Er mwyn galluogi’r Comisiynydd i benderfynu wedyn a ddylid fforffedu pensiwn ac, os felly, i ba raddau.

Dylid atodi manylion pensiwn yr unigolion i adroddiad Heddlu Dyfed-Powys, gydag enghreifftiau o sut y byddai gwahanol ostyngiadau o ran canran yn effeithio ar y pensiwn. Mae canllawiau’r Swyddfa Gartref ar fforffedu pensiwn yr heddlu, ac achosion cyfreithiol, yn nodi nad oes isafswm y gellir ei fforffedu a bod y swm uchaf y gellir ei fforffedu yn 65% o gyfraniadau cyflogwyr a wnaed gan yr heddlu. Mae’r gweddill yn adlewyrchu cyfraniadau’r aelod ei hun na ellir eu fforffedu.

Efallai y bydd angen cynnwys dogfennau perthnasol neu ddeunydd arall ochr yn ochr â’r adroddiad i gynorthwyo yn y broses o wneud penderfyniadau. Dylai hefyd gynnwys unrhyw sylwadau ysgrifenedig gan y swyddog heddlu / aelod o staff (neu gyn-swyddog neu gyn-aelod o staff) neu sylwadau ysgrifenedig gan briod neu bartner sy’n goroesi swyddog heddlu / aelod o staff sydd wedi marw, y rhoddir 21 diwrnod iddynt i’w cyflwyno (mae gan y Comisiynydd yr opsiwn o fynnu bod yr unigolyn yn bresennol wyneb yn wyneb i wneud sylwadau ar lafar yn seiliedig ar y sylwadau ysgrifenedig).

 

• Y weithdrefn i’w dilyn ar ôl i SCHTh gael adroddiad Heddlu Dyfed-Powys

Ar ôl cael adroddiad Heddlu Dyfed-Powys, bydd Prif Weithredwr SCHTh yn trefnu i’r Comisiynydd ystyried yr achos dros gais am fforffedu pensiwn o fewn 21 diwrnod.

Cyn gynted ag y bo’n ymarferol, bydd y Comisiynydd yn rhoi gwybod i’r swyddog, yr aelod o staff, neu briod neu bartner sy’n goroesi swyddog heddlu / aelod o staff sydd wedi marw dan sylw (yn ysgrifenedig) ei fod wedi cael yr adroddiad ac y bydd fforffedu ei bensiwn yn cael ei ystyried. Os gwneir penderfyniad cynnar i beidio â gwneud cais i’r Ysgrifennydd Cartref am dystysgrif, efallai na fydd angen y gofyniad hwn. (Ni ddylid datgelu Adroddiad Heddlu Dyfed-Powys nac unrhyw ddogfennaeth / deunydd ategol i’r swyddog, aelod o staff, na phriod neu bartner sy’n goroesi’r swyddog heddlu / aelod o staff sydd wedi marw ar y cam hwn).

Mae canllawiau’r Gymdeithas Prif Weithredwyr Plismona a Throseddu yn nodi y dylid rhoi sylw hefyd i lesiant yr aelod cynllun pensiwn. Mae hyn yn arbennig o bwysig os ydynt yn dal yn y carchar. Mae’n bosibl iawn nad yw’r unigolyn yn ymwybodol y gallai ei drosedd arwain at fforffedu, neu fod fforffediadau pensiwn yn bodoli. Os ydyw’r aelod cynllun pensiwn yn dal yn y carchar, gellir trosglwyddo gwybodaeth drwy swyddogion cyswllt y carchar, neu drwy Swyddfa’r Llywodraethwr, i’w wneud yn ymwybodol y gallai fod angen cymorth arno.

Os ydyw’r swyddog, aelod o staff, neu briod neu bartner sy’n goroesi swyddog heddlu / aelod o staff sydd wedi marw wedi cael caniatâd i apelio yn erbyn eu heuogfarn, dylai’r Comisiynydd aros am ganlyniad yr apêl cyn bwrw ymlaen.

Ar y cam hwn, dim ond penderfynu a ddylid gwneud cais i’r Ysgrifennydd Cartref am dystysgrif y mae’n rhaid i’r Comisiynydd ei wneud.

 

• Cais am dystysgrif fforffedu

Mae fforffedu yn gosb ychwanegol at gosb llys, ac ni ddylid fforffedu hawliau pensiwn, ac eithrio mewn amgylchiadau difrifol. Ni fydd fforffedu bob amser yn berthnasol ym mhob achos, ond dylid ei ystyried bob amser lle bu’r drosedd yn drosedd difrifol a lle bo pryder gan y cyhoedd ynghylch camddefnyddio safle ymddiriedaeth y swyddog heddlu / aelod o staff neu’r priod neu bartner sy’n goroesi.

Bydd y Comisiynydd yn ystyried y cwestiwn ynghylch a ddylid gwneud y cais am dystysgrif fforffedu i’r Ysgrifennydd Cartref.

Rhaid gwneud cais ar ôl cael euogfarn, ond nid oes unrhyw derfynau amser ar gyfer gwneud cais am fforffedu ar gyfer swyddogion heddlu.

Dylai’r Comisiynydd hefyd ystyried yn benodol a ydyw’r canlynol yn wir mewn perthynas â’r swyddog heddlu, y cyn-swyddog heddlu neu’r aelod o staff:

• maent wedi cael euogfarn o drosedd a gyflawnwyd mewn cysylltiad â’u gwasanaeth fel aelod o’r heddlu, ac
• mae’r drosedd wedi’i hardystio gan yr Ysgrifennydd Gwladol fel trosedd:
  1. sy’n debygol o arwain at golled ddifrifol o hyder yn y gwasanaeth cyhoeddus; neu
  2. yn niweidiol iawn i fuddiannau’r wladwriaeth.

Yr Ysgrifennydd Gwladol perthnasol dros swyddogion heddlu yw Ysgrifennydd Gwladol yr Adran Gartref.

Mae aelodau o staff yr heddlu yn cyfranogi yn y Cynllun Pensiwn Llywodraeth Leol ar wahân, a’r Ysgrifennydd Gwladol perthnasol yw’r Ysgrifennydd Gwladol dros Dai, Cymunedau a Llywodraeth Leol. Pan fo’r Comisiynydd yn dymuno gwneud cais am fforffedu pensiwn mewn perthynas ag aelod o staff yr heddlu o dan Reoliadau Cynllun Pensiwn Llywodraeth Leol 2013, dylai geisio rhagor o wybodaeth gan: [email protected].

Dylai cais y Comisiynydd gynnwys yr wybodaeth hanfodol ganlynol:

1. Manylion yr aelod cynllun pensiwn (enwau, rheng, dyddiad geni, dyddiad ymuno â’r heddlu).
2. Manylion pa gynllun neu gynlluniau pensiwn y mae’r aelod cynllun pensiwn perthnasol wedi cronni buddion ynddo / ynddynt. Gall hwn fod yn gynlluniau 1987, 2006, neu 2015, neu sawl un ohonynt. Mae hyn yn hanfodol, gan ei fod yn effeithio ar ba reoliadau y cyhoeddir y dystysgrif / tystysgrifau oddi tanynt.

• Manylion llawn y drosedd, neu droseddau, a’r cysylltiad â gwasanaeth yr heddlu.

1. Dyddiad(au) yr euogfarn a manylion yr euogfarn.
2. Manylion yr amgylchiadau sy’n ymwneud â’r drosedd a’r ymchwiliad. A oedd y drosedd yn ymwneud â’r canlynol:
   • Cynllwyn a drefnwyd ymhlith sawl swyddog (aelodau cynllun pensiwn)
   • Cymorth weithredol i droseddwyr
   • Gwyrdroi gweinyddiaeth cyfiawnder
   • Bradychu’r sefyllfa bwysig o ymddiriedaeth er budd personol
   • Llygru neu ymgais i lygru swyddogion iau.
3. Manylion y ddedfryd a osodwyd gan y llys (hyd y ddedfryd ac ati), a sylwadau dedfrydu’r barnwr (os ydynt yn hysbys).

• Manylion cyhoeddusrwydd a sylw yn y cyfryngau.
• Datganiad, ym marn yr awdurdod goruchwylio pensiynau, bod y drosedd dan sylw wedi’i chyflawni mewn cysylltiad â gwasanaeth yr aelod cynllun pensiwn fel aelod o’r heddlu ac yn debygol o arwain at golled ddifrifol o hyder yn y gwasanaeth cyhoeddus a/neu’n niweidiol iawn i fuddiannau’r wladwriaeth a’r rheswm, neu resymau, dros y farn hon.

1. Pan gaiff yr aelod cynllun pensiwn ei euogfarnu o fwy nag un drosedd, dylai’r awdurdod goruchwylio pensiynau amlygu pa droseddau penodol a gyflawnwyd mewn cysylltiad â gwasanaeth yr aelod cynllun pensiwn, a sicrhau bod y dyddiadau cywir yn cael eu darparu. Mae’r rhain yn hanfodol ar gyfer prosesu cais, a bydd y dyddiadau’n ymddangos ar unrhyw dystysgrif fforffedu, os caiff ei chyhoeddi. Yn aml, pan fydd nifer o euogfarnau, ni fydd pob un yn berthnasol i gais am fforffedu gan y gallai fod yn wir nad yw pob trosedd y mae aelod cynllun pensiwn yn cael ei euogfarnu ohoni yn dod o fewn cwmpas y darpariaethau fforffedu. Pan gaiff ei chyhoeddi, bydd tystysgrif yn nodi’r troseddau a dyddiadau’r euogfarn y caiff ei chyhoeddi ar eu cyfer. Felly, mae’n bwysig bod y rhain yn gywir.
2. Manylion unrhyw achosion o gamymddwyn yn erbyn yr aelod cynllun pensiwn, y deilliant (a deilliant apêl, pe cafwyd un) ac a ydyw’r aelod cynllun pensiwn wedi’i gynnwys ar y rhestr gwahardd ac ymgynghorol.
3. Unrhyw wybodaeth berthnasol am ymddygiad cyffredinol yr aelod cynllun pensiwn yn ystod yr achos a’r ymchwiliad, gan gynnwys ple, cydweithrediad ac ati.

Gallai gwybodaeth ddefnyddiol ychwanegol gynnwys:

• Manylion cryno am wasanaeth yr aelod cynllun pensiwn, megis hyd ei wasanaeth a’i reng;
• Goblygiadau ariannol unrhyw fforffedu posibl, gan gynnwys manylion pensiwn, ar weddwon neu unrhyw ddibynyddion fel plant neu aelodau o’r teulu.

Mae’r dogfennau i’w hatodi i’r adroddiad a allai fod yn berthnasol yn cynnwys:

• Datganiad y dioddefwyr / tystion os ydyw ar gael
• Copi o’r dyfarniad ar y ddedfryd
• Adroddiadau’r wasg / cyfryngau.

 

Dylid anfon ceisiadau at:

Swyddogion heddlu:   [email protected]   

Staff yr heddlu:         [email protected]     

Pan fydd y Comisiynydd yn penderfynu gwneud cais am dystysgrif, rhaid i’r awdurdod goruchwylio pensiynau roi gwybod i’r aelod(au) cynllun pensiwn am y cais i’r Ysgrifennydd Cartref cyn gynted â phosibl.

 

• CAM 2 – Ystyriaeth gan yr Ysgrifennydd Cartref

Unwaith y bydd y Swyddfa Gartref yn cael y cais, bydd swyddogion yn ystyried yr wybodaeth a ddarparwyd, ac yn cysylltu â’r awdurdod goruchwylio pensiynau os oes unrhyw ymholiadau, neu os oes unrhyw wybodaeth bwysig wedi’i hepgor. Yna, caiff cyngor ffurfiol ei baratoi a’i gyflwyno i’w ystyried gan yr Ysgrifennydd Cartref.

Gwneir y penderfyniad ynghylch a ddylid cyhoeddi tystysgrif gan yr Ysgrifennydd Cartref, neu Weinidog Gwladol, ar ei ran o dan awdurdod dirprwyedig. Mae rhai o’r ffactorau y bydd yr Ysgrifennydd Cartref yn eu hystyried wrth lunio barn yn cynnwys:

1. pa mor ddifrifol oedd y drosedd, neu droseddau, yn ôl y llys (fel y dangosir gan y gosb a osodwyd a’r sylwadau dedfrydu);
2. yr amgylchiadau sy’n ymwneud â’r drosedd a’r ymchwiliad;
3. rheng y swyddog (yr aelod cynllun pensiwn) neu’r cyn-swyddog (po fwyaf uchel ydyw o ran rheng, y mwyaf yw’r golled o hygrededd a hyder);
4. hyd a lled y cyhoeddusrwydd a’r sylw yn y cyfryngau; ac
5. a oedd y drosedd yn ymwneud â’r canlynol:
   • cynllwyn a drefnwyd ymhlith sawl swyddog
   • cymorth weithredol i droseddwyr
   • gwyrdroi cwrs cyfiawnder ar gyfer y cyhoedd
   • bradychu sefyllfa bwysig o ymddiriedaeth er budd personol
   • llygru neu ymgais i lygru swyddogion iau.

 

Rôl yr Ysgrifennydd Cartref yw ardystio a ydyw’r drosedd a gyflawnwyd yn cael ei hystyried yn niweidiol iawn i fuddiannau’r wladwriaeth, neu’n debygol o arwain at golled ddifrifol o hyder yn y gwasanaeth cyhoeddus. Nid yw’n ofynnol i’r awdurdod goruchwylio pensiynau roi unrhyw arwydd o unrhyw swm na chyfran, na hyd unrhyw fforffedu y gallent fod yn ei ystyried er mwyn gwneud cais am dystysgrif gan yr Ysgrifennydd Cartref.

Unwaith y bydd y penderfyniad hwn wedi’i wneud, bydd swyddogion yn cysylltu â’r awdurdod goruchwylio pensiynau i’w hysbysu o’r canlyniad. Fel arfer bydd hyn yn cynnwys llythyr eglurhaol ffurfiol yn amlinellu’r rhesymau dros y penderfyniad, gyda’r dystysgrif wedi’i llofnodi wedi’i hatodi hefyd (os ydyw wedi’i chyhoeddi). Mae’r llythyr eglurhaol yn atgoffa’r awdurdod bod yn rhaid rhoi gwybod i’r aelod cynllun pensiwn sy’n destun fforffedu o ganlyniad y cais, a’r rhesymau drosto, ynghyd â chopi o’r dystysgrif (os ydyw wedi’i chyhoeddi). Dylai’r awdurdod goruchwylio pensiynau roi gwybod i’r unigolyn cyn gynted â phosibl ar ôl iddo gael y dystysgrif (os ydyw wedi’i chyhoeddi).

Os ydyw’r Ysgrifennydd Cartref yn gwrthod cyhoeddi tystysgrif, ni all y broses fforffedu fynd rhagddi ac mae’r broses yn dod i ben yma.

 

• CAM 3 – Y weithdrefn i’w dilyn ar ôl cael tystysgrif yr Ysgrifennydd Cartref

Bydd y Comisiynydd yn ystyried a ddylid fforffedu pensiwn yr aelod cynllun pensiwn ac, os felly, i ba raddau y dylid fforffedu’r pensiwn, ac am ba hyd.

Gwneir y penderfyniadau hyn fesul achos a byddant yn dibynnu ar fanylion pob achos. Ni ellir fforffedu pensiwn unigolyn fwy na 65% (a dim ond cyfraniadau sydd wedi’u gwneud gan yr heddlu).

Gallai ffactorau a allai ddylanwadu ar faint y fforffedu y mae awdurdod goruchwylio pensiynau yn penderfynu ei gymhwyso gynnwys:

• difrifoldeb y drosedd;
• yramgylchiadau sy’n ymwneud â’r drosedd a’r ymchwiliad;
• rheng y swyddog (yr aelod cynllun pensiwn) neu’r cyn-swyddog (po fwyafuchel ydyw o ran rheng, y mwyaf yw’r golled o hygrededd a hyder);
• hyd a lled y cyhoeddusrwydd a’r sylw yn y cyfryngau; ac
• a oedd y drosedd yn ymwneud â’r canlynol:
  1. cynllwyn a drefnwyd ymhlith sawl swyddog
  2. cymorth weithredol i droseddwyr

• gwyrdroi cwrs cyfiawnder ar gyfer y cyhoedd

1. bradychu sefyllfa bwysig o ymddiriedaeth er budd personol
2. llygru neu ymgais i lygru swyddogion iau

• amgylchiadau lliniarol;
• anabledd yn y teulu;
• salwch ar adeg y drosedd;
• cymorth neu wybodaeth a roddwyd i’r heddlu yn ystod yr ymchwiliad neu yn dilyn yr euogfarn.

 

Fel sy’n berthnasol ar gyfer Cam 1:

• Dylid gofyn am gyflwyniadau gan y swyddog neu aelod o staff yr heddlu, a dylid gofyn i’r cyn-swyddogneu aelod o staff yr heddlu i fod yn bresennol, os dymunir. Nid oes angen i’r swyddog neu aelod o staff yr heddlu ymateb, ondrhaid i’r SCHTh allu dangos eu bod wedi cael eu gofyn.
• Gellir gofyn am gyngor cyfreithiol er mwyn gwneud y penderfyniad terfynol, ond unwaith eto, nidyw’n ofyniad.

Os bydd y CHTh yn penderfynu fforffedu, bydd angen i’r SCHTh roi gwybod i’r aelod cynllun pensiwn, y Prif Gwnstabl, y Swyddfa Gartref, a’r adran bensiynau berthnasol, naill ai’n uniongyrchol neu drwy dîm cyflogres yr heddlu. Argymhellir ceisio cadarnhad gan y darparwr pensiwn y bydd y fforffediad yn cael ei gymhwyso, a bod yr wybodaeth hon yn cael ei chofnodi.

Dylai’r aelod cynllun pensiwn hefyd gael gwybod am ei hawl i apelio. Felly mae’n hanfodol bod cofnodion cywir a manwl yn cael eu cynnal drwy gydol y broses, rhag ofn y bydd yr aelod cynllun pensiwn yn dymuno apelio.

Efallai y bydd hefyd am hyrwyddo’r fforffedu, yn fewnol ac yn allanol. Yn fewnol, o bosibl ar y cyd â’r Adran Safonau Proffesiynol, bydd yn dangos i swyddogion ganlyniad posibl camwedd troseddol difrifol. Gallai hyn fod yn rhan o broses gyfathrebu fewnol ehangach sydd â’r nod o dynnu sylw at y gwaith y mae’r heddlu yn ei wneud i frwydro yn erbyn camymddygiad swyddogion. Yn allanol, bydd yn dangos ymrwymiad y CHTh i’r safonau uchaf, a chamau cadarn i’w cynnal. Efallai y bydd Comisiynwyr Heddlu a Throseddu hefyd yn dymuno rhoi gwybod i’w Panel Heddlu a Throseddu lleol.

 

• Hawl apelio

Mae Rheoliad H5 o Reoliadau 1987 yn darparu ar gyfer hawl i apelio i Lys y Goron, yn erbyn penderfyniad yr awdurdod goruchwylio pensiynau i fforffedu’r pensiwn. Gall aelod cynllun pensiwn apelio yn erbyn penderfyniad yr awdurdod goruchwylio pensiynau bod yr achos wedi dod o fewn cwmpas y rheoliadau perthnasol, a/neu yn erbyn hyd a lled y fforffedu. Gallai penderfyniad i ohirio’r penderfyniad ynghylch fforffedu yn dilyn cyhoeddi tystysgrif, mewn rhai amgylchiadau, fod yn niweidiol i apêl lwyddiannus ac yn agored i her.

Mae’r hawl i apelio yn bodoli ar ôl i’r fforffedu ddigwydd, hyd yn oed os ydyw’r achos dros dramgwydd yn ymwneud â ph’un a gyflawnwyd y drosedd mewn cysylltiad â’u gwasanaeth ai peidio.

O dan reolau Llys y Goron, dylid cyflwyno hysbysiad o apêl i’r llys ac unrhyw barti arall i’r apêl o fewn 21 diwrnod i’r diwrnod y cafodd yr unigolyn ei hysbysu o’r penderfyniad. Fodd bynnag, mae gan y llys ddisgresiwn i dderbyn apêl ar ôl y cyfnod hwnnw.

Mae hawliau apelio hefyd yn cael eu cynnwys yn Rheoliadau 2006 (rheoliadau 66(d) a 67(2)(d)) a Rheoliadau 2015 (rheoliad 216).

 

• Papurau cefndir

Rheoliad K5 o Reoliadau Pensiynau’r Heddlu 1987

Rheoliad 55 o Reoliadau Pensiynau’r Heddlu 2006

Pennod 5 Rhan 13 o Reoliadau Pensiynau’r Heddlu 2015

Canllawiau’r Swyddfa Gartref ar fforffedu pensiwn yr heddlu: Canllawiau ar sut i wneud cais am dystysgrif fforffedu pensiwn ar gyfer pensiynau swyddogion heddlu yn dilyn euogfarn o drosedd Fersiwn 1.0 – Cyhoeddwyd 11 Chwefror 2021

Fforffedu pensiwn heddlu’r Swyddfa Gartref: Ffurflen gais

 

5.  Gweithredu ac adolygu

• Dylai’r Prif Gwnstabl (neu eu Swyddog Staff / cynrychiolydd) drafod y posibilrwydd o wneud cais i fforffedu â SCHTh, yr Adran Safonau Proffesiynol, yr Adran Gwasanaethau Cyfreithiol, ac arbenigwr pensiynau’r heddlu. Fel rhan o’r broses hon, dylid rhoi gwybod i’r aelod cynllun pensiwn a’i gymdeithas staff fod y Prif Gwnstabl (neu ei Swyddog Staff / cynrychiolydd) yn ystyried fforffedu pensiwn.

 

 

• Mae’r egwyddorion plismona moesegol canlynol yn berthnasol i’r polisi hwn:
  • Dewrder – gwneud penderfyniadau, eu cyfathrebu a bod yn atebol amdanynt, a sefyll yn erbyn unrhyw beth a allai ddwyn anfri ar ein proffesiwn.
  • Parch ac empathi – annog barn pobl eraill, gwrando arni a’i deall, a cheisio cydnabod ac ymateb i’r heriau corfforol, meddyliol ac emosiynol y gallwn ni a phobl eraill eu hwynebu.
  • Gwasanaeth cyhoeddus – gweithio er budd y cyhoedd, meithrin ymddiriedaeth a hyder y cyhoedd, ac ymfalchïo mewn darparu gwasanaeth rhagorol i’r cyhoedd.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mehefin 2026