Polisi Gweithio'n Glyfrach

1. Datganiad Polisi

Nod Heddlu Dyfed-Powys yw cefnogi trefniadau gweithio’n glyfrach ac arloesol sy'n dal i ddiwallu'r gwaith o ddarparu gwasanaethau effeithiol sy'n canolbwyntio ar y cwsmer ac anghenion y cyhoedd sy'n byw yn ardal Dyfed-Powys.

Mae cefnogi swyddogion a staff er mwyn sicrhau mwy o hyblygrwydd yn gofyn am ystyried ble, pryd a sut y cyflawnir gwaith; mae hyn yn sail i'r cysyniad o weithio'n glyfrach. Gall helpu i gynyddu cymhelliant swyddogion a staff, lleihau absenoldeb oherwydd salwch, hyrwyddo llesiant swyddogion a staff a denu/cadw gweithlu medrus a brwdfrydig.

Nod y polisi hwn a’r weithdrefn gysylltiedig yw rhoi fframwaith i reolwyr ar gyfer gweithredu ffyrdd newydd o weithio yn unol â gweithio'n glyfrach.

 

2. Cwmpas y Polisi

Mae'r polisi yn berthnasol i swyddogion a staff Heddlu Dyfed-Powys yn unig, boed yn staff amser llawn, rhan-amser, parhaol, cyfnod penodol, dros dro (gan gynnwys staff asiantaeth) neu staff ar secondiad. Rhaid i unrhyw swyddog heddlu a staff heddlu sy'n cyrchu ac yn defnyddio asedau ac eiddo'r Heddlu roi sylw dyledus i gynnwys y polisi hwn.

Mae'r categori 'Ystwyth' o weithio'n glyfrach, fel y nodir o fewn y ddogfen weithdrefn gysylltiedig, yn berthnasol i staff yr heddlu’n unig.

 

3. Pwerau a Gofynion Polisi/Cyfreithiol  

3.1 Cydraddoldeb

Bydd ymrwymiad Heddlu Dyfed-Powys i gyfle cyfartal yn cael ei weld bob amser wrth weithredu'r polisi hwn a'r weithdrefn ategol. Bydd hyn yn sicrhau bod unigolion yn cael eu trin yn deg a heb wahaniaethu ar sail hil, cenedligrwydd, tarddiad ethnig neu genedlaethol, rhyw, statws priodasol neu bartneriaeth sifil, anabledd, oedran, cyfeiriadedd rhywiol, aelodaeth neu weithgaredd undebau llafur, cred wleidyddol neu grefyddol, mamolaeth neu feichiogrwydd, ailbennu rhywedd ac euogfarn droseddol nad yw'n gysylltiedig.

3.2 Gofynion Cyfreithiol

Mae'r gofynion cyfreithiol canlynol wedi'u nodi yn y polisi hwn:

• Deddf Cydraddoldeb 2010
• Deddf Hawliau Dynol 1998
• Deddf Diogelu Data 2018
• Rheoliad Cyffredinol y DU ar Ddiogelu Data  (GDPR y DU)
• Deddf Rhyddid Gwybodaeth 2000
• Deddf Iechyd a Diogelwch yn y Gwaith 1974

 

3.3 Polisïau, gweithdrefnau a chanllawiau cysylltiedig

Polisi Gweithio Rhan Amser a Gweithio Hyblyg, Cynllun Oriau Hyblyg, Polisi Iechyd a Diogelwch, Canllawiau Gweithio’n Glyfrach - Cyflogai, Canllawiau Gweithio’n Glyfrach - Rheolwyr Llinell, Polisi Diogelu Data, Polisi Torri Diogelu Data, Polisi a Safonau Diogelwch Gwybodaeth

4. Dewisiadau a Chynlluniau Wrth Gefn  

4.1 Beth yw Gweithio’n Glyfrach?

Mae gweithio’n glyfrach yn golygu bod yn fwy hyblyg ynghylch pryd a/neu ble rydym yn gweithio, a sut rydym yn defnyddio gofod a thechnoleg i ddarganfod ffyrdd newydd a mwy effeithiol o wneud pethau, e.e. patrymau gwaith amrywiol, gweithio o bell, defnyddio galwadau cynhadledd yn hytrach na chyfarfodydd corfforol ac ati. Gall y math hwn o weithio helpu i leihau costau, gwella cynhyrchiant a chanolbwyntio ar gwsmeriaid, yn ogystal â chefnogi llesiant unigolion a gwell cydbwysedd rhwng bywyd a gwaith.

4.2 Categorïau Gweithio’n Glyfrach

Mae Heddlu Dyfed-Powys yn cydnabod na fydd pob swydd yn gymwys ar gyfer gweithio ystwyth neu weithio gartref ond mae gweithio’n glyfrach yn cwmpasu mwy na dim ond pryd a ble rydych chi'n gweithio a dylid ystyried defnyddio amser ac adnoddau yn fwy effeithlon yn gyffredinol.

Er mwyn sicrhau ei bod yn glir ac yn gyson, bydd y graddau y gall rolau unigolion ddefnyddio gweithio ystwyth a gweithio gartref yn cael eu hasesu fel un o dri chategori: Ystwyth, Sefydlog a Gweithredol Sefydlog. Ceir diffiniad o'r categorïau o fewn y ddogfen weithdrefn gysylltiedig.

 

4.3 Biliau Cyfleustodau a Threth

Ni fydd Heddlu Dyfed-Powys yn ad-dalu unigolion am gostau cyfleustodau wrth weithio gartref, megis gwresogi, goleuo a band eang.

Mae gweithio gartref yn wirfoddol yn Heddlu Dyfed-Powys, ac o ganlyniad nid yw gwneud hawliad o'r fath i CThEF yn ddilys.

 

4.4 Offer

Yr offer safonol ar gyfer gweithwyr ystwyth yw: gliniadur, llygoden, bysellfwrdd, clustffonau ac un monitor (ar gais).

4.5 Telerau ac Amodau Gwasanaeth a Chytundeb Cyflogaeth (Staff yr Heddlu)

Bydd telerau ac amodau gwasanaeth, polisïau a gweithdrefnau presennol yn parhau i fod yn berthnasol i'r holl swyddogion a staff.

Yn achos staff yr heddlu sy'n 'optio i mewn' i weithio ystwyth, bydd cytundeb yn cael ei amrywio i nodi'n glir hyblygrwydd a chyfyngiadau'r trefniant gweithio ystwyth. Bydd y gweithle cytundebol a'r oriau gwaith yn aros yr un fath.

 

4.6 Rheolwyr Llinell  

Nid yw rheoli gweithwyr ystwyth yn wahanol i arferion rheoli da bob dydd; dylai rheolwyr bennu amcanion penodol a gofynion canlyniadau clir i'w galluogi i asesu pa mor dda y mae'r unigolyn yn perfformio yn erbyn yr amcanion a'r canlyniadau hyn. Mae rheolwyr yn gyfrifol am hybu amcanion y polisi hwn a hyrwyddo’r newid diwylliannol sydd ei angen, sy’n cynnwys cael agwedd gadarnhaol tuag at ystyried ceisiadau ar gyfer gweithio’n glyfrach, (yn amodol ar anghenion y gwasanaeth) a chefnogi gweithredu’r ffyrdd newydd o weithio.

Mae Heddlu Dyfed-Powys yn cadw'r hawl i dynnu'n ôl y cyfle i weithio ystwyth, gan gynnwys gweithio gartref, os torrir y Polisi Gweithio'n Glyfrach. Mae torri'r Polisi Gweithio'n Glyfrach yn cynnwys torri rheolau diogelwch a diogelu data.

Mae egwyddorion y Cod Moeseg yn berthnasol i’r polisi hwn -  

• Dewrder
• Parch ac Empathi
• Gwasanaeth Cyhoeddus

Mae'r polisi hwn yn anelu i gefnogi cyflenwi Ein Cynllun a'n Llw Diwylliant.

 

5. Gweithredu ac adolygu

Datblygwyd y polisi hwn i alluogi Heddlu Dyfed-Powys i ddiwallu anghenion y boblogaeth y mae'n ei gwasanaethu yn y ffordd fwyaf effeithiol a hyblyg.

Mae’r polisi hwn yn ddarostyngedig i’r broses adolygu arferol. Mae cyfnod adolygu o dair blynedd o’r dyddiad cyhoeddi wedi’i gytuno. Datblygu Pobl a’r Sefydliad sy’n gyfrifol am adolygu’r polisi a chyfrifoldeb y Cyd-bwyllgor Ymgynghori a Thrafod Ffurfiol yw goruchwylio’r polisi.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Medi 2025