Polisi Recriwtio a Dethol

 

1. Datganiad Polisi

Nod y polisi yw rhoi fframwaith ar gyfer arfer gorau o ran recriwtio a dethol, a sicrhau:

• Bod gan Heddlu Dyfed-Powys arferion darparu adnoddau effeithiol a theg sy’n cefnogi cyflenwi gwasanaeth heddlu effeithiol.
• Bod y broses recriwtio’n seiliedig ar gyfle cyfartal ar gyfer pob ymgeisydd, yn fewnol ac yn allanol. Bydd pob ymgeisydd yn cael ei ystyried ar sail ei sgiliau a galluoedd, sy’n berthnasol ar gyfer y swydd y gwneir cais amdani.
• Bod Heddlu Dyfed-Powys bob amser yn anelu i recriwtio unigolion sydd fwyaf addas ar gyfer rolau penodol. Asesir cymwysterau, profiad a sgiliau ar y lefel sy’n berthnasol i’r swydd.

Rhaid gweithredu’r polisi hwn yn deg, cyfartal a chyson, ni waeth am oed, anabledd, ailbennu rhywedd, priodas neu bartneriaeth sifil, beichiogrwydd a mamolaeth, hil, crefydd neu gred, rhyw, cyfeiriadedd rhywiol neu unrhyw nodweddion gwarchodedig.

 

2. Cwmpas y Polisi

Mae’r polisi hwn a’r ddogfen weithdrefn gysylltiedig yn disodli polisïau recriwtio a dethol staff heddlu blaenorol yn ogystal â dethol swyddogion heddlu ar gyfer swyddi arbenigol.

Er ei fod yn cael ei weithredu’n unol â’r llawlyfr staff, mae’r polisi hwn a’r ddogfen weithdrefn gysylltiedig yn rhoi mwy o fanylion am recriwtio a dethol o fewn yr heddlu a’r prosesau y dylid glynu wrthynt. Nid yw’r polisi hwn yn ffurfio rhan o delerau ac amodau cyflogaeth staff yr heddlu, a gall fod yn agored i newid yn ôl disgresiwn Prif Swyddogion.

Mae’r polisi’n berthnasol i’r canlynol, ond heb fod yn gyfyngedig i hynny: Holl gategorïau swyddogion a staff Heddlu Dyfed-Powys, pa un ai a ydynt yn llawn amser, rhan amser, parhaol, cyfnod penodol, dros dro (gan gynnwys staff asiantaeth, cymdeithion a chontractwyr), staff sydd ar secondiad neu’n wirfoddolwyr. Rhaid i swyddogion, staff a gwirfoddolwyr sy’n cael gafael ar asedau ac eiddo’r Heddlu a’u defnyddio roi ystyriaeth ddyledus i gynnwys y polisi hwn.

 

3.  Pwerau a Gofynion Cyfreithiol/Polisi  

Ystyrir yr holl ddeddfwriaethau cyflogaeth cyffredinol wrth gynhyrchu neu adolygu’r polisi a gweithdrefnau cysylltiedig. Agweddau allweddol o ddeddfwriaeth yw:

Deddf Cydraddoldeb 2010

Rheoliad 10A Rheoliadau’r Heddlu 2003

Rheoliad 1ZA Rheoliadau Cwnstabliaid Gwirfoddol 1965

Deddf Hawliau Cyflogaeth 1996

Polisi Dyrchafu a Dethol Swyddogion Heddlu

Rheoli Gweithwyr ar Brawf

Polisi Rheoli Newid

Rheoliadau Gweithwyr Asiantaeth.

Gweithdrefn Recriwtio a Dethol

 

4.  Dewisiadau a Chynlluniau Wrth Gefn  

Nod unrhyw broses recriwtio a dethol yw penodi’r unigolyn gorau ar gyfer y swydd. Mae nifer o rolau a chyfrifoldebau arbennig o fewn y broses recriwtio. Nodir y rhain isod:

Cyfrifoldeb Rheolwyr Llinell/Adran

4.1 Proffil Rôl

• Sicrhau bod y proffil rôl ar gyfer y swydd wag berthnasol yn gywir.
• Mae’r Proffil Rôl yn ffurfio sail y broses gwerthuso swydd a rhaid ei grynhoi yn unol â’r ffurf y cytunwyd arno. Rhaid iddo gynnwys manylion am y cymwysterau, sgiliau a phrofiad perthnasol y dylai ymgeisydd arddangos er mwyn cyflawni’r swydd yn ddiogel ac effeithiol. Rhaid i bob cymhwyster, sgil a phrofiad perthnasol fod yn gyfiawnadwy a chymesur.
• Mae’r Proffil Rôl yn darparu’r sail ar gyfer paratoi’r hysbyseb, rhestr fer, cyfweliad, a phenderfyniad dethol. O’r herwydd, a chyn hysbysebu, rhaid adolygu proffil rôl a chadarnhau ei fod yn gywir. Lle nad oes proffil rôl yn bodoli, h.y. swydd newydd, rhaid i’r rheolwr sicrhau bod proffil addas yn cael ei lunio a’i brosesu drwy werthusiad swydd.

 

4.2  Ffurflen Gais Swydd Wag

• Cwblhau ffurflen gais swydd wag a’i chyflwyno er ystyriaeth a phenderfyniad.
• Rhaid i’r ffurflen gais swydd wag ddarparu’r holl fanylion perthnasol ar gyfer y swydd gan y bydd unrhyw hysbysiad swydd yn gydnaws â’r cais a awdurdodwyd.

4.3 Recriwtio a’r broses gynefino

• Penodi panel a llunio rhestr fer o’r ffurflenni cais a phroses gyfweld. Rhaid bod pob aelod panel wedi’i hyfforddi i gynnal cyfweliadau. Rhaid i aelod panel annibynnol ffurfio rhan o’r panel ar gyfer llunio rhestr fer a chyfweld.
• Gwahoddir y Ffederasiwn/Unsain i arsylwi pob cyfweliad.
• Rhoi adborth i ymgeiswyr yn ôl yr angen.
• Cefnogi’r Tîm Recriwtio wrth ymgysylltu gyda’r ymgeisydd drwy gydol y broses wirio cyn-cyflogaeth.
• Ymgysylltu â’r ymgeisydd/ymgeiswyr llwyddiannus i gytuno ar ddyddiad cychwyn unwaith y bydd yr holl wiriadau cyn-cyflogaeth wedi’u cwblhau.
• Trefnu rhaglen sefydlu leol ar gyfer yr ymgeisydd/ymgeiswyr llwyddiannus ac unrhyw ofynion angenrheidiol eraill, gan gynnwys rheoli cyfnod prawf staff yr heddlu a threfnu hyfforddiant angenrheidiol.

 

Tîm Recriwtio Datblygu Pobl a’r Sefydliad  

• Rhoi cyngor ac arweiniad i reolwyr llinell ar y broses recriwtio a dethol.
• Hap samplu swyddi gwag staff heddlu/swyddogion heddlu mewnol er mwyn sicrhau ansawdd holl gamau’r broses.
• Cynghori a chynorthwyo Arweinydd yr Adran â pharatoi cwestiynau cyfweliad a sicrhau ansawdd pob pecyn cyfweld sydd wedi’i gwblhau.
• Paratoi pob proses recriwtio swmp (Swyddogion Heddlu, SCCH, Cwnstabliaid Gwirfoddol a Throsglwyddedigion) yn y llwyfan recriwtio.
• Prosesu’r holl brosesau recriwtio swmp i gynnwys asesiadau, cyfweliadau, cynigion amodol o swydd, gwiriadau cyn cyflogaeth a chynigion swydd diamod.
• Paratoi swyddi gwag staff heddlu a swyddogion heddlu mewnol yn y llwyfan recriwtio yn dilyn cymeradwyaeth.
• Monitro’r broses recriwtio ar-lein.
• Cyflawni gwiriadau cymhwysedd perthnasol ar bob cais a dderbynnir.
• Anfon y rhestr fer at y panel ar ôl y dyddiad cau.
• Gwahodd yr ymgeiswyr llwyddiannus ar ôl dethol rhestr fer o’r ceisiadau ar gyfer asesiad/cyfweliad a diweddaru statws ymgeiswyr aflwyddiannus.
• Prosesu ymgeiswyr yn dilyn cyfweliad.
• Cyhoeddi cynigion swydd amodol.
• Sicrhau bod yr holl wiriadau cyn-gyflogaeth wedi’u cwblhau.
• Cydgysylltu gyda Fetio, ac Iechyd Galwedigaethol a Llesiant.
• Datblygu cynigion swydd diamod, ar sail y wybodaeth a gyflwynwyd ar y Ffurflen Gais Swydd Wag a gymeradwywyd.
• Anfon gwaith papur a chanllawiau’r broses gynefino at y rheolwr llinell.
• Cyhoeddi rhifau cyflogres ar gyfer aelodau staff newydd.

 

5.  Gweithredu ac Adolygu  

Er mwyn sicrhau effeithiolrwydd y polisi hwn a’r ddogfen weithdrefn gysylltiedig, bydd yn cael ei adolygu gan yr adran Datblygu Pobl a’r Sefydliad bob tair blynedd. Ystyrir unrhyw heriau, newidiadau i ddeddfwriaethau a chanllawiau cenedlaethol.

Bydd unrhyw ddiwygiadau i’r polisi neu’r ddogfen weithdrefnau gysylltiedig yn cael eu gweithredu gan yr adran Datblygu Pobl a’r Sefydliad gyda chymeradwyaeth y Bwrdd Pobl, Diwylliant a Moeseg.

 

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mawrth 2026