Polisi Rheoli Newid

1. Datganiad Polisi

Nod y polisi hwn yw sicrhau ymagwedd resymegol a chyson at ailstrwythuro, adleoli a dileu swyddi yn Heddlu Dyfed–Powys, gan ddarparu triniaeth deg a chyfiawn i staff beth bynnag fo'u sefyllfa o ran eu Hoedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol neu'r Gymraeg.

Mae’n berthnasol ar gyfer staff heddlu llawn amser, rhan amser, parhaol, tymor penodol, a dros dro.

Mae’n berthnasol i’r canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, boed yn staff llawn amser, rhan amser, parhaol, tymor penodol, dros dro (gan gynnwys staff asiantaeth, contractwyr a chymdeithion) staff ar secondiad a gwirfoddolwyr. Dylai swyddogion, staff a gwirfoddolwyr yr Heddlu sy’n cael mynediad at asedau ac eiddo’r Heddlu ac sy’n eu defnyddio roi ystyriaeth ddyledus i gynnwys y polisi hwn.

2. Cwmpas y Polisi

Mae'r polisi hwn yn berthnasol i holl staff yr heddlu ac yn nodi dull yr heddlu o ymdrin ag ailstrwythuro, adleoli a dileu swyddi. Nid yw'r polisi yn rhan o delerau ac amodau cyflogaeth cyflogeion a gellid ei newid yn ôl disgresiwn y rheolwyr.

3.  Pwerau a Gofynion Polisi/Cyfreithiol

Mae’r polisi hwn yn ymwneud â ‘Darpariaethau Anghyflogaeth’ yr Heddlu a Llawlyfr Cyflog ac Amodau Gwasanaeth Staff yr Heddlu.

4.  Opsiynau a Dewisiadau wrth Gefn

Mae’r Cyfarwyddwr/Pennaeth Adran yn gyfrifol am weithredu’r newidiadau arfaethedig gyda chymorth, cyngor ac arweiniad gan yr adran Datblygu Pobl a’r Sefydliad.

Mewn ymgynghoriad â’r adran Datblygu Pobl a’r Sefydliad, bydd rheolwyr llinell yn sicrhau bod y gronfa ar gyfer dethol yn cael ei nodi’n gywir a bod y meini prawf dethol a ddefnyddir yn wrthrychol ac yn cael eu gweithredu’n deg.

Gweithredir y Cod Moeseg i benderfyniadau a wneir yn y broses hon. Yn benodol:

• Dewrder - ymgynghorir â staff ynghylch newidiadau arfaethedig. Rhoddir gwybod i staff yr effeithir arnynt yn uniongyrchol am benderfyniadau a wneir ar ôl ymgynghori.
• Parch ac Empathi - drwy eu cyfranogiad yn y grŵp ac ymgynghori unigol, anogir staff i ddweud eu dweud, gan gynnwys esbonio eu hamgylchiadau personol a’r heriau maen nhw’n eu hwynebu.
• Gwasanaeth cyhoeddus – Wrth wneud penderfyniadau, bydd y Pennaeth Adran yn ystyried addasiadau sydd angen gan staff a’r angen i ddarparu adnoddau effeithiol ar gyfer blaenoriaethau’r Heddlu a chyflwyno gwasanaethau ardderchog i’r cyhoedd.

Mae'r polisi hwn yn anelu i gefnogi cyflenwi Ein Cynllun a'n Llw Diwylliant.

5.  Gweithredu ac Adolygu

Er mwyn sicrhau effeithiolrwydd y polisi hwn, cynhelir adolygiad bob tair blynedd, gan ystyried heriau i’r polisi ac unrhyw newidiadau i ddeddfwriaethau a chanllawiau cenedlaethol. 

Yr adran Datblygu Pobl a’r Sefydliad fydd yn cynnal yr adolygiad. Bydd pob diwygiad i’r polisi’n cael ei oruchwylio a’i gymeradwyo gan y Cyd-bwyllgor Ymgynghori a Negodi.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Ionawr 2025