Polisi Tor Diogelwch Data

 

1. Datganiad Polisi

Mae’r Polisi Tor Diogelwch Data’n galluogi Heddlu Dyfed-Powys i sefydlu arferion da o gwmpas defnyddio a thrin gwybodaeth, hyrwyddo diwylliant o ymwybyddiaeth a gwelliant, a chydymffurfio â deddfwriaeth. Mae’n anelu i roi fframwaith i weithwyr sy’n amlinellu’r driniaeth briodol o doriadau diogelwch data a rhoi sicrwydd bod yr Heddlu’n gweithredu’n gyfrifol er mwyn gwarchod y data personol y mae’n prosesu yn unol â Rheoliad Cyffredinol ar Ddiogelu Data’r DU, Deddf Diogelu Data 2018, a deddfwriaethau cysylltiedig eraill.

Mae Swyddfa’r Comisiynydd Gwybodaeth yn diffinio tor data personol fel tor diogelwch sy’n arwain at ddifa, colli, neu newid data personol, neu ei ddatgelu neu gael mynediad ato heb awdurdod, gan gynnwys toriadau sy’n ganlyniad achosion damweiniol a bwriadol. Mae hyn yn golygu bod tor yn fwy na dim ond colli data personol. 

Mae’r polisi hwn yn hollbwysig ar gyfer helpu gweithwyr Heddlu Dyfed-Powys i ddeall sut i ymateb pan nodir achos posibl o dor diogelwch data. Mae gwybodaeth yn arf pwerus ac yn ased hollbwysig o ran prosesu gorfodi’r gyfraith a rheoli adnoddau a gwasanaethau ledled yr Heddlu. Mae’n hollbwysig fod swyddogion heddlu, staff yr heddlu a gwirfoddolwyr yn deall sut i warchod data personol yn effeithiol a bod gwybodaeth gyfrinachol a sensitif yn aros yn ddiogel, a hefyd beth i’w wneud pan allai data personol fod wedi’i gyfaddawdu mewn rhyw ffordd. Mae hyn yn berthnasol ar gyfer gwybodaeth sy’n ymwneud â’r sefydliad, ei weithwyr a’r cyhoedd. Mae’n hanfodol hefyd bod polisïau, gweithdrefnau a phrosesau’n darparu sylfaen gadarn ar gyfer cydymffurfiaeth â rheoliadau diogelu data ar draws yr Heddlu cyfan.

Mae’n berthnasol i’r canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, boed yn staff llawn amser, rhan amser, parhaol, tymor penodol, dros dro (gan gynnwys staff asiantaeth, contractwyr a chymdeithion) staff ar secondiad a gwirfoddolwyr. Dylai swyddogion, staff a gwirfoddolwyr yr Heddlu sy’n cael mynediad at asedau ac eiddo’r Heddlu ac sy’n eu defnyddio roi ystyriaeth ddyledus i gynnwys y polisi hwn.

 

2. Cwmpas y Polisi

Mae gan Heddlu Dyfed-Powys gyfrifoldeb statudol i brosesu data personol yn unol â darpariaethau Rheoliad Cyffredinol ar Ddiogelu Data’r DU mewn perthynas â phrosesu nad yw’n ymwneud â gorfodi’r gyfraith a Deddf Diogelu Data 2018 mewn perthynas â phrosesu sy’n ymwneud â gorfodi’r gyfraith. 

O dan Ddeddf Diogelu Data 2018, Rhan 3, adrannau 67 a 68, ac Erthyglau 33, 34, 58 ac 84 a Datganiadau 75, 85-88 Rheoliad Cyffredinol ar Ddiogelu Data’r DU, gosodir dyletswyddau llym ar yr Heddlu mewn perthynas â thrin achosion o dorri rheoliadau diogelu data. Nod y polisi hwn yw safoni rheolaeth Heddlu Dyfed-Powys o achosion o dorri rheoliadau diogelu data a sicrhau cydymffurfiaeth â deddfwriaethau perthnasol a chanllawiau arfer gorau.

Mae Heddlu Dyfed-Powys yn cydymffurfio ag Arferion Proffesiynol Awdurdodedig y Coleg Plismona ar Reoli Gwybodaeth. Mae’r Arferion Proffesiynol Awdurdodedig yn darparu safonau a chanllawiau clir mewn perthynas â rheoli toriadau diogelwch data. Yn ogystal, mae Heddlu Dyfed-Powys yn dilyn holl ganllawiau perthnasol Swyddfa’r Comisiynydd Gwybodaeth mewn perthynas â materion diogelu data.  

Disgwylir i holl swyddogion heddlu, staff yr heddlu a gwirfoddolwyr ddeall ei gyfrifoldebau o dan ddeddfwriaeth diogelu data’r DU ynghylch adnabod ac adrodd am dor diogelwch data. Mae diogelu data’n gyfrifoldeb ar gyfer HOLL swyddogion, staff a gwirfoddolwyr, a rhaid glynu wrth y polisi hwn bob amser. Mae’r polisi hwn yn cael ei sbarduno cyn gynted ag y mae tor diogelwch posibl yn cael ei nodi ynghylch data personol sy’n cael ei brosesu gan, neu ar ran, Heddlu Dyfed-Powys.

Os na lynir wrth y polisi hwn a/neu mae toriadau diogelwch data’n cael eu gadael heb eu trin, mae risgiau posibl i’r Heddlu’n cynnwys y canlynol (ond heb fod yn gyfyngedig i hynny):

• Anallu i sicrhau a chynnal ffydd a hyder unigolion yn yr Heddlu
• Difrod i enw da’r Heddlu
• Methu â chydymffurfio â deddfwriaethau perthnasol
• Y posibilrwydd o dorri deddfwriaethau diogelu data’r DU, gan arwain at gamau gweithredu posibl yn cael eu cymryd yn erbyn yr Heddlu gan Swyddfa’r Comisiynydd Gwybodaeth am fethu â bodloni ei oblygiadau o ran hawliau gwybodaeth, a allai gynnwys cosbau ariannol llym
• Colled ariannol e.e. drwy geisiadau am iawndal

Mae toriadau hefyd yn debygol o gael effaith andwyol sylweddol ar unigolion. Er enghraifft:

• Arwain at wahaniaethu
• Difrod i enw da
• Colled ariannol
• Colli cyfrinachedd neu unrhyw anfantais gymdeithasol neu economaidd arwyddocaol arall a allai arwain at wahaniaethu

Mewn achosion mwy difrifol, er enghraifft, y rhai sy’n ymwneud â dioddefwyr a thystion, gall tor diogelwch data gael effaith andwyol mwy sylweddol ar unigolion. 

 

3.  Pwerau a Gofynion Polisi/Cyfreithiol

Mae gan Heddlu Dyfed-Powys ddyletswydd gyfreithiol i gydymffurfio â deddfwriaeth diogelu data’r DU. Bydd Heddlu Dyfed-Powys hefyd yn cyfeirio at Arferion Proffesiynol Awdurdodedig - Diogelu Data - Tor Data.

Mae deddfwriaeth berthnasol yn cynnwys:

• Deddf Diogelu Data 2018
• Rheoliad Cyffredinol ar Ddiogelu Data’r DU
• Deddf Camddefnyddio Cyfrifiaduron 1990
• Deddf Hawliau Dynol 1998
• Deddf Rheoleiddio Pwerau Ymchwilio 2000

Llywodraethir y broses o reoli achosion o dorri rheoliadau diogelu data gan yr Heddlu gan Ddeddf Diogelu Data 2018 a’r Rheoliad Cyffredinol ar Ddiogelu Data’r DU cysylltiedig. Disgwylir i bob swyddog, aelod staff a gwirfoddolwr ddeall ei gyfrifoldebau o dan y ddeddfwriaeth hon mewn perthynas ag adnabod ac adrodd am dor diogelwch data. Ceir manylion llawn yn y Ddogfen Ganllaw Diogelu Data.

Dylid darllen y polisi hwn hefyd ar y cyd â’r polisïau, protocolau, arferion a/neu gytundebau gwasanaeth canlynol: 

• Dogfen Ganllaw Diogelu Data
• Polisi Diogelu Data
• Polisi Diogelwch Gwybodaeth
• Polisi Rhannu Gwybodaeth
• Polisi Rheoli Cofnodion
• Polisi Archwilio Cydymffurfiaeth â Diogelu Data
• Canllawiau Rheoli Gwybodaeth Arferion Awdurdodedig Proffesiynol y Coleg Plismona
• Canllaw Diogelu Data Cyngor Cenedlaethol Prif Swyddogion yr Heddlu
• Canllawiau a Chod Ymarfer Swyddfa’r Comisiynydd Gwybodaeth

 

4.  Opsiynau a Dewisiadau wrth Gefn

Rolau a Chyfrifoldebau o fewn Heddlu Dyfed-Powys

Y Prif Gwnstabl

Prif Gwnstabl Heddlu Dyfed-Powys yw’r Rheolydd Data, ac o’r herwydd, mae ganddo/ganddi gyfrifoldeb cyffredinol dros brosesu’r holl ddata personol a brosesir gan yr Heddlu’n gyfreithlon. Yn yr un modd, maent yn gyfrifol am yr holl wybodaeth sy’n cael ei dal a’i phrosesu gan yr Heddlu, boed yn wybodaeth weithredol neu gorfforaethol.

Mae’r Rheolydd Data’n pennu’r dibenion a’r ffyrdd o brosesu data personol. Mae’r Rheolydd Data’n penderfynu pa ddata sy’n cael ei gasglu, pam mae’n cael ei gasglu, a sut mae’n cael ei ddefnyddio. Mae’n ysgwyddo’r prif gyfrifoldeb cyfreithiol am sicrhau cydymffurfiaeth â deddfwriaeth diogelu data . Ef hefyd sy’n atebol yn gyffredinol am ddogfennau gweithdrefnol, ac ef sy’n gyfrifol yn y pendraw am gydymffurfiaeth â’r polisi hwn ar draws yr Heddlu cyfan.

Mae’r polisi hwn yn fodd i sicrhau cydymffurfiaeth gan y Rheolydd Data o’i gyfrifoldeb personol o dan Erthygl 24 (2) GDPR y Du.

 

Uwch Berchennog Rheoli Risg (Uwch Berchennog Risg Gwybodaeth)   

Dirprwy Brif Gwnstabl Heddlu Dyfed-Powys yw’r Uwch Berchennog Rheoli Risg penodedig. Mae’n gyfrifol am y canlynol:

• Atebolrwydd cyffredinol am risg gwybodaeth ar draws yr Heddlu, gan gynnwys toriadau diogelwch data a allai ddigwydd
• Cynrychioli a hyrwyddo risg gwybodaeth
• Derbyn yr hyfforddiant gofynnol diweddaraf er mwyn parhau’n effeithiol yn ei rôl fel Uwch Berchennog Rheoli Risg
• Deall effaith risgiau gwybodaeth ar gofrestr risg yr Heddlu, a sut y gellir lleihau a rheoli’r risgiau hynny, a
• Chadeirio’r Bwrdd Sicrhau Ansawdd

 

Swyddog Diogelu Data

Pennaeth Rheoli Gwybodaeth Heddlu Dyfed-Powys yw’r Swyddog Diogelu Data penodedig. Mae’n gyfrifol am y canlynol:

• Diogelu cyfrinachedd data personol ar draws yr Heddlu
• Cynrychioli a hyrwyddo materion a gofynion diogelu data
• Sicrhau bod yr Heddlu’n bodloni’r safonau ymarferol uchaf ar gyfer trin toriadau diogelwch data
• Galluogi rhannu gwybodaeth addas â chyrff eraill
• Sicrhau bod materion tor diogelwch data’n cael eu hadlewyrchu’n briodol ym mholisïau, gweithdrefnau, prosesau a strategaethau’r Heddlu swyddogion heddlu, staff yr heddlu a gwirfoddolwyr
• Cynorthwyo’r Heddlu i arddangos cydymffurfiaeth â deddfwriaethau diogelu data’r DU fel rhan o’r ffocws uwch ar atebolrwydd
• Gweithredu fel pwynt cyswllt cyntaf ar gyfer gwrthrychau data a Swyddfa’r Comisiynydd Gwybodaeth mewn perthynas â thoriadau diogelwch data, a
• Hysbysu a chynghori ynghylch oblygiadau o ran diogelu data, mewn perthynas â thoriadau diogelwch data, ledled yr Heddlu

 

Perchennog/Perchnogion Asedau Gwybodaeth

Staff uwch yw Perchnogion Asedau Gwybodaeth, sef perchnogion enwebedig un ased gwybodaeth neu fwy a nodwyd. Maent yn gyfrifol am y canlynol:

• Monitro a deall pa wybodaeth – papur ac electronig – sy’n cael ei dal a sut mae’n cael ei chynnal; gwybod pwy sydd â mynediad ati a pham, a’u cymeradwyo
• Ceisio defnyddio gwybodaeth yn llwyr o fewn y gyfraith
• Nodi risgiau i’r wybodaeth a mynd i’r afael â nhw, gan gynnwys y potensial ar gyfer toriadau diogelwch data o fewn eu maes busnes, ac
• Annog diwylliant sy’n gwerthfawrogi, yn gwarchod ac yn defnyddio gwybodaeth er budd y cyhoedd.

 

Ymgynghorydd Diogelu Data

Mae’r Ymgynghorydd Diogelu Data’n gyfrifol am y canlynol: 

• Cynnal ymwybyddiaeth o faterion sy’n ymwneud â thoriadau diogelwch data ar draws yr Heddlu
• Annog diwylliant sy’n gwerthfawrogi, gwarchod a defnyddio gwybodaeth er budd y cyhoedd
• Adolygu a diweddaru’r Polisi Tor Diogelwch Data pan yn briodol, yn unol â deddfwriaeth
• Adolygu a diweddaru pob gweithdrefn a phroses sy’n ymwneud â’r polisi hwn lle bo’n briodol
• Sicrhau bod pob rheolwr llinell yn ymwybodol o’i gyfrifoldebau a’i atebolrwydd mewn perthynas â rheoli tor diogelwch data a gofynion y polisi hwn
• Sicrhau bod pob swyddog, aelod staff a gwirfoddolwr yn derbyn canllawiau priodol a gofynnol i hyrwyddo ei ddealltwriaeth o adnabod ac adrodd am doriadau diogelwch data,
• Cynnal ymchwiliadau cynhwysfawr o unrhyw dor diogelwch data yr adroddir amdano
• Pan fod angen, hysbysu Swyddfa’r Comisiynydd Gwybodaeth am unrhyw achos perthnasol o dorri rheoliadau diogelu data
• Pan fod angen, hysbysu’r gwrthrychau data yr effeithiwyd arnynt am achosion perthnasol o dorri rheoliadau diogelu data
• Sicrhau bod unrhyw gyfleoedd dysgu’n cael eu rhannu ar draws yr Heddlu, a
• Hysbysu a chynghori ynghylch oblygiadau diogelu data ledled yr Heddlu.

 

Holl swyddogion heddlu, staff yr heddlu a gwirfoddolwyr

Mae holl swyddogion heddlu, staff heddlu a gwirfoddolwyr yn gyfrifol am lynu wrth y Polisi Tor Diogelwch Data a dogfennau cysylltiedig. Bydd yn derbyn cyfarwyddyd, cyfeiriad a diweddariadau mewn perthynas â’r polisi gan:

• Reolwyr Llinell
• Swyddog Diogelu Data Heddlu Dyfed-Powys
• Modiwl(au) e-ddysgu diogelu data gorfodol. Disgwylir i bob gweithiwr, drwy’r sefydliad, geisio’r hyfforddiant diogelu data diweddaraf a hyfforddiant gloywi sy’n gymesur â’i rôl – ceir manylion llawn yn y Ddogfen Ganllaw Diogelu Data.
• Mewnrwyd Heddlu Dyfed-Powys, a
• Dogfennau a chanllawiau gweithdrefn a pholisi

 

Bwrdd Sicrhau Ansawdd

Rôl y Bwrdd Sicrhau Ansawdd yw:

• Cynnal goruchwyliaeth strategol, a chefnogi rheoli pob gweithgaredd mewn perthynas â defnyddio, prosesu, cadw a throsglwyddo gwybodaeth neu ddata o dan reolaeth Heddlu Dyfed-Powys a’r strwythurau, systemau a phrosesau a ddefnyddir ar gyfer y dibenion hynny yn unol ag Arferion Proffesiynol Awdurdodedig y Coleg Plismona ar Reoli Gwybodaeth. Mae hyn yn cynnwys rheolaeth yr Heddlu o doriadau diogelwch data, gan yr adroddir am achosion o dorri rheoliadau diogelu data wrth y Bwrdd Sicrhau Ansawdd (ac ymhellach i’r Bwrdd Plismona)
• Rhoi cymorth llywodraethu a chyfeiriad i’r Adran Rheoli Gwybodaeth a Chydymffurfiaeth yn unol â gweledigaeth yr Heddlu i ‘Ddiogelu ein Cymunedau Gyda’n Gilydd’, a
• Gweithio yn unol â byrddau a grwpiau eraill o ran cyflenwi gweledigaeth, cenhadaeth a gwerthoedd yr Heddlu, gweledigaeth y Prif Gwnstabl a’r cynllun cyflenwi er mwyn cefnogi’r Cynllun Heddlu a Throseddu.

 

Cytundebau trydydd partïon

Bydd y polisi hwn yn berthnasol pan fo cyflenwr neu drydydd parti arall, ee prosesydd data, angen data personol ac yn cael data personol gan yr heddlu i ddarparu gwasanaeth.Bydd trydydd partïon yn sicrhau bod yr heddlu’n cael gwybod am unrhyw achos o dorri rheolau neu ddigwyddiad ‘colli data’ mewn modd amserol ac yn unol â chytundebau cytundebol sydd ar waith rhwng y trydydd parti a’r heddlu.

 

Cod Moeseg

Yn unol â’r egwyddorion plismona moesegol, mae’r polisi hwn yn ceisio mynd i’r afael â’r canlynol:-

• Gwasanaeth cyhoeddus – “gweithio er budd y cyhoedd, meithrin ymddiriedaeth a hyder y cyhoedd, ac ymfalchïo mewn darparu gwasanaeth rhagorol i’r cyhoedd”.
• Dewrder – “gwneud, cyfathrebu a bod yn atebol am benderfyniadau, a sefyll yn erbyn unrhyw beth a allai ddwyn anfri ar ein proffesiwn”
• Parch ac empathi – “annog, gwrando ar a deall barn pobl eraill, a cheisio cydnabod ac ymateb i’r heriau corfforol, meddyliol ac emosiynol y gallwn ni a phobl eraill eu hwynebu.”

Bydd yr egwyddorion plismona moesegol yn cael eu defnyddio i helpu'r heddlu i wneud penderfyniadau proffesiynol ynghylch achosion o dorri rheolau diogelu data a myfyrio arnynt.

 

5.  Gweithredu ac Adolygu

Mae’r polisi hwn yn eiddo i’r Adran Rheoli Gwybodaeth a Chydymffurfiaeth. Bydd y broses adolygu’n cael ei chynnal gan yr Ymgynghorydd Diogelu Data neu Swyddog Diogelu Data bob yn eilflwydd er mwyn sicrhau effeithiolrwydd parhaus y polisi, ac ystyried unrhyw newidiadau i ddeddfwriaethau, canllawiau cenedlaethol, canllawiau Swyddfa’r Comisiynydd Gwybodaeth ac ati.

Bydd effeithiolrwydd y polisi’n cael ei fonitro’n rheolaidd uwchlaw a thu hwnt i’r cyfnod adolygu dwy flynedd a bydd unrhyw bryderon difrifol yn cael eu dwysau fel y bo’n briodol.

Mesurir effeithiolrwydd y polisi hwn drwy broses Archwilio Cydymffurfiaeth â Diogelu Data’r Heddlu a thrwy archwilio’r mynediad i’r ddogfen a dogfennau canllaw cysylltiedig. Y nod yw gwirio ymwybyddiaeth o’r angen ar gyfer adrodd am doriadau diogelwch data a sicrhau cydymffurfiaeth â deddfwriaeth diogelu data’r DU. Hefyd, bydd mesur nifer y toriadau diogelwch data yr adroddir amdanynt ac ymholiadau mewn perthynas â’r polisi a gyfeirir at yr Adran yn caniatáu ar gyfer mesur ei effeithiolrwydd.  

Bydd unrhyw newidiadau i'r polisi hwn yn cael eu cymeradwyo gan y Bwrdd Sicrwydd Gwybodaeth. Yn achos unrhyw ymholiadau mewn perthynas â’r polisi hwn, ei gynnwys neu ddogfennau canllaw cysylltiedig, dylai unigolion gysylltu â’r canlynol:

• Ymgynghorydd Diogelu Data Heddlu Dyfed-Powys
• E-bost: [email protected]
• Post: Ymgynghorydd Diogelu Data, Heddlu Dyfed-Powys, Blwch Post 99, Llangynnwr, Sir Gaerfyrddin, SA31 2PF

Bydd y polisi hwn yn cael ei hyrwyddo’n briodol, a allai gynnwys codi ymwybyddiaeth pan roddir cyflwyniadau a mewnbynnau hyfforddi ar draws yr Heddlu. Bydd y polisi hwn ar gael ar fewnrwyd a rhyngrwyd yr Heddlu. Bydd ei gyhoeddi drwy’r rhyngrwyd yn sicrhau ei fod ar gael i’r cyhoedd ei weld.

Bydd unrhyw faterion pryder neu risg mewn perthynas â chydymffurfiaeth â deddfwriaethau diogelu data’r DU ar draws yr Heddlu’n cael eu dwysau i Swyddog Diogelu Data’r Heddlu, Uwch Swyddog Risg Gwybodaeth yr Heddlu a’r Bwrdd Sicrhau Ansawdd, gan ddibynnu ar ddifrifoldeb.

Prosesir gwybodaeth mewn perthynas ag unrhyw faterion diogelu data eraill posibl ar draws yr heddlu yn unol â Pholisi Diogelu Data’r Heddlu. Gall adrodd o’r fath, ac ymchwiliad dilynol, dynnu sylw at broblemau â’r polisi hwn a chanllawiau cysylltiedig, a allai arwain at adolygiad gofynnol. Os felly, cymerir camau perthnasol. Bydd yr Ymgynghorydd Diogelu Data’n gweithio’n agos â chynrychiolwyr o’r adrannau perthnasol er mwyn mynd i’r afael â’r problemau a sicrhau bod unrhyw wersi a ddysgir yn cael eu hadrodd yn llawn a’u rhaeadru yn ôl yr angen.

 

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Medi 2025