Polisi Datgeliad Gwybodaeth Heddlu Cyfraith Gyffredin

1. Datganiad Polisi

Nod y Polisi hwn yw diffinio’n glir ymagwedd Heddlu Dyfed-Powys tuag at ymdrin ag amgylchiadau lle mae unigolyn sydd wedi dod i’w sylw am Drosedd Gofnodadwy yn cyflwyno perygl amlwg i blant, unigolion sy’n agored i niwed neu’r cyhoedd ehangach yn eu swydd neu sefyllfa wirfoddol yn rhinwedd eu troseddu honedig. 

Mae’r Polisi hwn yn nodi’r trefniadau o dan y Cynllun Datgeliad Heddlu Cyfraith Gyffredin ar gyfer datgelu gwybodaeth i gyflogwyr neu gyrff rheoleiddiol lle y gellir sefydlu angen cymdeithasol dybryd brys mewn perthynas â mynediad y mae gan unigolyn at bobl eraill yn rhinwedd ei swydd neu rôl wirfoddol.

Bydd y polisi hwn yn amlinellu’r cwmpas cyfyng y gall yr Heddlu ddefnyddio eu barn broffesiynol i wneud datgeliadau yn seiliedig ar Gyfraith Gyffredin mewn amgylchiadau lle maen nhw’n ystyried fod hyn yn ofynnol er mwyn cefnogi diogelu’r cyhoedd. Mae’r Polisi hwn yn parhau ar wahân i drefniadau’r Gwasanaeth Datgelu a Gwahardd, ond mae’n seiliedig ar ystyriaethau tebyg.

Mae ‘Angen Cymdeithasol Dybryd Brys’ yn cynnwys diogelu neu amddiffyn unigolyn, grŵp o unigolion neu gymdeithas yn gyffredinol rhag niwed, yn arbennig plant ac oedolion sy’n agored i niwed. Rhaid i’r angen hwn i ddiogelu fod yn gymesur ar yr un pryd â chydbwyso anghenion, hawliau a buddiannau’r unigolyn dan sylw. Bydd yn cynnwys ystyried effaith datgelu ar fywyd preifat yr unigolyn dan sylw. Dylai penderfyniadau ystyried unrhyw effaith andwyol y gallai datgelu gael ar atal neu ddatrys troseddau hefyd.

Ystyrir bod y trothwy ‘Angen Cymdeithasol Dybryd’ ar gyfer gwneud datgeliad o dan bwerau Cyfraith Gyffredin yr un fath â’r hyn sydd ei angen ar gyfer datgelu “Gwybodaeth Gymeradwy” yn unol â darpariaethau Rhan V Deddf yr Heddlu 1997 (fel y’i diwygiwyd).

Sefydlwyd yr egwyddor hon gan ddedfryd yr Uwch Lys yn R (ar gais L) (FC) (Apelydd) v Comisiynydd Heddlu’r Brifddinas (2009).

Gan hynny, argymhellir bod Swyddogion datgelu’n gweithredu’r fethodoleg “Fframwaith Sicrhau Ansawdd” y cytunwyd arni ar y cyd rhwng Cymdeithas Prif Swyddogion yr Heddlu a’r Gwasanaeth Datgelu a Gwahardd wrth benderfynu pa wybodaeth, os o gwbl, fydd yn cael ei datgelu.  

Wrth benderfynu pa un ai a ddylid gwneud DHCG, dylid ystyried y canlynol:

• A yw’r wybodaeth yn berthnasol?
• Beth yw ansawdd y wybodaeth?
• A fyddai datgeliad yn gymesur?

Mae’r polisi hwn yn berthnasol ar gyfer y canlynol (ond heb fod yn gyfyngedig i hynny):

Holl gategorïau Swyddogion a Staff Heddlu Dyfed-Powys, pa un ai a ydynt yn staff llawn amser, rhan amser, parhaol, cyfnod penodol, dros dro (gan gynnwys staff asiantaeth, cymdeithion a chontractwyr) staff sydd ar secondiad a gwirfoddolwyr. Rhaid i bob swyddog, aelod staff a gwirfoddolwr sy’n cael gafael ar asedau ac eiddo’r Heddlu a’u defnyddio roi ystyriaeth ddyledus i gynnwys y polisi hwn.

2. Cwmpas y Polisi

Mae Cyngor Cenedlaethol Prif Swyddogion yr Heddlu’n cynghori y dylid datgelu adeg arestio (neu bresenoldeb gwirfoddol) neu pan ddaw gwybodaeth i’r amlwg, a pheidio ag aros hyd nes y gwneir cyhuddiad. Dylid datgelu cyn gynted ag y bo’n ymarferol er mwyn sicrhau bod y perygl canfyddedig i’r cyhoedd yn cael ei liniaru cyn gynted â phosibl. Mae’n hollbwysig bod penderfyniadau datgelu sy’n seiliedig ar Gyfraith Gyffredin yn cael eu prosesu gan yr Heddlu heb oedi diangen fel bod y derbynnydd yn medru ymateb yn effeithiol i’r perygl brys a nodwyd. Lle penderfynir y dylid datgelu, mae’n arfer da cynghori’r unigolyn bryd hynny, os yw’n ymarferol gwneud hynny ac ni fydd yn rhwystro’r ymchwiliad.

Dylid datgelu mor gyflym â phosibl er mwyn lliniaru perygl.

1. Mewn amgylchiadau lle mae angen cymdeithasol dybryd, bydd hysbysu’n digwydd cyn gynted ag y bo’n ymarferol o’r adeg y mae perygl yn cael ei nodi, ni waeth pa bwynt a gyrhaeddwyd yn yr ymchwiliad neu’r broses cyfiawnder troseddol. Yn y pen draw, y swyddog yn yr achos fydd yn gyfrifol am gychwyn y broses hon.
2. Bydd yr Uned Ddatgelu’n gweithredu mewn capasiti cynghorol fel pwynt cyswllt sengl pan fydd angen.

Bydd yr uchod yn destun prawf perthnasedd a chymesuredd ysgrifenedig gan ddefnyddio’r Ffurflenni Asesiad Risg Datgelu Galwedigaethol ar NICHE a chymeradwyaeth gan Brif Swyddog cyn unrhyw hysbysiad.

Yr Unigolyn Perthnasol fydd y Swyddog yn yr Achos yn achos Ymchwiliad neu Gyfweliad gyda Mynychwr Gwirfoddol, neu Ringyll y Ddalfa neu Swyddog Cadw Restiedig, a bydd yn gyfrifol am nodi a chofnodi holl alwedigaethau a gwaith gwirfoddol y drwgdybyn yn gywir. Bydd yr Unigolyn perthnasol yn cychwyn y weithdrefn ymgeisio a bydd eu Harolygwyr unigol yn gyfrifol am sicrhau ansawdd a sylwadau ategol a rhannu â’r Comander Arian Ar Alwad.

Bydd y Comander Arian Ar Alwad yn adolygu unrhyw gais ac yn ychwanegu sylwadau ategol i gefnogi rhesymeg, a lle mae cytundeb, bydd yn ei anfon ymlaen at Brif Swyddogion er cymeradwyaeth. Ar ôl derbyn cymeradwyaeth Prif Swyddogion, bydd Uned Ddatgelu’r Heddlu’n gyfrifol am hysbysu’r corff cyflogi dros y ffôn, drwy e-bost diogel, neu trwy Bost Cofnodedig.

Lle mae perygl uniongyrchol, dylai’r Arolygydd perthnasol hysbysu’r corff cyflogi dros y ffôn, ond dim ond ar ôl ceisio awdurdod y Comander Arian Ar Ddyletswydd.  

Amcanion

1. Diogelu pobl sy’n agored i niwed a dangos sut mae’r heddlu’n cyfrannu at hyn.
2. Sefydlu dulliau cyson ac archwiliadwy o nodi a chofnodi galwedigaeth neu rôl wirfoddol drwgdybyn.
3. Sefydlu perygl posibl a gyflwynir yn gynnar.
4. ch) Sicrhau lliniaru cynnar a dogfennu tystiolaeth o’r broses benderfynu yn ystod pob cam gofynnol o’r broses.
5. Pob Swyddog, Aelod Staff a Gwirfoddolwr i feddu ar ddealltwriaeth sylfaenol o’r broses a’r rhan maen nhw’n chwarae o ran bod yn gyfrifol am y camau gweithredu gofynnol mewn perthynas â’r gofynion.
6. Yr Uned Ddatgelu i gasglu hysbysiadau ar gyfer datgelu a monitro perfformiad ac ymdrin ag unrhyw ymholiadau dilynol gan y corff cyflogi.

3. Pwerau a Gofynion Polisi/Cyfreithiol

Mae’r cynllun DHCG yn disodli’r Cynllun Galwedigaethau Hysbysadwy, fel y nodwyd yng Nghylchlythyr 06/2006 y Swyddfa Gartref, sydd wedi’i dynnu yn ôl yn dilyn hynny. Ystyriwyd bod y Cynllun Galwedigaethau Hysbysadwy o bosibl yn anghyfreithlon gan ei fod yn darparu ar gyfer datgelu cyffredinol ac yn debygol o fod yn torri Deddfwriaeth Diogelu Data ac Erthygl 8 Deddf Hawliau Dynol 1998. Yn groes i hynny, mae’r cynllun DHCH yn caniatáu i’r Heddlu ddefnyddio eu pwerau Cyfraith Gyffredin fesul achos er mwyn pennu pwy sy’n cael ei hysbysu, a beth maen nhw’n cael gwybod amdano, gan alluogi cyflogwyr neu gyrff rheoleiddio i gymryd camau gweithredu ar unwaith er mwyn mynd i’r afael â pherygl diogelu’r cyhoedd. Mae gan yr Heddlu bŵer Cyfraith Gyffredin i rannu gwybodaeth â thrydydd partïon lle y sefydlir diben plismona, gyda phob achos yn cael ei ystyried yn ôl ei rinweddau ei hun.  

Diffinnir Diben Plismona o dan God Ymarfer Rheoli Gwybodaeth a Chofnodion yr Heddlu fel:

• Diogelu bywyd ac eiddo
• Cadw trefn
• Atal comisiynu troseddau
• Dwyn troseddwyr i gyfiawnder
• Unrhyw ddyletswydd neu gyfrifoldeb yr Heddlu sy’n deillio o Gyfraith Statud neu Gyffredin

Y sefyllfa gyffredinol yw y dylai’r Heddlu gynnal cyfrinachedd gwybodaeth bersonol, ond mae barn gyfreithiol yn cefnogi datgelu gwybodaeth am unigolyn i’w gyflogwr (neu gyfwerth os yw’r unigolyn mewn rôl wirfoddol), neu Gorff Rheoleiddiol Cymwys, lle y gellir sefydlu angen Cymdeithasol Dybryd Brys ac mae’r Budd Cyhoeddus mewn datgelu’n fwy na’r ddyletswydd gyfrinachedd.

Bydd unrhyw benderfyniad i ddatgelu gwybodaeth yn unol â Deddf Diogelu Data 2018, Deddf Hawliau Dynol 1998 a Deddf Adsefydlu Troseddwyr 1974.

Mae deddfwriaeth berthnasol yn cynnwys:

• Deddf Diogelu Data 2018
• Rheoliad Cyffredinol ar Ddiogelu Data y DU
• Deddf Hawliau Dynol 1998

Polisïau, Protocolau, Arferion neu Gytundebau Gwasanaeth Cysylltiedig:

• Polisi Diogelu Data Heddlu Dyfed-Powys
• Polisi Diogelwch Gwybodaeth Heddlu Dyfed-Powys
• Polisi Rhannu Gwybodaeth Heddlu Dyfed-Powys
• Arferion Proffesiynol Awdurdodedig y Coleg Plismona – Rheoli Gwybodaeth – Rhannu Gwybodaeth Rheoli Gwybodaeth | y Coleg Plismona
• Datgeliadau Heddlu Cyfraith Gyffredin (DHCG) Cyngor Cenedlaethol Prif Swyddogion yr Heddlu – Darpariaethau i ddisodli’r Cynllun Galwedigaethau Hysbysadwy Datgeliadau Heddlu Cyfraith Gyffredin (DHCG) Cyngor Cenedlaethol Prif Swyddogion yr Heddlu – Darpariaethau i ddisodli’r Cynllun Galwedigaethau Hysbysadwy (college.police.uk)
• Fframwaith Sicrhau Ansawdd y Gwasanaeth Datgelu a Gwahardd, fersiwn 9 (FfSA f9). Fframwaith Sicrhau Ansawdd y Gwasanaeth Datgelu a Gwahardd, fersiwn 9 (FfSA f9) - GOV.UK (www.gov.uk)
• Cod Ymarfer Rheoli Gwybodaeth a Chofnodion yr Heddlu Cod Ymarfer rheoli gwybodaeth a chofnodion yr Heddlu | y Coleg Plismona

 

4. Dewisiadau a Chynlluniau Wrth Gefn

Mae Cyngor Cenedlaethol Prif Swyddogion yr Heddlu’n cynghori y dylid datgelu adeg arestio (neu bresenoldeb gwirfoddol pan ddaw gwybodaeth i’r amlwg), ac nid ei ohirio hyd nes bydd cyhuddiad. Gwneir penderfyniad i ddatgelu fesul achos, ond fel rheol, bydd gwybodaeth ond yn cael ei datgelu pan mae’n berthnasol, gofynnol a chymesur gwneud hynny, gan ystyried yr holl amgylchiadau yn yr achos a’r perygl canfyddedig i’r cyhoedd.

Tra bod y Polisi hwn yn edrych ar ddatgelu adeg Presenoldeb Gwirfoddol neu Arestio, dylai hyn fod yn destun adolygiad rheolaidd ac yng ngoleuni unrhyw amgylchiadau newidiol, er enghraifft, mewn achos lle y gwnaed penderfyniad i beidio datgelu pan mae rhywun yn cael ei ryddhau ar fechnïaeth ond daw gwybodaeth i’r amlwg nes ymlaen sy’n arwain at gyhuddiad.

Lle y bwriedir datgelu wrth gyflogwr, mae’n arfer da cynghori’r unigolyn ar y pryd gan y bydd hyn yn caniatáu iddo gyflwyno sylwadau ac ystyried hysbysu ei gyflogwr ei hun.

Bydd yr Uned Ddatgelu’n gyfrifol am ddatgelu gwybodaeth wrth gyflogwyr neu gyrff trwyddedu, proffesiynol neu reoleiddiol, ar yr amod bod y Swyddog yn yr Achos wedi dilyn y prosesau hysbysu cywir ac mae Prif Swyddog wedi’i gymeradwyo heblaw bod Datgelu Brys eisoes wedi’i ddarparu.

Archwiliad Cydymffurfiaeth â Diogelu Data

Bydd y broses ddatgelu DHCG yn ffurfio rhan o’r broses archwilio cydymffurfiaeth â diogelu data yr ymgymerir ag ef gan y Swyddog Cydymffurfiaeth â Diogelu Data a oruchwylir gan Gynghorydd Diogelu Data’r Heddlu.

Rolau a Chyfrifoldebau o fewn Heddlu Dyfed-Powys

Y Prif Gwnstabl

Prif Gwnstabl Heddlu Dyfed-Powys yw’r Rheolydd Data, ac o’r herwydd, mae ganddo gyfrifoldeb cyffredinol dros brosesu’r holl ddata personol a brosesir gan yr Heddlu’n gyfreithlon. Yn yr un modd, mae ganddo gyfrifoldeb am yr holl wybodaeth sy’n cael ei dal gan yr Heddlu, boed y wybodaeth honno’n wybodaeth weithredol neu’n wybodaeth gorfforaethol. Mae’n atebol yn gyffredinol am ddogfennau gweithdrefnol hefyd ac ef sydd â’r cyfrifoldeb am gydymffurfio â’r polisi hwn ar draws yr Heddlu yn y pen draw.

Uwch Berchennog Risg Gwybodaeth

Yr Uwch Berchennog Risg Gwybodaeth sy’n gyfrifol am oruchwylio’r Polisi a’r Broses.

Prif Swyddogion

Lle bo angen, bydd Prif Swyddogion yn gyfrifol am y broses gymeradwyo ac am sefydlu pa un ai a oes angen cymdeithasol dybryd a’i fod yn gyfiawn.

Comander Arian

Lle bo angen, mae’r Comander Arian yn gyfrifol am y broses gymeradwyo ac am sefydlu pa un ai a oes angen cymdeithasol dybryd a’i fod yn gyfiawn.

Y Rheolwr Datgelu, Cofnodion a Rhyddid Gwybodaeth (yr Adran Diogelu Data)

Mae’r Rheolwr Datgelu, Cofnodion a Rhyddid Gwybodaeth yn gyfrifol am:

• Ddarparu rôl gydlynu ar gyfer holl agweddau datgelu fel pwynt cyswllt sengl ar gyfer yr Heddlu ar ôl i ddatgelu cynnar a chymeradwy cychwynnol ddigwydd.
• Sicrhau bod prosesau’n cael eu dilyn.

Uwch Swyddog – Cyfleusterau Dalfa

• Bydd yr Uwch Swyddog sydd â gofal dros gyfleusterau Dalfa’n atebol am sicrhau bod holl alwedigaethau a gwaith gwirfoddol drwgdybyn yn cael eu nodi a’u cofnodi’n gywir.

Y Swyddog yn yr Achos a Swyddogion/Rhingylliaid/Arolygwyr Dalfa

• Maent yn gyfrifol am sicrhau bod galwedigaethau’n cael eu nodi’n gywir ar gyfer Cofnodion Dalfa a Mynychwyr Gwirfoddol.
• Sicrhau bod y Broses yn cael ei dilyn lle mae angen cymdeithasol dybryd i Ddatgelu.

Swyddogion Datgelu a Rheoli Gwybodaeth a Chydymffurfiaeth

• Bydd Swyddogion Datgelu’n gyfrifol am ddarparu Datgelu pan fyddant wedi’u Hawdurdodi i wneud hynny.
• Bydd yr Adran yn Archwilio ac yn adolygu penderfyniadau o gwmpas peidio â datgelu’n fisol. Tynnir sylw’r Uned Diogelu Data a Goruchwylwyr Gweithredol at hyn ar gyfer dysgu ac adolygu.

Swyddog Cydymffurfiaeth â Diogelu Data

• Ychwanegu’r broses DHCG i’r calendr archwilio cydymffurfiaeth â diogelu data.
• Ymgymryd ag archwiliadau o’r broses er mwyn sicrhau bod camau gweithredu a gymerir fel rhan o’r broses ddatgelu DHCG yn cydymffurfio â’r polisi hwn, canllawiau perthnasol, codau ymarfer perthnasol ac ati.
• Bydd y Swyddog Cydymffurfiaeth yn adrodd ar ganfyddiadau wrth y Cynghorydd Diogelu Data a’r Swyddog Diogelu Data.

Bwrdd Sicrhau Ansawdd

• Cynnal goruchwyliaeth strategol, a chefnogi'r gwaith o reoli'r holl weithgareddau sy'n ymwneud â defnyddio, prosesu, cadw a throsglwyddo gwybodaeth neu ddata o dan reolaeth Heddlu Dyfed-Powys a'r strwythurau, y systemau a'r prosesau a ddefnyddir at y dibenion hynny yn unol ag Arferion Proffesiynol Awdurdodedig y Coleg Plismona ar Reoli Gwybodaeth.
• Darparu cymorth a chyfeiriad llywodraethu i'r Adran Rheoli Gwybodaeth a Chydymffurfiaeth yn unol â gweledigaeth yr Heddlu i 'Ddiogelu ein Cymunedau Gyda'n Gilydd'.
• Gweithio'n unol â'r grwpiau a'r byrddau eraill i gyflawni cenhadaeth, gweledigaeth a gwerthoedd yr Heddlu, gweledigaeth y Prif Gwnstabl a'r cynllun cyflawni i gefnogi'r Cynllun Heddlu a Throseddu.
• Gellir codi unrhyw faterion i’w dwysáu gyda’r Bwrdd Sicrhau Ansawdd ar sail Chwarterol.

Rheolwyr Llinell/Goruchwylwyr

• Byddant yn gyfrifol am sicrhau y dilynir y polisi hwn a chanllawiau cysylltiedig gan swyddogion a staff perthnasol.
• Bydd rheolwyr llinell a goruchwylwyr yn sicrhau bod y swyddogion a staff y maent yn eu rheoli wedi ymgymryd â’r hyfforddiant cydymffurfiaeth â rheoli gwybodaeth perthnasol.
• Bydd rheolwyr llinell a goruchwylwyr yn sicrhau yr adroddir am unrhyw achosion o dorri rheoliadau diogelu data neu ddiogelwch gwybodaeth sy’n digwydd o ganlyniad i’r broses hon wrth yr Adran Rheoli Gwybodaeth a Chydymffurfiaeth yn unol â phrosesau cysylltiedig.

5. Gweithredu ac Adolygu

Mae'r polisi hwn yn eiddo i'r Adran Rheoli Gwybodaeth a Chydymffurfiaeth. Cyfrifoldeb pob Swyddog Heddlu, Aelod Staff a Gwirfoddolwr yw sicrhau bod ganddynt ddealltwriaeth sylfaenol o’r broses DHCG a’r rhan maen nhw’n chwarae o ran helpu Heddlu Dyfed-Powys i gydymffurfio â’i gofynion. Bydd Uned Ddatgelu’r Heddlu’n rhoi cyngor a chymorth mewn perthynas â’r broses DHCG.

Bydd y Polisi hwn yn cael ei adolygu’n rheolaidd er mwyn asesu ei effeithiolrwydd a’i berthnasedd. Trefnir hyn yn flynyddol o leiaf, a gall unrhyw newidiadau sylweddol i ddeddfwriaethau neu ganllawiau cenedlaethol (Arferion Proffesiynol Awdurdodedig yr Heddlu) annog adolygiadau yn ychwanegol i’r rhai sydd wedi’u trefnu.

Cynhelir y broses adolygu gan y Rheolwr Datgelu, Cofnodion a Rhyddid Gwybodaeth (neu gyfwerth), wedi’i annog drwy eitem agenda sefydlog drwy’r Bwrdd Sicrhau Ansawdd a Swyddog Polisi’r Heddlu.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Medi 2024