Polisi Diogelwch Terfynellau Airwave

1. Datganiad Polisi

Diben y polisi hwn yw ymdrin â diogelwch corfforol, trin a chyfrif pob ased TETRA Airwave sy’n eiddo i Heddlu Dyfed-Powys neu sy’n cael ei reoli ganddo. Mae hyn yn cynnwys terfynellau llaw cludadwy, terfynellau cerbyd a therfynellau symudol sefydlog.

Mae’n berthnasol (ond heb fod yn gyfyngedig) i: Holl gategorïau swyddogion a staff Heddlu Dyfed-Powys, pa un ai a ydynt yn llawn amser, rhan amser, parhaol, cyfnod penodol neu dros dro (gan gynnwys staff asiantaeth, cymdeithion a chontractwyr, staff sydd ar secondiad a gwirfoddolwyr). Mae’r polisi hwn yn berthnasol yn benodol i swyddogion, staff a gwirfoddolwyr sydd wedi’u hawdurdodi i ddefnyddio terfynellau Airwave fel rhan o’u gwaith. Dim ond swyddogion, staff a gwirfoddolwyr sydd wedi derbyn pecyn hyfforddi terfynell Airwave yr Heddlu sydd ag awdurdod i ddefnyddio terfynellau Airwave.

 

2. Cwmpas y Polisi

Er mwyn cefnogi dilyn arfer gorau bob amser, rhaid i derfynellau Airwave gael eu defnyddio gan staff sydd wedi derbyn pecyn hyfforddi terfynell Airwave yr Heddlu yn unig.

Offer a Gyhoeddwyd yn Bersonol

Mae Swyddogion Heddlu a rhai aelodau staff heddlu penodol a nodwyd wedi derbyn y canlynol yn bersonol:

• Terfynell Airwave llaw gludadwy a batri
• Gwefrwr personol
• Teclyn clust
• Ategolion cludo

Pan nad ydynt yn cael eu defnyddio, rhaid cadw’r eitemau hyn yn y locer clo a bennwyd ar gyfer y diben hwnnw. Pan fyddant yn cael eu cadw yn y locer, rhaid i’r terfynellau gael eu diffodd.

Ar gyfer rhesymau gweithredol, mae’n bosibl y caiff aelodau staff gadw eu setiau radio pan nad ydynt ar ddyletswydd. Swyddogion sy’n cyflawni swyddogaeth ‘ar alwad’ fydd y rhain yn bennaf. Caiff Rheolwyr Llinell / Comanderiaid awdurdodi swyddogion i fynd adref â’r terfynellau a chânt ddirprwyo’r awdurdod hwnnw i lefel oruchwyliol maen nhw’n teimlo sy’n briodol.

Pan mae terfynell radio llaw gludadwy’n cael ei chadw heb ofalydd yng nghartref defnyddiwr, rhaid i’r adeilad fod yn ddiogel h.y. dylid cloi drysau a mynedfeydd eraill a dylid cau ffenestri.

Os oes angen gadael terfynell llaw gludadwy mewn cerbyd dros dro, dylid diffodd y derfynell, ei chadw o’r golwg, a chloi’r cerbyd.

Offer Cronfa

Darperir terfynellau llaw cludadwy Airwave cronfa â:

• Batri
• Ategolion cludo

Pan na fyddant yn cael eu defnyddio, rhaid i’r eitemau hyn gael eu cadw yn y locer clo a bennwyd ar gyfer y diben hwnnw. Rhaid bod y terfynellau wedi’u diffodd pan fyddant yn cael eu cadw yn y locer

Ni ddylid cadw setiau radio cronfa mewn unrhyw leoliad arall heblaw’r orsaf heddlu.

Rhaid i’r goruchwylydd ar ddyletswydd ar gyfer yr ardal dan sylw awdurdodi cyhoeddi terfynellau llaw cludadwy Airwave bob tro. Rhaid i hyn gael ei gofnodi ar y ffurflen a ddarperir o fewn pob locer cronfa.

Os bydd angen gadael terfynell llaw gludadwy Airwave cronfa mewn cerbyd dros dro, dylid diffodd y derfynell, ei chadw o’r golwg, a diogelu’r cerbyd.

Terfynellau Cerbyd

Pan na fydd neb ynddynt, rhaid cloi cerbydau sydd wedi’u gosod â therfynell Airwave. Os bydd y derfynell gerbyd yn cael ei defnyddio fel ‘porth’, does dim angen diffodd y derfynell. Ym mhob achos arall, rhaid diffodd terfynellau mewn cerbydau heb ofalydd

Pan nad ydynt yn cael eu defnyddio, mae cerbydau heddlu’n cael eu cadw mewn garej. Lle nad oes darpariaeth garej yn bodoli, rhaid diogelu’r cerbyd.

Symudion Sefydlog

Lle bo terfynell symudol sefydlog Airwave wedi’i gosod mewn gorsaf heddlu, ymdrinnir â’i diogelwch yn unol â’r Polisi Diogelwch Gwybodaeth (Safon 11 – Diogelwch Corfforol Eiddo ac Ardaloedd Gweithredol) a’r Polisi Diogelwch Adeiladau Heddlu.

Diffygion

Terfynell Airwave llaw gludadwy

• Os nad oes modd datrys nam yn lleol, rhaid i’r defnyddiwr gofnodi galwad gyda Desg Gymorth TGCh yr Heddlu. Y tu allan i oriau gwaith arferol, rhaid cofnodi’r alwad gyda Chanolfan Gyfathrebu’r Heddlu. Mae’r Arolygydd sydd ar ddyletswydd yng Nghanolfan Gyfathrebu’r Heddlu’n gyfrifol am gysylltu â’r Arbenigwr TGCh ar alwad (Cyfathrebu).
• Mae gweithredydd desg Gwasanaeth TGCh yr Heddlu / Arbenigwr TGCh (Cyfathrebu) ar alwad yn trefnu bod y derfynell yn cael ei hanalluogi o bell ac yn rhoi cyfarwyddiadau ynghylch sut i anfon y derfynell ymlaen ar gyfer ei thrwsio.

Terfynellau Cerbyd

• Rhaid i’r defnyddiwr gofnodi galwad gyda Desg Gymorth TGCh yr Heddlu. Y tu allan i oriau gwaith arferol, rhaid cofnodi’r alwad gyda Chanolfan Gyfathrebu’r Heddlu. Mae’r Arolygydd sydd ar ddyletswydd yng Nghanolfan Gyfathrebu’r Heddlu’n gyfrifol am gysylltu â’r Arbenigwr TGCh (Cyfathrebu) ar alwad.
• Mae gweithredydd desg Gwasanaeth TGCh yr Heddlu / Arbenigwr TGCh (Cyfathrebu) ar alwad yn trefnu bod y derfynell yn cael ei hanalluogi o bell ac yn rhoi cyfarwyddiadau ynghylch sut i anfon y derfynell ymlaen ar gyfer ei thrwsio, yn ogystal â threfnu bod terfynell arall yn cael ei gosod yn y cerbyd.
• Os bydd angen i gerbyd heddlu adael safle heddlu ar gyfer gwasanaeth neu atgyweirio, a chael ei adael heb ofalydd tra bydd yn cael gwasanaeth neu’n cael ei drwsio, rhaid i ddefnyddiwr y cerbyd gysylltu â Desg Gymorth TGCh yr Heddlu. Mae gweithredydd desg Gwasanaeth TGCh yr Heddlu / technegydd cyfathrebu ar alwad yn trefnu bod y derfynell yn cael ei hanalluogi o bell. Unwaith mae’r cerbyd yn cael ei ddychwelyd ar ôl cael gwasanaeth neu ar ôl cael ei drwsio, dylai defnyddiwr y cerbyd hwnnw gysylltu â Desg Gymorth TGCh yr Heddlu  eto er mwyn ailfywiogi’r radio.

Symudyn Sefydlog

• Rhaid i alwad gael ei chofnodi gan y defnyddiwr gyda Desg Gymorth TGCh yr Heddlu a rhaid dilyn ei chyfarwyddiadau. Tu allan i oriau gwaith arferol, rhaid i’r alwad gael ei chofnodi gyda Chanolfan Gyfathrebu’r Heddlu. Mae’r Arolygydd ar Ddyletswydd yng Nghanolfan Gyfathrebu’r Heddlu’n gyfrifol am gysylltu â’r Arbenigwr TGCh (Cyfathrebu) ar alwad.

Ategolion

• Os nad oes modd datrys nam yn lleol, rhaid i alwad gael ei chofnodi gan y defnyddiwr gyda gweithredydd Desg Gymorth TGCh yr Heddlu a rhaid i’w chyfarwyddiadau gael eu dilyn.

Ar Goll / Wedi’i Dwyn

Er mwyn sicrhau nad yw’r isadeiledd Gwasanaeth Airwave yn cael ei gyfaddawdi’n ddiangen ac er mwyn cynnal diogelwch gwybodaeth yr Heddlu o fewn y Gwasanaeth Airwave, os yw terfynell Airwave yn cael ei cholli, mae’n hollbwysig fod defnyddiwr y derfynell honno’n cymryd camau i’w chael yn ôl, megis cymryd amser i chwilio amdani.

Os nad yw’r derfynell wedi’i hadennill o fewn awr o’r adeg y mae’r defnyddiwr yn darganfod ei bod ar goll, rhaid i’r defnyddiwr gysylltu â gweithredydd Desg Gymorth TGCh yr Heddlu yn syth. Bydd gweithredydd Desg Gymorth TGCh yr Heddlu’n trefnu bod y derfynell goll honno’n cael ei hanalluogi o bell. Tu allan i oriau gwaith arferol, rhaid i’r Arolygydd ar Ddyletswydd yng Nghanolfan Gyfathrebu’r Heddlu gael ei hysbysu a rhaid iddo/iddi gysylltu â’r Arbenigwr TGCh (Cyfathrebu) sydd ar alwad. Os oes unrhyw bosibilrwydd bod yr eitem wedi’i ddwyn yn hytrach na’i golli, ystyrir bod y derfynell wedi’i dwyn a rhaid dilyn y gweithdrefnau a amlinellir isod.

Os yw’r derfynell yn cael ei dwyn, rhaid i ddefnyddiwr y derfynell honno hysbysu gweithredydd Desg Gymorth TGCh yr Heddlu yn syth am y lladrad hwnnw. Mae hyn yn ychwanegol i arferion presennol yr heddlu sy’n ymwneud â lladrad eiddo’r heddlu. Bydd gweithredydd Desg Gymorth TGCh yr Heddlu’n trefnu bod y derfynell goll honno’n cael ei hanalluogi o bell yn syth.  Tu allan i oriau gwaith arferol, rhaid i’r Arolygydd ar Ddyletswydd yng Nghanolfan Gyfathrebu’r Heddlu gael ei hysbysu a rhaid iddo/iddi gysylltu â’r Arbenigwr TGCh (Cyfathrebu) sydd ar alwad.

Os yw’r radio wedi’i ddwyn pan mae defnyddiwr y derfynell wedi’i analluogi, dyletswydd y swyddog cyntaf sy’n darganfod y wybodaeth honno fydd hysbysu gweithredydd desg gymorth Airwave.

Os yw’r derfynell yn cael ei cholli / dwyn, rhaid i’r defnyddiwr ddarparu adroddiad cynhwysfawr ar amgylchiadau’r golled / lladrad i’w Reolwr Llinell / Comander. Rhaid i’r adroddiad hwnnw gael ei anfon at y Pennaeth Rheoli Cyswllt a Digwyddiadau fel perchennog system Airwave yr Heddlu.

Archwilio

Mae’n ofynnol yn ôl y Swyddfa Gartref bod archwiliad llawn yn cael ei gynnal o derfynellau Airwave yn rheolaidd, ac o leiaf unwaith bob 12 mis.

Mae gan Heddlu Dyfed-Powys geidwad terfynellau penodol sy’n gyfrifol am gadw cofnod o’r holl asedau Airwave y mae gan Heddlu Dyfed-Powys fynediad iddynt. Cedwir y cofnodion gan ddefnyddio meddalwedd arbenigol a brynwyd gan yr Heddlu.

Yn ogystal, mae’r Swyddfa Gartref yn disgwyl y bydd mynediad i staff Airwave 24 awr y dydd, 365 diwrnod y flwyddyn. Bydd y swyddogaeth hon yn cael ei harfer gan y staff cyfathrebu sydd ar alwad. 

Mae’r ceidwad terfynellau’n cynnal archwiliad cynhwysfawr blynyddol o asedau Airwave y ceir mynediad atynt gan Heddlu Dyfed-Powys. Rhoddir canlyniadau’r archwiliad i’r Pennaeth Rheoli Cyswllt a Digwyddiadau.  

Mae’n ofynnol cynnal archwiliadau amlach o asedau sy’n cael eu dal yn diriogaethol. Rhaid bod llai na 3 mis rhwng pob archwiliad, a rhaid nodi daliwr swydd fel yr unigolyn sy’n gyfrifol am dystio bod yr archwiliad wedi’i gynnal.

Mae ceidwad terfynellau’r Heddlu’n rhoi rhestr fanwl gywir i Reolwyr Llinell o’r asedau Airwave hysbys presennol sy’n cael eu dal o fewn ei faes cyfrifoldeb.

Rhaid i’r ceidwad terfynellau, sy’n gorfod cydymffurfio â’r canllawiau sydd mewn grym gan y Swyddfa Gartref ar y pryd, ddwyn diffygion yn yr archwiliad i sylw’r Pennaeth Rheoli Cyswllt a Digwyddiadau’n syth.

Gosodir meddalwedd ar setiau radio cronfa er mwyn sicrhau bod unrhyw un sy’n defnyddio’r ddyfais yn cofnodi ei ddefnydd a’i leoliad yn gywir er mwyn awtomeiddio’r broses archwilio. Mae’r ceidwad terfynellau’n adolygu’r adroddiadau archwiliad awtomatig er mwyn cadarnhau lleoliad pob radio, ac yn tynnu sylw Rheolwyr Llinell at unrhyw ddyfeisiau coll.

 

3.  Pwerau a Gofynion Cyfreithiol/Polisi  

Mae’r polisi hwn yn addas ar gyfer y diben o ran ei fod yn bodloni gofynion fel y nodir yng Nghod Cysylltu Airwave.

Mae’r Heddlu’n cydymffurfio â’r deddfwriaethau canlynol a phob deddfwriaeth arall fel y bo’n briodol, gan gynnwys, ond heb fod yn gyfyngedig i:

 

• Ddeddf Camddefnyddio Cyfrifiaduron 1990
• Deddf Diogelu Data 2018
• Rheoliad Cyffredinol Diogelu Data’r DU
• Deddf Hawliau Dynol 1998
• Deddf Cyfrinachau Swyddogol 1989
• Deddf Cyfathrebu Electronig 2000
• Deddf Rheoleiddio Pwerau Ymchwilio 2000
• Deddf Rhyddid Gwybodaeth 2000

 

Polisïau, safonau, gweithdrefnau ac arferion cysylltiedig, gan gynnwys, ond heb fod yn gyfyngedig i:

 

• Bolisi Diogelwch Gwybodaeth Heddlu Dyfed-Powys
• Polisi Diogelu Data Heddlu Dyfed-Powys

 

4.  Dewisiadau a Chynlluniau Wrth Gefn  

Pob Defnyddiwr

Rhaid i bob defnyddiwr gydymffurfio’n weithredol â’r polisi hwn a phob gofyniad diogelwch Airwave o’r fath, gan gynnwys adrodd am unrhyw golled / lladrad. Yn achos colled / lladrad, rhaid i’r defnyddiwr gyflwyno adroddiad cynhwysfawr ar amgylchiadau’r golled / lladrad i’w Reolwr Llinell / Comander.

 

Rheolwyr Llinell / Comanderiaid

Caiff Rheolwyr Llinell / Comanderiaid awdurdodi swyddogion i fynd adref â’u terfynellau a chânt ddirprwyo’r awdurdod hwnnw i lefel oruchwyliol sy’n briodol yn eu barn nhw.

 

Rhaid i Reolwyr Llinell / Comanderiaid ddweud pwy sy’n gyfrifol am archwilio setiau radio cronfa bob dydd.

 

Rhaid i Reolwyr Llinell / Comanderiaid adrodd am golled / lladrad offer wrth Berchennog System Airwave yr Heddlu.

 

Ceidwad Terfynell

Rhaid i’r Ceidwad Terfynell gynnal cofnod o'r holl asedau Airwave y mae gan Heddlu Dyfed-Powys fynediad iddynt, gan gynnwys archwiliad cynhwysfawr blynyddol o asedau Airwave. 

 

Rhaid i’r Ceidwad Terfynell roi rhestr fanwl gywir i Reolwyr Llinell / Comanderiaid o’r asedau Airwave hysbys presennol sy’n cael eu dal o fewn eu maes cyfrifoldeb ac adrodd am unrhyw ddiffygion yn syth wrth Berchennog System Airwave yr Heddlu.

 

Perchennog System Airwave yr Heddlu

Y Pennaeth Rheoli Cyswllt a Digwyddiadau yw Perchennog System Airwave yr Heddlu, ac mae’n cyflawni’r rôl hon yn unol â chanllawiau’r Swyddfa Gartref.

 

Cymorth Rheolwr TGCh Uwch

Mae’r Cymorth Rheolwr TGCh Uwch yn adolygu’r polisi hwn ar sail flynyddol.

Mae’r egwyddorion cod moeseg canlynol yn berthnasol i'r polisi hwn:

• Gwasanaeth Cyhoeddus
• Dewrder
• Parch & Empathi

Mae hyfforddi defnyddwyr cyn eu bod nhw’n defnyddio asedau Airwave yn arddangos didwylledd yn y ffordd y mae’r polisi hwn yn cael ei drosglwyddo. 

 

5.  Gweithredu ac adolygu  

Mae’r polisi hwn yn cael ei ddiweddaru yn ôl yr angen i adlewyrchu a chydymffurfio ag unrhyw newidiadau neu ddiwygiadau i arferion perthnasol. Mae’r ddogfen hon yn destun adolygiad blynyddol gan y Cymorth Rheolwr TGCh Uwch.

 

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Ionawr 2026