Polisi Cam-drin Plant ac Amddiffyn Plant

1. Datganiad Polisi

Diben y polisi hwn yw amlinellu ymateb Heddlu Dyfed-Powys ynghylch cam-drin plant ac amddiffyn plant.

Bydd y polisi hwn yn sicrhau bod Heddlu Dyfed-Powys yn cyflawni ymagwedd gyson a phroffesiynol wrth blismona achosion o gam-drin plant ac amddiffyn plant sy’n wynebu risg er mwyn sicrhau bod plant yn cael eu diogelu, a bod unrhyw achosion o gam-drin plant yn cael eu hymchwilio’n briodol ac yn drylwyr.

Mae’n berthnasol i holl swyddogion a gweithwyr Heddlu Dyfed-Powys sy’n ymateb i ddigwyddiadau sy’n ymwneud â phlant, o’r pwynt cyswllt cyntaf, trwy ymchwiliad ac erlyniad.

Mae Heddlu Dyfed-Powys yn rhoi ystyriaeth arbennig i ddiogelu plant, yn anoddefgar tuag at unrhyw gam-drin neu esgeulustod a bydd yn nodi’r unigolion a allai fod yn fregus, ac yn asesu a ydynt yn wynebu risg o niwed, gan ddelio ag unrhyw bryderon diogelu uniongyrchol a gweithio gydag asiantaethau eraill i roi camau gweithredu ar waith er mwyn atal cam-drin neu niwed pellach yn unol â Gweithdrefnau Diogelu Cymru.

Mae Heddlu Dyfed-Powys yn cydweithio â byrddau diogelu rhanbarthol yn unol â’u protocolau amlasiantaeth. Cysur | Polisïau a Gweithdrefnau Rhanbarthol

Yn berthnasol (ond heb fod yn gyfyngedig) i’r canlynol: Pob categori o swyddogion a staff Heddlu Dyfed-Powys, boed yn weithwyr llawn amser, rhan amser, parhaol, gweithwyr am gyfnod penodol, gweithwyr dros dro (gan gynnwys staff asiantaeth, partneriaid a chontractwyr) neu staff ar secondiad a gwirfoddolwyr. Rhaid i swyddogion heddlu, staff a gwirfoddolwyr sy’n cyrchu a defnyddio asedau ac eiddo’r heddlu roi sylw dyledus i gynnwys y polisi hwn.

  

2. Cwmpas y Polisi

Gweithredir y polisi hwn ar draws yr heddlu.

Bydd y polisi'n cael ei adolygu'n flynyddol a'i ddiweddaru yn unol â deddfwriaeth a chanllawiau. Dylid dogfennu unrhyw wyro oddi wrth y polisi hwn yn glir gyda'r rhesymeg briodol. Bydd y dogfennau polisi a gweithdrefn yn amlinellu’r ffordd y mae Heddlu Dyfed-Powys yn gweithio fel sefydliad a chyda’n partneriaid amlasiantaethol i wneud y canlynol:

• Sicrhau bod aelodau o Heddlu Dyfed-Powys yn cydnabod, yn cofnodi ac yn ymdrin ag achosion o gam-drin plant ac esgeulustod, neu pan allai plentyn fod yn wynebu risg o gael ei gam-drin neu ei esgeuluso, mewn modd cyson.
• Hyrwyddo diogelwch plant.
• Nodi cyfleoedd atal.
• Sicrhau y caiff atgyfeiriadau priodol eu gwneud i asiantaethau eraill mewn modd effeithiol yn unol â Gweithdrefnau Diogelu Cymru.
• Mabwysiadu ymagwedd amlasiantaeth wrth ddatblygu gwasanaethau ar gyfer plant.
• Ymchwilio'n gymesur i droseddau sy'n ymwneud â phlant.
• Hwyluso camau gweithredu effeithiol a phriodol yn erbyn troseddwyr fel y gellir mynnu eu bod yn atebol drwy’r system cyfiawnder troseddol.
• Hybu a chynyddu hyder y gymuned yn y system cyfiawnder troseddol, gwasanaeth yr heddlu a gwella’r ffordd y caiff achosion eu hadrodd.
• Hyrwyddo strwythur sy’n adolygu perfformiad yn rheolaidd, er mwyn sicrhau bod ymateb yr heddlu wrth ymdrin â cham-drin plant ac amddiffyn plant yn gwella ac yn esblygu.

Diffiniadau

Plentyn – Mae Deddf Gwasanaethau Cymdeithasol a Llesiant (Cymru) 2014 a’r canllawiau cysylltiedig yn diffinio ‘plentyn’ fel person dan 18 oed.

Plentyn sy'n wynebu risg – mae adran 130 (4) o Ddeddf Gwasanaethau Cymdeithasol a Llesiant (Cymru) yn diffinio plentyn sy’n wynebu risg yw plentyn:

1. sy’n cael, neu sy’n wynebu risg o gael, ei gam-drin neu ei esgeuluso neu ddioddef mathau eraill o niwed;
2. y mae arno anghenion am ofal a chymorth (p’un a yw’r awdurdod yn diwallu unrhyw un neu rai o’r anghenion hynny ai peidio).

Mae’n bwysig nodi’r canlynol:

• Mae defnyddio’r term ‘wynebu risg’ yn golygu nad oes angen i’r gamdriniaeth neu esgeulustod ei hun ddigwydd, yn hytrach dylid ystyried ymyriadau cynnar i amddiffyn plentyn sy’n wynebu risg i atal gwir niwed, camdriniaeth ac esgeulustod.
• Mae’r ddau amod sydd angen eu bodloni i ddangos bod plentyn yn wynebu risg o gael ei gam-drin neu ei esgeuluso yn sicrhau bod y rhai sydd ag anghenion gofal a chymorth ac sydd hefyd yn dibynnu ar gamau gweithredu i sicrhau eu diogelwch ar gyfer y dyfodol yn cael eu diogelu.
• Gall risg o gam-drin neu esgeulustod ddigwydd o ganlyniad i un pryder neu ffactorau cronnol.

Caiff niwed ei ddiffinio fel a ganlyn:

• camdriniaeth, gan gynnwys cam-drin rhywiol, esgeulustod, cam-drin emosiynol a cham-drin seicolegol.
• amhariad ar iechyd corfforol neu feddyliol (gan gynnwys yr hyn a ddioddefwyd o weld neu glywed rhywun arall yn cael ei gam-drin).
• amhariad ar ddatblygiad corfforol, deallusol, emosiynol, cymdeithasol neu ymddygiadol (gan gynnwys yr hyn a ddioddefwyd o weld neu glywed rhywun arall yn cael ei gam-drin).

Niwed sylweddol

Pryderon ynghylch niwed sylweddol tebygol neu wirioneddol i blentyn yw’r trothwy ar gyfer cychwyn ymholiadau adran 47 o dan Ddeddf Plant 1989. Nid oes diffiniad statudol o niwed sylweddol. Felly, rhaid i ymarferwyr ystyried y canlynol:

• ‘Os caiff iechyd neu ddatblygiad y plentyn ei ystyried wrth geisio penderfynu a yw niwed yn sylweddol, dylid cymharu iechyd neu ddatblygiad y plentyn â’r hyn y gellid ei ddisgwyl yn rhesymol gan blentyn tebyg’.

Mathau o niwed

Isod ceir rhestr anghyflawn o enghreifftiau.

• Cam-drin corfforol – taro, slapio, gorddefnyddio neu gamddefnyddio meddyginiaeth, ataliaeth ormodol neu sancsiynau amhriodol.

• cam-drin emosiynol/seicolegol – bygythiadau o niwed neu gefnu, rheoli gorfodol, cywilyddio, cam-drin geiriol neu hiliol, ynysu neu dynnu’n ôl o wasanaethau neu rwydweithiau cefnogol, bod yn dyst i gam-drin eraill.
• cam-drin rhywiol – gorfodi neu ddenu plentyn neu berson ifanc i gymryd rhan mewn gweithgareddau rhywiol, p’un a yw’r plentyn yn ymwybodol o’r hyn sy’n digwydd ai peidio, gan gynnwys: cyswllt corfforol, gan gynnwys gweithredoedd treiddiol neu anhreiddiol; gweithgareddau digyswllt, megis cynnwys plant wrth edrych ar, neu gynhyrchu, deunydd pornograffig neu wylio gweithgareddau rhywiol neu annog plant i ymddwyn mewn ffyrdd rhywiol amhriodol.
• cam-drin ariannol – bydd y categori hwn yn llai cyffredin i blentyn ond dangosyddion posibl fyddai:
• peidio â diwallu eu hanghenion am ofal a chymorth a ddarperir trwy daliadau uniongyrchol; neu
• cwynion bod eiddo personol ar goll.
• esgeuluso – methiant i ddiwallu anghenion corfforol, emosiynol neu seicolegol sylfaenol sy’n debygol o arwain at amhariad ar iechyd neu ddatblygiad.

Gall y perygl o niwed gwirioneddol neu niwed posibl arall i blentyn neu berson ifanc hefyd ddeillio o’r canlynol:

• Camfanteisio troseddol megis llinellau cyffuriau (camfanteisio troseddol ar blant)
• Cam-fanteisio’n rhywiol ar blant
• Radicaleiddio
• Anffurfio organau cenhedlu benywod
• Caethwasiaeth fodern a masnachu pobl
• Cam-drin ar sail anrhydedd

Plant coll

Gall plentyn sydd ar goll (boed wedi’i adrodd ai peidio) neu deulu neu blentyn sy’n colli apwyntiadau pwysig (er enghraifft, gyda gweithwyr gofal iechyd proffesiynol) a/neu yr amheuir ei fod wedi symud allan o’r ardal leol heb rybudd fod yn arwydd o gam-drin plant. Gall plant sy’n mynd ar goll fod yn wynebu risg tra eu bod ar goll a/neu efallai eu bod wedi rhedeg i ffwrdd er mwyn dianc rhag cael eu cam-drin.

Cyn dychwelyd plant coll, dylid gwneud ymholiadau i ddarganfod y rhesymau dros eu diflannu trwy gyfweliadau ‘diogel ac iach’. Gall yr ymholiadau hyn arwain at bryderon pellach am y plentyn a datgelu achosion o gam-drin. Mewn rhai achosion gellir dod o hyd i blentyn nad yw wedi cael ei hysbysu i’r heddlu fel plentyn sydd ar goll, efallai oherwydd bod y plentyn wedi'i wahardd yn fwriadol o amgylchedd y cartref. Mewn achosion o’r fath dylai swyddogion ystyried diogelwch y plentyn a pha mor fregus ydyw.

Gall gwybodaeth sy’n cael ei chasglu yn ystod ymchwiliadau i bobl ar goll (er enghraifft, pan fydd plentyn neu blant yn cael eu canfod yn rheolaidd yn yr un cyfeiriad neu gyda'r un unigolyn) ddangos bod angen ymchwiliad pellach.

 

3.  Pwerau a Pholisi / Gofynion Cyfreithiol

• Deddf Gwasanaethau Cymdeithasol a Llesiant (Cymru) 2014
• Deddf Plant 1989 (legislation.gov.uk)
• Gweithdrefnau Diogelu Cymru 2019
• Deddf Diogelu Grwpiau Hyglwyf 2006
• Rheoliadau Byrddau Diogelu (Swyddogaethau a Gweithdrefnau) (Cymru) 2015
• Deddf Diogelu Data 2018
• Deddf Trosedd ac Anhrefn 1998
• Deddf Plant (Diddymu Amddiffyniad Cosb Resymol) (Cymru) 2020
• Arferion Proffesiynol Awdurdodedig y Coleg Plismona – Ymchwilio i gam-drin plant a diogelu plant

Ysgrifennir y polisi hwn yn unol â'r .

Mae Heddlu Dyfed-Powys yn gweithredu’n unol â’r ddeddfwriaeth a’r gweithdrefnau uchod gan gydnabod y canllawiau a nodir yn Arferion Proffesiynol Awdurdodedig y Coleg Plismona mewn perthynas â cham-drin plant a diogelu plant.

Mae adran 46 o Ddeddf Plant 1989 yn darparu pŵer argyfwng sy’n caniatáu i unrhyw swyddog heddlu amddiffyn plentyn y credir yn rhesymol ei fod yn wynebu risg o niwed sylweddol. Mae’r ddeddf hon yn grymuso swyddog i symud plentyn i lety addas neu atal plentyn rhag cael ei symud o ysbyty neu le arall lle mae’r plentyn hwnnw’n cael ei letya. Pan fydd y pwerau hyn yn cael eu harfer, ystyrir bod y plentyn yn cael ei amddiffyn gan yr heddlu. Nid yw amddiffyniad yr heddlu yn rhoi cyfrifoldeb rhiant i’r heddlu ac nid yw, er enghraifft, yn rhoi’r gallu i’r heddlu gydsynio ar ran y plentyn i archwiliad meddygol fforensig. Ni chaniateir cadw unrhyw blentyn dan amddiffyniad yr heddlu am fwy na 72 awr. Dim ond pan fo angen eu defnyddio am resymau sy'n ymwneud â diogelwch uniongyrchol y plentyn y dylid defnyddio pwerau amddiffyn yr heddlu.

Mae'r polisi hwn yn berthnasol ac yn gysylltiedig â pholisïau eraill yr heddlu a dylid ei ystyried ochr yn ochr â nhw. Y polisïau hyn yw –

• Polisi Cofnodi Troseddau a Digwyddiadau ac Ymchwilio Iddynt
• Polisi Camfanteisio Troseddol
• Polisi Cam-drin Domestig
• Polisi Anffurfio Organau Cenhedlu Benywod
• Polisi Cam-drin ar sail Anrhydedd a Phriodas dan Orfod
• Polisi Rhannu Gwybodaeth
• Polisi Ymchwilio ac Erlyn i Dreisio a Throseddau Rhywiol Difrifol
• Polisi Unigolion Coll
• Polisi Bregusrwydd

Egwyddorion cyffredinol

Mae dyletswydd gyfreithiol ar bob asiantaeth, gan gynnwys yr heddlu, i ddiogelu a hyrwyddo llesiant plant, sy’n cynnwys rhannu pryderon yn gynnar er mwyn annog camau ataliol.

Mae Gweithdrefnau Diogelu Cymru yn manylu ar rolau a chyfrifoldebau hanfodol ymarferwyr i sicrhau eu bod yn diogelu plant sy’n wynebu risg o gael eu cam-drin a’u hesgeuluso.

Mae Heddlu Dyfed-Powys yn bartner sefydliadol i’r bwrdd diogelu rhanbarthol. Bydd Heddlu Dyfed-Powys, ynghyd â’i asiantaethau partner, yn amddiffyn plant sy’n wynebu risg o niwed, camdriniaeth ac esgeulustod yn y ffyrdd canlynol:

• atal neu ymyrryd yn gynnar i fynd i’r afael ag unrhyw bryderon sy’n dod i’r amlwg.
• nodi pryderon.
• Lle bo angen, amddiffyn ar unwaith i gadw’r unigolyn sy’n wynebu risg o niwed yn ddiogel gan ddefnyddio’r pwerau heddlu priodol (pwerau adran 46) a chamau gweithredu cadarnhaol gyda chyflawnwyr.
• cyfeirio’r pryderon hyn at yr awdurdod lleol ar gyfer cychwyn ymholiadau adran 47 o dan Ddeddf Plant 1989 o bosibl.
• darparu gofal a chymorth i fynd i’r afael ag anghenion nas diwallwyd os canfyddir nad yw’r plentyn yn wynebu risg neu niwed sylweddol.
• amddiffyn o ran gofal a chymorth i fynd i’r afael ag anghenion, gan gynnwys cadw’r unigolyn yn ddiogel os yw’r plentyn yn wynebu a/neu’n debygol o wynebu niwed sylweddol parhaus.

Egwyddorion diogelu

Er mwyn sicrhau bod plant yn cael eu diogelu’n effeithiol, bydd Heddlu Dyfed-Powys yn cymryd y camau canlynol:

• Cyfrannu at y gwaith o ddiogelu a hyrwyddo llesiant y plentyn ochr yn ochr â’i asiantaethau partner drwy rannu gwybodaeth.

• Cyfrannu at waith rhyngddisgyblaethol ac amlddisgyblaethol er mwyn deall y plentyn unigol yn well, ynghyd â’i amgylchiadau a’i anghenion am ofal, cymorth a diogelwch.
• Meithrin a chynnal cydberthnasau gwaith cyd-gynhyrchiol â’r plentyn sy’n wynebu risg, ei deulu a’i ofalwyr i ddarganfod beth sy’n bwysig iddo a sicrhau ei fod yn teimlo ei fod yn cael ei barchu a’i fod yn cael yr wybodaeth ddiweddaraf.

 Dull sy’n canolbwyntio ar y plentyn

Mae Heddlu Dyfed-Powys, yn unol â Rhan 2.6(2) o Ddeddf Gwasanaethau Cymdeithasol a Llesiant (Cymru) 2014 yn cydnabod y canlynol:

• y dylai hawliau’r plentyn fod yn hollbwysig i’r ymagwedd.
• eu buddion pennaf fydd sylfaen ein penderfyniadau.
• bydd llais y plentyn yn cael ei ystyried yn barhaus drwy gydol ein hymateb i unrhyw bryderon.
• byddant yn canfod ac yn rhoi sylw i farn, dymuniadau a theimladau’r plentyn, cyn belled ag y bo’n rhesymol ymarferol.
• bydd Heddlu Dyfed-Powys yn rhoi sylw i bwysigrwydd hyrwyddo a pharchu urddas yr unigolyn.
• bydd Heddlu Dyfed-Powys yn rhoi sylw i nodweddion, diwylliant a chredoau’r plentyn a’i deulu (gan gynnwys, er enghraifft, iaith) ac ar yr un pryd yn cydnabod bod diogelu’r unigolyn yn cael blaenoriaeth.
• bydd Heddlu Dyfed-Powys yn rhoi sylw i bwysigrwydd darparu cymorth priodol er mwyn galluogi’r plentyn i gymryd rhan mewn penderfyniadau sy’n effeithio arno i’r graddau sy’n briodol o dan yr amgylchiadau, yn enwedig pan fo gallu’r plentyn i gyfathrebu wedi ei gyfyngu am unrhyw reswm.

 

Chwilfrydedd proffesiynol

Wrth ymateb i ddigwyddiadau sy’n ymwneud â phlant, rhaid i staff ddangos chwilfrydedd proffesiynol er mwyn archwilio a deall beth sy’n digwydd i unigolyn, neu o fewn teulu, yn hytrach na gwneud rhagdybiaethau neu dderbyn pethau heb eu cwestiynu.

Anogir swyddogion a staff i wneud y canlynol:

• Edrych, gwrando, gofyn cwestiynau uniongyrchol, gwirio a myfyrio ar yr wybodaeth a gafwyd.
• Profi damcaniaethau proffesiynol.
• Asesu gwybodaeth o wahanol ffynonellau i gael gwell dealltwriaeth o unigolion.
• Cael nifer o ffynonellau o wybodaeth a pheidio â derbyn un set o fanylion a roddir heb eu cwestiynu.
• Bod yn ymwybodol o'u rhagfarn bersonol a sut y gall honno effeithio ar wneud penderfyniadau a sicrhau ei bod yn cael ei hosgoi trwy barhau i ganolbwyntio ar y plentyn neu'r plant, chwilio am esboniadau amgen, profi eu rhagdybiaeth a dehongli gwybodaeth drwy eu harchwilio yn fanwl a chyfartal.
• Dogfennu a chofnodi eu gweithredoedd a'u rhesymeg yn briodol i gefnogi archwiliad manwl yn y dyfodol.

Llais y plentyn

Mae angen ystyried llais y plentyn bob tro y mae swyddog heddlu yn ymchwilio i bryder amddiffyn plant gan ddefnyddio’r cofair AWARE. Mae staff yn cael eu cyfarwyddo i ddefnyddio eu chwilfrydedd proffesiynol wrth ystyried y ffactorau canlynol o brofiadau bywyd plentyn –

A – Appearance (edrychiad)

W – Words (geiriau)

A – Activity and Behaviours (gweithgarwch ac ymddygiadau)

R – Relationships and Dynamics (perthnasoedd a dynameg)

E – Environment (amgylchedd)

 

Profiadau niweidiol yn ystod plentyndod.

Bydd yr heddlu yn defnyddio dull sy’n ystyriol o drawma ar gyfer pob achos sy’n gofyn am ymateb sy’n amddiffyn plant neu’n cynnig cymorth cynnar. Bydd hyn yn cynnwys asesu a dogfennu ffactorau gwydnwch plant i’w rhannu â phartneriaid fel rhan o asesiadau parhaus y plentyn. 

I gydnabod effaith trawma yn ystod plentyndod, mae Heddlu Dyfed-Powys yn cefnogi’r penderfyniad i ddiddymu amddiffyniad cosb resymol, fel y nodir yn Neddf Plant (Diddymu Amddiffyniad Cosb Resymol) (Cymru) 2020.

Dyletswyddau asiantaethau partner perthnasol

Mae dyletswydd gyfreithiol ar asiantaethau partner perthnasol i adrodd am bryderon i’r awdurdod lleol os oes ganddynt wybodaeth am bryderon neu amheuon bod plentyn wedi dioddef, neu’n wynebu risg o ddioddef niwed sylweddol.  

Mae partneriaid perthnasol yn cynnwys (ond heb fod yn gyfyngedig i) yr awdurdod lleol, gwasanaethau iechyd a'r heddlu.

Bydd Heddlu Dyfed-Powys yn amlygu unrhyw bryderon diogelu drwy gyflwyno Hysbysiad Diogelu’r Cyhoedd i’r awdurdod lleol. Mae pedwar awdurdod lleol o fewn cyfansoddiad daearyddol Heddlu Dyfed-Powys; sef Cyngor Sir Caerfyrddin, Cyngor Sir Ceredigion, Cyngor Sir Penfro a Chyngor Sir Powys.  

 

4.  Opsiynau a Chynlluniau Wrth Gefn

Rhaid i swyddogion heddlu a staff heddlu sy'n ymwneud â'r broses ymchwilio feddu ar y cymwysterau, y cymwyseddau a'r sgiliau priodol. Un o elfennau allweddol ymateb effeithiol yr heddlu i gam-drin plant yw ymagwedd gyfannol, teulu cyfan at yr ymchwiliad a chamau gweithredu cysylltiedig yr heddlu a chamau amlasiantaethol cysylltiedig. Yn y mwyafrif o achosion o gam-drin plant bydd hyn, o reidrwydd, yn cynnwys ymchwilwyr cam-drin plant arbenigol.

Mae’r holl staff yn yr Adran Ymchwilio i Droseddau (CID) yn ymchwilwyr sydd wedi cyflawni hyfforddiant Rhaglen Broffesiynoli Ymchwilio lefel 2 a hyfforddiant cam-drin plant arbenigol, neu’n gweithio tuag at hyn dan gyfarwyddyd goruchwylwyr hyfforddedig. Yn adran CID rhai ardaloedd plismona lleol ceir Cyd-unedau Ymchwilio penodedig sy’n ymdrin â’r ymchwiliadau amddiffyn plant i sicrhau bod unrhyw weithgarwch ymchwilio a diogelu yn amserol. Yna gellir dyrannu ymchwiliadau hirfaith i swyddog sydd wedi'i hyfforddi'n briodol o'r adran CID i sicrhau bod swyddogion y Cyd-uned Ymchwilio yn gallu bwrw ymlaen ag atgyfeiriadau mewn modd amserol. Cyfrifoldeb y Ditectif Brif Arolygydd lleol yw sicrhau bod yr holl staff yn yr adrannau hyn wedi'u hyfforddi'n briodol ac yn gymwys i gyflawni eu rôl neu ar y llwybr tuag at hyn.

Y swyddog arweiniol yw'r Ditectif Uwch-arolygydd ar gyfer Diogelu Pobl Fregus, sef yr arweinydd strategol ar gyfer Bregusrwydd.

Mae Comander yr Ardal Blismona Leol a'r Ditectif Brif Arolygydd yn gyfrifol am y canlynol:

• Sicrhau bod eu staff yn deall, gweithredu a chydymffurfio â’r polisi hwn.
• Nodi swyddogion addas i ymgymryd â hyfforddiant a rolau sydd eu hangen ar gyfer ymchwiliadau arbenigol.
• Ymchwilio, diogelu a chefnogi pobl fregus yn eu hardal ddaearyddol.

 

Drwy gymhwyso’r polisi hwn a’r ddogfen ganllaw gysylltiedig, bydd Heddlu Dyfed-Powys yn gweithredu’n unol â’r egwyddorion plismona moesegol gan ddangos dewrder, parch, empathi a gwasanaeth cyhoeddus.

 

5.  Camau gweithredu ac adolygu

Rheolir cam-drin plant ac amddiffyn plant o dan y portffolio Bregusrwydd a gaiff ei oruchwylio gan y Bwrdd Bregusrwydd Strategol a’i gadeirio gan y Prif Gwnstabl Cynorthwyol bob chwarter. 

Mae Portffolio Bregusrwydd Heddlu Dyfed-Powys yn dilyn cyfeiriad strategol y Cynllun Gweithredu Cenedlaethol ar gyfer Bregusrwydd.

Caiff ymateb yr heddlu i ymchwiliadau sy'n ymwneud ag amddiffyn pobl fregus ei reoli gan bob Ditectif Brif Arolygydd yr Ardaloedd Plismona Lleol, wedi’i oruchwylio gan y Ditectif Uwch-arolygydd ar gyfer Diogelu Pobl Fregus.

Y Ditectif Brif Arolygydd gyda chyfrifoldeb dros y Portffolio Bregusrwydd sy’n gyfrifol am lunio adolygiad blynyddol o ymateb yr heddlu i amddiffyn pobl fregus, yn ogystal â llunio Datganiad Rheoli'r Heddlu, sy’n canolbwyntio ar y capasiti a'r gallu yn y maes arbenigol hwn.

Mae Heddlu Dyfed-Powys yn rhan o’r Bwrdd Diogelu Rhanbarthol, ac mae’r Pennaeth Diogelu Pobl Fregus, neu gynrychiolydd enwebedig, yn cymryd rhan mewn cyfarfodydd gweithredol bob chwarter gyda’r bwrdd ac arweinwyr eraill o’r partner-asiantaethau perthnasol. Mae'r broses hon yn dal y sefydliad i gyfrif ar y lefel weithredol ar draws pob maes o Fregusrwydd, gan gynnwys cam-drin plant ac amddiffyn plant.

Bydd Heddlu Dyfed-Powys yn gweithredu yn unol â’n protocol diogelu amlasiantaethol rhanbarthol ar gyfer datrys gwahaniaethau proffesiynol lle bo’n berthnasol.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Awst 2024