Polisi Stelcio ac Aflonyddu

1. Datganiad Polisi

Nod y polisi hwn yw sicrhau bod gan Heddlu Dyfed-Powys drefn gyson ac ymagwedd broffesiynol at blismona digwyddiadau o stelcio ac aflonyddu, yn unol ag Arferion Proffesiynol Awdurdodedig y Coleg Plismona ar gyfer Stelcio ac Aflonyddu sy'n nodi'r egwyddorion a'r safonau i'w dilyn.

Bydd polisi Dyfed-Powys yn adlewyrchu’n llwyr y “Protocol ar ymdrin yn briodol â throseddau stelcio neu aflonyddu rhwng Cyngor Cenedlaethol Prif Swyddogion yr Heddlu a Gwasanaeth Erlyn y Goron” (CPS). Bydd canllawiau gweithredu yn cael eu darparu yn y canllaw “Proses Heddlu Dyfed-Powys” a gedwir ar safle mewnrwyd yr heddlu mewn dogfennau canllaw Diogelu Pobl Fregus.

NODAU:

• Cyflawni perfformiad gwell a chyson wrth nodi, ymchwilio ac erlyn achosion o stelcio neu aflonyddu;
• Sicrhau ymateb cyfiawnder troseddol cadarn a phriodol i stelcio neu aflonyddu;
• Sefydlu cyswllt cynnar ac effeithiol rhwng yr heddlu a Gwasanaeth Erlyn y Goron mewn achosion stelcio; • Gwella'r gwasanaeth i ddioddefwyr stelcio neu aflonyddu;
• Cynyddu hyder y cyhoedd yn ehangach yng ngallu'r System Cyfiawnder Troseddol i ymdrin ag achosion o stelcio neu aflonyddu;
• Adlewyrchu Arferion Proffesiynol Awdurdodedig y Coleg Plismona a pholisi Gwasanaeth Erlyn y Goron.

Mae’n berthnasol i’r canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, boed yn staff llawn amser, rhan amser, parhaol, tymor penodol, dros dro (gan gynnwys staff asiantaeth, contractwyr a chymdeithion) staff ar secondiad a gwirfoddolwyr. Dylai swyddogion, staff a gwirfoddolwyr yr Heddlu sy’n cael mynediad at asedau ac eiddo’r Heddlu ac sy’n eu defnyddio roi ystyriaeth ddyledus i gynnwys y polisi hwn.

2. Cwmpas y Polisi

Mae'r ymrwymiad i roi terfyn ar stelcio ac aflonyddu wedi'i wreiddio yn y Strategaeth Rhoi Terfyn ar Drais yn erbyn Menywod a Merched trawslywodraethol. Ategir y strategaeth gan waith partneriaeth effeithiol ar lefel leol a chenedlaethol. Mae erlyn yr achosion hyn yn llwyddiannus a diogelu'r dioddefwyr hynny yn dibynnu ar waith partneriaeth cryf a chydweithredol rhwng yr heddlu ac erlynwyr.

Mae’r dull Trais yn Erbyn Menywod a Merched yn cydnabod bod dioddefwyr stelcio fwy na heb yn fenywod.Er mae Heddlu Dyfed-Powys yn cydnabod nad yw'r math hwn o droseddu yn gyfyngedig i un rhywedd, a bod y polisi hwn felly yn berthnasol i bawb. Mae’r dull yn cydnabod Trais yn Erbyn Menywod a Merched fel cam-drin sylfaenol o hawliau dynol a hawliau menywod. Mae llywodraeth y DU wedi llofnodi a chadarnhau galwad y Cenhedloedd Unedig i bob gwladwriaeth atal ac ymateb i drais yn erbyn menywod a merched. Ym mis Chwefror 2023, dosbarthodd y Swyddfa Gartref am y tro cyntaf, Trais yn Erbyn Menywod a Merched fel bygythiad cenedlaethol i ddiogelwch y cyhoedd a’i wneud yn rhan o’r Gofyniad Plismona Strategol. Mae hyn yn golygu bod heddluoedd yn blaenoriaethu eu hymatebion i Drais yn Erbyn Menywod a Merched yn yr un modd â therfysgaeth a throseddau cyfundrefnol a difrifol. Mae stelcio ac aflonyddu wedi’i nodi fel un o’r pum bygythiad tyngedfennol i fenywod a merched yn y Datganiad Plismona Trais yn Erbyn Menywod a Merched. Mae’r heddlu a Gwasanaeth Erlyn y Goron wedi ymrwymo i holl ddioddefwyr troseddau sydd wedi’u grwpio gyda’i gilydd fel ‘Trais yn Erbyn Menywod a Merched’ ac i’r perwyl hwnnw, mae eu dull yn gynhwysol. Mae'r holl bolisïau Trais yn Erbyn Menywod a Merched yn cael eu cymhwyso'n deg ac yn gyfartal i bawb a ddrwgdybir a dioddefwyr trosedd - waeth beth fo'u rhywedd. Mae Datganiad Cyhoeddus Gwasanaeth Erlyn y Goron ar ddioddefwyr gwrywaidd yn berthnasol i'r protocol hwn - Datganiad Cyhoeddus Gwasanaeth Erlyn y Goron ar ddioddefwyr gwrywaidd troseddau a gwmpesir gan Strategaeth Trais yn Erbyn Menywod a Merched Gwasanaeth Erlyn y Goron | Gwasanaeth Erlyn y Goron.

Mae gan Brif Gwnstabliaid gyfrifoldeb cyffredinol am ymchwilio i weithgarwch troseddol honedig yn eu hardal heddlu unigol.

Gwasanaeth Erlyn y Goron yw'r prif awdurdod erlyn sy'n delio ag erlyniadau troseddol yng Nghymru a Lloegr. Mae Gwasanaeth Erlyn y Goron wedi ymrwymo'n llwyr i erlyn yn deg ac yn effeithiol pawb sy'n aflonyddu neu'n stelcio.

Dylai heddluoedd a’u partneriaid sicrhau bod troseddau stelcio bob amser yn cael eu trin o ddifrif.

Mae diogelwch dioddefwyr yn hollbwysig. Mae methu ag adnabod ac ymdrin yn gadarn ag aflonyddu neu ymddygiad stelcio cyn gynted â phosibl yn galluogi’r rhai a ddrwgdybir i barhau â’u hymddygiad. Gall hyn olygu bod dioddefwyr yn agored i risg gynyddol, gan gynnwys ymosodiad rhywiol a dynladdiad. Rhaid felly ystyried y risgiau i ddioddefwyr yn ofalus yn yr achosion hyn. Mae hyn nid yn unig mewn perthynas â’r risg uniongyrchol i’r dioddefwr gan y sawl a ddrwgdybir, ond hefyd y risg i unrhyw un sy’n gysylltiedig â dioddefwyr, megis eu plant a’u dibynyddion, aelodau o’r teulu a ffrindiau.

Bydd Heddlu Dyfed-Powys yn defnyddio Arolygon Stelcio er mwyn mesur a deall bodlonrwydd dioddefwyr yn well.                 

Mae Heddlu Dyfed-Powys yn cydnabod bod stelcio yn cael ei ystyried yn fath o drosedd risg uchel. Mae'r gwir risg i'r dioddefwr yn aml yn cael ei guddio gan ymddangosiad ymddygiad troseddol lefel isel.

Bydd Heddlu Dyfed-Powys yn defnyddio’r wyth cam ymchwil academaidd i laddiadau fel egwyddor ar gyfer deall y risg, a defnyddio’r pecyn cymorth buddsoddi amser i ganfod yr amser cudd y mae cyflawnwyr yn ei fuddsoddi mewn cyflawni troseddau o’r fath.

Mae Heddlu Dyfed-Powys yn cydnabod ei bod yn hollbwysig ein bod yn nodi ymddygiadau stelcio ac felly byddwn yn ystyried pob achos o aflonyddu a chyfathrebu maleisus ar gyfer ymddygiad stelcio.

Mae achosion o stelcio mewn lleoliad domestig yn cael ymateb amlasiantaethol uwch fel y nodir ym mhrotocol Cynhadledd AmlAsiantaeth Asesu Risg yr heddlu. Pan fydd achosion o stelcio yn disgyn y tu allan i'r sefyllfa ddomestig, byddant i gyd yn cael eu hystyried gan swyddogion arbenigol a lle bo angen bydd ymatebion partneriaeth yn cael eu sefydlu fesul achos.

Bydd Heddlu Dyfed-Powys yn dilyn egwyddorion polisi cofnodi a dyrannu troseddau'r heddlu wrth ystyried perchnogaeth pob ymchwiliad i stelcio neu aflonyddu. Oherwydd natur gymhleth troseddau ymddygiadol, bydd yr heddlu yn sicrhau bod rhwydwaith o swyddogion arbenigol a chefnogaeth cymheiriaid i gynnig arweiniad lle bo angen.

Bydd Heddlu Dyfed-Powys yn cymryd safbwynt ragweithiol wrth geisio dod â throseddwyr o flaen y llys. Ym mhob achos byddwn yn cynnal ymchwiliad a arweinir gan dystiolaeth, a lle bodlonir y trothwyon tystiolaeth byddwn yn ceisio gweithio mewn partneriaeth â Gwasanaeth Erlyn y Goron i ddod â chyflawnwyr gerbron y llys.

Lle canfyddir stelcio bydd cynllun rheoli risg yn cael ei sefydlu ym mhob achos. Bydd cynlluniau rheoli risg yn gwneud y mwyaf o'r defnydd o orchmynion i gyfyngu ar weithgareddau'r troseddwr ac amddiffyn y dioddefwr. Ni fydd Heddlu Dyfed-Powys yn cynhyrchu gorchmynion generig, ond bydd pob gorchymyn yn cael ei deilwra i ofynion penodol y cynllun rheoli risg. Lle bo'n briodol, bydd ein trefniadau partneriaeth ar gyfer rheoli troseddwyr yn cael eu defnyddio.

Bydd Heddlu Dyfed-Powys yn rhagweithiol wrth geisio adsefydlu y troseddwyr gan ddefnyddio rhaglenni cyflawnwyr lle mae asesiad gan ddarparwyr gwasanaeth yn ystyried ei bod yn briodol ac yn ddiogel i wneud hynny.

Diffiniadau

2.1 Stelcio

Nid yw stelcio wedi’i ddiffinio’n gyfreithiol ond mae adran 2A(3) o Ddeddf Gwarchodaeth rhag Aflonyddu 1997 yn rhestru sawl enghraifft o ymddygiadau sy’n gysylltiedig â stelcio. Nid yw'r rhestr yn un hollgynhwysfawr ond mae'n rhoi syniad o'r mathau o ymddygiad y gellir eu harddangos mewn trosedd stelcio. Yr ymddygiadau a restrir yw’r canlynol:

(a) dilyn unigolyn,

(b) cysylltu ag unigolyn, neu geisio cysylltu ag ef mewn unrhyw fodd,

(c) cyhoeddi unrhyw ddatganiad neu ddeunydd arall sy’n ymwneud ag unigolyn neu’n honni ei fod yn ymwneud ag unigolyn, neu’n honni ei fod yn tarddu oddi wrth unigolyn,

(ch) monitro’r defnydd gan unigolyn o’r rhyngrwyd, e-bost neu unrhyw ffurf arall ar gyfathrebu electronig,

(d) loetran mewn unrhyw le (cyhoeddus neu breifat),

(dd) ymyrryd ag unrhyw eiddo sydd ym meddiant unigolyn,

(e) gwylio neu ysbïo ar unigolyn. Nid yw aflonyddu sy'n cynnwys un neu fwy o'r nodweddion uchod yn stelcio yn awtomatig. Rhaid i batrwm yr ymddygiad, a asesir yn ei gyfanrwydd, gyd-fynd â'r dehongliad cyffredin o'r gair ‘stelcio’. Mae’r Coleg Plismona yn cynorthwyo ymhellach gyda chanllawiau ar wahaniaethu rhwng stelcio ac aflonyddu, gan ddarparu tri phwynt i’w hystyried gan gynnwys cofair ymarferol i’w gymhwyso i’r amgylchiadau,

- bydd stelcio yn aml yn canolbwyntio ar unigolyn, wrth i aflonyddu yn aml ganolbwyntio ar anghydfodau,

- a oes tystiolaeth i awgrymu, os bydd y broblem yn cael ei datrys, y bydd yr ymddygiad yn dod i ben?

- ystyriwch y cofair stelcio SODA. A yw'r ymddygiadau yn:

Sefydlog,

Obsesiynol,

Digroeso,

Ailadroddus

2.2 Aflonyddu

Mae aflonyddu fel y'i diffinnir o dan Ddeddf Gwarchodaeth rhag Aflonyddu 1997 yn nodi dwy drosedd o aflonyddu.

Trosedd Adran 2 - Aflonyddu

Elfennau trosedd adran 2 yw fel a ganlyn:

- patrwm ymddygiad;

- sy'n gyfystyr ag aflonyddu ar rywun arall; a

- y mae'r diffynnydd yn gwybod, neu dylai wybod ei fod yn gyfystyr ag aflonyddu ar rywun arall.

Adran 4A(1)(b)(ii) Trosedd - Stelcio sy’n cynnwys ofn o drais neu ddychryn difrifol neu ofid,:

Elfennau trosedd adran 4 yw fel a ganlyn:

- Unigolyn (“A”) y mae patrwm ei ymddygiad –

- yn gyfystyr â stelcio, a naill ai - yn peri i rywun arall (“B”) ofni, ar o leiaf ddau achlysur, y bydd trais yn cael ei ddefnyddio yn erbyn “B”, neu’n achosi dychryn neu ofid difrifol i “B” sy’n cael effaith andwyol sylweddol ar weithgareddau arferol o ddydd i ddydd B,

- yn euog o drosedd os yw “A” yn gwybod neu y dylai wybod y bydd patrwm ymddygiad “A” yn achosi “B” felly i ofni ar bob un o’r achlysuron hynny neu (yn ôl rhaid) y bydd yn achosi dychryn neu ofid o’r fath.

- Dylai “A” wybod y bydd “patrwm ymddygiad A yn achosi i “B” ofni y bydd trais yn cael ei ddefnyddio yn erbyn “B” ar unrhyw achlysur pe bai unigolyn rhesymol sydd â’r un wybodaeth yn ei feddiant yn meddwl y byddai patrwm ymddygiad A yn achosi “ B” felly i'w ofni ar yr achlysur hwnnw.

 - Dylai “A” wybod y bydd patrwm ymddygiad “A” yn achosi dychryn neu ofid difrifol i “B” sy’n cael effaith andwyol sylweddol ar weithgareddau arferol B o ddydd i ddydd, pe bai unigolyn rhesymol sydd â’r un wybodaeth yn ei feddiant yn meddwl y byddai’r patrwm ymddygiad yn achosi dychryn neu ofid o'r fath.

 

3.  Pwerau a Gofynion Polisi/Cyfreithiol

• Deddf Gwarchodaeth rhag Aflonyddu 1997 (legislation.gov.uk)
• Stelcio neu aflonyddu | Arferion Proffesiynol Awdurdodedig y Coleg Plismona
• Protocol ar drin stelcio neu aflonyddu yn briodol
• Polisi Cam-drin Domestig Heddlu Dyfed-Powys
• crime-recording-rules-for-frontline-officers-and-staff-march2024.pdf (publishing.service.gov.uk)

 

4.  Opsiynau a Dewisiadau wrth Gefn

Adrodd

Mae pum ffordd i roi gwybod i’r heddlu am stelcio neu aflonyddu:

• Rhoi gwybod dros y ffôn i Ganolfan Gyfathrebu’r Heddlu.
• Rhoi gwybod ar-lein trwy Gartref Ar-lein Sengl neu y cyfryngau cymdeithasol;
• Rhoi gwybod i Swyddog Ymholiadau’r Cyhoedd yn yr orsaf.
• Rhoi gwybod i swyddogion rheng flaen ar batrôl;
• Atgyfeiriad gan bartneriaid i’r Gynhadledd Amlasiantaeth Asesu Risg.

*Gall adroddiadau gael eu gwneud yn uniongyrchol gan ddioddefwyr neu ar ran dioddefwyr trwy drydydd parti.

Ymateb Cychwynnol

• Ym mhob achos lle ceir adroddiad uniongyrchol i blismona fel y pwynt cyswllt cyntaf, cynhelir asesiad 'Bygythiad, Niwed, Risg, Ymchwilio, Bregusrwydd, Ymgysylltu, Diogelu' (THRIVES) i sefydlu lefel yr ymateb sydd ei angen. Mewn achosion lle mae risg uniongyrchol wedi'i nodi, bydd swyddogion yn mynychu’r lleoliad i gychwyn ac yn cynnal asesiad.
• Lle rhoddir gwybod am stelcio neu aflonyddu sy'n gysylltiedig â cham-drin domestig, cynhelir asesiad Hysbysiad Diogelu’r Cyhoedd yn ymwneud â chamdrin domestig.
• Os rhoddir gwybod am stelcio neu aflonyddu nad yw'n gam-drin domestig, cynhelir asesiad Hysbysiad Diogelu’r Cyhoedd yn ymwneud â stelcio neu aflonyddu.
• Cyfrifoldeb y swyddog sy'n cwblhau'r asesiad risg yw sefydlu cynllun rheoli risg effeithiol y dylid ei ddogfennu ar dempled y cynllun rheoli risg ar Niche.
• Mewn achosion lle yr ystyrir bod y risg ar fin digwydd yn isel gall fod yn briodol ymateb yn arafach sy'n rhoi anghenion y dioddefwr wrth wraidd y penderfyniad.
• Dylai'r swyddog cychwynnol sy'n delio, gymryd y camau ymchwiliol angenrheidiol i gasglu tystiolaeth am y drosedd. Gall hyn fod yn groes i ddymuniadau'r dioddefwr, ond cydnabyddir bod ansawdd y dystiolaeth yn lleihau dros amser, a dylid ystyried y risg i'r dioddefwr a'r cyhoedd yn gyffredinol.
• Dylid ystyried Cod G PACE fel ffordd o uchafu cyfleoedd ar gyfer uchafu cyfleodd diogelu a chasglu tystiolaeth, gan gynnwys chwilio ac atafaelu dyfeisiau lle bo’n briodol.
• Dylai swyddogion osgoi cynghori dioddefwyr i dynnu eu hunain o gyfryngau cymdeithasol.
• Os yw Stelcio yn cael ei alluogi gan dechnoleg seiber, dylai’r swyddog yn yr achos sicrhau bod y dull hwn yn cael ei gofnodi.
• Bydd diogelu'r dioddefwr yn hollbwysig uwchlaw pob cam arall.

Diogelu

• Cyfrifoldeb y swyddog sy’n bresennol fydd y camau gweithredu diogelu cychwynnol.
• Bydd Hysbysiadau Diogelu’r Cyhoedd yn ymwneud â cham-drin domestig yn cael eu hadolygu gan swyddog arbenigol gyda gwell dealltwriaeth o’r maes risg hwn. Bydd Hysbysiadau Diogelu’r Cyhoedd yn ymwneud â stelcio neu aflonyddu yn cael eu hadolygu gan y Cydgysylltydd Cyflawnwyr Cam-drin Domestig a Stelcio. Ar gyfer yr achosion hynny sy'n bodloni'r meini prawf gofynnol, bydd Swyddogion Cam-drin Domestig yn cynnal Asesiad Sgrinio ar gyfer Stelcio ac Aflonyddu (SASH).
• Yn achos cam-drin domestig, bydd polisi cam-drin domestig yr heddlu yn cael ei ddilyn.
• Lle nad yw'r mater yn cael ei ystyried yn risg uchel trwy asesiad, bydd perchnogaeth hirdymor ar gyfer diogelu yn aros gyda'r uned reoli sylfaenol (URS) i sicrhau bod cynlluniau rheoli risg ar waith ac yn cael eu monitro fel y bo'n briodol.
• Dylid defnyddio timau Plismona Bro ac Atal Lleol sydd â gwybodaeth well am galedu targedau i gynnal asesiadau o gyfeiriad cartref y dioddefwr a lleoliadau allweddol eraill megis gweithle.
• Ym mhob achos dylid ystyried cyfeirio at asiantaethau cymorth. Yn achos digwyddiadau domestig risg uchel, ymdrinnir â rhannu gwybodaeth o fewn protocol rhannu gwybodaeth y Gynhadledd Amlasiantaeth Asesu Risg.
• Dylid ystyried defnyddio gorchmynion megis Gorchymyn Amddiffyn rhag Stelcio a Gorchymyn Diogelu rhag Trais Domestig o’r cychwyn cyntaf fel arf effeithiol i reoli’r risgiau a berir gan y cyflawnwr. Argymhellir ymgysylltu'n gynnar â'r Gwasanaethau Cyfreithiol a/neu'r Cydgysylltydd Sifil. Ni ddylai'r cyfyngiadau a roddir ar unrhyw orchymyn atal y dioddefwr rhag ymgysylltu mewn gweithgareddau arferol o ddydd i ddydd, a dylai ganolbwyntio ar liniaru'r risgiau sy'n amlwg yn ymddygiad y troseddwr.
• Dylid trin unrhyw achos o dorri gorchymyn fel parhad o ymddygiad Stelcio, ac o’r herwydd, mae’n ddwysâd o risg. Dylid adlewyrchu hyn bob amser fel cynnydd mewn unrhyw asesiad risg yr ymgymerir ag ef.
• Mae’r swyddog sydd â gofal dros yr achos yn gyfrifol am asesu a rheoli’r risg i’r dioddefydd yn ystod ymchwiliad.
• Mae’r swyddog sydd â gofal dros yr achos yn gyfrifol am gwblhau Asesiad o Anghenion Dioddefydd gyda’r dioddefydd, a dylai ei gyfeirio at wasanaethau cymorth priodol pan geir caniatâd. Bydd nifer y cyfeiriadau at wasanaethau cymorth yn cael eu monitro’n fisol fel bod modd cymryd camau gweithredu os yw niferoedd cyfeirio’n isel.
• Dylai swyddogion sydd â gofal dros yr achos sicrhau bod dioddefwyr yn derbyn y Pecyn Gwybodaeth ar gyfer Dioddefwyr, sydd wedi’i deilwra i ddioddefwyr stelcio sy’n cynnwys cam-drin domestig a stelcio nad yw’n cynnwys cam-drin domestig.

 

Bydd Heddlu Dyfed-Powys yn gweithio gyda Chomisiynydd yr Heddlu a Throseddu er mwyn sicrhau bod cymorth ar gyfer dioddefwyr Stelcio mewn grym. 

 

SASH Asesiad Sgrinio ar gyfer Stelcio ac Aflonyddu

Beth yw Asesiad Sgrinio ar gyfer Stelcio ac Aflonyddu a elwir weithiau’n SASH?

Mae SASH yn acronym ar gyfer Asesiad Sgrinio ar gyfer Stelcio ac Aflonyddu. Dim ond pan fydd tystiolaeth o batrwm stelcio neu aflonyddu cyfredol y dylid defnyddio'r Asesiad Sgrinio ar gyfer Stelcio ac Aflonyddu, hynny yw, patrwm o gyfathrebiadau neu gysylltiadau digroeso dro ar ôl tro sy'n achosi pryder, gofid neu ddychryn i'r targed. Mae’n bosibl bod y stelcio wedi parhau am fisoedd lawer neu hyd yn oed flynyddoedd, ond er mwyn i episod fod yn gyfredol rhaid iddo olygu bod y stelciwr yn ymyrryd yn ddiangen yn ystod y chwe mis cyn yr asesiad. Gellir defnyddio'r Asesiad Sgrinio ar gyfer Stelcio ac Aflonyddu ar gyfer cyflawnwyr gwrywaidd a benywaidd ni waeth a yw

Lefel y Pryder ac Ymateb: ISEL – Dylai’r achosion hyn gael yr ymateb safonal. CANOLIG/CYMEDROL – Dylai’r achosion hyn gael ymateb cynhwysfawr. UCHEL – Dylai’r achosion hyn gael ymateb ar unwaith a chynhwysfawr. Bydd achosion pryder uchel a chymedrol yn aml yn derby mathau tebyg o ymatebion, a’r gwahaniaeth mawr fydd y brys I’w gweithredu.

stelciwr a’r dioddefwr o wahanol rywedd neu o'r un rhywedd.

 

Cyfrifoldeb y Swyddog Cam-drin Domestig fydd mynd i'r afael â diogelu yn ymwneud â phob Asesiad Sgrinio ar gyfer Stelcio ac Aflonyddu a nodir fel pryder UCHEL/CYMEDROL, ni waeth a ydynt yn achosion cam-drin domestig ai peidio.Os yw lefel y pryder yn ‘ISEL’, yna bydd y cyfrifoldeb diogelu yn aros gyda swyddog yr achos. Ni fydd y Swyddog Cam-drin Domestig yn adolygu’r cynllun rheoli risg fel arfer, ond bydd ar gael i roi cyngor os gofynnir amdano.

Ym mhob sefyllfa, bydd y Swyddog Cam-drin Domestig yn diweddaru'r digwyddiad ar Niche gyda chanlyniad yr Asesiad Sgrinio ar gyfer Stelcio ac Aflonyddu fel bod swyddog / goruchwyliwr yr achos yn ymwybodol o'r canlyniad er mwyn sicrhau eglurder perchnogaeth risg / ymchwiliad.

Os bydd y swyddog Diogelu Pobl Fregus yn nodi o’i adolygiad nad oes angen Asesiad Sgrinio ar gyfer Stelcio ac Aflonyddu, bydd yn cadarnhau’r rhesymeg ar y digwyddiad Niche. Os bydd y dosbarthiad ystadegau’n newid o Stelcio, cychwynnir tasg i Gofrestrydd Troseddau a Digwyddiadau’r Heddlu ei adolygu.

 

Cofnodi Troseddau

Os oes mwy nag un drosedd yn cael ei hysbysu, dylid cofnodi’r drosedd fwyaf difrifol (yn unol â Rheolau Cofnodi Troseddau y Swyddfa Gartref / Rheol Prif Drosedd). Fodd bynnag, dylid ymchwilio i'r drosedd stelcio hefyd fel rhan o'r ymchwiliad.

Os yw ymchwiliad blaenorol yn ymwneud â’r un dioddefydd a drwgdybyn wedi’i gwblhau (Canlyniad 15/6) o fewn y 3 mis diwethaf, dylid ailagor yr ymchwiliad gwreiddiol gan fod yr ymddygiad stelcio’n barhad o’r Stelcio gwreiddiol.

 

Os oedd ymchwiliad blaenorol yn ymwneud â’r un dioddefydd a drwgdybyn wedi’i gwblhau (Canlyniad 15/6) dros 3 mis yn ôl, dylid cofnodi trosedd Stelcio newydd.

 

Ymchwiliad Stelcio - Dyrannu Troseddau

Ar gyfer POB trosedd stelcio a nodir fel PRYDER UCHEL yn dilyn Asesiad Sgrinio ar gyfer Stelcio ac Aflonyddu, bydd yr ymchwiliad yn cael ei gyfeirio at yr Adran Ymchwilio i Droseddau (CID) i ddyrannu ymchwilydd Rhaglen Broffesiynoli Ymchwilio (PIP) Lefel 2 i symud yr ymchwiliad yn ei flaen. Hyd nes y bydd yr Asesiad Sgrinio ar gyfer Stelcio ac Aflonyddu wedi'i gwblhau, bydd perchenogaeth gychwynnol yr ymchwiliad yn cael ei dyrannu ar sail canlyniad sgôr Hysbysiad Diogelu’r Cyhoedd yn ymwneud â cham-drin domestig / stelcio neu aflonyddu a bydd angen ei drafod yn y cyfarfodydd rheoli dyddiol ar draws yr URS.

Gydag achosion o gam-drin domestig sy'n cynnwys stelcio efallai na fydd cydberthynas bob amser rhwng yr asesiad risg Cam-drin Domestig, Stelcio ac Aflonyddu cychwynnol a sgôr yr Asesiad Sgrinio ar gyfer Stelcio ac Aflonyddu dilynol. Yn yr achosion hyn, os caiff yr Asesiad Sgrinio ar gyfer Stelcio ac Aflonyddu ei raddio fel risg UCHEL, yna bydd hyn yn gofyn am ymchwilydd Rhaglen Broffesiynoli Ymchwilio Lefel 2 (Adran Ymchwilio i Droseddau) i symud yr ymchwiliad yn ei flaen ni waeth Hysbysiad Diogelu’r Cyhoedd yn ymwneud â cham-drin domestig.

Rheolaeth y Tîm Plismona Bro

Yn achos aflonyddu yn y gymuned, gall fod yn briodol i'r Tîm Plismona Bro ac Atal Lleol fabwysiadu dull Plismona sy'n Canolbwyntio ar Broblem. Bydd hyn fel arfer yn digwydd pan fydd sawl digwyddiadau ac yn ymwneud ag anghydfod (hy, fel perchnogaeth tir).

Os bernir bod dull plismona sy’n canolbwyntio ar broblem yn briodol, caiff cynllun plismona sy’n canolbwyntio ar broblem ei greu i liniaru / rheoli'r risg.

Bydd rheolaeth y cynllun plismona sy'n canolbwyntio ar broblem yn parhau gyda'r Tîm Plismona Bro ac Atal lleol.

 

Cydlynydd Troseddwyr Stelcio:

 

Mae gan Heddlu Dyfed-Powys Gydlynydd Troseddwyr Stelcio pwrpasol sy’n gyfrifol am gydlynu ymateb yr heddlu i Stelcio. Mae eu gwaith o ddydd i ddydd yn cynnwys:

 

• sgrinio troseddau a digwyddiadau i nodi achosion stelcio sydd wedi’u cam-adnabod.
• cefnogi swyddogion ymchwilio yn rhagweithiol i wella ansawdd ymchwiliadau a diogelu.
• cefnogi swyddogion i wneud ceisiadau am Orchmynion Diogelu Rhag Stelcio.
• codi ymwybyddiaeth a chynyddu gwybodaeth am stelcio yn yr heddlu.
• darparu pwyntiau cyswllt ar gyfer gwasanaethau eiriolaeth, a gwella cysylltiadau rhwng heddluoedd a gwasanaethau cymorth arbenigol i ddioddefwyr.
• Rheoli’r Rhaglen Ymyrraeth Stelcio a’t broses banel Gwella Gwasanaeth ar y Cyd Amlasiantaeth
• Cydlynu cyfeiriadau i’r cyferiad ymyrraeth troseddwr

 

Rheoli Troseddwyr / Adsefydlu

Ym mhob achos dylid ystyried rheoli ymddygiad troseddol yn y tymor hir er mwyn lleihau'r risg o droseddu pellach.

• Cyfrifoldeb swyddog yr achos yw gofyn am y gorchmynion ar ôl euogfarn priodol ar adeg y ddedfryd.
• Rhaid hefyd ystyried gorchmynion sifil o'r cychwyn cyntaf ac yn ystod yr ymchwiliad.
• Bydd pob trosedd stelcio a gofnodir yn cael ei adolygu am addasrwydd ar gyfer Gorchymyn Diogelu Rhag Stelcio.
• Bydd y rheolwr troseddwyr penodol o fewn Rheoli Troseddwyr yn Integredig yn gyfrifol am unrhyw achos o dorri Gorchymyn Diogelu Rhag Stelcio.
• Bydd achosion o dorri gorchmynion eraill, megis gorchymyn atal, er enghraifft, yn cael eu hymchwilio yn seiliedig ar yr asesiad risg a gwblhawyd gan y swyddog sydd â gofal dros yr achos. Mae unrhyw achos o dorri gorchymyn yn cynrychioli dwysâd, ac felly bydd angen cynnydd o ran lefel risg.
• Ym mhob achos dylai swyddog yr achos ystyried manteision cefnogi'r cyflawnwr trwy'r Cynllun Rheoli Troseddwyr Integredig.
• Bydd pob troseddwr sy'n cael ei reoli trwy gynllun statudol neu wirfoddol yn cael ei sgrinio i nodi nodweddion ymddygiad stelcio a bydd hyn yn ffurfio rhan o'u hadsefydliad hyd yn oed os yw'r mynegai trosedd ar gyfer mater gwahanol.
• Dylid ystyried anfon troseddwyr i fynychu rhaglenni cyflawnwyr megis y Rhaglen Ymyrraeth Stelcio.
• Lle bo’n briodol, bydd troseddwyr stelcio’n cael eu rheoli o dan MAPPA.

 

Proses adnabod cyflawnwyr risg uchel

Bydd y Cydlynydd Stelcio yn adolygu canlyniadau Asesiad Sgrinio ar gyfer Stelcio ac Aflonyddu, ynghyd â chynnal adolygiadau achos i nodi cyflawnwyr “Risg Uchel”.

Bydd cyflawnwyr ‘Risg Uchel’ yn cael eu hadolygu gan y Cydlynydd Stelcio er mwyn ystyried eu cynnwys mewn Cyfarfodydd Tasgau Bygythiad a Niwed URS ar gyfer targedu ac amharu pwrpasol. Byddant hefyd yn cael eu hystyried ar gyfer trafodaeth mewn cyfarfod Rhaglen Ymyrraeth Stelcio misol.

Ymagwedd amlasiantaeth:

Panel Gwella Gwasanaeth ar y Cyd Amlasiantaeth

Mae gan Heddlu Dyfed-Powys grŵp gwella ar y cyd deufisol gyda GEG a gwasanaeth cymorth stelcio Paladin sy’n sicrhau ymagwedd ar y cyd tuag at wella canlyniadau ymchwiliad ar gyfer dioddefwyr Stelcio. 

Nod y cyfarfod yw:

• Canolbwyntio ar adeiladu perthnasau ar gyfer ymyriadau partneriaeth cydlynol
• Galluogi ein partneriaid statudol i adolygu troseddau sydd wedi’u hymchwilio gan Heddlu Dyfed-Powys, tynnu sylw at arfer gorau a’i rannu, a rhannu gwersi a ddysgwyd er mwyn gwella.
• Ymateb i faterion perfformiad, gan dynnu sylw at beryglon yn y dyfodol sy’n gysylltiedig â stelcio nad yw’n ymwneud â cham-drin domestig, a’u rheoli.
• Asesu p’un a yw ymchwiliadau ac erlyniadau heddlu wedi’u cynnal yn effeithiol.

Rhaglen Ymyrraeth Stelcio

Mae Heddlu Dyfed-Powys yn cynnal Rhaglen Ymyrraeth Stelcio fisol sy’n cynnwys partneriaid mewnol ac allanol. Diben y Rhaglen Ymyrraeth Stelcio yw:

• Hyrwyddo ymagwedd gyson tuag at ddigwyddiadau Stelcio.
• Pwyso ar arbenigedd a chudd-wybodaeth asiantaethau lluosog i hysbysu’r broses rheoli risg.
• Sicrhau y cynigir yr eiriolaeth a’r cymorth arbenigol cywir i’r dioddefydd.
• Mynd i’r afael ag obsesiwn troseddwyr drwy gyfeiriadau at raglenni ymyrraeth.
• Cynyddu nifer y gorchmynion diogelu rhag Stelcio mae Heddlu Dyfed-Powys yn gwneud cais amdanynt.

 

Cod Moeseg

Mae holl egwyddorion y Cod Moeseg yn berthnasol i’r polisi hwn –

• Dewrder
• Parch ac empathi
• Gwasanaeth cyhoeddus

 

Safonau'r Gymraeg

Gall dioddefwyr a throseddwyr ofyn am gael eu trin trwy gyfrwng y Gymraeg. Bydd hyn yn cael ei ddarparu pryd bynnag y bo modd. *os yw dod o hyd i siaradwr Cymraeg yn achosi oedi sy’n cynyddu’r risg / yn peryglu’r ymchwiliad, bydd swyddog / staff sy’n siarad Cymraeg yn cael ei ddarparu ar ôl i’r risgiau gael eu lliniaru.Bydd y gwasanaeth a ddarperir a phroffesiynoldeb swyddogion yn aros yr un fath beth bynnag fo'u hiaith.

 

5.  Camau gweithredu ac Adolygu

Llywodraethu

Y swyddog arweiniol yw'r Ditectif Uwcharolygydd ar gyfer Diogelu Pobl Fregus.

Mae Comander yr Uned Reoli Sylfaenol (URS) a’r Ditectif Brif Arolygydd yn gyfrifol am y canlynol:

• Gwybodaeth, gweithrediad a chydymffurfedd y polisi hwn ymhlith ei staff.
• Nodi swyddogion addas i ymgymryd â hyfforddiant a rolau y mae eu hangen ar gyfer yr ymchwiliad arbenigol.

Bydd y Pennaeth Cyswllt a Rheoli Digwyddiad yn gyfrifol am y canlynol:

• Gwybodaeth, gweithrediad a chydymffurfedd y polisi hwn ymhlith y staff o fewn Canolfan Gyfathrebu’r Heddlu.
• Sefydlu hyfforddiant addas sy’n ymgorffori anghenion y rhai sy’n ymwneud â’r cyswllt cychwynnol â’r dioddefwyr. Bydd y Prif Arolygydd sy'n arwain ar Stelcio ac Aflonyddu yn gyfrifol am y canlynol;
• Gwybodaeth, gweithrediad a chydymffurfedd y polisi hwn o fewn Heddlu Dyfed-Powys.
• Sicrhau hyfforddiant addas i sicrhau bod y rhai sy'n ymwneud ag ymchwilio i stelcio ac aflonyddu wedi'u hyfforddi a bydd adnoddau priodol ganddynt.
• Bod â throsolwg strategol ar ymateb Heddlu Dyfed-Powys i stelcio ac aflonyddu.

Bydd y polisi hwn yn cael ei adolygu’n flynyddol i sicrhau ei fod yn effeithiol ac yn addas i’r diben, i adlewyrchu unrhyw newidiadau i ddeddfwriaeth neu ganllawiau cenedlaethol ac unrhyw heriau a wneir i’r polisi.

Rheolir stelcio ac aflonyddu o dan y portffolio bregusrwydd sy'n cael ei oruchwylio gan y Bwrdd Bregusrwydd ac Atal Strategol, a gadeirir gan Brif Gwnstabl Cynorthwyol yr heddlu.

Mae’r Ditectif Uwch-arolygydd yn sicrhau bod prosesau ar waith i gyflawni’r canlynol:

• Monitro’r gwaith o ymchwilio i droseddau yn erbyn pobl fregus yn effeithiol a darparu sicrwydd ansawdd,
• Cynnal safonau ymchwilio trwy ddarparu cyfleoedd hyfforddi ac adborth o archwiliadau, canllawiau ac arferion gorau,
• Sicrhau bod proses ar waith ar gyfer pob achos o “Dim Trosedd”, i gael eu hadolygu gan Gofrestrydd Troseddau’r Heddlu,
• Darparu gwasanaeth ymgynghori a chynghori ar gyfer materion ymchwilio i droseddau.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mawrth 2026