Cynllun Ceir yr Heddlu: Dyraniad a Pholisi Defnydd Preifat

Nid yw JavaScript wedi'i alluogi

Heb JavaScript ni fydd ffurflenni'n gweithio.

1. Datganiad polisi

Nod y polisi hwn yw darparu cerbyd i ddeiliaid swyddi cymwys sy’n addas ar gyfer cynnal busnes yr heddlu a nodi sut y bydd y cynllun yn cael ei weithredu o fewn yr heddlu.

Yn berthnasol (ond heb fod yn gyfyngedig) i’r canlynol: Pob categori o swyddogion a staff Heddlu Dyfed-Powys, boed yn weithwyr amser llawn, rhan amser, parhaol, cyfnod penodol neu dros dro (gan gynnwys staff asiantaeth, partneriaid a chontractwyr), neu staff ar secondiad a gwirfoddolwyr. Rhaid i swyddogion heddlu, staff a gwirfoddolwyr sy’n cyrchu a defnyddio asedau ac eiddo’r heddlu roi sylw dyledus i gynnwys y polisi hwn.

2. Cwmpas y polisi

Mae’r polisi hwn yn disodli pob polisi blaenorol yn ymwneud â Chynllun Ceir yr Heddlu.

Gallai car o wneuthuriad a math y mae’r heddlu yn ei ystyried yn addas gael ei ddarparu i ddeiliad swydd cymwys.

Mae’r cynllun yn agored i’r swyddi canlynol:

Swyddogion o reng Uwcharolygydd barhaol
Swyddogion o reng Prif Uwcharolygydd barhaol
Swyddogion o reng Uwcharolygydd dros dro a gwblhawyd ers chwe mis neu fwy
Swyddogion o reng Prif Uwcharolygydd dros dro a gwblhawyd ers chwe mis neu fwy

3. Pwerau a pholisi / gofynion cyfreithiol

Polisi rheoli, cadw a gwaredu cofnodion CThEF

Llawlyfr Incwm Cyflogaeth CThEF

Deddf Treth Incwm (Enillion a Phensiynau) 2003

Deddf Cyllid 2017

4. Opsiynau a chynlluniau wrth gefn

Dyraniad o geir yr heddlu

Bydd cerbydau’n cael eu prynu drwy fframwaith caffael BlueLight Commercial gan ddefnyddio cyllideb cyfalaf y fflyd. Bydd y dewis o gerbyd yn cael ei benderfynu yn seiliedig ar werth am arian ac allyriadau CO2 er mwyn sicrhau y rhoddir ystyriaeth i nodau ariannol a chynaliadwyedd. Bydd Rheolwr y Fflyd yn dewis cerbyd yn unol â’r uchafswm a bennir gan y Cyfarwyddwr Cyllid a bydd cadeirydd Cymdeithas yr Uwch-arolygwyr yn cytuno arno. Yr uchafswm cyfredol yw £25,000 a bydd yn cael ei adolygu bob blwyddyn yn seiliedig ar brisiau cerbydau drwy’r fframwaith. Bydd y cerbyd yn addas ar gyfer cynnal busnes yr heddlu. Ni chaniateir dewis unrhyw ychwanegiadau. Yn achos cerbydau trydan, ni fydd gwefrwr cartref yn cael ei ddarparu gyda’r cerbyd ac fe’i ystyrir yn ddewis personol.

Ni fydd goleuadau glas yn cael eu gosod ar y cerbydau oni bai ei fod yn angenrheidrwydd gweithredol. Bydd y penderfyniad i wneud hynny yn cael ei awdurdodi gan y Pennaeth Fflyd ar ôl ymgynghori â’r cynrychiolydd gweithredol priodol. Bydd goleuadau glas disylw neu oleuadau blaen sy’n fflachio yn cael eu gosod ar geir sydd wedi’u haddasu i gael eu defnyddio gan yr heddlu yn ôl yr angen.

Disgwylir i swyddogion sy’n dechrau swyddi lle mae car heddlu eisoes ar gael (er enghraifft, oherwydd ymddeoliad deiliad blaenorol y swydd) ac sy’n dymuno manteisio ar y cynllun ddefnyddio’r car presennol hyd nes y bydd angen ei newid am gar newydd, yn unol â’r meini prawf a ddisgrifir o dan ‘Tynnu ceir heddlu yn eu hôl’. Efallai y bydd rhaid i rai sy’n ymuno â’r cynllun o’r newydd aros hyd at flwyddyn i gael cerbyd. Bydd hyn yn seiliedig ar y cyfnod o fewn y flwyddyn ariannol oherwydd dyraniad y gyllideb ac amseroedd dosbarthu’r cerbydau, a bennir gan y gweithgynhyrchwyr.

Tanwydd

Rhaid i ddeiliaid swyddi dalu am yr holl danwydd ar gyfer y cerbydau, a rhaid i’r deiliad swydd gadw’r holl slipiau tanwydd sy’n gysylltiedig â milltiroedd busnes am gyfnod o saith mlynedd oherwydd polisi rheoli a chadw a gwaredu cofnodion CThEF. Rhaid gwneud cofnod llawn a chywir o’r holl filltiroedd busnes a deithiwyd gan ddefnyddio llyfr log electronig a ddarperir gan y gyflogres. O ran cerbydau trydan, rhaid i’r deiliaid swyddi gofnodi p’un a gafodd y cerbyd ei wefru gan ddefnyddio gwefrwr cartref neu wefrwr cyhoeddus. Rhaid cyflwyno copi o filltiroedd y mis blaenorol i adran y gyflogres yn fisol cyn y seithfed o’r mis. Bydd deiliaid swyddi yn cael eu had-dalu am filltiroedd busnes yn eu cyflog ar gyfradd tanwydd gynghorol CThEF fesul milltir neu yn ôl cyfradd milltiroedd briodol. Dylid cyflwyno milltiroedd yn fisol i’r Gwasanaethau Fflyd er mwyn caniatáu diweddariadau cywir o ran milltiroedd er mwyn helpu gyda’r gwaith o gynnal a chadw ac olrhain yr angen i newid cerbydau. Gallai methu â chydymffurfio â’r gofynion hyn arwain at dynnu’r cerbyd yn ôl.

Tynnu ceir yr heddlu yn ôl

Bydd y car yn cael ei newid pan fydd y milltiroedd yn cyrraedd 100,000 milltir neu pan fydd saith mlynedd wedi mynd heibio, pa un bynnag a ddaw gyntaf.
Pan ddarperir car heddlu, mae’n amod y gall yr heddlu ei dynnu’n ôl yn ôl ei ddisgresiwn diymatal ei hun ar unrhyw adeg. Ni fydd yn ofynnol i’r heddlu gyfiawnhau pam ei fod yn tynnu’r car yn ôl ond bydd, o dan amgylchiadau arferol, yn darparu cyfnod rhybudd priodol (o leiaf dau fis).
Ar ôl i hysbysiad o’r fath ddod i ben, rhaid i’r deiliad swydd dan sylw ddychwelyd y car ar unwaith, ynghyd â’r holl allweddi, i’r heddlu yn ei leoliad gwaith arferol.
Bydd cymhwystra y deiliad swydd i fod yn rhan o’r cynllun yn dod i ben fis ar ôl y canlynol, ac eithrio mewn amgylchiadau esgusodol, a rhaid i unrhyw estyniadau gael eu cymeradwyo gan yr awdurdod priodol:
- Ataliad dros dro
- Seibiant gyrfa
- Unrhyw fath arall o absenoldeb hirdymor

O dan unrhyw un o’r amgylchiadau hyn, gall yr heddlu ddadactifadu gallu golau glas y cerbyd ar unwaith yn dibynnu ar yr amgylchiadau a natur yr achos, a bydd hyn yn cael ei gymeradwyo gan yr awdurdod priodol.
Gellir terfynu cymhwystra’r deiliad swydd i fod yn rhan o’r cynllun ar unwaith o dan rai amgylchiadau, gan gynnwys ond heb fod yn gyfyngedig i’r canlynol:
- Ymddeoliad
- Diswyddiad
- Dileu swydd
- Colli trwydded
- Cam-drin y cerbyd yn barhaol / esgeuluso’r cerbyd yn fwriadol
- Gwrthod gwneud taliadau sy’n ofynnol gan y cynllun
- Gwrthod cydymffurfio â gofynion y polisïau
- Cael ei drosglwyddo / ei symud i swydd nad yw’n gymwys

Mae’r deiliad swydd yn cydnabod y cytunir ar ddyddiad ar gyfer dychwelyd y cerbyd mewn amgylchiadau o’r fath. Os bydd anghydfod, bydd penderfyniad yr heddlu yn derfynol. Bydd y deiliad swydd yn ad-dalu’r holl gostau sy’n gysylltiedig ag adfer y cerbyd os na fydd y deiliad swydd yn dychwelyd y cerbyd erbyn y dyddiad penodedig. Yn gyffredinol, derbynnir y bydd y deiliad swydd yn cadw’r cerbyd hyd nes y bydd yn cael ei waredu, yn unol â’r meini prawf a gynhwysir o dan ‘Tynnu ceir yr heddlu yn ôl’, ac eithrio mewn achosion lle mae terfyniad cynnar. Bydd Rheolwr y Fflyd yn trefnu i waredu cerbydau drwy ocsiwn. Dylai deiliaid swyddi sydd â diddordeb mewn prynu’r cerbyd gofrestru eu diddordeb â Rheolwr y Fflyd, a fydd yn eu hysbysu o ddyddiad a lleoliad yr ocsiwn.

Os yw’r deiliad swydd yn dymuno tynnu’n ôl o’r cynllun, rhaid i’r deiliad swydd hysbysu adran y gyflogres a Rheolwr y Fflyd drwy roi o leiaf mis o rybudd, a bydd yn dychwelyd y cerbyd ar ddyddiad y cytunwyd arno.

Defnydd preifat o gar heddlu

Caniateir defnydd preifat o gar heddlu gan y deiliad swydd y mae’r cerbyd wedi’i ddyrannu iddo. Diffinnir defnydd o’r fath fel teithio o’r cartref i’r swyddfa ac unrhyw ddefnydd arall a wneir o’r cerbyd nad yw’n gysylltiedig â busnes yr heddlu. Yn ogystal â hyn, caiff priod neu bartner y deiliad swydd ganiatâd penodol i yrru’r cerbyd gan y Prif Gwnstabl drwy’r polisi ac, yn unol â hynny, caiff yr yswiriant ei gynnal.
Bydd yr holl gostau tanwydd ar gyfer milltiroedd preifat yn cael eu talu gan y deiliad swydd y neilltuir y cerbyd iddo.

Cymudo arferol a milltiroedd busnes

Dylid cadw at egwyddorion a gymerwyd o Lawlyfr Incwm Cyflogaeth CThEF wrth ystyried beth sy’n cyfrif fel cymudo arferol a beth ddylid ei drin fel milltiroedd busnes. Mae’r rhain yn cynnwys y canlynol:

Bydd unrhyw daith arferol i’r gweithle ac yn ôl yn cael ei thrin fel milltiroedd preifat, p’un a yw swyddogaeth ar alwad yn cael ei chyflawni ai peidio.
Pan fo’r daith rhwng y cartref a gweithle dros dro yr un fath yn fras â thaith gymudo arferol y gweithiwr, caiff hyn ei ddosbarthu fel milltiroedd preifat.
Pan fo’r daith rhwng y cartref a gweithle dros dro yn golygu pellter ychwanegol o ddeng milltir neu fwy bob ffordd, dylid dosbarthu hyn fel milltiroedd busnes yn ei gyfanrwydd, p’un a yw’r llwybr yn rhan o’r daith gymudo arferol ai peidio.

Defnyddio car yr heddlu yn ystod gwyliau

Caniateir i ddeiliaid swyddi y mae car heddlu wedi’i ddyrannu iddynt ddefnyddio’r car yn ystod gwyliau blynyddol a gwyliau cyhoeddus, yn amodol ar yr amodau canlynol:

Caniateir defnyddio car ar gyfer gwyliau blynyddol a gymerir y tu allan i’r Deyrnas Unedig, yn amodol ar gymeradwyaeth ymlaen llaw gan Reolwr y Fflyd neu gynrychiolydd dynodedig.
Y deiliad swydd fydd yn gyfrifol am unrhyw gostau neu daliadau cysylltiedig ac am gostau fferi ceir, trên moduron neu wasanaethau cyfatebol ac unrhyw ffioedd eraill sy’n gysylltiedig â mynd â’r car dramor.
Rhaid i’r deiliad swydd dalu cost y tanwydd a ddefnyddir yn ystod y cyfnodau gwyliau, fel y nodir yn y paragraff ‘Tanwydd’ uchod.

Cynnal a chadw

Cyfrifoldeb y deiliad swydd y mae’r car wedi’i ddyrannu iddo yw sicrhau ei fod mewn cyflwr glân ac mewn cyflwr gweithio da yn fecanyddol. Y deiliad swydd sy’n gyfrifol am gadw’r car yn lân yn fewnol ac yn allanol ac am wirio gwasgedd y teiars, olew ac ati yn rheolaidd. Bydd y deiliad swydd yn rhoi gwybod am unrhyw ddifrod neu ddiffyg ar unwaith gan ddefnyddio’r ffurflen ddiffygion ar-lein a ddarperir gan adran y fflyd.
At ddibenion y ddogfen hon, ystyrir bod y car ym mherchnogaeth yr heddlu. Mae cyfrifoldeb ychwanegol ar y defnyddiwr i fodloni unrhyw ofynion arbennig a osodir gan yr heddlu ar y defnydd o’r car.
Mae pob car o dan warant, y dylid ei defnyddio ym mhob amgylchiad.
Bydd yr holl waith o ran gwasanaeth / cynnal a chadw a phrofion MOT yn cael ei drefnu gan adran y fflyd. Bydd y deiliad swydd yn hysbysu adran y fflyd am unrhyw waith o ran gwasanaethau neu brofion MOT sydd ar ddod er mwyn eu galluogi i amserlennu’r gwaith.

Yswiriant

Mae ceir yr heddlu wedi’u hyswirio o dan drefniadau yswiriant cerbydau’r heddlu. Mae’r yswiriant yn ymestyn i briod neu bartner y deiliad swydd ac i weithwyr sy’n gyrru ceir yr heddlu, ar yr amod eu bod wedi cael awdurdodiad priodol.
Rhaid i bob gyrrwr fod â thrwydded yrru ddilys.
Pan fydd angen gwneud hawliad yswiriant, y deiliad swydd fydd yn gyfrifol am dalu’r tâl-dros-ben cychwynnol perthnasol os gwnaed y difrod tra oedd y cerbyd yn cael ei ddefnyddio’n breifat. Os caiff y tâl-dros-ben ei adennill gan drydydd parti yn dilyn hynny, bydd y deiliad swydd yn cael ad-daliad o’r swm perthnasol. Y tâl-dros-ben cyfredol yw £250; bydd y deiliaid swyddi yn cael gwybod am unrhyw newidiadau i’r tâl-dros-ben.
Bydd unrhyw ddifrod o ganlyniad i ddamwain yn cael ei adrodd ar unwaith i Reolwr y Fflyd gan ddefnyddio’r ffurflen berthnasol a ddarperir gan adran y fflyd a bydd y gwasanaethau cyfreithiol yn delio â phob hawliad gan drydydd parti.

Gwrthdrawiadau

Os yw’n rhan o wrthdrawiad, rhaid i yrrwr cerbyd fflyd yr heddlu wneud y canlynol:
- Gwneud nodyn o enw(au) a chyfeiriad(au) y gyrrwr arall / y gyrwyr eraill dan sylw.
- Nodi rhif(au) cofrestru’r cerbyd(au) a gwneuthuriad y cerbyd(au).
- Ceisio canfod enw/cyfeiriad eu hyswirwyr.
- Nodi enwau a chyfeiriadau tystion annibynnol a gwneud diagram bras o’r ddamwain.
- Os bydd unrhyw unigolyn neu anifail yn cael ei anafu, neu os bydd difrod i gerbyd arall neu eiddo, rhoi enw a chyfeiriad y gyrrwr, enw a chyfeiriad perchennog y cerbyd sy’n cael ei yrru, a rhif cofrestru’r cerbyd i unrhyw un sydd â sail resymol dros ofyn am yr wybodaeth.
- Peidio â thrafod pwy oedd ar fai am y gwrthdrawiad na chyfaddef atebolrwydd o unrhyw fath. Os na chaiff y cyfarwyddyd hwn ei ddilyn, gall greu anawsterau i’r heddlu wrth ymdrin â’r hawliad.
Os bydd y gwrthdrawiad yn digwydd tra bod y car yn cael ei yrru gan swyddog heddlu sy’n defnyddio goleuadau glas a chyrn, yna rhaid trin y ddamwain fel damwain cerbyd heddlu a’i hadrodd i swyddog heddlu yn yr ardal lle digwyddodd. O dan yr amgylchiadau hyn, dylai’r gwrthdrawiad fod yn destun adroddiad manwl i Reolwr y Fflyd cyn gynted â phosibl.

Cofnodion

Fel rhan o’r trefniadau hyn, mae’n ofynnol bod pawb y mae car heddlu wedi’i ddyrannu iddynt yn cadw cofnod o’u milltiroedd busnes. Bydd unrhyw filltiroedd nad ydynt wedi’u cofnodi fel milltiroedd busnes yn filltiroedd preifat. Rhaid cyflwyno llyfr log electronig misol ardystiedig a ddarperir gan y gyflogres mewn da bryd i gyrraedd yr adran erbyn y seithfed o’r mis er mwyn galluogi’r gyflogres i gyfrifo’r cyfraniad priodol sy’n ddyledus i’r deiliad swydd o ran milltiroedd busnes ar gyfer y mis blaenorol.

Yn ogystal â hyn, mae’n bwysig y gall yr heddlu nodi pwy oedd yn gyrru’r car ar unrhyw adeg benodol. Cymerir yn ganiataol mai y deiliad swydd cymwys yw’r gyrrwr, oni bai fod y llyfr log yn nodi fel arall. Felly, mae’n bwysig, os yw’r car yn cael ei yrru gan unrhyw un heblaw y deiliad swydd y mae’r cerbyd wedi’i ddyrannu iddo, bod y llyfr log yn cael ei gwblhau yn unol â hynny, e.e. swyddog arall o’r heddlu.

Torri i lawr

Mae pob car wedi’i yswirio gyda’r AA os yw’n torri i lawr a gellir cael mynediad at y gwasanaeth drwy ffonio 0800 424 151. Dylid rhoi gwybod i Reolwr y Fflyd am unrhyw ddefnydd o’r gwasanaeth hwn. Dylai deiliaid swyddi ddefnyddio gwasanaethau y tu allan i oriau gwaith y mae adran y fflyd yn eu darparu, megis yn achos tyllau teiars ac atgyweiriadau, trwy gwmnïau allanol lle bo’n briodol. I gael manylion cyswllt gwasanaethau y tu allan i oriau gwaith, cysylltwch ag adran y fflyd.

Defnydd arall o’r cerbyd

Disgwylir i ddeiliaid swyddi sydd â cheir yr heddlu ganiatáu i aelodau eraill o’r heddlu ddefnyddio’r cerbyd o bryd i’w gilydd ar gyfer cynnal dyletswyddau gweithredol sy’n gysylltiedig â’r heddlu (nid teithio busnes arferol). Rhoddir hysbysiad ymlaen llaw i’r deiliad swydd os oes angen y cerbyd a bydd y galw yn cael ei gydlynu / ei reoli gan Reolwr y Fflyd, a fydd hefyd yn gyfrifol am drefnu i logi cerbyd addas i’w ddefnyddio gan y deiliad swydd.

Trethiant

Mae pob cerbyd a ddosberthir fel ‘asedau’ yn fuddion trethadwy. O fis Ebrill 2025 ymlaen, bydd pob budd trethadwy yn cael ei drethu wrth y ffynhonnell yn uniongyrchol drwy gyflog yr unigolyn mewn amser real, yn hytrach nag ar ddiwedd pob blwyddyn dreth ar ffurf ffurflen P11d fel yn y blynyddoedd a fu.

Bydd buddion y gyflogres yn ymddangos fel eitem ar wahân ar slipiau cyflog fel ychwanegiad trethadwy at enillion. Bydd hyn yn caniatáu i dreth gael ei chyfrifo a’i thynnu wrth y ffynhonnell yn achos pob budd sydd ar waith.

Cyfrifoldeb yr unigolyn yw gwirio ei sefyllfa benodol o ran treth gyda Chyllid a Thollau EF. Nid yw’r heddlu yn derbyn unrhyw gyfrifoldeb am unrhyw rwymedigaethau treth incwm personol ar gyfer defnyddwyr y cynllun nac am unrhyw newidiadau mewn deddfwriaeth dreth a allai effeithio ar sefyllfa treth incwm unigolyn.

Mae’r pwyntiau canlynol yn rhoi syniad o ddealltwriaeth gyfredol yr heddlu o’r sefyllfa dreth:

Pan fydd car les a ddyrannwyd i ddeiliad swydd cymwys yn cael ei addasu i gael ei ddefnyddio gan yr heddlu, mae’n dod yn ased at ddibenion treth ac mae’n drethadwy o dan adran 205 o Ddeddf Treth Incwm (Enillion a Phensiynau) 2003, ynghyd â gwelliannau pellach i Ddeddf Cyllid 2017.
At ddibenion cyfrifo gwerth budd mewn nwyddau ased, ei werth blynyddol yw 20% o’i werth ar y farchnad ar yr adeg pan fydd yr ased ar gael am y tro cyntaf (nid o reidrwydd pan fydd y gweithiwr yn ei ddefnyddio am y tro cyntaf). Neu, os yw’n fwy, swm blynyddol unrhyw rent neu dâl llogi y mae’r heddlu yn ei dalu am yr ased, ynghyd â chostau rhedeg ychwanegol (e.e. premiwm yswiriant, cynnal a chadw, atgyweiriadau, treth cerbyd).
Pan nad yw car les a ddyrannwyd i ddeiliad swydd cymwys wedi’i addasu i gael ei ddefnyddio gan yr heddlu (e.e. nid oes ganddo oleuadau glas parhaol wedi’u gosod), mae’n dod yn gar cwmni at ddibenion treth ac mae’n drethadwy o dan adrannau 114 a 120-171 o Ddeddf Treth Incwm (Enillion a Phensiynau) 2003 ynghyd â gwelliannau pellach i Ddeddf Cyllid 2017.
Pennir y dreth ar geir cwmni gan ddefnyddio pris safonol y car, allyriadau CO2 y cerbyd a’r math o danwydd.

Diwrnodau nad yw ar gael

Rhoddir rhyddhad treth ar ddiwrnodau cyfan pan nad yw’r car ar gael i’r prif ddefnyddiwr. Yn ystod cyfnodau o’r fath, rhaid ildio allweddi’r cerbyd hefyd.

Ffioedd

Efallai y bydd y cerbyd a ddarperir i’r deiliad swydd yn cael ei addasu i gael ei ddefnyddio gan yr heddlu a gallai gael ei alw’n ôl i gefnogi gofynion plismona rheng flaen. Felly, at ddibenion trethiant, fe’i hystyrir yn ased yn hytrach na "char cwmni". Fodd bynnag, gan fod y cerbyd ar gael at ddefnydd preifat y deiliad swydd, bydd yn arwain at rwymedigaeth dreth bersonol.
Bydd milltiroedd busnes yn cael eu had-dalu ar gyfradd tanwydd gynghorol CThEF fesul milltir neu yn ôl cyfradd milltiroedd briodol.
Bydd Rheolwr y Fflyd yn hysbysu adran y gyflogres ar ôl i’r deiliad swydd nôl y cerbyd ac yn cadarnhau unrhyw daliadau ychwanegol y mae y deiliad swydd yn gyfrifol amdanynt mewn cysylltiad ag eitemau a bennwyd yn bersonol er mwyn llunio anfoneb.

Pwyntiau cyffredinol

Mae’r deiliad swydd yn atebol am dalu unrhyw ddirwyon, ffioedd neu gosbau yn ymwneud â’r cerbyd yn ystod y cyfnod defnydd, ac eithrio pan godir taliadau o’r fath pan fydd y cerbyd wedi’i alw’n ôl i gael ei ddefnyddio gan yr heddlu.

Nid oes dim wedi’i nodi yn y cytundeb uchod sy’n atal swyddog rhag dewis parhau fel defnyddiwr hanfodol/achlysurol. Fodd bynnag, mewn amgylchiadau o’r fath, ni fydd y swyddog yn gymwys i fod yn rhan o’r cynllun hwn.

Bydd swyddogion sydd â char heddlu sy’n symud o swydd gymwys i swydd gymwys arall yn mynd â’r cerbyd gyda nhw.
Bydd gofyn i swyddogion sydd â char heddlu sy’n symud i swydd anghymwys ildio’r car ar ddyddiad cychwyn y swydd newydd.
Disgwylir i swyddogion sy’n cael cerbyd ddefnyddio’r car ar gyfer pob taith fusnes, ac fel rheol ni fyddant yn gymwys i hawlio tâl i deithio ar y trên. Mae’r cynllun wedi’i ariannu’n rhannol o arbedion a ragwelwyd yn sgil llogi cerbydau ac o deithio ar drenau ac, felly, pan ystyrir fod teithio ar drenau yn fwy priodol, mae angen cymeradwyaeth.

Mae egwyddorion y cod moeseg yn berthnasol i’r polisi hwn –

Dewrder
Parch ac empathi
Gwasanaeth cyhoeddus

5. Gweithredu ac adolygu

Er mwyn sicrhau effeithiolrwydd y polisi hwn, bydd yn cael ei adolygu’n rheolaidd, gan ystyried heriau i’r polisi ac unrhyw newidiadau i ddeddfwriaeth a chanllawiau cenedlaethol. Bydd y polisi’n cael ei adolygu gan rôl enwebedig a bydd yn cael ei oruchwylio gan y Bwrdd Fflyd Strategol.

Bydd polisïau’n cael eu hadolygu i ddechrau ar ôl i 12 mis fynd heibio ac yna byddant yn destun adolygiad bob dwy flynedd (ond gall perchennog y polisi gynnal adolygiad yn gynt os, er enghraifft, ceir newidiadau mawr i ddeddfwriaeth sy’n gysylltiedig â’r polisi, newidiadau mawr i’r broses ac ati).

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mawrth 2026

Cwcis