Polisi Diogelwch Adeiladau'r Heddlu

1. Datganiad Polisi

Diben y polisi hwn a’r ddogfen weithdrefnau gysylltiedig yw rhoi cyfeiriad ar ddiogelwch Adeiladau Heddlu Dyfed-Powys a Phencadlys yr Heddlu er diogelwch personél.

Yn sgil sefyllfaoedd domestig, cenedlaethol a rhyngwladol achlysurol, mae lefelau risg neu fygythiadau penodol i adeiladau’r heddlu’n codi. Gan hynny, mae’n hollbwysig fod y polisi hwn a’r ddogfen weithdrefnau gysylltiedig yn cyflwyno mesurau diogelwch, sy’n ofynnol ar gyfer cynyddu ymwybyddiaeth a gwyliadwriaeth a gwarchod personél, eiddo’r heddlu ac adeiladau’r heddlu.  

Yn berthnasol (ond heb fod yn gyfyngedig) i'r canlynol: Holl gategorïau swyddogion a staff Heddlu Dyfed-Powys, boed yn llawn amser, rhan amser, parhaol, cyfnod penodol, dros dro (gan gynnwys staff asiantaeth, cymdeithion a chontractwyr), staff ar secondiad neu wirfoddolwyr. Rhaid i swyddogion heddlu, staff a gwirfoddolwyr sy'n cyrchu ac yn defnyddio asedau ac eiddo'r Heddlu roi sylw dyledus i gynnwys y polisi hwn.

2. Cwmpas y Polisi

Mae’r polisi hwn yn berthnasol ar gyfer holl swyddogion, staff, contractwyr a gwirfoddolwyr Heddlu Dyfed-Powys. 

Bydd y Lefelau Ymateb/Rhybudd Diogelwch yn adeiladau’r heddlu’n adlewyrchu’r bygythiad presennol i adeiladau a phersonél yr heddlu o ganlyniad i unrhyw sefyllfa a grëir yn genedlaethol, yn ddomestig neu’n rhyngwladol, ac fe’u bwriedir i sicrhau gwyliadwriaeth, amddiffyniad a chanllawiau i ddiogelu personél, eiddo ac adeiladau. Bydd y rhain yn cysylltu â’r Lefel Bygythiad Terfysgaeth sy’n berthnasol ar y pryd.

Rhaid rhoi gwybod i’r Prif Gwnstabl Cynorthwyol, yr Uwch-arolygydd Gweithrediadau Arbenigol a’r Prif Uwch-arolygydd Plismona Lifrog am bob mater a allai effeithio ar y LEFEL YMATEB. Bydd y swyddogion rhagddywedig yna’n ystyried y cyfarwyddiadau diogelwch i’w gweithredu ar ôl codi’r lefel Ymateb ar gyfer Adeiladau’r Heddlu drwy Grŵp Diogelwch yr Heddlu. Rhoddir gwybod i Gomanderiaid Ardaloedd Plismona Lleol a Phenaethiaid Adran yn ôl yr angen. Rhaid gweithredu mesurau a amlinellir yn y polisi hwn ac unrhyw atodiadau perthnasol yn syth pan roddir gwybod am newid.  

3. Pwerau a Gofynion Cyfreithiol/Polisi  

Cynllun Digwyddiadau Mawr yr Heddlu.

Cyfarwyddebau Cenedlaethol.

Negeseuon Grŵp Ymgynghorol.

Cynllun Wrth Gefn “Ymateb Cychwynnol i Ddigwyddiadau/Bygythiadau Bom a Gweithredoedd Terfysgol”

4.  Dewisiadau a Chynlluniau Wrth Gefn  

Rolau a Chyfrifoldebau

Tra bod gan yr holl bersonél ddyletswydd mewn perthynas â diogelwch, mae’r prif feysydd cyfrifoldeb o fewn y Pencadlys yn gorwedd gyda:

• Gweithrediadau Arbenigol Pencadlys yr Heddlu - drwy Benaethiaid Adran, bydd yn monitro a gorfodi gweithdrefnau fel y’u nodir yn y polisi hwn a’r ddogfen weithdrefnau gysylltiedig ac yn arwain ar faterion diogelwch drwy’r Grŵp Diogelwch Rhanbarthol a Grŵp Diogelwch yr Heddlu.
• Penaethiaid Adran - yn ogystal â bod yn gyfarwydd â chynnwys y polisi hwn a’r ddogfen weithdrefnau gysylltiedig, rhaid iddynt sicrhau bod swyddogion, staff a gwirfoddolwyr o dan eu rheolaeth yn cael gwybod y dylent adrodd am unrhyw beth a allai godi eu hamheuon neu weithredu ar hyn. Rhaid i swyddogion, staff a gwirfoddolwyr arddangos a gwisgo prawf adnabod priodol sydd i’w weld yn glir bob amser a sicrhau bod ymwelwyr maen nhw’n gyfrifol amdanynt yn gwneud yr un peth. Bydd staff wrth y brif dderbynfa’n cyhoeddi prawf adnabod ar gyfer ymwelwyr ym mhrif adeilad Pencadlys yr Heddlu.
• Dylai Comanderiaid Ardal Blismona Leol ystyried yr angen ar gyfer trefniadau lleol o ran pennu cyfrifoldeb a sicrhau bod dalwyr swydd yn ymwybodol o’u cyfrifoldebau.

5.  Gweithredu ac adolygu

Bydd y polisi hwn a’r dogfennau gweithdrefnau cysylltiedig yn destun adolygiad blynyddol yn y lle cyntaf, gydag adolygiadau dilynol yn cael eu cynnal pan fod angen, ac o leiaf bob yn ail flwyddyn.

Bydd y polisi hwn a’r ddogfen weithdrefnau gysylltiedig yn cael ei fonitro er mwyn sicrhau ei effeithiolrwydd, ei fod yn addas ar gyfer y diben, unrhyw heriau i’r polisi a newidiadau i strategaethau neu ganllawiau cenedlaethol.  

Cymeradwyir pob diwygiad i’r polisi hwn a’r ddogfen weithdrefnau gysylltiedig drwy’r strwythur llywodraethu Gweithrediadau Arbenigol a’r Bwrdd Plismona Gweithredol.  

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mawrth 2024