Polisi TCC Mewn Mannau Cyhoeddus

1. Datganiad Polisi

Mae Teledu Cylch Cyfyng (TCC) yn dechnoleg sy’n cynnig ffordd effeithiol o adnabod pobl, cerbydau neu ddigwyddiadau a allai olygu bod angen i’r Heddlu neu sefydliadau partner gymryd camau gweithredu.

Mae Heddlu Dyfed-Powys wedi rhoi system TCC Man Cyhoeddus ar waith mewn 25 tref ar draws yr ardal heddlu, sy’n cynnwys dros 155 camera. 

Mae’n arf plismona rhagweithiol ar gyfer ymchwiliadau a phlismona ymatebol, sy’n medru atal troseddolrwydd trwy dargedu troseddwyr ac ardaloedd sy’n dioddef lefelau trosedd uwch. 

Defnyddir technoleg TCC o fewn Heddlu Dyfed-Powys er mwyn helpu i ddatrys ac atal gweithgarwch troseddol ar lefel leol, ranbarthol a chenedlaethol, ac aflonyddu arno. Mae hyn yn cynnwys mynd i’r afael â throseddwyr teithiol, terfysgwyr a Grwpiau Troseddu Trefnedig. 

Bydd Heddlu Dyfed-Powys yn defnyddio’r system TCC er mwyn cynorthwyo staff a swyddogion gweithredol i gasglu tystiolaeth wrth ymchwilio i droseddau a thawelu meddyliau aelodau’r cyhoedd. Bydd y camerâu TCC yn cael eu monitro gan aelodau staff penodol, a bydd pob swyddog ac aelod staff gweithredol yn medru cael mynediad i’r delweddau TCC yn ôl yr angen ac yn unol â’u rolau a’u cyfrifoldebau.

Diben y polisi hwn yw adnabod y gweithdrefnau a'r protocolau sydd angen er mwyn i staff/swyddogion heddlu weithredu, lleoli a defnyddio camerâu TCC, gan ystyried deddfwriaeth a chanllawiau cenedlaethol. Bydd y polisi hwn yn amlinellu ac yn cyflawni’r canlynol:

• Rhoi gwybodaeth glir a diamwys ar y defnydd o offer recordio a gwylio TCC.
• Darparu fframwaith o gyfarwyddiadau ar gyfer defnyddio, cadw a dadansoddi recordiad TCC.
• Bodloni gofynion Deddf Diogelu Data 2018.
• Bodloni gofynion Rheoliad Cyffredinol ar Ddiogelu Data’r DU.
• Bodloni gofynion Deddf Iechyd a Diogelwch yn y Gwaith 1974.
• Hyrwyddo amgylchedd gweithio gwell ar gyfer staff ac unrhyw unigolyn arall a allai ddod i gysylltiad â’r system recordio TCC.
• Bodloni gofynion Codau Ymarfer y Comisiynydd Camerâu Gwyliadwriaeth ac egwyddorion arweiniol.
• Defnyddio’r system TCC yn effeithiol er mwyn cael y gwerth gorau o’r ased hwn.
• Dwyn mwy o droseddwyr i gyfiawnder drwy gynhyrchu tystiolaeth TCC o safon.

 

Mae'r polisi a chanllawiau cysylltiedig yn sefydlu'r sail gyfreithiol a'r canllawiau ar gyfer defnyddio TCC Mannau Cyhoeddus Heddlu Dyfed-Powys.

Mae’n berthnasol i’r canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, boed yn staff llawn amser, rhan amser, parhaol, tymor penodol, dros dro (gan gynnwys staff asiantaeth, contractwyr a chymdeithion) staff ar secondiad neu wirfoddolwyr. Dylai unrhyw swyddog, aelod staff neu wirfoddolwr sy’n cael mynediad at asedau ac eiddo’r Heddlu ac sy’n eu defnyddio roi ystyriaeth ddyledus i gynnwys y polisi hwn.

 

2. Cwmpas y Polisi

Bwriadwyd y polisi hwn a chanllawiau cysylltiedig, sef y Weithdrefn Gweithredu TCC, i alluogi swyddogion i gydymffurfio â deddfwriaethau a chanllawiau ar gyfer cipio tystiolaeth i'w defnyddio mewn gweithdrefnau llys ac ymchwilio i droseddau a’u datrys.

Egwyddorion trosfwaol ar gyfer y defnydd gweithredol o Deledu Cylch Cyfyng:

Mae gan Deledu Cylch Cyfyng Mannau Cyhoeddus rôl hanfodol i’w chwarae mewn cadw pobl yn ddiogel, ac ar yr un pryd, mae angen i bobl fod yn hyderus bod dal ganddynt hawl i’w preifatrwydd.

Bydd camerâu TCC:

• yn cydymffurfio â safonau diwydiant
• yn cael eu gosod mewn lleoliadau lle mae eu hangen fwyaf a lle byddant o’r budd mwyaf i ddiddordeb cyhoeddus
• yn cael eu gweithredu’n gyfreithlon a thryloyw gan unigolion cymwys, gyda phreifatrwydd y dinesydd unigol wrth galon penderfyniadau gweithdrefnol a system
• yn cael eu defnyddio’n agored, ac ni fyddant yn cael eu defnyddio’n gudd heblaw mewn amgylchiadau eithriadol a lle mae’r awdurdodau gofynnol wedi’u caniatáu
• yn darparu gwybodaeth amser real am ddigwyddiadau sy’n mynd rhagddynt
• yn cynorthwyo i leihau trosedd ac anhrefn
• yn cynorthwyo ag ymholiadau am unigolion coll
• yn cynorthwyo â chynnal ymchwiliadau
• yn darparu cudd-wybodaeth
• yn lleihau ofn trosedd ac yn helpu cymunedau i deimlo’n fwy diogel
• yn cynyddu canfyddiad y cyhoedd o ddiogelwch
• yn cynyddu pledion euog troseddwyr ac yn dwyn troseddwyr i gyfiawnder
• yn sicrhau bod defnyddwyr yn medru cyfiawnhau eu defnydd o'r system a bod ganddynt sail gyfreithiol a gwrthrychol dros ffilmio. Rhaid i hyn fod yn gymesur â'r gweithgarwch/digwyddiad dan sylw.

 

3. Gofynion Cyfreithiol/Polisi a Phwerau

Bydd y system TCC hon yn eiddo i Heddlu Dyfed-Powys, ac yn cael ei hariannu ganddo. 

Bydd y system yn eiddo i Adran Weithrediadau’r Heddlu, a’r Uwch-arolygydd sy’n gyfrifol am Weithrediadau Arbenigol fydd yr Uwch Berchennog Cyfrifol dynodedig.

Pwynt Cyswllt Sengl, sef y Cydlynydd TCC, yw’r dynodiad ffurfiol ar lefel fwy tactegol, ac ef fydd y ffynhonnell cyngor arbenigol cydnabyddedig a chydlynydd yr holl allu a gweithgarwch camerâu gwyliadwriaeth amlwg o fewn y sefydliad. Yn ogystal, y Cydlynydd TCC fydd rheolwr llinell cyntaf y Gweithredwyr TCC.

Bydd y Prif Gwnstabl yn gweithredu fel y Rheolydd Data ar gyfer delweddau TCC sy’n cael eu recordio a’u cadw ar systemau’r heddlu.

Mae'r system wedi'i gosod, ei gweithredu a'i rheoli yn unol â’r Cod Ymarfer Camerâu Gwyliadwriaeth, a bydd yr Uwch Berchennog Cyfrifol yn gyfrifol am arddangos unplygrwydd prosesau ac am ystyried Cod Ymarfer y Comisiynydd Camerâu Gwyliadwriaeth. Mae hyn yn galluogi’r Heddlu i ddangos i gymunedau ein bod ni’n gweithredu arferion gorau sy’n dryloyw a chymesur.

Cedwir delweddau TCC am 31 diwrnod. Ar ôl hynny, maent yn cael eu dileu'n awtomatig o ddydd i ddydd, heblaw eu bod yn cael eu lawrlwytho ar gyfer dibenion tystiolaethol, lle bydd delweddau'n cael eu cadw yn unol â rheoliadau Rheoli Gwybodaeth yr Heddlu.

Cynhyrchwyd Gweithdrefn Weithredu sy'n amlinellu ac yn diffinio’r defnydd gweithredol o’r system TCC er mwyn sicrhau cydymffurfiaeth â’r ddeddfwriaeth briodol, y Cod Ymarfer a pholisïau’r heddlu. .

Mae gan y system gefnogaeth Llywodraeth Cymru, Asiantaethau Cefnffyrdd, Cynghorau Tref a'r Cynghorau Sir unigol. Mae Memoranda Cyd-ddealltwriaeth wedi’u cytuno gyda’r partïon perthnasol sy’n amlinellu rolau a chyfrifoldebau penodol. 

 

4. Dewisiadau a Chynlluniau Wrth Gefn

Mae Dadansoddiad o Batrymau Troseddu, gan gynnwys data trosedd, digwyddiadau troseddau casineb ac ymddygiad gwrthgymdeithasol, a galwadau am wasanaeth, ynghyd â gwybodaeth blismona leol, yn hysbysu penderfyniadau sy'n ymwneud â lleoliadau camera. 

Bydd y Cydlynydd TCC yn cynnal adolygiadau blynyddol o leoliadau camera. Bydd cyfrifoldeb cyffredinol yn gorwedd gyda'r Uwch-arolygydd sy'n gyfrifol am Weithrediadau Arbenigol, fel yr Uwch Berchennog Cyfrifol.

Bydd Asesiadau Effaith ar Breifatrwydd yn cael eu cyflawni ar gyfer pob lleoliad camera, ac fe’u cyhoeddir ar wefan Heddlu Dyfed-Powys.

Yn unol â Chod Ymarfer y Comisiynydd Camerâu Gwyliadwriaeth, bydd pob safle camera’n cael ei adolygu’n flynyddol a bydd Asesiadau Effaith ar Breifatrwydd wedi’u diweddaru’n cael eu cyhoeddi pan fod angen. Pan benderfynir dileu a/neu adleoli safle camera, bydd Asesiad Effaith ar Breifatrwydd newydd yn cael ei gyhoeddi/diweddaru yn ôl yr angen.

Fel gofyniad sylfaenol, bydd adolygiadau blynyddol o safleoedd camera’n cynnwys adolygiad o’r mygydau preifatrwydd a weithredir i bob camera er mwyn sicrhau bod ffenestri a/neu ddrysau unrhyw anheddau preifat yn cael eu mygydu’n briodol er mwyn lleihau ymyrraeth.

Bydd y Cydlynydd TCC yn gyfrifol am gynorthwyo defnyddwyr gweithredol o ran defnyddio'r system TCC.

Bydd y Cydlynydd TCC yn gyfrifol am ymgymryd ag adolygiadau ad hoc misol a rhoi gwybodaeth i reolwyr yn ôl yr angen ac fel yr amlinellir yn y Fframwaith Perfformiad.

Bydd y system TCC yn cael ei monitro gan dîm penodol o Weithredwyr TCC yng Nghanolfan Gyfathrebu’r Heddlu ym Mhencadlys yr Heddlu, lle mae mynediad wedi’i gyfyngu. Dim ond personél awdurdodedig caiff fynediad i’r lle hwn. Bydd yr holl ddelweddau TCC yn cael eu recordio 24 awr y dydd, 365 diwrnod y flwyddyn, a byddant yn wyliadwy yn lleol hefyd. 

Yn y lle cyntaf, bydd y Cydlynydd TCC yn ymchwilio i unrhyw achos o dorri’r Polisi TCC, neu gamddefnydd o’r system TCC, gan swyddogion, staff a gwirfoddolwyr Heddlu Dyfed-Powys neu unrhyw ddefnyddiwr awdurdodedig arall, er mwyn asesu a chanfod pa un ai a yw amodau’r polisi wedi’u torri. Bydd unrhyw achos difrifol o dorri amodau’r Polisi TCC neu gamddefnydd o’r system yn cael ei ymchwilio’n syth, a bydd yr Adran Safonau Proffesiynol yn cynnal ymchwiliad annibynnol er mwyn gwneud argymhellion ynghylch sut y dylid datrys y mater. 

Mae Gweithredwyr TCC, o dan oruchwyliaeth y Cydlynydd TCC, yn gyfrifol am ddwyn pob nam â'r camerâu neu offer cysylltiedig i sylw'r Contractwr.  

Bydd gan bob swyddog heddlu gweithredol a phob gwirfoddolwr ac aelod staff heddlu ymchwiliol fynediad i'r system HikCentral, sy'n cael ei rheoli drwy'r broses Mynediad at Systemau electronig.

Mae cwmni Baydale Control Systems Cyf yn gyfrifol am gynnal a chadw camerâu yn flynyddol ac am gynhyrchu'r ddogfennaeth ofynnol.

Rhaid i ddefnyddwyr fod mewn sefyllfa i gyfiawnhau eu defnydd o’r system, sydd angen ymwneud â diben plismona, yn unol â Deddf Diogelu Data 2018 a Deddf Camddefnyddio Cyfrifiaduron 1990.

Mae defnyddwyr yn gyfrifol am rannu darnau ffilm â GEG yn ôl yr angen.

 

5. Gweithredu ac Adolygu

Gweithredir y polisi ochr yn ochr â'r Weithdrefn Weithredu sy'n amlinellu defnydd a diben bwriadedig y system TCC Mannau Cyhoeddus a meddalwedd gysylltiedig.

Bydd cydymffurfiaeth â'r polisi a gweithdrefnau Gweithredu cysylltiedig yn cael eu monitro drwy:

• Gweinyddwyr System yn adolygu pob cais am fynediad i'r system
• Gweinyddwyr System yn rheoli mynediad i'r system
• Gwiriadau archwilio ad hoc
• Paratoi adroddiadau misol / chwarterol / blynyddol ar ystadegau a defnydd

Atgyfnerthir gweithredu'r polisi a Chod Ymarfer y Comisiynydd Camerâu Gwyliadwriaeth drwy gyhoeddi’r Asesiadau Effaith ar Breifatrwydd ar wefan yr Heddlu. Bydd y Cydlynydd TCC yn adolygu’r polisi hwn bob yn eilflwydd.

Mae tudalen TCC hefyd yn bodoli ar fewnrwyd yr heddlu, sy'n rhoi gwybodaeth i swyddogion, staff a gwirfoddolwyr am ymarferoldeb y system a'r defnydd ohoni, yn ogystal â lleoliadau'r holl gamerâu.

Bydd yr Uwch-arolygydd Gweithrediadau Arbenigol yn cymeradwyo pob adroddiad ar Deledu Cylch Cyfyng Mannau Cyhoeddus.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Tachwedd 2023