Polisi Parhad Busnes

1. Datganiad Polisi

Nodir yr heddlu o dan Ddeddf Argyfyngau Sifil 2004 fel ymatebwyr ‘categori 1’ neu ymatebwyr ‘categori 2’. Ymatebwyr categori 1 yw’r sefydliadau hynny sydd yn greiddiol i ymateb brys ac maent yn ddarostyngedig i’r set lawn o ddyletswyddau diogelwch sifil.

Fel gwasanaeth brys, mae “Prif Swyddog yr Heddlu” wedi’i benodi’n “Ymatebwr categori 1” o dan Ddeddf Argyfyngau Sifil 2004, gyda dyletswyddau penodol i asesu risg argyfyngau sy’n digwydd a chynllunio i barhau i gyflawni ei swyddogaethau os oes argyfwng yn digwydd.

Yn unol â’r dyletswyddau statudol, bydd yr Heddlu’n ceisio nodi aflonyddu posibl i’w ddarpariaeth o wasanaethau, ac yn cynllunio a gweithredu cynlluniau i liniaru’r effeithiau, pe baen nhw’n digwydd, lle bo’n ymarferol. Mae enghreifftiau o aflonyddu’n cynnwys colli’r defnydd o adeiladau, streiciau tanwydd, gweithredu diwydiannol gan staff yr heddlu, ffliw pandemig, tywydd garw, neu fethiannau o ran y gadwyn gyflenwi, systemau TG neu systemau cyfathrebu.

Rhaid i’r heddlu, partneriaid a chyflenwyr sicrhau bod cynllunio parhad busnes yn ymagwedd system gyfan, gyda phob sefydliad yn chwarae ei ran.

Bydd trefniadau parhad a chadernid realistig ond yn cael eu cyflawni pan mae pawb yn deall ac yn cynllunio i gynnal lefel gwasanaeth briodol ar draws pob maes gwasanaeth.

Er mwyn cefnogi’r gofynion a glynu wrth y polisi hwn, datblygwyd Pecyn Offer Rheoli Parhad Busnes (RhPB) i gefnogi a chynorthwyo staff i allu bodloni gofyniad yr Heddlu i barhau i gyflenwi gwasanaethau adeg digwyddiad neu aflonyddu yn unol â gofynion Deddf Argyfyngau Sifil 2004.

Rhaid i Uwch Reolwyr/Penaethiaid Adran adolygu’r system Rheoli Parhad Busnes yn rheolaidd ar gyfer ei effeithiolrwydd a chymryd camau i fynd i’r afael ag unrhyw ddiffygion neu newidiadau i ofynion.

Mae’n berthnasol ar gyfer y canlynol (ond heb fod yn gyfyngedig i hynny): Holl gategorïau swyddogion a staff Heddlu Dyfed-Powys, pa un ai a ydynt yn llawn amser, rhan amser, parhaol, cyfnod penodol, dros dro (gan gynnwys staff asiantaeth, cymdeithion a chontractwyr) yn staff sydd ar secondiad neu’n wirfoddolwyr. Rhaid i swyddogion, staff a gwirfoddolwyr heddlu sy’n cael gafael ar asedau ac eiddo’r Heddlu ac yn eu defnyddio roi ystyriaeth ddyledus i gynnwys y polisi hwn.

2. Cwmpas y Polisi

Yn achos aflonyddu lleol, bydd penaethiaid adran yn rheoli eu hymateb parhad busnes eu hun. Mae’r Pecyn Offer RhPB yn deillio o’r cylch Cynllunio, Gwneud, Gwirio, Gweithredu a chynghorir y dylai pob uwch arweinydd a rheolwr gyfeirio at y cylch hwn er mwyn hyrwyddo gwelliannau o ran cynllunio a chodi safon parodrwydd Parhad Busnes.  

Gall digwyddiad Parhad Busnes fod yn unrhyw beth sydd â’r potensial i aflonyddu ar wasanaeth arferol, ond yn ei hanfod, bydd unrhyw ddigwyddiad o’r fath naill ai’n achosi i adnodd gael ei golli (e.e. adeiladau, pobl, offer ac ati), neu gynnydd o ran galw, neu o bosibl y ddau'r un pryd.

Os yw maint yr aflonyddwch yn fwy na galluoedd / galluedd lleol, sefydlir Grŵp Aur o dan gyfarwyddyd y Comander Aur. Bydd y Grŵp Aur yn cydlynu ymateb Parhad Busnes mewnol yr heddlu, gan gynnwys ymateb i ddigwyddiadau, adfer busnes a dychwelyd i’r drefn arferol. 

Mae’r Heddlu wedi mabwysiadu ymagwedd gynhwysol tuag at gynllunio Parhad Busnes sy’n sicrhau ymgysylltu a pherchnogaeth ar bob lefel.

Rhaid i Uwch Arweinwyr/Rheolwyr Adran gynnal asesiadau o’r effaith ar fusnes yn rheolaidd a phenderfynu ar ofynion busnes yn achos aflonyddu heb ei gynllunio i wasanaethau/gweithgareddau. Gall hyn gynnwys cynlluniau ar gyfer mynd i’r afael â seilwaith allweddol eiddo, systemau TG a chyfathrebu, systemau gorchymyn a rheoli, adnoddau dynol, cyllid, rheoli iechyd, diogelwch a risg, a gofynion cyfreithiol a gofynion cydymffurfiaeth eraill.

 

3.  Pwerau a Gofynion Cyfreithiol/Polisi  

Nodir yr heddlu o dan Ddeddf Argyfyngau Sifil 2004 fel ymatebwyr ‘categori 1’ neu ymatebwyr ‘categori 2’. Ymatebwyr categori 1 yw’r sefydliadau hynny sydd yn greiddiol i ymateb brys ac maent yn ddarostyngedig i’r set lawn o ddyletswyddau diogelwch sifil.

Fel gwasanaeth brys, mae “Prif Swyddog yr Heddlu” wedi’i benodi’n “Ymatebwr categori 1” o dan Ddeddf Argyfyngau Sifil 2004, gyda dyletswyddau penodol i asesu risg argyfyngau sy’n digwydd a chynllunio i barhau i gyflawni ei swyddogaethau os oes argyfwng yn digwydd.

 

4.  Dewisiadau a Chynlluniau Wrth Gefn  

Nodir rolau a chyfrifoldebau’r partïon sy’n gysylltiedig â chyflenwi’r strategaeth hon isod;

Bydd y Dirprwy Brif Gwnstabl yn gyfrifol am:

• oruchwylio’r ymagwedd gorfforaethol tuag at Barhad Busnes;
• sicrhau creu a chynnal y Cynllun Parhad Busnes Corfforaethol a Chynlluniau Parhad Busnes lleol;
• datblygu a gweithredu rhaglen brofi addas ar gyfer Cynlluniau Parhad Busnes;
• adolygu’r adnoddau sydd angen i gyflenwi Parhad Busnes effeithiol; ac
• arwain ar y maes busnes ym Mwrdd Gweithredol yr Heddlu.

Bydd Penaethiaid Adran/Maes Busnes yn gyfrifol am:

• greu a chynnal Cynllun Parhad Busnes mewn perthynas â’u maes/meysydd busnes, gan adlewyrchu’r peryglon i gyflenwi eu hamcanion fel y diffinnir yn eu cynllun(iau) busnes;
• sicrhau bod Parhad Busnes yn cael ei adolygu’n rheolaidd gan y tîm rheoli adrannol;
• cydymffurfio â pholisi Parhad Busnes a chanllawiau adrannol / yr Heddlu;
• sicrhau bod pob swyddog, aelod staff, gwirfoddolwr, contractwr a phartner yn cael gwybod am ei gyfrifoldeb ar gyfer Parhad Busnes a mecanweithiau ar gyfer bwydo gwybodaeth a phryderon i mewn i brosesau rheoli ffurfiol yr Heddlu;
• enwebu aelod staff perthnasol i weithredu fel ei gynrychiolydd adran / pwynt cyswllt sengl ar gyfer Parhad Busnes; ac
• enwebu aelod staff perthnasol ar gyfer hyfforddiant Parhad Busnes.

Bydd Archwilio Mewnol yn gyfrifol am:

• adolygu cynnwys a chwmpas Cynlluniau Parhad Busnes yr Heddlu a’r adran;
• adolygu digonolrwydd gweithdrefnau i asesu risgiau, eu hadolygu ac ymateb iddynt;
• adolygu effeithiolrwydd rhaglen profi Parhad Busnes yr Heddlu; a
• gwneud argymhellion sy’n deillio o adolygiadau o systemau a gweithdrefnau.

Bydd pob Swyddog ac Aelod Staff yn gyfrifol am:

• gynnal ymwybyddiaeth o Barhad Busnes a bwydo hyn i mewn i’r prosesau cynllunio busnes, rheoli ac adrodd ffurfiol; a
• chefnogi a chymryd rhan mewn gweithgareddau Parhad Busnes, gan gynnwys profi a gweithredu effeithiol cynlluniau sy’n ymwneud â’u gweithgareddau.

Wrth gyflawni nodau ac amcanion y polisi hwn, bydd yr Heddlu’n gwneud y peth iawn yn y ffordd iawn ac yn cyffwrdd ar rai o naw egwyddor y Cod Moeseg Plismona:

• Atebolrwydd ac Unplygrwydd – mae’r polisi’n glir ac yn sicrhau unplygrwydd o fewn ei ddiben;
• Tegwch – mae’r polisi’n gyfreithlon a chymesur ac yn parchu hawliau unigolion;
• Arweinyddiaeth – mae’r polisi’n cynnwys cyfrifoldebau sydd wedi’u diffinio’n glir; a
  • Gwrthrychedd – mae’r polisi’n hyrwyddo ystyriaethau cydraddoldeb ac amrywiaeth ble bynnag y mae’n bosibl, ac nid yw’n gwahaniaethu’n annheg neu’n anghyfreithlon.

 

5.  Gweithredu ac adolygu  

Bydd Ymgynghorydd Risg a Pharhad Busnes yr Heddlu’n monitro’r polisi, gan naill ai adrodd ei fod dal yn “addas ar gyfer y diben” neu’n cyflwyno drafft diwygiedig ar gyfer cymeradwyaeth gan Fwrdd Gweithredol yr Heddlu, i’w alluogi i gynnal adolygiad blynyddol, (gweler isod).

Bydd yr adolygiad ac unrhyw ddiwygiadau’n ystyried;

• Effeithiolrwydd y polisi, fel yr asesir gan archwiliad mewnol / allanol Bwrdd Gweithredol yr Heddlu;

• Unrhyw newidiadau i ddeddfwriaethau / Canllawiau’r Swyddfa Gartref;
• Newidiadau i’r polisi; ac
• Unrhyw arbedion effeithlonrwydd mewn perthynas â gweithredu.

Bydd y polisi’n cael ei adolygu’n ffurfiol bob blwyddyn.  

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

 

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

 

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Ionawr 2024