Apêl yr Heddlu yn dilyn digwyddiad yn Llanelli

Mae Heddlu Dyfed-Powys yn ymchwilio i ddigwyddiad a ddigwyddodd am 9.10 o’r gloch fore ddydd Iau 26 Tachwedd 2020 yn Llanelli.

Roedd swyddog lleihau anafiadau ar y ffyrdd mewn fan GanBwyll wedi parcio tu allan i Ysgol Gynradd Bryn, yn gwylio cyflymder cerbydau wrth iddynt deithio drwy’r parth 20mya ar adeg pan oedd plant yn cael eu gollwng ger yr ysgol.

Reidiodd beiciwr modur o’r ystâd tai cyfagos tuag at gefn y fan GanBwyll a thaflodd wy drwy’r ffenestr gefn, a oedd ar agor. Bu bron iddo daro’r swyddog yn y fan. Aeth y beiciwr modur ymlaen drwy bentref Bryn, gan deithio ar ochr anghywir y ffordd ac achosi traffig a oedd yn dod tuag ato i gymryd camau i’w osgoi.

Mae’r heddlu’n yn apelio ar i unrhyw un a oedd yn yr ardal ar y pryd, ac a welodd y digwyddiad, i ddod ymlaen. Dymunant glywed gan unrhyw un a oedd yn gyrru yn yr ardal ac sydd â chamera cerbyd, a allai gynnwys ffilm o’r digwyddiad neu’r beiciwr modur.

Gofynnir i unrhyw un sydd â gwybodaeth a allai gynorthwyo’r ymchwiliad i gysylltu â Heddlu Dyfed-Powys ar-lein ar: https://www.dyfed-powys.police.uk/cy-GB/cysylltu-a-ni/af/cysylltu-a-ni, drwy anfon e-bost at [email protected], neu drwy alw 101.

Os ydych chi’n fyddar, yn drwm eich clyw, neu â nam ar eich lleferydd, anfonwch neges destun at y rhif difrys 07811 311 908.