Lansiad ymgyrch atal gyrru dan ddylanwad alcohol a chyffuriau dros y Nadolig

Mae hon wedi bod yn flwyddyn sydd wedi gweld cymaint o newid – peidiwch â gadael i Nadolig 2020 fod yr un sy’n newid teulu am byth.

Bydd heddluoedd ar draws Cymru unwaith eto’n cynnal ymgyrch atal gyrru dan ddylanwad alcohol a chyffuriau drwy gydol mis Rhagfyr er mwyn targedu’r rhai hynny sy’n peryglu bywydau pobl eraill drwy fynd y tu ôl i’r llyw pan dan ddylanwad alcohol neu gyffuriau.

 Yn ystod ymgyrch y llynedd roedd gan 10% o’r holl gerbydau a stopiwyd yrrwr dan ddylanwad alcohol neu gyffuriau.

Dwedodd yr Uwcharolygydd Clark Jones-John o Heddlu Dyfed-Powys fod y ffigur hwn yn syml iawn yn annerbyniol.

 Ychwanegodd:

“Mae’r flwyddyn hon wedi bod yn arbennig o anodd ac rydyn ni’n deall fod pobl o bosibl eisiau mwynhau, ond rydyn ni’n eu hatgoffa y gall mynd y tu ôl i’r llyw pan dan ddylanwad alcohol a chyffuriau arwain at ganlyniadau difrifol.

“Rydyn ni’n siarad am fwy na dim ond colli trwydded, sy’n aml yn arwain at golli swydd. Mae gyrru dan ddylanwad alcohol a chyffuriau’n arwain at lawer gormod o wrthdrawiadau difrifol ac angheuol.

“Gwnewch yn siŵr nad chi yw’r un sy’n gyfrifol am ddinistrio teulu y Nadolig hwn.”

Dan arweiniad Heddlu Dyfed-Powys, mae’r ymgyrch mis cyfan hwn yn erbyn yfed dan ddylanwad alcohol neu gyffuriau yn cychwyn ar ddydd Mawrth, y 1af o Ragfyr, pan fydd swyddogion ar draws y wlad yn defnyddio tactegau wedi eu harwain gan gudd-wybodaeth a gwybodaeth leol ynghylch mannau risg uchel i ganfod pobl sy’n gyrru dan ddylanwad alcohol neu gyffuriau dros gyfnod y Nadolig.

“Wrth i dymor y Nadolig gychwyn rydym yn atgoffa gyrwyr o beryglon a chanlyniadau mynd y tu ôl i’r llyw ar ôl yfed neu gymryd cyffuriau,” meddai’r Uwcharolygydd Jones-John.

“Bydd swyddogion o’r Unedau Plismona’r Ffyrdd, y Timau Cymdogaeth Ddiogelach a’r Gwnstabliaeth Wirfoddol yn gweithio 24 awr y dydd, saith diwrnod yr wythnos, a dylai unrhyw un sy’n ystyried gyrru dan ddylanwad alcohol neu gyffuriau wybod y byddwn ni allan yn disgwyl amdanynt.”

Eleni fydd yna ddim parti swyddfa mawr, ond dydy hynny ddim yn golygu na fydd pobl eisiau rhyddhad ar ôl blwyddyn anodd. Gyda hyn mewn golwg, mae swyddogion yn gofyn i bobl gynllunio ymlaen llaw, meddwl am beth fyddan nhw’n ei wneud a gwneud yn siŵr eu bod nhw’n trefnu tacsi i fynd adref.

Maen nhw hefyd yn atgoffa pobl mae’r terfyn gyrru ac yfed yw dwy uned, nid dwy ddiod.

“Mae ein neges yn syml; os ydych allan ac yn gwybod y byddwch yn yfed, gwnewch yn siŵr fod gyda chi gynlluniau ar gyfer mynd adref yn ddiogel heb yrru,” meddai’r Uwcharolygydd Jones-John.

“Os oes rhaid i chi yrru, ein cyngor yw osgoi alcohol yn llwyr. Yr unig derfyn yfed diogel yw yfed dim.”

Gofynnir i unrhyw un sydd â phryderon ynghylch unrhyw un y maent yn credu eu bod yn gyrru dan ddylanwad alcohol neu gyffuriau i gysylltu â’r heddlu ar 101 (neu 999 os ydynt yn achosi perygl uniongyrchol) fel arall, cysylltwch â Crimestoppers yn ddienw ar 0800 555 111.