Dioddefwyr cam-drin domestig yn cael eu hannog i godi eu llais wrth i ddyn gael ei garcharu

Wrth i ddyn gael ei garcharu am ymosod ar ei bartner beichiog, mae’r heddlu’n dweud wrth ddioddefwyr cam-drin domestig ei bod hi’n bwysig iddynt godi eu llais.  

Mae Heddlu Dyfed-Powys yn annog dioddefwyr i beidio â dioddef yn dawel, a rhoi gwybod iddynt am ddigwyddiadau cyn gynted â phosibl fel bod modd ymchwilio iddynt a threfnu cymorth gan asiantaethau arbenigol amrywiol.  

Daw’r alwad ar ôl i Steven McInerney, 41 oed, o Borth Tywyn, gael ei garcharu am geisio crogi ei bartner beichiog a’i phwno yn ei chawell asennau.

Digwyddodd y digwyddiad yn ystod oriau mân y bore ar 29 Mawrth yng nghartref y cwpwl. Dywedodd y dioddefydd wrth swyddogion ei bod hi a’i phartner wedi bod yn yfed pan gynddeiriogodd ac ymosod arni. Gadawodd yr eiddo’n gyflym er ei diogelwch a magodd yr hyder i alw’r heddlu cyn cael ei chymryd i’r ysbyty.  

Dywedodd Cwnstabl Tyne Evans: “Drwy siarad â’r dioddefydd, dysgom fod ymddygiad y troseddwr wedi gwaethygu, a’i bod hi’n gynyddol bryderus am ei diogelwch.

“Er bod rhywfaint o ofn erlyn arni i ddechrau, yr oeddem yn medru sicrhau’r dioddefydd y byddai mesurau’n cael eu rhoi mewn grym i’w gwarchod hi a’i theulu, a chysylltwyd ag asiantaethau allanol a allai darparu cymorth arbenigol pellach. 

“Ar ôl ennill ei hyder, yr oedd hi’n llwyr gefnogol o’r heddlu’n cymryd camau gweithredu, ac roedd modd inni ddatblygu’r ymchwiliad yn gyflym iawn.”

Roedd McInerney wedi gadael yr eiddo cyn i’r heddlu gyrraedd. Daethpwyd o hyd iddo a’i arestio o fewn dwy awr ar ôl derbyn adroddiad am y drosedd. Cafodd ei gyhuddo o drais domestig drwy guro a difrod troseddol, a’r diwrnod canlynol, cafodd ei gyhuddo o ddefnyddio ymddygiad neu eiriau a waethygwyd gan hiliaeth yn erbyn swyddogion er mwyn achosi braw neu ofid. 

Plediodd yn euog i’r tair trosedd yn y llys, ac fe’i dedfrydwyd ar 14 Ebrill. Rhoddwyd dedfryd o 18 wythnos o garchar iddo a gorchymyn atal yn ei wahardd rhag cysylltu â’r dioddefydd am ddwy flynedd, a rhaid iddo dalu £350 o iawndal a chostau llys o £85. 

Dywedodd y Ditectif Brif Arolygydd Richard Yelland: “Yr ydym yn gobeithio bydd y ddedfryd hon yn dod â chysur i’r dioddefydd, gan wybod na fydd y troseddwr yn medru cysylltu â hi am ddwy flynedd. Os yw’n torri’r gorchymyn hwn, bydd yn cyflawni tramgwydd troseddol, ac fe allai fynd i’r carchar am hynny.

“Drwy godi ymwybyddiaeth o’r achos hwn, yr ydym hefyd yn gobeithio y medrwn sicrhau unrhyw un sydd mewn perthynas camdriniol y bydd yr heddlu bob amser yn ymateb yn gyflym i ddigwyddiadau o’r natur hwn, ein bod ni’n trin pob adroddiad o ddifrif ac yn sensitif, ac y gellir rhoi cymorth parhaus mewn grym i’ch helpu drwy ymchwiliad a thu hwnt i hynny.”

 

 

Cyngor ar gyfer dioddefwyr cam-drin domestig:

DIOGELWCH Y CARTREF:
• Clowch neu ddiogelwch pob ffenestr a drws.
• Os ydych chi’n teimlo’n anniogel yn eich cyfeiriad presennol, medrwch geisio lle mewn lloches drwy linell gymorth 24 awr Byw Heb Ofn ar 0808 80 10 800.
• Os yw’r troseddwr yn galw heibio i’ch cartref, galwch yr heddlu ar 999. 

DIOGELWCH PERSONOL:
• Ystyriwch lawrlwytho’r ap diogelwch personol Hollie Guard. Os ydych chi’n teimlo’ch bod chi mewn perygl, medrwch sbarduno rhybudd a fydd yn hysbysu’ch cysylltiadau o ddewis ac yn rhannu’ch lleoliad yn syth.
• Ystyriwch lawrlwytho’r ap Bright Sky, sy’n eich galluogi i gadw negeseuon testun, sgrinluniau a lluniau’n ddiogel.  
• Cadwch eich ffôn symudol gyda chi bob amser, gan sicrhau ei fod wedi’i wefru’n llwyr.
• Ystyriwch wella’r gosodiadau preifatrwydd ar eich ffôn a’ch cyfrifon cyfryngau cymdeithasol, gan gynnwys newid cyfrineiriau.
• Seiniwch y larwm (e.e. sgrechian a gweiddi) yn gynnar yn ystod unrhyw ddigwyddiad yn y dyfodol, gan adael cyn gynted â phosibl.
• Ystyriwch gynllun cyfeillio gyda chymydog, aelod o’r teulu neu ffrind yr ydych yn ymddiried ynddo, gan gytuno ar air cod y medrwch ei ddefnyddio os fyddwch chi’n teimlo’ch bod chi mewn perygl. Gwnewch yn siŵr bod y ffrind yn gwybod pa gamau i’w cymryd os yw’n clywed y gair cod, ac anogwch ef/hi i alw’r heddlu.
• Cysylltwch â’r heddlu ar 101 neu 999 er mwyn adrodd am unrhyw ddigwyddiadau pellach. Defnyddiwch 999 bob amser os ydych chi mewn perygl uniongyrchol o niwed.
• Gellir gwneud cais ar gyfer Cyfraith Clare, sef cynllun datgelu cam-drin domestig, mewn perthynas ag unrhyw berthnasau newydd. Mae hyn yn galluogi’r heddlu i ddatgelu hanes unigolyn o ymddygiad camdriniol i’r rhai sydd mewn perygl o ymddygiad o’r fath. 

CYMORTH ALLANOL:

Gwasanaeth Dioddefwyr a Thystion Goleudy: Rhoddir cymorth i ddioddefwyr a thystion, hyd yn oed os nad ydynt wedi rhoi gwybod i’r heddlu am y digwyddiad. Ffôn: 0300 1232996 E-bost: [email protected]

Llinell Gymorth Genedlaethol Cam-drin Domestig: 0808 2000 247

Llinell Gymorth Byw Heb Ofn: 0808 8010 800 E-bost: [email protected] (Llinell Gymorth Cam-drin Domestig a Thrais Rhywiol Cymru Gyfan)

Cymorth i Ddioddefwyr: 0845 30 30 900

Llinell Gymorth Genedlaethol Stelcio: 0808 802 0300

Llinell Gyngor Dynion: 0808 801 0327 www.mensadviceline.org.uk

Llinell Gymorth Cam-drin Domestig Genedlaethol LHDT+: 0800 999 5428

Argyfwng Trais (Cymru a Lloegr): 0808 802 9999 www.rapecrisis.org.uk

The Mix, gwybodaeth a chymorth am ddim i bobl ifainc o dan 25 oed yn y DU: 0808 808 4994