Lansio menter bartneriaeth er mwyn sicrhau bod Dinbych-y-pysgod dal yn le diogel a phoblogaidd i bawb yr haf hwn

Gwelwyd cynnydd y penwythnos diwethaf yn nifer y bobl sy’n ymweld ag ardal Sir Benfro wrth i’r cyfyngiadau lacio a’r tywydd gynhesu. Er ei bod hi’n braf bod pobl nawr yn medru ymweld â Sir Benfro eto, gosododd ymddygiad rhai bwysau ychwanegol ar yr Heddlu a gwasanaethau eraill. Denodd Dinbych-y-pysgod dorf fawr nos Sadwrn (18 Ebrill 2021) yn arbennig, gan arwain at ymddygiad gwrthgymdeithasol, yn enwedig yn ardal yr harbwr.

Dywedodd y Prif Arolygydd Louise Harries o Heddlu Dyfed-Powys: “Yr ydym yn ymwybodol o bryderon preswylwyr a busnesau yn dilyn yr ymddygiad gwrthgymdeithasol a welwyd yn Ninbych-y-pysgod nos Sadwrn, ac yn gweithio gyda phartneriaid er mwyn atal hyn rhag digwydd eto.

“Mae Ymgyrch Lion wedi bod ar waith yn ystod yr haf yn Ninbych-y-pysgod a Saundersfoot ers sawl blwyddyn bellach. Yn dilyn digwyddiadau diweddar, ac ar ôl gwrando ar bryderon preswylwyr, yr ydym yn lansio’r cynllun yn gynharach eleni. Byddwn yn cychwyn yr ymgyrch yr wythnos hon.”

Mae Ymgyrch Lion yn fenter bartneriaeth â’r nod o sicrhau diogelwch cyhoeddus ac atal ymddygiad gwrthgymdeithasol, materion trefn gyhoeddus lefel is, a phroblemau sy’n gysylltiedig ag yfed, er mwyn gwneud Dinbych-y-pysgod yn le pleserus i fyw a gweithio ynddi, ac i ymweld â hi, dros y misoedd nesaf. 

Cynhelir Ymgyrch Lion bob penwythnos yn Ninbych-y-pysgod a Saundersfoot, gan gychwyn y penwythnos hwn, sef dydd Gwener 23 Ebrill. Bydd mwy o swyddogion heddlu yn yr ardal er mwyn ymgysylltu ag ymwelwyr a phreswylwyr a helpu i reoli cynnydd o ran troseddau, anhrefn ac ymddygiad gwrthgymdeithasol. Bydd hyn hefyd yn cael ei gefnogi gan staff a mesurau ychwanegol gan ein partneriaid.  

Bydd swyddogion yn cynnal presenoldeb amlwg ac yn ymgysylltu â’r cyhoedd, ac yn defnyddio pwerau gorfodi i wasgaru’r rhai sy’n ymddwyn yn wrthgymdeithasol os oes angen.

Ychwanegodd y Prif Arolygydd Harries: “Mae trefi fel Dinbych-y-pysgod yn prysuro yn ystod yr haf, ac ar ôl blwyddyn anodd, mae’n naturiol y bydd pobl eisiau mwynhau ein sir – yr ydym yn croesawu hyn, ond mae angen sicrhau ei fod yn cael ei wneud mewn modd diogel i bawb. Rwyf ond eisiau i bobl ystyried eu hymddygiad a’r effaith y gallai gael arnyn nhw ac eraill.

“Yn ogystal â swyddogion ychwanegol yng ngorsaf heddlu Dinbych-y-pysgod, bydd swyddogion ychwanegol ar droed yn patrolio’r dref ac ardal yr harbwr, gan gychwyn yn gynnar y prynhawn. Yr ydym yn gweithio’n agos â busnesau lleol a’r gymuned er mwyn sicrhau bod Dinbych-y-pysgod dal yn fan diogel a phoblogaidd i bawb fwynhau.”

Dywedodd y Cynghorydd David Simpson, Arweinydd Cyngor Sir Benfro: “Mae Cyngor Sir Benfro’n adleisio’r pwynt bod y rhan fwyaf o bobl yn mwynhau’r Sir mewn modd diogel a chyfrifol, a diolchwn iddynt am hynny.

“Lle y bu ambell ddigwyddiad unigryw o ymddygiad gwael, yr ydym wedi bod yn gweithio’n agos gyda’n partneriaid i gynllunio ar gyfer digwyddiadau yn y dyfodol a’u rheoli.  

“Yr ydym yn croesawu Ymgych Lion, sy’n cychwyn heddiw, ac rydym wedi adolygu ein gwasanaethau yn Ninbych-y-pysgod, yn arbennig ardal yr harbwr, er mwyn ceisio osgoi digwyddiadau diweddar rhag digwydd eto.

“Bydd pedwar warden stryd yn ymweld â’r ardal dros y penwythnos er mwyn ymgysylltu ag aelodau o’r cyhoedd, atgyfnerthu’r neges ynglŷn ag ymbellhau cymdeithasol, ac annog pobl i beidio â gollwng sbwriel. Mae’n well gennym ymgysylltu yn hytrach na gorfodi bob amser.

“Gofynnwn i bobl fwynhau eu hunain mewn ffordd sydd ddim yn effeithio’n negyddol ar eraill. Defnyddiwch y biniau a ddarperir. Os yw’r biniau’n llawn, ewch â’ch sbwriel adref. Helpwch ni i gadw Sir Benfro’n hardd i bawb.”

Bydd y toiledau cyhoeddus ger traeth y castell nawr ar agor yn hwyrach ar benwythnosau, yn ystod y gwyliau ysgol ac yn ystod gwyliau banc, a hynny tan 9 o’r gloch y nos.

Dywedodd yr Arolygydd Richard Powell o’r Heddlu Trafnidiaeth Prydeinig: “Yr ydym wedi gweithio’n llwyddiannus ochr yn ochr â’n partneriaid yn Heddlu Dyfed-Powys a Thrafnidiaeth Cymru dros y blynyddoedd diwethaf er mwyn sicrhau bod pawb sy’n ymweld â Dinbych-y-pysgod yn medru cael amser da.

“Ein prif flaenoriaeth yw cadw teithwyr a staff rheilffordd yn ddiogel. Bydd gennym swyddogion ychwanegol yn cynnal patrolau amlwg, gan sicrhau bod y rhai sy’n teithio i Ddinbych-y-pysgod yn medru gwneud hynny’n ddiogel. Bydd swyddogion hefyd yn atgoffa teithwyr am bwysigrwydd gwisgo mwgwd ar drenau ac mewn gorsafoedd, heblaw eu bod wedi’u heithrio. Os ydych ein hangen, anfonwch neges destun inni ar 61016 neu galwch 0800 40 50 40.”

Os ydych chi’n profi ymddygiad gwrthgymdeithasol neu droseddolrwydd, medrwch adrodd amdano wrthym ar-lein ar https://www.dyfed-powys.police.uk/cy-GB/riportio/riportio/, drwy anfon e-bost at [email protected], neu drwy alw 101.