Carcharu dyn am bedair blynedd ar ôl i negeseuon ddatgelu maint gwerthu cyffuriau

Mae dyn 20 oed wedi’i garcharu am bedair blynedd am werthu cyffuriau ar ôl i ymchwiliad heddlu darfu ar grŵp troseddu trefnedig yn Aberhonddu.

Amheuwyd Callum Samuel o Heol-y-Ffynnon, Aberhonddu, o arwain y grŵp troseddu trefnedig yn y dref cyn iddo gael ei arestio ar gyfer dau fater digysylltiad. 

Wrth chwilio ei gartref mewn perthynas â’r troseddau hynny, daeth swyddogion o hyd i lawer iawn o ganabis a chocên, yn ogystal â £1250 mewn arian parod.

Fodd bynnag, datgelodd ffonau a gymerwyd wrth Samuel tua 1000 o negeseuon yn ymwneud â gwerthu cyffuriau yn ardal Aberhonddu a de Powys. Roedd negeseuon a anfonwyd yn gofyn pa un ai a oedd y derbynnydd eisiau “gêr”, ac roedd ymatebion i geisiadau am gyffuriau. 

Dywedodd y Ditectif Gwnstabl James Page: “Ymchwiliwyd yn helaeth er mwyn dwyn yr achos hwn i’r llys ac uchafu’r ddedfryd a roddwyd i Samuel.

“Ni ddaethpwyd o hyd i lawer iawn o gyffuriau yn ei eiddo, ond fe wnaeth y ffonau a atafaelwyd a’r negeseuon arnynt ei ddal allan. 

“Profodd y negeseuon ar y ffonau ei fod yn chwarae rhan fawr mewn cyflenwi cyffuriau yn Aberhonddu a’r ardal ehangach.”

Dedfrydwyd Samuel i gyfanswm o 18 mis ar ôl pledio’n euog i ddau achos o feddu ar gyffuriau dosbarth A â’r bwriad o werthu, dau achos o feddu ar gyffuriau dosbarth A, a dau achos o feddu ar gyffuriau dosbarth B.

Roedd Samuel hefyd wedi torri gorchymyn cymunedol a ddaeth i rym ar 10 Rhagfyr 2020 am ysbeiliad, ymosod ar weithiwr brys a chymryd cerbyd gwaethygedig.

Fe’i gorchmynnwyd i dreulio 15 mis arall yn y carchar am ysbeiliad, 12 mis am gymryd cerbyd gwaethygedig, a thri mis arall am ymosod ar weithiwr brys. Bydd yn rhaid iddo dreulio un cyfnod ar ôl y llall yn y carchar, sy’n golygu y bydd yn treulio cyfanswm o bedair blynedd yn y carchar.

Ychwanegodd y Ditectif Gwnstabl Page: “Mae’r ymchwiliad hwn, a arweiniwyd gan y Tîm Plismona Achosion Difrifol, yn enghraifft wych o ffocws rhyngadrannol ar gyfer sicrhau canlyniad ardderchog i dref Aberhonddu.

“Mae Samuel wedi derbyn dedfryd sylweddol o garchar, ac mae’r grŵp troseddu trefnedig a nodwyd gan Ymgyrch Brompton wedi’i chwalu. 

“Bydd ei ddedfryd yn helpu i wella bywydau pobl yn y dref, felly mae hyn i’w groesawu.”

Dedfrydwyd Samuel yn Llys y Goron Merthyr ar 23 Gorffennaf.