Cyhoeddi Hysbysiad Gwarchod y Gymuned ar gyfer poeni da byw yn ardal Powys

Cyhoeddwyd yr Hysbysiad Gwarchod y Gymuned yn ardal Powys yn dilyn sawl adroddiad am boeni da byw yr oedd modd eu holrhain i gŵn un person. Roedd y perchennog eisoes wedi derbyn llythyr rhybudd ddechrau Chwefror eleni, fodd bynnag, roedd y cŵn dal yn cael eu caniatáu i boeni da byw.

Mae’r Hysbysiad Gwarchod y Gymuned yn mynnu:

• nad yw’r unigolyn yn mynd ar unrhyw dir preifat, megis cae ffermwr, yn gaeedig neu beidio, gydag unrhyw gi heb ganiatâd ysgrifenedig y perchennog tir;
• bod yn rhaid i unrhyw gi o dan ei reolaeth gael ei gadw ar dennyn yn ddiogel wrth groesi unrhyw dir lle mae da byw;
• bod yn rhaid i unrhyw gi o dan ei reolaeth gael ei gadw ar dennyn yn ddiogel pan mae’n cael ei gerdded ar unrhyw ffordd gyhoeddus neu briffordd.  

Dywedodd y Rhingyll Matthew Langley o Dîm Troseddau Gwledig Heddlu Dyfed-Powys:

“Fel heddlu sy’n bennaf wledig, yr ydym yn aml yn derbyn adroddiadau am dda byw’n cael eu poeni, ac mae’n drosedd yr ydym yn ei chymryd yn hollol o ddifri.

“Er y bydd ffermwyr yn aml yn derbyn iawndal gan y perchnogion cŵn lle mae’r perchennog yn cael ei adnabod, nid yw hynny wir yn ystyried y gost o brynu neu fagu anifeiliaid eraill yn eu lle.

“Yr ydym yn aml yn cyhoeddi negeseuon ar gyfryngau cymdeithasol ac yn y wasg yn cynghori perchnogion cŵn i gadw eu cŵn ar dennyn a sicrhau bod mesurau diogelwch digonol gyda nhw mewn grym adref fel nad oes modd i’w cŵn ddianc.

“Er ein bod ni’n ceisio’n gorau i addysgu perchnogion cŵn, mae nifer dal yn meddwl nad oes dim o’i le mewn gadael i’w cŵn grwydro’n rhydd yng nghefn gwlad, hyd yn oed os yw’n amlwg bod da byw mewn caeau cyfagos.

“Mae’r llythyr rhybudd, a nawr yr Hysbysiad Gwarchod y Gymuned, yn dangos y byddwn yn cymryd camau cyfreithiol pan fod angen.”