Dyn o Aberteifi wedi’i garcharu am droseddau cyffuriau.

Dedfrydwyd Thomas Francis Eley, 34 oed, i 5 mlynedd a hanner yn y carchar yn Llys y Goron Abertawe ddydd Gwener, 30 Gorffennaf 2021.

Roedd Heddlu Dyfed-Powys wedi stopio ac archwilio’r cerbyd yr oedd Eley yn deithiwr ynddo yn ardal Cynwyl Elfed wrth iddo deithio o Gasnewydd i Geredigion ddydd Gwener, 5 Chwefror 2020.

Fe’i harestiwyd ar amheuaeth o feddu ar gyffuriau dosbarth A gyda’r bwriad o’u cyflenwi, cyn cael ei ryddhau’n ddiweddarach dan ymchwiliad tra bo ymholiadau’r heddlu’n parhau.

Yn y ddalfa, daethpwyd o hyd i werth £1,400 o Heroin y tu mewn i’w gorff a gwerth £1,180 o ganabis ar ôl chwilio ei gyfeiriad cartref.

Dangosodd ymholiadau fod Eley wedi teithio i Gasnewydd ar 23 achlysur rhwng mis Medi 2019 a mis Chwefror 2020.

Ar 4 Mai eleni, cafodd Eley ei gyhuddo o 2 achos o feddu ar gyffuriau dosbarth A gyda’r bwriad o’u cyflenwi, ac 1 achos o feddu ar gyffuriau dosbarth B gyda’r bwriad o’u cyflenwi. Plediodd yn euog i bob cyhuddiad yn Llys y Goron Abertawe ddydd Gwener, 30 Gorffennaf 2021.

Dywedodd yr Arolygydd Owen Williams: “Roedd hon yn enghraifft wych o blismona rhagweithiol sydd wedi arwain at ddedfryd sylweddol i ddeliwr cyffuriau cyson ac amharu ar y cyflenwad o gyffuriau anghyfreithlon i Geredigion. Gobeithio y bydd hyn yn rhybudd i eraill sy’n dymuno dod â chyffuriau i ardal Ceredigion na chaiff hyn ei oddef.”

I roi gwybod am unrhyw beth amheus neu bryderon am werthu a chymryd cyffuriau yn y gymuned, cysylltwch â Heddlu Dyfed-Powys naill ai ar-lein ar: https://www.dyfed-powys.police.uk/cy-GB/cysylltu-a-ni/af/cysylltu-a-ni/,  neu drwy e-bostio [email protected], neu drwy ffonio 101.  Os ydych chi’n fyddar, yn drwm eich clyw, neu â nam ar eich lleferydd, anfonwch neges destun at y rhif 07811 311 908101.

Fel arall, cysylltwch â’r elusen annibynnol, Crimestoppers, yn ddienw drwy ffonio 0800 555111, neu drwy ymweld â crimestoppers-uk.org.