Gosod cyn swyddog ar restr wahardd y Coleg Plismona

Mae un o gyn swyddogion Heddlu Dyfed-Powys, a ddygodd fatri o gar a oedd wedi bod mewn gwrthdrawiad, wedi ei osod ar restr wahardd y Coleg Plismona yn dilyn Gwrandawiad Camymddwyn Carlam.

Ar ddydd Sadwrn 23 Ionawr 2021, pan oedd ar ddyletswydd, aeth Oliver George West i leoliad gwrthdrawiad traffig y ffyrdd ar y ffordd o Ben-bre i Drimsaran yn Sir Gaerfyrddin.

Tra yn y lleoliad, tynnodd y cyn swyddog y batri o’r cerbyd a oedd yn gysylltiedig â’r gwrthdrawiad heb unrhyw ganiatâd gan y perchnogion, neu unrhyw ddiben neu awdurdod plismona cyfreithlon, a mynd ag ef adref ar gyfer ei ddefnydd personol ei hun. 

Tynnwyd sylw goruchwylwyr y swyddog at y mater ar 7 Chwefror 2021 a lansiodd Adran Safonau Proffesiynol yr Heddlu ymchwiliad, a arweiniodd at y swyddog yn cael ei wahardd o’i waith ar 11 Chwefror 2021.

Cyhuddwyd West â throsedd o ddwyn o gerbyd modur, a phlediodd yn euog i’r drosedd ar 1 Gorffennaf 2021.   

Fe’i dedfrydwyd yn Llys Ynadon Abertawe ar 30 Gorffennaf 2021. Rhoddwyd Gorchymyn Cymunedol iddo ac fe’i gorchmynnwyd i gynnal 200 awr o waith di-dâl. Hefyd, fe’i gorchmynnwyd i dalu £85 o gostau a ffi gordal dioddefydd o £95.

Ymddiswyddodd West o’r heddlu ar 28 Gorffennaf 2021, ac ar 2 Medi 2021, ymddangosodd gerbron Gwrandawiad Camymddwyn Carlam. Cadeirydd y gwrandawiad oedd y Prif Gwnstabl Dros Dro Claire Parmenter.

Cyfaddefodd i Gamymddwyn Difrifol a chanfu’r cadeirydd y byddai’r cyn swyddog wedi’i ddiswyddo pe bai dal yn aelod o’r gwasanaeth heddlu.  

O ganlyniad, bydd nawr yn cael ei osod ar restr wahardd y Coleg Plismona, a fydd yn ei atal rhag cael ei gyflogi gan unrhyw wasanaeth heddlu neu gorff gorfodi’r gyfraith penodol arall yn y dyfodol.

Mae Heddlu Dyfed-Powys yn disgwyl y safonau unplygrwydd a gonestrwydd uchaf gan bob swyddog ac aelod staff, a bydd unrhyw achos honedig o dorri’r Safonau Ymddygiad Proffesiynol yn cael eu trin yn briodol.