Teyrnged teulu i ferch a chwaer gariadus sydd wedi marw ar ȏl gwrthdrawiad

Mae teulu merch ifanc bu farw yn dilyn damwain ar yr A478 ym Mhenblewin, Arberth, ar ddydd Gwener, 20 Awst, wedi mynegi eu tristwch yn dilyn colled eu merch a chwaer cariadus.

Bu farw Beca Mai Richards, 23, o Llangain, Caerfyrddin, yn yr ysbyty heddiw (26 Awst).

Mae ei theulu wedi cyhoeddi teyrnged, lle maen nhw'n sôn am eu balchder wedi i Beca Mai, "sydd o hyd wedi gofalu dros eraill", roi organau i helpu a rhoi bywyd gwell i eraill.

Dyma deyrnged y teulu: "Rydym wedi ein chwalu'n llwyr gan golled Beca. Roedd hi'n ferch, chwaer, ffrind ac athrawes llawn cariad a charedigrwydd ac yn un sydd o hyd wedi gofalu dros eraill. Rydym yn ymfalchïo y gwireddwyd dymuniad Beca, fel ei chymwynas olaf, i fod yn rhoddwr, er mwyn cynnig bywyd gwell i eraill. Fel teulu, hoffwn ddiolch i bawb, yn enwedig yr Uned Gofal Dwys ac Ambiwlans Awyr Cymru, am eu cefnogaeth a gofal dros y dyddiau diwethaf. Ein dymuniad nawr yw cael amser i alaru'n breifat."

Mae'r teulu yn cael eu cefnogi gan swyddogion sydd wedi eu hyfforddi'n arbennig.