Blog mis Rhagfyr gan Arolygydd Aberhonddu

Wrth inni wynebu’r Nadolig, bu cryn dipyn o ffocws ar blismona yn genedlaethol, a chreffir yn fanylach nag erioed ar blismona. Er y gall hyn fod yn anghyfforddus, nid yw ond yn iawn bod y gwasanaeth heddlu’n cael ei ddal i gyfrif ac yn darparu gwasanaeth ardderchog. Mae tryloywder ac unplygrwydd yn hollbwysig ar gyfer cynnal hyder y cyhoedd.

Ym mis Tachwedd, newidiodd Heddlu Dyfed-Powys y ffordd yr ydym yn trin ymchwiliadau. Mae dau dîm penodol wedi’u sefydlu i’n helpu i wella ein safonau ymchwilio, diweddaru dioddefwyr yn fwy rheolaidd, a helpu i leihau galw ar dimoedd rheng flaen. O ganlyniad, mae rolau swyddogion yn gliriach, sy’n eu rhyddhau i ganolbwyntio ar fynd i leoliadau digwyddiadau, ymateb i faterion cymunedol a phlismona ein strydoedd yn rhagweithiol. Yr ydym yn parhau i fod yn fwy amlwg yn ein cymunedau, a’r nod yn y pen draw yw bod swyddogion ymateb yn treulio mwy o amser nag y maent yn ei dreulio ar hyn o bryd ar waith plismona rhagweithiol. Mae Plismona Bro, Plismona’r Ffyrdd a thimoedd Troseddau Gwledig penodol dal yn rhan hanfodol o’n gwasanaeth cyffredinol. Mae’r 18 mis diwethaf wedi dangos inni ein bod ni’n medru newid y ffordd yr ydym yn gweithio heb leihau ansawdd y gwasanaeth a ddarparwn. Yn ystod y pandemig, daeth yn glir y gallai ymchwiliadau o bell chwarae rhan bwysig yn hyn, gan ein galluogi i reoli galw’n well a chyflawni rhagor dros ddioddefwyr. Ar lefel leol, mae rheolwyr Powys wedi bod yn cwrdd â chynghorau lleol a phartneriaid eraill i esbonio’r newidiadau, ac mae’r adborth a dderbyniwyd wedi bod yn gadarnhaol iawn. Fel sy’n wir gydag unrhyw newid i’r ffordd yr ydym yn gweithio, mae’r model newydd yn cael ei fonitro’n agos a’i addasu yn ôl yr angen.

Yr ydym hefyd wedi cael llwyddiannau sy’n werth eu nodi. Ar 29 Hydref, ymddangosodd Simon Lester a Michael Evans gerbron Llys y Goron Merthyr Tudful i gael eu dedfrydu yn dilyn sawl cyhuddiad o droseddau byrgleriaeth a thrin nwyddau wedi’u dwyn. Dedfrydodd y barnwr Evans i ddwy flynedd o garchar am fyrgleriaeth, a Lester i flwyddyn o garchar am drin nwyddau wedi’u dwyn. Mae’r troseddau’n mynd yn ôl i 2019 pan oedd nifer fawr o droseddau gwledig yn cael eu cyflawni yn ne Powys. Diolch i waith y Rhingyll Songhurst a’i gydweithwyr o dan Ymgyrch Maple, mae’r troseddau wedi lleihau’n sylweddol – ond nid ydynt wedi diflannu’n llwyr. Gwelodd yr ymchwiliad hwn y defnydd o dystiolaeth ffôn symudol ac arolygon amledd radio’n cael eu defnyddio fel tystiolaeth i nodi symudiadau drwgdybiedigion. Mae ymgyrchoedd trawsffin gyda heddluoedd cyfagos a rhannu gwybodaeth dal yn targedu troseddwyr teithiol.

Daethpwyd â throsedd dreisgar i stop yn sydyn ar 3 Rhagfyr yng nghanol tref Aberhonddu wrth i ddau ddrwgdybyn gael eu harestio. Arestiwyd y dynion o fewn 10 munud yn dilyn galwad 999. Rhyddhawyd y ddau ddyn ar fechnïaeth amodol ac mae tystiolaeth dal yn cael ei chasglu mewn perthynas â throseddau trefn gyhoeddus difrifol a meddu ar eitem finiog.

Yn ddiweddar, dathlodd Heddlu Dyfed-Powys ei seremoni wobrwyo flynyddol, ac rydym yn falch bod swyddogion a staff De Powys wedi ennill dwy gategori. Mr Lee Davies enillodd y wobr Gwirfoddolwr y Flwyddyn am ei ymrwymiad tuag at y fenter Cadw Llygad ar Gyflymder yn y Gymuned ac am wirfoddoli yn y gymuned. Mae hyn yn ychwanegol i wobr arall a dderbyniodd yn ddiweddar gan Gyngor Tref Aberhonddu, eto am wirfoddoli’n anhunanol.

Bu’n dda gweld bod galw’r haf wedi lleihau rhywfaint, gan alluogi swyddogion i barhau â’u hymholiadau a bodloni gwaith diweddaru llysoedd, ond wrth gwrs, mae cyfnod prysur y Nadolig ar ein pennau yn awr.   

Wrth inni gamu i gyfnod y Nadolig, mae’n bwysig ein bod ni’n cymryd gofal ac yn gofalu am ein gilydd. Yn aml, mae gan droseddau treisgar gysylltiad ag alcohol, ac mae nifer fawr o fywydau wedi’u colli dros y blynyddoedd oherwydd yfed a gyrru. Ar 1 Rhagfyr, cychwynnodd yr ymgyrch fis o hyd yn erbyn yfed/cymryd cyffuriau a gyrru, ac rydym eisoes wedi gweld canlyniadau grymus ledled De Powys. Mae alcohol yn amharu ar farn. Gan hynny, mae’n rhaid inni ystyried pa un ai a oes angen inni yrru cyn yfed alcohol, waeth pa un ai a ydym yn aros gartref neu’n mynd allan am y nos. 

Wrth inni agosáu at ŵyl y Nadolig yn y cyfnod ansicr hwn, dymunaf Nadolig diogel a llawen ichi. Ar gyfer gweithwyr sifft a’u teuluoedd, efallai bydd yn rhaid dathlu’n gynnar neu’n hwyr, fodd bynnag, treulio amser gyda theulu a ffrindiau yw’r peth pwysicaf.