Yr heddlu’n annog pobl i beidio ag ymosod ar weithwyr y gwasanaethau brys yn dilyn ymosodiadau

Mae Heddlu Dyfed-Powys wedi cyhoeddi apêl i’r cyhoedd weithio gyda ni, nid yn ein herbyn, yn dilyn nifer o ymosodiadau ar weithwyr y gwasanaethau brys yn ystod yr wythnos diwethaf.

Daw hyn ar ôl i ddyn a hyrddiodd ymlaen at swyddog heddlu yn dilyn aflonyddwch gael ei ddedfrydu i 120 awr o waith di-dâl.

Roedd swyddogion wedi mynd i leoliad aflonyddwch ar Heol Spilman, Caerfyrddin, nos Sadwrn 11 Rhagfyr, ar ôl derbyn adroddiadau bod 20 o bobl yn ymladd.  

Pan gyrhaeddodd swyddogion, roedd y sefyllfa wedi tawelu rhywfaint i wthio yn hytrach nag ymladd.

Roedd swyddogion yn siarad â’r rhai a oedd yn gysylltiedig â’r digwyddiad, gan gynnwys Robin Pitt, 40 oed, a oedd yn ymddangos yn ddigynnwrf.

Fodd bynnag, pan oedd swyddogion yn ymdrin â dyn arall, hyrddiodd Pitt ymlaen at un ohonynt o’r tu ôl, â’i fraich allan.

Camodd Cwnstabl Chris Day, a welodd Pitt yn hyrddio ymlaen, i mewn er mwyn atal ymosodiad posibl ar gydweithiwr.

“Camais rhyngddyn nhw,” meddai Cwnstabl Day.

“Gafaelodd ynof i, felly gafaelais ynddo ef, a rhoddodd ei freichiau o gwmpas fy mhen.

“Pan dynnodd fi i’r llawr, bwriais fy mhen-glin chwith ar y llawr, gan ddioddef sawl clwyf a chleisiau.

“Glaniodd ar fy mhen. Clwyfais fy llaw wrth geisio ei wthio i ffwrdd a dioddefais gochni o gwmpas fy llygad chwith.

“Roedd crafiadau ar draws fy wyneb yn dilyn y ffrwgwd, a oedd fel papur gwydrog ar fy wyneb.”

Dywedodd Cwnstabl Day bod yr ymosodiad yn un direswm.

“Yr oedd yn hollol annisgwyl,” meddai. “Pan gyrhaeddais y lleoliad a siarad ag ef, roedd e’n iawn ac yn hollol ddigynnwrf yn fy nghwmni.

“Does neb yn disgwyl dioddef ymosodiad yn y gwaith.

“Fel swyddog heddlu, rydych chi’n disgwyl ymdrin â throseddwyr treisgar, ond ry’n ni ond yn gwneud ein gwaith, ac ni ddylai neb ymosod arnom am ei wneud.”

Cyfaddefodd Pitt i’r ymosodiad yn Llys Ynadon Llanelli ar 13 Rhagfyr.

Rhoddwyd gorchymyn cymunedol o 12 mis iddo, gan gynnwys 120 awr o waith di-dâl, costau o £85, tâl dioddefydd ychwanegol o £95 , ac iawndal o £100.

Y mis hwn, mae Heddlu Dyfed-Powys yn cefnogi ymgyrch #GydaNiNidYnEinHerbyn y gwasanaethau brys, sy’n cael ei harwain gan Wasanaeth Ambiwlans Cymru.

Mewn un wythnos y mis hwn, cofnodwyd wyth ymosodiad ar swyddogion heddlu neu barafeddygon yn yr ardal heddlu.

Mae ymosodiadau o’r fath ar gynnydd. Bu 4240 o ymosodiadau yn erbyn gweithwyr y gwasanaethau brys, gan gynnwys swyddogion heddlu, tân ac ambiwlans, rhwng Ebrill 2019 a Thachwedd 2020. Mae hyn yn cynrychioli cynnydd misol cyfartalog o 202 yn 2019 i 222 yn 2020, neu 10%.

Roedd ymosodiadau’n amrywio o gicio, pwno a phenio, i boeri, taro, cnoi a cham-drin geiriol.

Yn 2018, dyblwyd y ddedfryd uchaf o dan y Ddeddf Ymosodiadau ar Weithwyr y Gwasanaethau Brys (Troseddau) o 6 mis i 12 mis o garchar, ond cyn hir, gallai troseddwyr wynebu hyd at 2 flynedd o garchar o dan gyfreithiau newydd.

Ymosodiadau ar weithwyr y gwasanaethau brys:

• Pan alwyd swyddogion i leoliad aflonyddwch yng Nghil-maen ar 9 Chwefror, fe wnaethant arestio dyn, a giciodd un swyddog a phenio un arall.
• Galwyd swyddogion i ymdrin â dynes a oedd yn difrodi car yn ardal Cydweli ar 9 Rhagfyr. Ar ôl iddi gael ei harestio, ymatebodd yn fyrbwyll, gan gicio coesau dau swyddog.
• Wrth arestio rhywun yn Llanelli ar 12 Rhagfyr, ymosodwyd ar ddau swyddog. Tynnwyd gwallt un swyddog, a chnowyd llaw’r llall.
• Ar 12 Rhagfyr, galwyd swyddogion i Lanelli ar ôl i barafeddyg gael ei phwno yn ei stumog gan glaf mewn ambiwlans.
• Ymatebodd swyddogion i bryderon am les dyn yn ardal Aberystwyth ar 12 Rhagfyr. Daethpwyd o hyd i’r dyn a chynigiwyd cymorth iddo gan swyddogion, ond dechreuodd ymddwyn yn sarhaus tuag at swyddog, gan gynnwys gwneud sylwadau hiliol.
• Ar 14 Rhagfyr, aeth swyddogion i Ysbyty’r Tywysog Philip yn Llanelli yn dilyn adroddiadau am ddyn meddw â phlentyn, a oedd yn gwrthod gadael i’r plentyn dderbyn triniaeth. Daethpwyd o hyd iddo mewn car tu allan i’r ysbyty, a phan aeth swyddogion i fyny ato, dechreuodd ymddwyn yn ymosodol, gan godi dyrnau ar swyddogion a phobl a oedd yn cerdded heibio, a rhegi arnynt. Yna, fe hyrddiodd at swyddog, gan boeri yn ei wyneb. Yn nalfa’r heddlu, ymatebodd yn fyrbwyll eto, gan gicio crimog swyddog arall.
• Ar 14 Rhagfyr, aeth swyddogion i eiddo yng Nghaerfyrddin, gan siarad â deiliad, a ymatebodd yn fyrbwyll. Bu’n rhaid iddo gael ei ffrwyno. Ciciwyd coesau dau swyddog yn ystod y cynnwrf.