Cydnabyddiaeth Arbennig ar gyfer Paul Pugh, ymgyrchydd o Rydaman

Mae dyn o Rydaman a ddioddefodd anafiadau difrifol yn dilyn ymosodiad digymell yn ei dref enedigol wedi derbyn cydnabyddiaeth arbennig am ei ymrwymiad tuag at atal trais sy’n gysylltiedig ag alcohol.

Cyflwynwyd Gwobr Cydnabyddiaeth Arbennig Heddlu Dyfed-Powys i Paul Pugh yn ystod sgwrs rithwir gyda’r Prif Gwnstabl Mark Collins QPM.

Gan ganmol blynyddoedd o waith ymgyrchu Paul, dywedodd Mr Collins, “Mae cryfder a phenderfynoldeb Paul i geisio helpu eraill ac atal trais sy’n gysylltiedig ag alcohol wir yn arwrol.”

Yn 2007, gadawyd Paul mewn coma am ddeufis, a bu yn yr ysbyty am 13 mis, yn dilyn ymosodiad digymell yn Rhydaman, Sir Gaerfyrddin.

Dioddefodd anafiadau difrifol i’w ymennydd, a dywedodd meddygon wrtho na fyddai byth yn cerdded nac yn siarad eto. Carcharwyd pedwar dyn am yr ymosodiad.

Bellach, mae Paul yn medru cerdded â chymorth, ac ers chwe blynedd, y mae wedi bod yn hyrwyddo #AddewidPaul, sef ymgyrch yn erbyn trais sy’n gysylltiedig ag alcohol.

Mae Paul wedi rhannu ei stori â channoedd o ysgolion, colegau, prifysgolion, clybiau ieuenctid a chymdeithasau chwaraeon ledled Sir Gaerfyrddin, Ceredigion, Sir Benfro, Powys a thu hwnt, gan godi ymwybyddiaeth miloedd o bobl ifainc ac oedolion am beryglon a chanlyniadau alcohol a thrais.

Wrth dderbyn y wobr, dywedodd Paul, sydd wrth ei fodd â phêl droed, “Braint ac anrhydedd yw derbyn y Wobr Cydnabyddiaeth Arbennig gan Brif Gwnstabl Heddlu Dyfed-Powys, Mark Collins.”

Dywedodd Dayton Hughes, SCCH o Rydaman, “Mae’n wych gweithio gyda Paul. Y mae wedi cymryd profiad negyddol iawn ac wedi cymryd arno’i hun i newid safbwyntiau a chyflwyno newid cadarnhaol.”

Aeth ymlaen i ddweud, “Ar ôl y cyflwyniadau, mae Paul fel seren enwog i’r gynulleidfa – mae pawb eisiau ysgwyd llaw ag ef!”

Ers dechrau’r pandemig, mae gwaith Paul allan yn y gymuned wedi’i atal, ond ym mis Ionawr 2020, cyn y pandemig, llwyddodd Paul i fynd i Dŷ’r Arglwyddi, lle y derbyniodd Wobr Cadeirydd y Bartneriaeth Alcohol Cymunedol.

Nôl yn 2017, 10 mlynedd union ers yr ymosodiad, derbyniodd Paul Gymeradwyaeth gan Mark Collins, a oedd newydd ei benodi’n Brif Gwnstabl Heddlu Dyfed-Powys, yng Nghlwb Pêl Droed Cwmaman, sy’n annwyl iawn i Paul, a oedd yn gapten y tîm adeg yr ymosodiad.

Hon oedd y Gymeradwyaeth gyntaf a gyflwynwyd gan y Prif Gwnstabl Collins, felly mae’n briodol mai Cydnabyddiaeth Arbennig Paul yw un o’r gwobrau olaf i’r Prif Gwnstabl Collins gyflwyno cyn iddo ymddeol yn ddiweddarach y mis hwn.

“Fel Prif Gwnstabl, bu’n fraint imi gyflwyno’r Wobr Cydnabyddiaeth Arbennig hon, a’r Gymeradwyaeth yn 2017, i Paul. Mae’n rym na ellir ei atal, ac yn llawn haeddu ei gyflawniadau.”