Datgelu Canlyniadau Ymgyrch Atal Yfed neu Cymryd Cyffuriau a Gyrru Cymru Gyfan Dros y Nadolig

Serch y cyfyngiadau mewn perthynas â’r haint coronafeirws a chyfyngiadau symud ar draws y wlad ym mis Rhagfyr, rhoddodd heddluoedd Cymru brofion anadl i bron 5,000 o fodurwyr.

O’r 4,906 prawf anadl a weinyddwyd, fe wnaeth 181 (3.7%) modurwr fethu’r prawf, neu fethu â darparu sampl, a byddant yn colli eu trwyddedau. 

Cynhaliodd swyddogion 469 prawf sweip hefyd, gyda 274 (58.4%) yn methu, gan arwain at 377 arést.

Gwelodd yr ymgyrch genedlaethol, a oedd yn cael ei harwain gan Heddlu Dyfed-Powys, y pedwar heddlu yng Nghymru’n cymryd rhan drwy gydol mis Rhagfyr er mwyn mynd i’r afael ag yfed/cymryd cyffuriau a gyrru.

Dywedodd Prif Gwnstabl Cynorthwyol Heddlu De Cymru, Arweinydd Strategol Plismona’r Ffyrdd yng Nghymru, “Mae gan yfed/cymryd cyffuriau a gyrru ganlyniadau trychinebus ar gyfer teuluoedd a chymunedau. Mae’r rhan fwyaf o yrwyr yn gyfrifol, felly yr ydym yn diolch i’r gyrwyr hynny sy’n parchu’r gyfraith a diogelwch eraill. Yn anffodus, mae canlyniadau’r ymgyrch hon yn dangos fod nifer o yrwyr yn ymddwyn yn anghyfrifol. Mae eu hymddygiad yn peryglu eraill, ac mae hyn yn annerbyniol.

“Fel gwasanaeth, yr ydym wedi ymrwymo i leihau gwrthdrawiadau angheuol. Byddwn yn defnyddio ein hadnoddau i dargedu’r aelodau hynny o’r gymuned sy’n peryglu eraill. Nid yw’n werth y risg. Gadewch inni wneud ein ffyrdd a’n cymunedau mor ddiogel â phosibl.”

Dywedodd Clark Jones-John, Uwch-arolygydd Heddlu Dyfed-Powys: “Cafodd 181 o yrwyr yng Nghymru Nadolig a Blwyddyn Newydd i gofio am y rhesymau anghywir - ar ôl cael eu harestio gan ein swyddogion am yfed/cymryd cyffuriau a gyrru.

“Mae’n siomedig bod rhai pobl dal yn barod i fentro a mynd tu ôl i’r olwyn dan ddylanwad alcohol neu gyffuriau.”

Er bod y ffigurau’n dangos gostyngiad yng nghanran y methiannau ar gyfer tri o heddluoedd Cymru, gwelodd Heddlu Dyfed-Powys gynnydd o bron 5%.

Mae peryglon yfed/cymryd cyffuriau a gyrru’n glir i bawb. Yn amlwg, nid yw’r rhai sy’n mentro’n meddwl am deuluoedd y bobl hynny sydd wedi marw wrth law gyrrwr sydd wedi’i effeithio gan alcohol neu gyffuriau.

“Yn aml, ein swyddogion yw’r rhai cyntaf i gyrraedd lleoliad gwrthdrawiadau o’r fath, ac mae rhai o’r pethau maen nhw wedi gweld yn erchyll. Ni ddylai neb weld y fath olygfa na dioddef oherwydd gweithredoedd anghyfrifol ac anghyfreithlon rhywun arall.

Yn y DU, gweinyddwyd 42,613 prawf anadl, gyda 3917 (9.2%) yn methu, neu’n methu â darparu sampl. O’r 4,217 prawf cyffuriau a weinyddwyd, roedd 2813 (66.7%) yn gadarnhaol.

Ychwanegodd yr Uwch-arolygydd Jones-John: “Mae ein swyddogion yn gweithio 24 awr y dydd, saith diwrnod yr wythnos, a dylai unrhyw un sy’n ystyried gyrru dan ddylanwad wybod y byddwn ni o gwmpas yn aros amdanynt – peidiwch â meddwl bod natur wledig ein hardal yn eich amddiffyn, oherwydd nid yw hynny’n wir.

“Byddwn yn parhau i weithredu’n llym yn erbyn y rhai sy’n cymryd y risg diangen hwn ac yn eu dwyn o flaen y llysoedd.”